1. Finshi Abena Kristu balingile ukucita pa kuti bapwishe ukubutuka ulubilo lwa ku mweo?

ABENA KRISTU balabutuka ulubilo lwa ku mweo. Nampo nga e lyo tutendeke fye ukubutuka nelyo twalibutuka pa myaka iingi, tulingile ukutwalilila fye ukubutuka mpaka tukapoke icilambu. Amashiwi ayo umutumwa Paulo aebele Abena Kristu mu musumba wa Filipi kuti yalenga twatwalilila ukubutuka mpaka twapwisha no lubilo lwesu. Ilyo Paulo alembeele aba Abena Kristu kalata, ninshi bamo mu cilonganino balibombela Yehova pa myaka iingi. Kwena balemubombela fye bwino, lelo Paulo abacinkwileko ukuti balingile ukutwalilila ukushipikisha ilyo balebombela Yehova. Alefwaya batwalilile ukubutuka ulubilo lwa ku mweo nga fintu ena alecita.—Fil. 3:14.

2. Cinshi twingalandila ukuti amashiwi Paulo aebele abali mu cilonganino ca mu Filipi ayalandile pa nshita iisuma?

² Amashiwi ayo Paulo aebele abali mu cilonganino ca mu Filipi ayalandile pa nshita iisuma. Abali muli ici cilonganino batampile ukubacusha ilyo icilonganino catendeke fye. Ici cilonganino catendeke ilyo Lesa aebele Paulo na Sila ‘ukwabukila ku Makedonia’ nalimo mu mwaka wa 50 ninshi Yesu alibwelelamo ku muulu. (Imil. 16:9) Ilyo bafikile ku Makedonia, bamonene no mwanakashi we shina lya kuti Lidia ‘uwalekutika, kabili uo Yehova aiswile nga nshi umutima’ pa kuti akutike imbila nsuma. (Imil. 16:14) Tapakokwele no kukokola Lidia pamo na ba mu ng’anda yakwe balibatishiwe. Lelo Satana Kaseebanya taikelepo fye. Abaume aba mu musumba batwele Paulo na Sila kuli bamafumu kabili bababepeshe ukuti baleleta icimfulunganya. Ici calengele Paulo na Sila babome, babakake mu cifungo, na pa numa babebe ukufuma mu musumba. (Imil. 16:16-40) Bushe balilekele ukubombela Yehova? Nakalya! Inga bamunyinefwe  na bankashi abali muli cilya icilonganino icipya bena bacitile shani? Nabo bene balishipikishe! Ukwabula no kutwishika, filya Paulo na Sila batwalilile ukubombela Yehova fyalengele aba aba bwananyina nabo batwalilile.

3. Finshi Paulo aishibe, kabili mepusho nshi twalaasuka?

³ Paulo talefwaya nangu panono ukuleka ukubombela Yehova. (2 Kor. 4:16) Lelo alishibe ukuti pa kuti atwalilile ukubombela Yehova ne cishinka mpaka ne mfwa, alingile ukutwalilila ukubika amano ku cilambu. Finshi tulesambilila kuli Paulo? Ni bani muno nshiku abalanga ukutila kuti twashipikisha nangu tukwate amafya? Na kabili bushe isubilo lya kuti ifintu fikawama ku ntanshi kuti lyalenga shani twatwalilila ukubombela Yehova?

4. Finshi Paulo alecita ifyalengele atwalilile ukubombela Yehova nangu ca kuti alekwata amafya?

⁴ Tontonkanyeni pali fyonse ifyo Paulo alecita ilyo alembeele abena Filipi. Pali iyi nshita ninshi bamukakila mu ng’anda mu Roma. Kanshi takwete insambu sha kuya mu kubila imbila nsuma. Na lyo line, alitwalilile ukubila ku baleya mu kumumona kabili alelembela ne filonganino ifyali ukutali amakalata. Na muno nshiku mwine, Abena Kristu abengi aba kuti calyafya ukufuma pa ng’anda ukuya mu kubila imbila nsuma, balabila ku baya mu kubamona pa mayanda yabo. Na kabili balalembela abantu abo bashingamonana nabo amakalata pa kuti babakoseleshe.

