1, 2. Mulandu nshi tulingile ukusambilishisha bambi imilimo pa kuti balebombako imilimo ya kwa Lesa?

ICO Yesu abikileko sana amano, kubila imbila nsuma ya Bufumu. Na lyo line, alesambilishako na bambi ukuba bakacema kabili bakasambilisha. (Mat. 10:5-7) Nangu ca kuti Filipi alepoosa inshita iikalamba mu mulimo wa kubila, alisambilishe abana bakwe abanakashi bane ifya kulasambilisha bwino icine ca mu Malembo. (Imil. 21:8, 9) Bushe ukusambilisha bambi kwacindama shani muno nshiku?

² Abantu abalekutika imbila nsuma mwi sonde lyonse, balefulilako fye. Kanshi abasambi ba Baibolo abashilabatishiwa balingile ukwishiba ifyo cacindamina ukulaisambilisha Baibolo. Na kabili balingile ukusambilila ifya kubila imbila nsuma ne fya kusambilisha abantu icine. E lyo tulingile ukukoselesha bamunyinefwe mu filonganino fyesu ukulabombesha pa kuti bakafikepo ukuba ababomfi batumikila nelyo baeluda. Abena Kristu abakalamba mu fya kwa Lesa balingile ukusambilisha abapya “isambilisho ilisuma” pa kuti balelunduluka.—Amapi. 4:2.

3, 4. (a) Bushe Paulo ayampenye shani ukuisambilisha Baibolo no kubomba bwino umulimo wa kubila imbila nsuma? (b) Ilyo tushilakoselesha umupya ukulaisambilisha Baibolo, finshi tulingile ukulacita?

³ Mulandu nshi cacindamina ukulaisambilishisha Amalembo? Ifyo Paulo aebele Abena Kristu ba ku Kolose kuti fyatwafwa ukwasuka ici cipusho. Abebele ati: “Lyonse fye tulamupepelako ukutula pa bushiku twaumfwile ifi pali imwe. Tulomba Lesa ukuti amwisushemo ukwishiba bwino bwino ukufwaya kwakwe no kukwata amano yonse aya kwiluka ifyo umupashi wakwe upeela, pa kuti muleikala ukulingana ne fyo Yehova afwaya pa kuti mulecita lyonse ifya kumusekesha ilyo muleya muletwala ifisabo mu mulimo onse uusuma kabili ilyo muleya muleishibilako Lesa bwino bwino.” (Kol. 1:9, 10) Ukwishiba bwino bwino Lesa kwali no kulenga Abena Kristu abali mu Kolose ‘baleikala ukulingana ne fyo Yehova afwaya pa kuti balecita lyonse ifya kumusekesha.’ Ne ci cali no kulenga ‘baletwala ifisabo mu mulimo onse uusuma,’ maka maka mu mulimo wa kubila imbila nsuma. Pa kuti bakapepa ba kwa Yehova balebomba bwino, balingile ukulaisambilisha Baibolo lyonse. Tulingile no kwafwa abasambi ukwishiba ukuti calicindama ukulaisambilisha Baibolo.

⁴ Ilyo tushilayafwa bambi ukwishiba ubusuma bwaba mu kuisambilisha Baibolo, fwe bene tulingile ukwishiba ubusuma bwabamo. Na kuba tulingile ukulaisambilisha Baibolo lyonse. Kanshi tulingile ukuyipusha atuti: ‘Nga ca kuti umuntu alanda ifyapusana ne fyo Baibolo isambilisha nelyo aipusha ifipusho ifyakosa, bushe kuti nayasuka ukubomfya Baibolo? Nga nabelenga fimo pali Yesu, Paulo na bambi abashanenwike ilyo balebomba umulimo wa kubila, bushe ndatontonkanya sana pa fyo ningasambilila ku fyo babombeele Yehova ukwabula ukunenuka?’ Ifwe bonse tulingile ukunonka ukwishiba no kulaumfwila ukufunda ukwaba mu Cebo ca kwa Lesa. Nga tuleebako bambi ifyo tunonkelamo ilyo tuisambilisha Baibolo, kuti twalenga nabo balaisambilisha Baibolo lyonse pa kuti balenonkelamo.

