1. Finshi bonse tufwaya balupwa lwesu bacita?

NKASHI Pauline * alandile ati: “Ukutula fye ilyo nasambilile icine, nalefwaya nkabe na balupwa lwandi bonse mu Paradaise. Nalefwaisha maka maka abena mwandi ba Wayne no mwana wesu umwaume umunono nabo batendeke ukubombela Yehova.” Bushe mwalikwata balupwa abashilaishiba Yehova kabili abashilamutemwa? Na imwe mufwile mumfwa nge fyo nkashi Pauline aleumfwa pali balupwa lwakwe.

2. Mepusho nshi twalayasuka muli cino cipande?

² Te kuti tupatikishe balupwa lwesu ukukutika imbila nsuma, lelo kuti twabakoselesha ukulatontonkanya pa fyo Baibolo ilanda no kulafikonka. (2 Tim. 3:14, 15) Mulandu nshi tulingile ukulabilila imbila nsuma kuli balupwa lwesu? Mulandu nshi tulingile ukulabalangulukililako? Finshi tufwile ukucita pa kuti twafwe balupwa lwesu batemwe Yehova nga fintu twamutemwa? Kabili finshi bonse mu cilonganino bengacita pa kuti batwafwe?

3. Ukulingana ne fyo ilembo lya 2 Petro 3:9 lilanda, mulandu nshi tulingile ukulabilila imbila nsuma kuli balupwa lwesu?

³ Yehova ali no konaula cino calo. Abakapusuka fye bantu ababa ne ‘mitima iisuma iifwaya umweo wa muyayaya.’ (Imil. 13:48) Tulabomfya amaka yesu kabili tulapoosa inshita iikalamba pa kuti tubile ku bashili balupwa lwesu. Kanshi mu cifyalilwa fye kuti twafwaya balupwa lwesu nabo batendeka ukubombela Yehova. Shifwe Yehova uwatutemwa, “tafwaya umuntu  nangu umo ukonaika lelo afwaya ukuti bonse bakalapile.”—Belengeni 2 Petro 3:9.

4. Mibele nshi tufwile ukukwata ilyo tulebila kuli balupwa lwesu?

⁴ Tufwile ukulaibukisha ukuti kwaba inshila iisuma iya kwebelamo abantu imbila iingalenga bakapusuke e lyo ne nshila iibi. Ku ca kumwenako, tulaba ne cikuuku ilyo tulebila ku muntu uo tushaishiba, lelo nalimo te kuti tube ne cikuuku ilyo tulebila kuli balupwa lwesu.

5. Finshi tulingile ukulaibukisha ilyo tulebila imbila nsuma kuli balupwa lwesu?

⁵ Fwe bengi tulomfwa ububi nga twaibukisha inshila twabililemo imbila nsuma kuli balupwa lwesu pa muku wa kubalilapo, kabili tutontonkanya ukuti kanshi nga twalibilileko mu nshila imbi. Umutumwa Paulo aebele Abena Kristu ati: “Imilandile yenu yonse ibe iisuma, iyalungwamo umucele, pa kuti mwishibe ifya kwasuka bwino umuntu onse.” (Kol. 4:5, 6) Tufwile ukulaibukisha aya amashiwi ilyo tulebila kuli balupwa lwesu. Nga tatuleyakonka, kuti twalabakalifya mu cifulo ca kulenga balefwaisha ukukutika.

6-7. Landeni pa ca kumwenako icilanga ico aba bwananyina abakwata abena mwabo abashili ba Nte balingile ukulabalangulukililako.

⁶ Tulebalangulukilako. Ba Pauline abo tulandilepo kale batile: “Pa kubala, nalefwaya ukulalanda fye pa fya kwa Lesa na bena mwandi. Tatwalelanda pa fintu fimbi.” Nomba ba Wayne ba muka ba Pauline tabaishibe ifingi ifya mu Baibolo kabili tabaleishiba ifyo ba Pauline balelandapo. Balemona ukuti ba Pauline baletontonkanya fye pa mipepele yabo. Ba Wayne balisakamene pantu balemona ukuti abena mwabo bali mu kabungwe ka mipepele akapondokele imipepele imbi kabili kalebalufya.