5. Nga fintu ilembo lya Abena Filipi 3:12-14 lilanda, finshi fyalengele Paulo atwalilile ukubika amano ku cilambu?

⁵ Paulo talekele ifisuma nelyo ifibi ifyo acitile fyamupumbula aleka no kubombela Yehova. Na kuba, alandile ati alingile ‘ukulaba ifya ku numa’ pa kuti ‘akonkelele ifya ku ntanshi,’ e kutila pa kuti apwishe ukubutuka ulubilo. (Belengeni Abena Filipi 3:12-14.) Finshi fimo ifyali no kupumbula Paulo? Ica kubalilapo, ilyo Paulo ashilaba Umwina Kristu, alilundulwike sana mu mipepele ya baYuda. Lelo ilyo aishileba Umwina Kristu atendeke ukumona ifyo alundulwike nge “fisooso fye.” (Fil. 3:3-8) Ica bubili, talekele ifyabipa ifyo alecita ilyo alecusha Abena Kristu fyalenga aleka ukubombela Yehova. Ica butatu, taletontonkanya ukuti apo alibombeele sana Yehova, talingile ukutwalilila ukubombesha. Paulo alibilile sana imbila nsuma nangu ca kuti balimukakilepo mu cifungo, balimuminepo, balimupoolelepo amabwe, ubwato ubo alimo bwalibundilepo, alibulishepo ifya kulya kabili alisapwilepo. (2 Kor. 11:23-27) Lelo nangu ca kuti alibilile sana imbila nsuma kabili aliculile sana, alishibe ukuti alingile ukutwalilila ukubombela Yehova. Ifi fine e fyo na ifwe tufwile ukulacita.

6. “Fya ku numa” nshi fimo ifyo nalimo tulingile ukulaba?

⁶ Finshi tufwile ukucita pa kuti ‘tulabe ifya ku numa’ nga filya Paulo acitile? Fwe bamo nalimo tulingile ukuleka ukumfwa ububi pa fibi ifyo twacitile kale. Nga ca kuti mulomfwa ububi, bushe te kuti ciwame mwatendeka ukuisambilisha pa cilubula ca kwa Kristu? Nga tuleisambilisha pa cilubula, tuletontonkanyapo sana, kabili tulepepelapo, nalimo kuti twaleka ukumfwa ububi na pa fishilingile. Nalimo kuti twaleka no kumfwa ububi pa filubo ifyo Yehova atwelela kale. Natulande na pali fimbi ifyo twingasambilila kuli Paulo. Nalimo bamo pa kuti balebombela sana Yehova balilekele imilimo iyali no kulenga babe ne cuma. Nga ca kuti ifi e fyo mwacitile, bushe te kuti ciwame mwaleka ukulatontonkanya pa fyo mwasha? (Impe. 11:4-6; Luk. Mil. 7:10) “Ifya ku numa” fimbi kuti fyaba milimo iyo twabombela Yehova nelyo amafya ayo twashipikishapo. Kwena nga twatontonkanya pa fyo Yehova atwafwa pa myaka iyo twamubombela, kuti  twapalama sana kuli Shifwe. Nomba tatufwile ukulamona ukuti twalibombela sana Yehova.—1 Kor. 15:58.

