Mulefwaya ifyacindama ukucila golde
Bushe mwalibala amusangapo akalibwe ka golde? Kwena bantu fye abanono abasangapo utumabwe twa golde. Na lyo line abantu abengi nga nshi balisanga ifyacindama ukucila golde. Balisanga amano ayafuma kuli Lesa, na “golde iyalopololwa bwino te kuti ikaabulwemo” aya mano.—Yobo 28:12, 15.
ABASAMBI ba Baibolo aba cishinka baba kwati bantu abafwaya utumabwe twa golde. Abasambi bafwile ukubombesha no kutwalilila ukufwailisha mu Malembo pa kuti basange amano ayacindamisha. Apo tuli basambi ba Baibolo, finshi twingasambila ku nshila shitatu isho abantu babomfya pa kusanga golde?
ILYO MWASANGILE FYE GOLDE!
Elenganyeni ukuti muleenda mu mbali ya mumana e lyo mwamona akalibwe kalebeeka. Mwakontama e lyo mwamona ukuti kalibwe ka golde akanono na pa kamutwe kamacisa, kabili takamonaika nge libwe lya daimondi. Ukwabula no kutwishika kuti mwatendeka ukufwailapo utumabwe na tumbi.
Ifi fine e fyo mwacitile pa muku wa kubalilapo ilyo Inte sha kwa Yehova bamutandalile ku kulanshanya na imwe isubilo lya mu Baibolo. Nalimo mulebukisha ilyo mwaumfwile icine pa muku wa kubalilapo icali nga kalibwe ka golde. Nalimo icine mwasambilile pa muku wa kubalilapo mu Baibolo, lishina lya kwa Lesa ilya kuti, Yehova. (Amalu. 83:18) Na kabili mufwile mwalisambilile ukutila kuti mwaba cibusa wa kwa Yehova. (Yako. 2:23) Ilyo line fye mwalishibe ukuti namusanga ifyacindama ukucila golde! E ico mufwile mwalefwaya sana ukwishibilapo na fimbi pali Lesa.
MWASANGILAPO GOLDE NA IMBI!
Limo limo utupaapaatu twa golde tulasangwa mu mbali ya fibemba e lyo na mu mbali ya mimana. Mu myeshi fye iinono abafwaya amabwe yauma umutengo balasanga golde iingi muli ishi ncende iyo bengashitisha pa madola ya ku America ayengi nga nshi.
Ilyo mwatendeke fye ukusambilila Baibolo na ba Nte mwacitile nga filya abafwaya golde bacita pa kupatulula golde kwi loba na ku mabwe ukubomfya amenshi. Ukutontonkanya sana pa fyo mwasambilile mu Baibolo kwalengele mwaishibilapo na fimbi pali Lesa. Ilyo mwaletontonkanya sana pa cine ca mu Baibolo, mwalisambilile ifyo mwingacita pa kuti mupalame kuli Yehova ne fyo mwingekalilila mu kutemwa kwakwe ilyo mulelolela ubumi bwa muyayaya.—Yako. 4:8; Yuda 20, 21.
Nga filya abafwaya amabwe yauma umutengo babombesha pa kufwaya golde, bushe na imwe mulabombesha pa kusambilila icine ca mu Baibolo?
Nga filya uufwaya amabwe ayauma umutengo Mat. 28:19, 20.
abombesha pa kusanga golde, na imwe bene mufwile mwalibombeshe pa kusanga icuma icaba mu Baibolo. Pa numa ya kusambilila amasambililo ya kutendekelako aya mu Baibolo, mwaliipeele no kubatishiwa.—TWALILILENI UKUFWAILAPO NA FIMBI!
Abafwaya amabwe yauma umutengo balasanga utumabwe utunono sana utwa golde mu lubwe. Muli ulu lubwe mulaba golde iyo bengafumyamo nga balutobaula. Ulubwe nga mwalulolesha fye te kuti mumone no kuti muli golde. Mulandu nshi? Pantu ulubwe ulufinine amakilogramu 1000 kuti bafumyamo nalimo golde iifinine amagramu 10! Na lyo line, nga bashitisha iyi golde balasangamo indalama ishingi nga nshi.
Umuntu afwile ukutwalilila ukubombesha na pa numa ya kwishiba “amasambililo ya kutendekelako pali Kristu.” (Heb. 6:1, 2) Mufwile ukubombesha pa kuti muleishibilapo na fimbi ifipya no kubomfya ifyo muleisambilisha muli Baibolo. Nomba finshi mwingacita pa kuti mulenonkelamo ilyo muleisambilisha Baibolo nangu ca kuti kale mwatendeka ukuisambilisha Amalembo?
Twalilileni ukuisambilisha kabili mulebikako amano pa kuti muleumfwikisha ifishinka ifyo mulebelenga. Nga mwatwalilila ukwishibilapo na fimbi, mukasanga amano no butungulushi ubwaba mu Cebo ca kwa Lesa. (Rom. 11:33) Pa kuti muleishibilapo na fimbi ifya mu Malembo, mulebomfya sana impapulo ishingamwafwa ukufwaya ifyebo na fimbi. Muleteka umutima ilyo mulefwaya ubutungulushi bwa mu Malembo na masuko ku mepusho ya mu Baibolo. Kuti mwaipushako na bambi pa Malembo ne fipande fya mu mpapulo ifyo batemwa sana kabili ifibakoselesha. Muleebako bambi ifishinka ifyo mwatemenwe ilyo mwaleisambilisha Icebo ca kwa Lesa.
Kwena, ico muleisambilishisha te kufwaya fye ukwishiba fimo iyo. Umutumwa Paulo alandile ati “ukwishiba kulatuumika.” (1 Kor. 8:1) Kanshi mulingile ukubombesha pa kuti muleba abaicefya no kuba ne citetekelo icakosa. Nga mulekwata amapepo ya lupwa kabili muleisambilisha Baibolo, mukalakonka amafunde ya kwa Yehova kabili mukalayafwako na bambi. Ne cacindamisha ca kuti mukalasekelela pantu mwalisanga ifyacila golde.—Amapi. 3:13, 14.