 ⁷ Ba Pauline balisumine ukuti pa nshita imo balepoosa inshita iikalamba mu cungulo na pa mpela ya mulungu ku kuba pamo na bamunyinefwe na bankashi, e kutila baleba ku kulongana, ku kubila imbila nsuma na ku kwangalila pamo na ba bwananyina. Ba Pauline batile: “Inshita shimo ba Wayne balesanga pa ng’anda tapali nangu umo, kanshi baletalalilwa.” Ba Wayne balefwaya ukulaba pamo na bena mwabo no mwana wabo. Tabaishibe abantu abaleba na bena mwabo e lyo no mwana, kabili calemoneka kwati ifibusa ifyo abena mwabo nomba bapangile e fyacindeme sana ukubacila. Ici calengele ba Wayne bebe ba Pauline ukuti bali no kubaleka nga ca kuti tabali no kwaluka. Bushe kuti mwatontonkanyako pali fimo ifyo ba Pauline bali no kucita pa kulangulukilako abena mwabo?

8. Nga fintu ilembo lya 1 Petro 3:1, 2 lilanda, finshi balupwa lwesu babikako sana amano?

⁸ Muleba ne mibele iisuma. Ilingi line, ifyo balupwa lwesu babikako sana amano fintu tucita te fintu tulanda. (Belengeni 1 Petro 3:1, 2.) Mu kupita kwa nshita ba Pauline balishininkishe ukuti ifi twalanda e fyo caba. Batile: “Nalishibe ukuti abena mwandi balitutemenwe kabili tabaiminine pa kupwisha icupo. Lelo filya banjebele ukuti bali no kundeka fyalengele nailuka ukuti nalingile ukulakonka ifyo Yehova alanda pa cupo. Mu cifulo ca kulaeba fye abena mwandi pa fya kwa Lesa, nalingile ukulabacitila ifisuma.” Ba Pauline balilekele ukupatikisha ba Wayne ukulalanda nabo pa fya mu Baibolo, batampile ukulalanda nabo pa fya mikalile ya cila bushiku. Ba Wayne balimwene ukuti abena mwabo baishileba aba mutende, kabili balimwene no kuti umwana wabo na  o aishileba ne mibele iisuma. (Amapi. 31:18, 27, 28) Ilyo bamwene ifyo Baibolo yalengele ulupwa lwabo lwabelako ne mibele iisuma, batendeke ukutontonkanya pa fyaba mu Cebo ca kwa Lesa na pa fyo bengalafikonka.—1 Kor. 7:12-14, 16.

9. Cinshi tushilingile ukunenukila ilyo tuleafwa balupwa lwesu?

⁹ Tamufwile ukunenuka ilyo muleafwa balupwa lwenu. Yehova e o tulingile ukulapashanya. Yehova taleka ukupeela abantu inshita ya kukutika imbila nsuma pa kuti bakabe no mweo. (Yer. 44:4) Umutumwa Paulo na o akoseleshe Timote ukukananenuka ilyo aleafwa abantu. Mulandu nshi ashalingile ukunenukila? Pantu e lyo ena na balemumfwa bali no kupusuka. (1 Tim. 4:16) Twalitemwa balupwa lwesu, e co tufwaila baishiba icine icaba mu Cebo ca kwa Lesa. Mu kupita kwa nshita, ifyo ba Pauline balecita ne fyo balelanda fyalengele abena mwabo basambilila icine. Pali ino nshita baliba ne nsansa pantu abena mwabo nabo balabombela Yehova. Bonse babili ni bapainiya, kabili ba Wayne ni baeluda.

