1. Finshi Davidi alandile pa fyo Yehova aicefya?

BUSHE kuti twalanda ukuti Yehova ali-icefya? Ee ali-icefya. Inshita imo Davidi alandile ukuti: “Mukampeela inkwela yenu iye pusukilo, kabili ukuicefya kwenu kulankusha.” (2 Sam. 22:36; Amalu. 18:35) Nalimo ilyo Davidi alembele aya mashiwi aleibukisha ubushiku ilyo kasesema Samwele aishile ku ng’anda ya kwa wishi ku kusuba uwali no kuba imfumu ya bena Israele ku ntanshi. Nangu ca kuti Davidi e walipo umwaice pa bana bonse abaume 8, e o Yehova asalile ukupyana Imfumu Shauli.—1 Sam. 16:1, 10-13.

2. Finshi twalasambilila muli cino cipande?

² Davidi afwile aleumfwa nge ifyo uwaimbile amalumbo aleumfwa uwalandile pali Yehova ukuti: “Alakontama pa kuti aloleshe pa myulu na pe sonde, pa kuti emye umulanda mu lukungu; Aimya umupiina . . . no kumulenga ukwikala na abakata.” (Amalu. 113:6-8) Muli cino cipande twalabalilapo ukulanda pa fyo Yehova inshita shimo alangile ukuti ali-icefya pa kuti tusambilileko amasambililo ayacindama pa kuicefya. Lyena twalalanda pa fyo twingasambilila pa kufuuka ku fyo Imfumu Shauli yacitile, kuli kasesema Daniele na kuli Yesu.

3. Finshi Yehova acitila fwe bantunse, kabili ici cilanga ukuti aba shani?

³ Ifyo Yehova acita ku bantunse abashapwililika filanga ukuti ali-icefya. Tapelela fye pa kupokelela ukupepa kwesu, lelo atumona no kuti tuli fibusa fyakwe. (Amalu. 25:14) Kabili pa kuti tube ifibusa fyakwe, Yehova ali-itendekeleko ukutupeela Umwana  wakwe ukuba icilubula pa membu shesu. Cine cine Yehova alitulanga ukuti wa luse kabili alalangulukilako!

4. Cinshi Yehova atupeela, kabili mulandu nshi?

⁴ Tontonkanyeni na pali cimbi icilanga ukuti Yehova ali-icefya. Apo ni Kabumba, afwaya nga atupangile mu musango wa kuti twilaisalila ifyo tulefwaya ukucita mu bumi bwesu. Lelo te fyo acitile. Atupanga mu cipasho cakwe, kabili alitupeela ne nsambu sha kuisalila ifya kucita. Ifyo tusalapo ukucita fyalicindama kuli Yehova, nangu ca kuti tuli banono sana nga kutulinganya kuli ena. Afwaya tulesalapo ukumubombela ne mitima yesu yonse pa mulandu wa kuti twalimutemwa kabili twalishiba ifisuma ififumamo nga tulemumfwila. (Amala. 10:12; Esa. 48:17, 18) Ala tulatasha nga nshi pali ifi Yehova alanga ukuti ali-icefya!

5. Bushe Yehova atusambilisha shani ukuba abaicefya? (Moneni icikope cili pa nkupo.)

⁵ Yehova alatusambilisha ukuba abaicefya ilyo alecita ifilanga ukuti ali-icefya. Nangu ca kuti Yehova e wakwatisha amano mu muulu na pano isonde, alasumina ukucita ifyo bambi baletontonkanya. Ku ca kumwenako, Yehova alisuminishe Umwana wakwe ukumwafwako ukubumba ifintu fyonse. (Amapi. 8:27-30; Kol. 1:15, 16) Kabili nangu ca kuti Yehova e wa Maka Yonse, alapeelako bambi amaka ya kutungulula. Ku ca kumwenako, alisonta Yesu ukuba Imfumu ya Bufumu bwakwe, kabili akapeela amaka yamo aya kutungulula ku bantunse 144,000 abakateka pamo na Yesu. (Luka 12:32) Twalishiba ukuti Yehova alisambilisha Yesu ukuba Imfumu kabili Shimapepo Mukalamba. (Heb. 5:8, 9) Na kabili alasambilisha abakateka pamo na Yesu pa kuti bakabombe bwino uyu mulimo, lelo ilyo bakalabomba uyu mulimo takale-esha ukulabatungulula muli fyonse ifyo bakalacita. Lelo alicetekela ukuti bakalateka ukulingana no kufwaya kwakwe.—Ukus. 5:10.