5. Landeni pa fyo mwingacita pa kwafwa abapya ukulaisambilisha Baibolo lyonse.

⁵ Yipusheni amuti, ‘Kuti nasambilisha shani umusambi ukulabelenga Baibolo cila bushiku?’ Kuti mwatendekela fye pa ku mulanga ifya kupekanya isambililo mukasambilila nankwe. Kuti mwamweba ukulabelenga ifyebo na fimbi ifyaba mu citabo citila Bushe Cinshi Baibolo Isambilisha? no kulabelengela kabela amalembo ayabamo. Kuti mwamulanga ifya kupekanishisha ukulongana pa kuti aleyasukapo. Na kabili kuti mwamukoselesha no kulabelenga Ulupungu lwa kwa Kalinda na Loleni! yonse iyafuma. Nga ca kuti Watchtower Library nelyo Watchtower LAIBRARE YA PA INTANETI e ko yaba mu lulimi umusambi alanda, kuti mwamulanga ifya kusanga amasuko ku mepusho ayo Baibolo yasuka. Nga mwacita  ifi, mukafwa umusambi wenu uwa Baibolo ukutemwa ukulaisambilisha Icebo ca kwa Lesa.

6. (a) Kuti mwayafwa shani uo musambilisha Baibolo ukutemwa sana Baibolo? (b) Finshi uo musambilisha Baibolo akacita nga atemwa sana Amalembo?

⁶ Kwena tatulingile ukulapatikisha abantu ukulabelenga no kulasambilila Baibolo. Lelo tulingile ukulabomfya ifintu ifyalekanalekana ifyo icilonganino ca kwa Yehova catupeela ku kwafwa abasambi besu ukutemwa sana Baibolo. Mu kupita kwa nshita, umusambi uulefwaisha ukwishiba ifingi pali Baibolo kuti aumfwa nge fyo uwaimbile amalumbo aumfwile, uwatile: “Ukupalama kuli Lesa kusuma kuli ine.Muli Shikulu Mulopwe Yehova e mo nauba.” (Amalu. 73:28) Yehova akabomfya umupashi wakwe ukwafwa umusambi wa musango uyu.

7. Finshi Yesu acitile pa kusambilisha abatumwa ifya kulabila bwino imbila nsuma? (Moneni icikope pa ntendekelo ya cino cipande.)

⁷ Muli Mateo icipandwa 10, mwaliba ifyo Yesu aebele abatumwa bakwe 12 ukulakonka. Abasambilishe ukuti ilyo balesambilisha balingile ukulalanda mu kulungatika. ^[1] Ilyo Yesu alebasambilisha abatumwa ifya kubila bwino imbila nsuma, balekutika. Pa numa, Yesu alibatumine ukuya mu kubila. Apo balemona ifyo Yesu alecita pa kubila imbila nsuma, tapakokwele baishileba bakasambilisha abafikapo aba cine ca mu Malembo. (Mat. 11:1) Na ifwe kuti twasambilisha abasambi besu ukuba bakasabankanya abafikapo aba mbila nsuma. Nomba natulande pa nshila shibili ishingabafwa.

8, 9. (a) Bushe Yesu alecita shani pa kutendeka ukulanshanya na bantu mu mulimo wa kubila? (b) Kuti twayafwa shani abapya ukwishiba ifya kulanshanya na bantu nga fintu Yesu acitile?

⁸ Mulelanshanya na bantu. Ilingi line, Yesu alelanshanya na bantu pa Bufumu. Ku ca kumwenako, alilanshenye bwino sana no mwanakashi pa cishima ca kwa Yakobo icali mupepi no musumba wa Sukari. (Yoh. 4:5-30) Na kabili alilanshenye na Mateo uwaleitwa no kuti Lebi uwali kasonkesha wa misonko. Mu mabuuku ya Mbila Nsuma mwaba fye ifinono sana pa fyo Yesu alanshenye na Mateo, lelo Mateo alisumine ukuba umusambi wa kwa Yesu. Mateo e lyo na bambi balyumfwile ifyo Yesu abasambilishe ilyo ali pa mutebeto mu ng’anda ya kwa Mateo wine.—Mat. 9:9; Luka 5:27-39.

⁹ Pa nshita imbi, ilyo Yesu alandile na Natanaele uwasuulile abena Nasarete, alilandile nankwe bwino. Ifi Yesu acitile fyalengele Natanaele aaluke mu fyo aletontonkanya. E ico asalilepo ukwishibilapo na fimbi pa fyo Yesu umwina Nasarete alesambilisha. (Yoh. 1:46-51) Kanshi na ifwe tulingile ukusambilisha abasambi ukwishiba ifya kulanshanya bwino na bantu. ^[2] Bonse abo twingafwa muli iyi nshila bakamona ifyo abantu abafwaya ukusambilila Baibolo bakutika nga nabababikako amano kabili balelanshanya nabo bwino.