10. Mulandu nshi tulingile ukubela abatekanya?

¹⁰ Muleba abatekanya. Ilyo twasalilepo ukulaumfwila Lesa, twalilekele ukucita fimo kabili twalilekele ukusumina muli fimo. Kuti cakosela balupwa lwesu ukusumina ukuti nomba twalyaluka. Ilingi line babalilapo ukumona twaleka ukulasefya nabo imitebeto ya mu mipepele kabili twaleka no kulaibika mu fikansa fya calo. Pa kutampa, balupwa lwesu bamo kuti batufulilwa no kutufulilwa. (Mat. 10:35, 36) Lelo tatulingile ukulamona ukuti tabakatale abaluuka. Nga twaleka ukubafwa pa kuti beshibe ifyo twasuminamo, cikaba kwati twabapingula ukuti tabalinga ukwisakwata umweo wa muyayaya. Yehova tatupeela umulimo wa kupingula abantu, lelo uo apeela ni Yesu. (Yoh. 5:22) Nga tuletekanishisha balupwa lwesu, mu kupita kwa nshita kuti bafwaya ukukutika imbila nsuma.—Moneni akabokoshi akaleti “ Mulebomfya Webusaiti Yesu pa Kusambilisha.”

11-13. Finshi mwasambilila ku fyo ba Alice balecitila abafyashi babo?

¹¹ Muleba aba cikuuku, lelo mwilaleka balupwa lwenu balenga mwayalula ifyo mwasalapo. (Amapi. 15:2) Natulande pali ba Alice. Ilyo basambilile icine baleikala ukutali sana no kwaleikala abafyashi babo abali mu fikansa fya calo, kabili abashasumine ukuti Lesa e ko aba. Ba Alice bamwene ukuti balingile ukwangufyanya ukwebako abafyashi babo pa fisuma ifyo balesambilila. Batile: “Nga wakokola ukweba balupwa ukuti nauleka ukusumina muli fimo kabili nauleka no kulacitako ifintu fimo, kuti bapapa sana nga baishiba.” Ba Alice balelembela abafyashi babo amakalata no kubepusha pa fyo baletontonkanya pali fimo ifyo Baibolo isambilisha ifyo balemona ukuti bali no kufitemwa. Cimo ico babepwishepo, fintu Baibolo isambilisha pa kutemwa. (1 Kor. 13:1-13) Balitashishe abafyashi babo pa fyo babakushishe na pa fyo balebasakamana kabili balibatumiineko no bupe. Ilyo baletandalila abafyashi balebombesha imilimo ya pa ng’anda. Pa kubala, abafyashi tabatemenwe ilyo ba Alice babebele pa fyo basumiinemo nomba.

¹² Ilyo ba Alice baleba pa ng’anda pa bafyashi babo, balebelenga Baibolo cila bushiku. Balandile abati: “Ifi nalecita fyalengele bamayo baishiba ifyo nacindike Baibolo.” Nomba bawishi baba Alice bena balefwaya ukwishiba ifyaba mu Baibolo ifyalengele umwana wabo aluke, kabili balefwaya na pa kusangila ifilubo muli Baibolo. Ba Alice batile: “Nalipeele batata Baibolo kabili nalibalembeele na ka kalata nakabika na mu Baibolo mwine.” Finshi fyacitike? Bashibo ba Alice tabasangile ifilubo mu Baibolo, kabili balitemenwe sana ifyo babelengele.

 ¹³ Tufwile ukuba ne cikuuku na lintu baletucusha. (1 Kor. 4:12b) Ku ca kumwenako ba Alice balebasuusha kuli banyinabo. Ba Alice balandile abati: “Ilyo nabatishiwe, bamayo banjebele abati ndi ‘mwana umubi.’” Finshi ba Alice bacitilepo? Abene batile: “Mu cifulo ca kwikala fye tondolo, nalebalondolwela mu mucinshi ukuti nalisalilepo ukuba Inte ya kwa Yehova kabili nshali no kwalula ifyo nasalilepo. Naebele bamayo ukuti nalibatemenwe sana. Bonse babili twalililile kabili nalibepikiile ifya kulya ifisuma. Ukutula iyi nshita bamayo batendeke ukumona ukuti ifya mu Baibolo ifyo naishibe fyalengele naba umuntu umusuma.”