6-7. Finshi twingasambilila kuli Shifwe wa ku muulu pa kupeelako bambi imilimo?

 ⁶ Nga ca kuti Shifwe wa ku muulu uushikabila abali bonse ukumwafwa alapeelako bambi imilimo, ninshi ifwe tufwile ukucilanapo ukupeelako bambi imilimo! Bushe muli mutwe wa lupwa, nelyo bushe ni mwe baeluda mu cilonganino? Mulepeelako bambi imilimo nga filya Yehova acita kabili mwilaesha ukubatungulula muli fyonse ilyo balebomba imilimo mwabapeela. Nga mulepashanya Yehova mukalalenga imilimo ikalebombwa bwino, mukalasambilishako bambi, kabili mukalenga bekalatwishika ukutila kuti babomba imilimo iingi. (Esa. 41:10) Finshi fimbi abakwata umulimo wa kutungulula bengasambilila kuli Yehova?

⁷ Mu Baibolo mwaliba ifilanga ukuti Yehova alatemwa ukukutika kuli bamalaika. (1 Isha. 22:19-22) Mwe bafyashi, kuti mwacita shani pa kuti mulepashanya Yehova? Inshita shimo muleipusha abana benu ifyo baletontonkanya ukuti e fyo mwingacita pa kubomba umulimo umo. Nga ca kuti ifyo balanda kuti fyabomba, mulefikonka.

8. Bushe Yehova atekanishishe shani Abrahamu na Sara?

⁸ Inshila na imbi iyo Yehova alangilamo ukuti ali-icefya fintu aba uwatekanya. Ku ca kumwenako, Yehova alatekanishisha ababomfi bakwe nga ca kuti mu mucinshi bamwipusha ico apingwilapo ukucita ifintu fimo. Alikutike kuli Abrahamu ilyo alemwipusha nga ca kuti cali fye bwino ukonaula imisumba ya Sodomu na Gomora. (Ukute. 18:22-33) Kabili ibukisheni ne fyo Yehova atekanishishe Sara umukashi wa kwa Abrahamu. Yehova tafulilwe filya Sara asekele ilyo alandile ukuti ali no kwimita mu bukote. (Ukute. 18:10-14) Lelo acitile ifyalangile ukuti alicindike Sara.

9. Finshi abafyashi na baeluda bengasambililako kuli Yehova?

⁹ Finshi mwe bafyashi na baeluda mwingasambililako kuli Yehova? Mucita shani nga ca kuti abana benu nelyo aba mu cilonganino bamo balemona kwati ifyo mwapingula tafili bwino? Bushe mulatendeka ukubalungika apo pene? Nelyo mulesha ukumfwikisha icilengele bamone kwati ifyo mupingwile tafili bwino? Aba mu lupwa na ba mu cilonganino balanonkelamo nga ca kuti abaletungulula balepashanya Yehova. Ukufika pano natulanda pa fyo twingasambililako kuli Yehova filya aba uwaicefya. Nomba twalalanda pa fyo twingasambilila pa kufuuka ku bantu bamo abalembwa mu Cebo ca kwa Lesa.

10. Bushe Yehova atusambilisha shani ukubomfya amalyashi ya bantu balembwa mu Baibolo?

¹⁰ Apo Yehova e ‘Kasambilisha wesu Uwapulamo,’ alilemba amalyashi ya bantu bamo mu Cebo cakwe pa kuti atusambilishe. (Esa. 30:20, 21) Tulasambililako ifingi nga tulebelenga no kutontonkanya sana pa malyashi ayalembwa mu Baibolo aya bantu abali ne mibele iyo Yehova atemwa, apaba no kufuuka. Kabili na lintu tulebelenga ifyacitikiile abantu abafililwe ukuba ne mibele iyo Lesa atemwa, tulasambililako fimo.—Amalu. 37:37; 1 Kor. 10:11.