10-12. (a) Bushe Yesu alecita shani pa kuti afwe abalefwaya ukwishibilapo na fimbi pa mbila nsuma? (b) Kuti twayafwa shani bakasabankanya abapya ukulasambilisha bwino icine ca mu Baibolo?

¹⁰ Mulebika amano ku balefwaya ukwishibilapo na fimbi. Yesu ali fye ne nshita iinono iya kubomba umulimo wa kubila imbila nsuma. Na lyo line, alecita ifyalelenga abantu abalefwaya ukumfwilapo na fimbi pa mbila nsuma balefwaya ukusambililapo na fimbi. Ku ca kumwenako, pa nshita imo Yesu aninine mu bwato ilyo alesambilisha amabumba. E lyo pa nshita imbi, alicitile icipesha mano ilyo ayafwile Petro ukwipaya isabi ilingi nga nshi, kabili amwebele ati: “Ukufuma pali nomba walaba umulondo wa bantu.” Finshi Petro acitile pa fyo Yesu acitile e lyo na pa fyo alandile? Petro na banankwe “babweseshe amato ku mulundu, kabili bashile fyonse no kumukonka.”—Luka 5:1-11.

¹¹ Nikodemo uwalebombela mu cilye ca  Sanhedrini, alitemenwe ifyo Yesu alesambilisha kabili alefwaya ukwishibilapo na fimbi pa fyo Yesu alesambilisha. Lelo aletiina abantu, abikile amano ku fyo bali no kulanda nga bamumona alelanda na Yesu. Yesu tali uwaumina kumo, aliipeelesha ukusambilisha Nikodemo uwaile kuli ena ubushiku. (Yoh. 3:1, 2) Finshi tulesambilila kuli aya malyashi? Umwana wa kwa Lesa aleshako inshita ya kukosha icitetekelo ca bantu. Tufwile ukulabwelela ku bantu abalefwaya ukwishibilapo na fimbi pali Baibolo kabili tufwile ukuba abacincila mu kutungulula amasambililo ya Baibolo!

¹² Bakasabankanya abapya kuti baishiba bwangu ifya kusambilisha abantu icine nga ca kuti tulebomba nabo mu mulimo wa kubila. Tufwile ukubasambilisha ifya kucita pa kuti belalaba abantu abo balanshenye nabo abalefwaya ukwishibilapo na fimbi pali Baibolo. Kuti twaya nabo ilyo tulecita ifipempu fya kubwelelamo na lintu twaya mu kutungulula amasambililo ya Baibolo. Nga tulecita ifi, bakasabankanya abapya bakeshiba ifya kucita ifipempu fya kubwelelamo ne fya kutungulula amasambililo ya Baibolo. Na kabili tabakalanenuka bwangu lelo bakalatekanishisha abantu abo bakalasanga mu mulimo wa mwi bala.—Gal. 5:22; moneni akabokoshi akaleti: “Mwilanenuka.”

13, 14. (a) Finshi mulesambilila ku bantu abalembwa mu Baibolo abalebombesha pa kwafwa bambi? (b) Finshi mwingacita pa kuti musambilishe bakasabankanya abapya na bacaice ukutemwa bamunyinefwe na bankashi?

¹³ Amalyashi ya mu Baibolo yalalanga ukuti twalikwata ishuko lya kulanga ukuti ‘twalitemwa aba bwananyina’ kabili tulafwaya ukulababombela. (Belengeni 1 Petro 1:22; Luka 22:24-27.) Umwana wa kwa Lesa alipeelelepo no bumi bwakwe pa kuti fye abombele bambi. (Mat. 20:28) Dorka “alebomba imilimo isuma iingi nga nshi kabili aali kapekape.” (Imil. 9:36, 39) Maria, nkashi uwaleikala mu Roma, ‘alebombela apakalamba nga nshi’ aba mu cilonganino. (Rom. 16:6) Kuti twayafwa shani abapya ukwishiba ifyo cacindamina ukwafwa bamunyinefwe na bankashi?

¹⁴ Ba Nte abakalamba mu fya kwa Lesa kuti baleya na bapya ku kutandalila abalwele na bakalamba. Abafyashi nabo nalimo kuti baleya na bana babo ku kutandalila aba musango uyu. Baeluda kuti babombela pamo na ba mu cilonganino bamo pa kwafwilisha abakalamba abashikwete ifya kulya no kubawamishako ing’anda. Nga tulecita ifi, abacaice e lyo na bakasabankanya abapya kuti basambilila ifya kwafwa aba bwananyina. Eluda umo nga alebila imbila nsuma, alitemenwe ukutandalila ba Nte abekala mu cifulo aleshimikilamo pa kuti eshibe ifyo bali. Munyinefwe wacaice uo alebomba nankwe asambilile ukuti bonse mu cilonganino balingile ukulaumfwa ukuti balitemwikwa.—Rom. 12:10.