7. Ukulingana ne lembo lya 1 Abena Korinti 9:24-27, finshi tulingile ukucita pa kuti tukapoke icilambu? Langilileni.

⁷ Paulo alyumfwikishe amashiwi ayo Yesu alandile. Yesu atile: “Bombesheni na maka.” (Luka 13:23, 24) Paulo alishibe ukuti alingile ukubombesha mpaka ne mfwa nga filya fine Kristu acitile. E co alinganishishe umulimo wesu fwe Bena Kristu ku kubutuka ulubilo lwa kucimfyanya. (Belengeni 1 Abena Korinti 9:24-27.) Uubutuka ulubilo lwa kucimfyanya abika amano ku kufika ku mpela kabili tafwaya icintu nangu cimo camupumbula. Katulangilile: Ababutukila ulubilo lwa kucimfyanya mu matauni, nalimo mu mbali ya musebo mwaliba amatuuka ne fintu fimbi ifingabapumbula. Bushe uulebutuka kuti aiminina alatamba ifyo bashitisha mu matuuka? Awe, te kuti acimfye nga acita ifi! Na ifwe bene tatufwile ukuleka icintu nangu cimo catupumbula ilyo tulebutuka ulubilo lwa ku mweo. Nga twabika amano ku cilambu, kabili nga tulebombesha na maka nga fintu Paulo alecita, tukapoka icilambu!

8. Mafya nshi yatatu ayo twalalandapo?

⁸ Nomba natulande pa mafya yatatu ayengalenga twafuupuka. Ubwafya bwa kubalilapo, ifyo twenekela nga taficitike, ubwalenga bubili, amaka nga yeleyalepwa pa mulandu wa kukula, no bwalenga butatu, amafya nga tayaleputuka. Te kuti tufuupuke nga twasambililako ku fyo ababomfi ba kwa Yehova bambi batwalilila ukumubombela nangu ca kuti balakwata amafya.—Fil. 3:17.

9. Kuti twaba shani nga ca kuti ifyo twenekela taficitike?

⁹ Ifyo twenekela nga taficitike. Mu cifyalilwa fye tulafwaisha ukukwata ifintu ifyo Yehova atulaya. Ku ca kumwenako, Habakuki kasesema wa kwa Yehova alefwaisha ukuti Yehova apwishe ububifi ubwali mu Yuda, lelo Yehova amwebele ukuti “ulecilolela.” (Haba. 2:3) Nomba nga ca kuti ifyo twenekela fyakokola ukucitika, nalimo kuti twaleka ukuba abacincila kabili no kufuupuka kuti twafuupuka. (Amapi.  13:12) Ifi twalandapo fyalicitike mu 1914. Abena Kristu abasubwa abengi baleenekela ukuya ku muulu muli uyu mwaka. Bacitile shani ilyo ifyo baleenekela fishacitike?

10. Bushe ba Royal na ba Pearl bacitile shani ilyo ifyo baleenekela fishacitike?

¹⁰ Natulande pa fyo Abena Kristu babili aba cishinka bacitile pa kuti befuupuka. Munyinefwe Royal Spatz abatishiwe mu 1908 ninshi ali ne myaka 20. Alishininkishe ukuti tapali na kukokola ali no kuya ku muulu. Na kuba, ilyo alanshishe nkashi Pearl mu 1911, amwebele ati: “Walishiba ifikacitika mu 1914. Nga tuli no kuupana, ninshi tufwile ukwangufyanya!” Ilyo umwaka wa 1914 wafikile, aba Abena Kristu tabaile ku muulu. Bushe balilekele ukubutuka ulubilo lwa ku mweo pantu tabaile ku muulu? Awe, pantu ico babikileko sana amano kuba ne cishinka ilyo balecita ukufwaya kwa kwa Lesa, te kuya ku muulu iyo. Tabalefwaya nangu panono ukuleka ukubutuka ulubilo lwa ku mweo. Na cine, ba Royal na ba Pearl balitwalilile ukuba abacincila kabili aba cishinka pa myaka iingi mpaka bapwisha umulimo wabo pano isonde. Ukwabula no kutwishika mulafwaisha inshita ikafike ilyo Yehova akalenga ishina lyakwe likabe ilya mushilo, na lintu akalenga cikeshibikwe ukuti e walinga ukuteka ku muulu na pano isonde e lyo na lintu akafikilisha fyonse ifyo alaya. Mwilatwishika no kutwishika, Yehova akafikilisha ifi fintu pa nshita iyo umwine abika. Ilyo Yehova ashilafikilisha ifi fyonse, natutwalilile ukuba abacincila ilyo tulemubombela, kabili twikafuupuka nga ca kuti ifyo twenekela taficitike.