11. Finshi twingasambilila kuli filya Shauli acitile ifyo ashalingile ukucita?

¹¹ Tontonkanyeni pa fyo cali ku Mfumu Shauli. Ilyo Shauli ali umulumendo ali uwafuuka. Alishibe ifyo engakumanisha ne fyo ashingakumanisha ukucita, kabili limo aleshimunuka ukusumina imilimo iikalamba. (1 Sam. 9:21; 10:20-22) Nomba mu kupita kwa nshita Shauli aishileba ne cilumba kabili atendeke ukuituntumba. Atendeke ukuba ne iyi imibele pa numa fye ya kuba imfumu. Inshita imo alifililwe ukutekanya ilyo alelolela kasesema Samwele. Mu cifulo ca kucetekela ukuti Yehova ali no kupususha abantu bakwe, Shauli atuulile ilambo lya  koca nangu ca kuti takwete insambu sha kucita ifi. Ici calengele Yehova aleke ukumupaala kabili mu kupita kwa nshita alimufumishe na pa bufumu. (1 Sam. 13:8-14) Kuli ili lyashi tulesambililako ukuti nga tatulecita ifintu ifyo tushikwetepo insambu ninshi tulelanga ukuti tuli ba mano.

12. Bushe Daniele alangile shani ukuti ali uwafuuka?

¹² Tontonkanyeni pali kasesema Daniele uwacitile ifyapusana sana ne fyabipa ifyo Shauli acitile. Pa nshita yonse iyo ali pano isonde, Daniele ali mubomfi wa kwa Lesa uwaicefya kabili uwafuuka, kabili lyonse aleipusha Yehova ukuti amwebe ifya kucita. Ku ca kumwenako, ilyo Yehova amulengele ukulondolola iciloto ico imfumu Nebukadnesari yalotele, tacitile nangu cimo icali no kulenga abantu balemulumbanya. Lelo ali uwafuuka kabili alengele abantu balalumbanya Yehova. (Dan. 2:26-28) Finshi tulesambililako? Nga ca kuti aba bwananyina balatemwa ukukutika amalyashi yesu nelyo nga tulabomba bwino umulimo wa kubila imbila nsuma, tuleibukisha ukuti tufwile ukulalenga abantu balalumbanya Lesa ukucila ukutulumbanya. Tufwile ukulaibukisha ukutila te kuti tubombe bwino imilimo tubomba mu cilonganino nga ca kuti Yehova taletwafwa. (Fil. 4:13) Nga tulecita ifi ninshi tulepashanya na Yesu uwali uwafuuka. Ni mwi twalosha?

13. Ukulingana na mashiwi yaba pali Yohane 5:19, 30, finshi tulesambilila kuli Yesu pa kuba abafuuka?

¹³ Yesu aleshintilila pali Yehova, nangu ca kuti ali Mwana wa kwa Lesa uwapwililika. (Belengeni Yohane 5:19, 30.) Tatalile esha ukupoka amaka ya kuteka ayo Wishi wa ku muulu akwata. Baibolo pa Abena Filipi 2:6 itila Yesu “tatalile atontonkanya ukutila kuti alingana na Lesa.” Apo Yesu ali Mwana wa cumfwila, alishibe ukuti kwali ifyo alingile ukucita ne fyo ashalingile ukucita kabili alicindike amaka ya kutungulula ayo Wishi akwata.

14. Finshi Yesu alandile ilyo bamwebele ukucita ifyo ashakwetepo insambu?

¹⁴ Tontonkanyeni pa fyo Yesu ayaswike Yakobo na Yohane e lyo na nyina wa aba basambi ilyo bamulombele ukuti abacitile ifyo ashakwete insambu sha kucita. Apo pene fye Yesu abebele ukuti Wishi wa ku muulu e wakwata fye insambu sha kusala uufwile ukwikala ku kulyo na ku kuso ukwa cipuna ca Bufumu ica kwa Yesu. (Mat. 20:20-23) Ifyo Yesu abebele fyalangile ukuti talefwaya ukucita ifyo aishibe ukutila talingile ukuficita. Ali uwafuuka. Tatalile acita ifyo Yehova ashamupeele insambu sha  kuficita. (Yoh. 12:49) Kuti twacita shani pa kuti tulepashanya Yesu ukuba abafuuka?

15-16. Kuti twakonka shani ukufunda kwa mu Baibolo ukwaba pali 1 Abena Korinti 4:6?