14. Mulandu nshi tushilingile ukulekela balupwa balenga twayalula ifyo twasalapo ukucita?

¹⁴ Kuti papita inshita pa kuti balupwa lwesu beshibe bwino ifyo twacindika ukubombela Yehova. Ku ca kumwenako, ilyo ba Alice basalilepo ukutendeka bupainiya ukucila ukulabomba imilimo iyo abafyashi babo balefwaya balebomba, banyinabo balililile na kabili. Na lyo line, ba Alice tabayalwile ifyo basalilepo. Ba Alice batile: “Nga waleka balupwa lobe balenga wayalula fimo ifyo wasalapo ukucita, nalimo kuti balenga wayalula na fimbi. Nomba nga uli ne cikuuku kabili taulealula ifyo wasalapo ukucita, bamo nalimo kuti bakusuminisha.” Ifi fine e fyo cali kuli ba Alice. Abafyashi babo bonse ni bapainiya kabili bawishibo ni baeluda.

15. Nga fintu tubelenga pe lembo lya kwa Mateo 5:14-16 ne lya 1 Petro 2:12, bushe ifisuma ifyo aba bwananyina bacita kuti fyalenga balupwa lwesu bacita shani?

¹⁵ Yehova alakulila abantu kuli ena ukupitila mu milimo iisuma iya Bena Kristu mu cilonganino. (Belengeni Mateo 5:14-16; 1 Petro  2:12.) Nga ca kuti abena mwenu te Nte ya kwa Yehova, bushe balimonanapo na ba bwananyina aba mu cilonganino mwaba? Ba Pauline abo tulandilepo kale balitile bamunyinefwe na bankashi ku mwabo pa kuti abena mwabo ba Wayne babeshibe. Ba Wayne balebukisha ifyo munyinefwe umo alengele baishiba bwino ifyo ba Nte baba. Batile: “Alipokele cuti ya bushiku bumo ku ncito pa kuti tutambile pamo icangalo.” Ifi uyu munyinefwe acitile fyalengele ba Wayne bailuka ukuti uyu uwa bwananyina tatemwa fye ifya kwa Lesa, alitemwa ne fintu fimbi.

16. Mulandu nshi tulingile ukulaitila balupwa lwesu ku kulongana?

¹⁶ Inshila iyawamisha iyo twingafwilamo balupwa lwesu, kulabeta ku kulongana uko tukwata pa Ng’anda ya Bufumu. (1 Kor. 14:24, 25) Ba Wayne babalilepo ukuyasangwa ku Cibukisho pantu caliko ninshi nabenuka ku ncito kabili tacasendele inshita iitali. Ba Wayne batile: “Nshaumfwikishe ifyo balandile mu lyashi, lelo ico natemenwe sana fintu abantu bali. Balinsekelele kabili balemfunka na mu minwe. Nalimwene ukuti bantu abasuma.” Abaupana bamo bali ne cikuuku sana kuli ba Pauline, balebafwako ukulela umwana wabo ilyo balelongana na lintu balebila imbila nsuma. E ico ilyo ba Wayne basukile balafwaya ukwishibilapo na fimbi pa fyo abena mwabo basumiinemo, baebele munyinefwe ukuti alebasambilisha Baibolo.

17. Finshi mushilingile ukulaipeelelapo imilandu, kabili mulandu nshi mushilingile ukulamwena ukuti balupwa lwenu tabakaluke?

¹⁷ Tulesubila balupwa lwesu bonse nabo bakatendeka ukubombela Yehova. Lelo nangu twingesha shani ukubafwa pa kuti babe ababomfi ba kwa Lesa, nalimo te kuti basambilile icine. Nga caba ifi, tamulingile ukulaipeela imilandu pantu ninshi e fyo abene basalilepo. Na kuba, te kuti mupatikishe umuntu nangu umo ukusumina ifyo mwasuminamo. Lelo nga bamona ifyo mwaba ne nsansa pa mulandu wa kuti mulabombela Yehova, kuti bayaluka. Mulebapepelako. Mulelanda nabo cikuuku cikuuku. Tamufwile ukuleka ukubafwa! (Imil. 20:20) Mwilatwishika, Yehova akamupaala pa fyo mubombesha. Na kabili nga ca kuti balupwa lwenu basumina ukukutika kuli imwe, bakapusuka!