15. Mulandu nshi baeluda balingile ukubikila amano kuli bamunyinefwe mu cilonganino?

¹⁵ Apo Yehova abomfya abaume ku kusambilisha mu cilonganino, calicindama ukuti bamunyinefwe baishiba ifya kulanda bwino amalyashi. Nga ni mwe baeluda, mulekutikako ilyo umubomfi atumikila alepituluka mu lyashi ilyo alepekanya! Nga mulecita ifi, mukamwafwa ukuwamyako ifyo asambilisha Icebo ca kwa Lesa.—Nehe. 8:8. ^[3]

16, 17. (a) Finshi filanga ukuti Paulo alibikile amano ku kusambilisha Timote? (b) Bushe baeluda kuti basambilisha shani abakaba bakacema mu cilonganino?

¹⁶ Baeluda aba kucema umukuni balefwaikwa nga nshi mu cilonganino ca kwa Lesa, kabili abalingile ukuba baeluda balingile ukutwalilila ukusambilila ifya kubomba uyu mulimo. Paulo alilandile pa fyo twingacita pa kusambilisha bamunyinefwe imilimo ilyo aebele Timote ati: “We mwana wandi, ulekosa mu cikuuku ca kwa Lesa ico na Kristu Yesu akwata, kabili ifintu ifyo waumfwile  kuli ine ifyo ne nte ishingi shashininkisha, ifi fintu ufipeele ku ba cishinka, abakafikapo bwino bwino ukusambilisha bambi.” (2 Tim. 2:1, 2) Timote alisambilile ifya kubomba imilimo pantu alebomba na Paulo uwali eluda. Lyena pa kubila imbila nsuma na pa kubomba imilimo imbi iya kwa Lesa, Timote alebomfya ifyo asambilile kuli Paulo.—2 Tim. 3:10-12.

¹⁷ Paulo alibikile amano ku kusambilisha Timote imilimo, taleti apo akakwatila inshita epo akamusambilishisha. Alesendako Timote ilyo aleya mu kubomba imilimo. (Imil. 16:1-5) Baeluda kuti balepashanya Paulo nga ca kuti limo limo balesendako ababomfi batumikila abafikapo ku fipempu fya bucemi. Baeluda nga balecita ifi ninshi balesambilisha abatumikila ifya kusambilisha, ukuba ne citetekelo, ukushishimisha, no kuba no kutemwa uko baeluda balingile ukukwata. Ne ci cikalenga aba bamunyinefwe bakasambilile ifya kuba bakacema ba “mukuni wa kwa Lesa.”—1 Pet. 5:2.

18. Mulandu nshi tulingile ukusambilishisha aba bwananyina ifya kubomba umulimo wa kwa Yehova?

¹⁸ Ukusambilisha bambi kwalicindama pantu aba kubomba imilimo mu cilonganino balefwaikwa nga nshi, kabili lishuko ukusambilisha bambi ifya kubombela Yehova. Yesu na Paulo balitulanga ifya kusambilisha bambi. Yehova afwaya ababomfi bakwe muno nshiku baishiba bwino ifya kubomba imilimo mu cilonganino cakwe. Lesa alitupeela umulimo wa kusambilisha abapya ifya kubomba imilimo mu cilonganino. Apo ifintu filebipilako fye mu calo kabili abantu abengi balefwaya ukukutika imbila nsuma, nacicindama ukusambilisha bwangu bwangu aba bwananyina imilimo.

19. Mulandu nshi twingashininkishisha ukuti nga tulebombesha ukusambilisha bambi imilimo ya kwa Yehova bakalunduluka?

¹⁹ Kwena, palapita inshita pa kusambilisha abantu imilimo kabili tulingile ukubombesha. Lelo Yehova no Mwana wakwe uo atemwa bakalatwafwa kabili bakalatupeela amano pa kuti tulesambilisha bwino bambi imilimo. Tukaba ne nsansa nga twamona abo twasambilisha imilimo ‘balebombesha nga nshi kabili balelwisha sana.’ (1 Tim. 4:10) Kabili na ifwe bene natutwalilile ukulunduluka ilyo tulebombela Yehova umulimo wa mushilo.