¹⁵ Kuti twaba abafuuka nga filya Yesu ali nga tulekonka ifyo Baibolo ilanda pali 1 Abena Korinti 4:6. Baibolo pali ili lembo ilanda ukuti: “Mulekonka ifyalembwa.” Kanshi umuntu nga atweba ukuti tumupandeko amano, tatulingile ukumupatikisha ukukonka ifyo tuletontonkanya nelyo ukutendeka ukumupanda amano ukwabula ukuti tutontonkanyepo sana. Lelo tulingile ukumulanga ifyo Baibolo ne mpapulo shesu shalandapo pa fyo alefwaya tumupandeko amano. Nga tulecita ifi ninshi tulelanga ukuti tatwaishiba fyonse. Kabili ninshi twalifuuka pantu ninshi tulelanga ukuti “ifipope [fya wa Maka Yonse] ifyalungama” fisuma ukucila amano yesu.—Ukus. 15:3, 4.

¹⁶ Ukulunda pa kulenga Yehova acindikwa, kwaliba imilandu na imbi iyo tufwile ukubela abafuuka. Natulande pa fyo ukuba abaicefya kabili abafuuka kwingalenga twalasekelela, e lyo ne fyo kwingalenga twalaumfwana bwino na bantu.

17. Cinshi cilenga abantu abaicefya kabili abafuuka balesekelela?

¹⁷ Ukuba abaicefya kabili abafuuka kuti kwalenga twalasekelela. Cinshi twalandila ifi? Pantu nga natwishiba ukuti kwaliba ifyo twingacita ne fyo tushingacita, tukalatasha kabili tukalaba ne nsansa bambi nga batwafwa. Ku ca kumwenako, tontonkanyeni pa fyo cali ilyo Yesu aundepe abaume 10 abali ne fibashi. Umo fye e wabwelele kuli Yesu mu kumutasha pa fyo amundepe ubulwele ubwabipisha, ubo ashali na kuiposha. Ulya mwaume uwali uwaicefya kabili uwafuuka alitashishe sana pa fyo Yesu amucitile kabili alicindike Lesa.—Luka 17:11-19.

18. Bushe ukuicefya no kufuuka kulenga shani twalaumfwana bwino na bantu? (Abena Roma 12:10)

 ¹⁸ Abantu abaicefya kabili abafuuka balomfwana bwino na bantu kabili ilingi line balakwata sana ifibusa. Cinshi cilenga? Balishiba ukuti abantu bambi nabo balikwata imibele iisuma kabili balabacetekela. Abaicefya kabili abafuuka balaba ne nsansa nga ca kuti abantu bambi babomba bwino imilimo imo iyo babapeele kabili balangufyanya ukubatasha no kubacindika.—Belengeni Abena Roma 12:10.

19. Finshi fimo ifyo tushifwile ukubela ne cilumba?

¹⁹ Abantu bacilumba bena cilabakosela ukutasha bambi, bafwaya ukuti e bo abantu balelumbanya. Ilingi line balailinganya kuli bambi kabili bafwaya ukucila bambi. Mu cifulo ca kusambilishako bambi imilimo no kubapeela insambu sha kucita ifintu fimo, batila, “Nga ulefwaya umulimo ubombwe bwino taufwile ukupeela umuntu umbi ukubomba, ufwile ukuibombela we mwine.” Bamona kwati bambi te kuti babombe ukulingana ne fyo ufwile ukubombwa. Umuntu uwa cilumba afwaya ukuba uwacindama ukucila abantu bambi kabili alafimbila bambi nga babomba bwino umulimo ukucila ifyo ena abomba. (Gal. 5:26) Ilingi line abantu ba musango uyu tabapanga bucibusa na bantu pa nshita iitali. Nga twasanga ukuti twaliba ne cilumba, tufwile ukulomba Yehova ukuti atwafwe ‘ukwalula amatontonkanyo yesu’ pa kuti iyi imibele yabipa tailimbile imishila muli ifwe.—Rom. 12:2.

20. Cinshi tufwile ukubela abaicefya kabili abafuuka?

²⁰ Ala tulatasha sana ifi Yehova aba uwaicefya! Ifyo acita ku babomfi bakwe filanga ukuti ali-icefya kabili tulafwaya ukulamupashanya. Tulafwaya no kulapashanya abali abafuuka abalembwa mu Baibolo abale-enda na Lesa. Shi lyonse natulepeela Yehova ubukata no mucinshi ifyo alinga ukupokelela. (Ukus. 4:11) Nga tulecita ifi ninshi na ifwe tukalaenda na Shifwe wa ku muulu uwatemwa abantu abaicefya kabili abafuuka.