11-12. Cinshi twingalandila ukutila kuti twatwalilila ukubombela Yehova na lintu amaka yeleyalepwa? Langilileni.

¹¹ Amaka nga yeleyalepwa pa mulandu wa kukula. Uubutuka ulubilo alingile ukukwata amaka sana. Lelo imwe tamufwile ukukwata amaka sana pa kuti mutetekele sana Yehova kabili mube abacincila ilyo mulemubombela. Na kuba, abengi aba kuti amaka yalicepa bacili balicincila ilyo babombela Yehova. (2 Kor. 4:16) Ku ca kumwenako, munyinefwe Arthur Secord aali ne myaka 88 kabili alelwalilila ninshi alibombela pa Bethel pa myaka 55. Bushiku bumo nasi uwalemusakamana aile pa busanshi bwa kwa uyu munyinefwe. Aliloleshe munyinefwe e lyo amweba ati: “Munyinefwe Secord, mwalibombela sana Yehova.” Lelo uyu munyinefwe tabikile fye amano ku fyo abombeele Yehova kale. Na o aliloleshe nasi no kumweba ati: “Ico walanda cishinka. Lelo icacindama te fyo twabombela Yehova kale. Icacindama fintu tulemubombela pali ino nshita ne fyo tukatwalilila ukumubombela.”

¹² Nalimo mwalibombela Yehova pa myaka iingi kabili nomba pa mulandu wa kuti mulelwalilila cilemukosela ukubombesha nga fintu  mwalebombesha kale. Ifi nga e fyo caba, mwilafuupuka. Mwilatwishika, Yehova talaba imilimo iyo mwamubombela kabili alatasha. (Heb. 6:10) Pali ino nshita muleibukisha ukuti imilimo iyo tubombela Yehova te ilanga ifyo twamutemwa. Lelo icilenga tulemubombela e lyo no kubomba apo twingapesha e filanga ifyo twamutemwa. (Kol. 3:23) Yehova alishiba ifyo twingaba na maka ya kucita kabili tatwenekela ukucita ifyo tushingacita.—Marko 12:43, 44.

13. Finshi fyacitikile ba Melnik no lupwa lwabo, kabili ifi filenga shani twatwalilila ukubombela Yehova nangu ca kuti twalikwata amafya ayengi?

¹³ Amafya nga tayaleputuka. Ababomfi ba kwa Yehova bamo balishipikisha pa myaka iingi nangu ca kuti balikwata amafya kabili balabacusha sana. Natulande pali ba Anatoly Melnik. * Uyu munyinefwe ali fye ne myaka 12 ilyo bawishi babekete no kubakaka mu cifungo, kabili babatwele ku Siberia, ukwalepa amakilomita ukucila pali 7,000 ukufuma ku mwabo ku Moldova. Ilyo papitile umwaka umo, ba Melnik, banyinabo, bashikulwibo, na banakulwibo nabo bene babatwele ku Siberia. Pa numa batendeke ukulaya mu kulongana ku mushi umbi, lelo baleenda mu menshi makasa pa makilomita 30 ninshi nakutalala nga nshi. Mu kupita kwa nshita, munyinefwe Melnik balimukakile pa myaka itatu. Pali iyi nshita ninshi alyupa alikwata no mwana umwanakashi uwali no mwaka umo. Nangu ca kuti ba Melnik bali na mafya, bena no lupwa lwabo balitwalilile ukubombela Yehova ne cishinka. Pali ino nshita ba Melnik bali ne myaka 82 kabili baba muli Komiti ya Musambo wa ku Central Asia. Kanshi natulebombesha umulimo wa kwa Yehova, kabili natutwalilile ukushipikisha nga fintu ba Melnik na bena mwabo ba Lidiya bacitile.—Gal. 6:9.

14. Finshi ifyo Paulo aishibe ukuti e fyo alingile ukucita pa kuti akapoke icilambu?

¹⁴ Paulo alishininkishe ukuti ali no kupwisha ulubilo lwakwe ulwa ku mweo. Apo ali Mwina Kristu uwasubwa, alesubila “ubwite bwa ku muulu ubwafuma kuli Lesa.” Lelo alishibe ukuti pa kuti akapoke ici cilambu, alingile ‘ukukonkelela’ ubuyo. (Fil. 3:14) Paulo aebele abena Filipi icilangililo icisuma sana pa kuti babike sana amano ku cilambu.

15. Bushe Paulo abomfeshe shani icilangililo ca bwana calo pa kukoselesha abeni Filipi pa kuti batwalilile ukubutuka ulubilo lwa ku mweo?

¹⁵ Paulo aibukisheko abena Filipi ukuti ubwana calo bwabo bwali bwa ku muulu. (Fil.  3:20) Mulandu nshi balingile ukulaibukishisha ukuti ubwana calo bwabo bwali bwa ku muulu? Muli shilya nshiku abantu abengi balefwaya ukuba abana calo ba calo ca bena Roma pantu balenonkelamo sana. * Nomba Abena Kristu abali abasubwa bali bana calo ba buteko ubusuma nga nshi kabili ubwali no kulenga bakanonkelemo sana. Te kuti tulinganye ubwana calo bwa bena Roma no bwana calo ubo Abena Kristu abali abasubwa bali no kukwata! E calengele Paulo akoseleshe abena Filipi ukuti, “Ikaleni imikalile iyawamina imbila nsuma iya kwa Kristu.” (Fil. 1:27) Abena Kristu abasubwa muno nshiku nabo balatwalilila ukubombela Yehova pa kuti bakaye ku muulu kabili na ifwe bene tufwile ukulabapashanya.

16. Ukulingana ne lembo lya Abena Filipi 4:6, 7, finshi tulingile ukutwalilila ukucita nampo nga tusubila ukwikala ku muulu nelyo nga tusubila ukwikala pano isonde?

¹⁶ Nampo nga tusubila ukwikala umuyayaya ku muulu nelyo nga tusubila ukwikala mu paradaise pano isonde, tufwile ukutwalilila ukubombela Yehova pa kuti tukekale ku muulu nelyo mu paradaise. Nangu tube na mafya ya musango shani, tatulingile ukulatontonkanya pa fya ku numa; kabili tatufwile ukuleka icintu nangu cimo calenga twaleka ukubombela Yehova. (Fil. 3:16) Nalimo ifyo twalolela pa myaka iingi tafyacitika, nelyo amaka yeleyalepwa pa mulandu wa kukula. Nalimo twalishipikisha amafya kabili balitucusha pa myaka iingi. Nampo nga ifi twalandapo e fyo caba nelyo iyo, ‘mwilasakamikwa nangu kamo.’ Lelo mulelomba Lesa kabili mulemupapaata, na o akamupeela umutende uwacila amatontonkanyo yenu.—Belengeni Abena Filipi 4:6, 7.

17. Finshi tukasambilila mu cipande cikonkelepo?

¹⁷ Natulebika amano ku kupwisha ulubilo lwesu ulwa ku mweo nga filya fine uubutuka ulubilo aibikilishako sana nga afika mupepi na pa kupwishisha ulubilo. E ico natutwalilile ukubombesha apo twingapesha kabili tutwalilile ukubika amano ku fisuma ifyo twenekela. Finshi fingatwafwa pa kuti tuleshipikisha? Mu cipande cikonkelepo tukasambilila ifyo tufwile ukubikako sana amano ne fyo twingacita pa kuti twishibe “bwino bwino ifyacilapo ukucindama.”—Fil. 1:9, 10.