ICIPANDE CA KUSAMBILILAMO 34
Mwalikwata Umulimo mu Cilonganino ca kwa Yehova!
“Nangu ca kutila ifilundwa fya muntu fyaba ifingi, umubili wena waba fye umo, ne filundwa fyonse ifya uyo mubili, nelyo fyabe fingi, fyaba umubili umo, e fyo na Kristu aba.”—1 KOR. 12:12.
ULWIMBO 101 Ukubombela Pamo mu Kwikatana
IFYO TWALASAMBILILA *
1. Lishuko nshi twakwata?
ALA LISHUKO nga nshi ifi twaba mu cilonganino ca kwa Yehova! Twaba mu paradaise ya ku mupashi umwaba bamunyinefwe na bankashi aba mutende kabili aba nsansa. Nomba mulimo nshi mwakwata mu cilonganino?
2. Cilangililo nshi umutumwa Paulo abomfeshe mu makalata ayengi ayo alembele ayaba mu Baibolo?
2 Kuti twasambililako ifingi pa mulimo twakwata mu cilonganino ku cilangililo Paulo abomfeshe mu makalata ayengi ayaba mu Baibolo ayo umupashi wa mushilo wamulengele ukulemba. Muli aya amakalata, Paulo apashenye icilonganino ku mubili wa muntu. Kabili apashenye na baba mu cilonganino ku filundwa fya mubili.—Rom. 12:4-8; 1 Kor. 12:12-27; Efes. 4:16.
3. Masambililo nshi yatatu ayo twalasambilila muli cino cipande?
3 Muli cino cipande, twalalanda pa masambililo yatatu ayacindama ayo twingasambilila ku cilangililo Paulo abomfeshe. Ica kubalilapo, twalasambilila icishinka ca kuti bonse fye twalikwata umulimo * mu cilonganino ca kwa Yehova. Icalenga bubili, twalasambilila pa fyo twingacita nga ca kuti catukosela ukwishiba umulimo twakwata mu cilonganino. Ne calenga butatu, twalasambilila umulandu tulingile ukulabombela lyonse umulimo twakwata mu cilonganino ca kwa Lesa.
BONSE FYE TWALIKWATA UMULIMO MU CILONGANINO CA KWA YEHOVA
4. Bushe amashiwi yaba pa Abena Roma 12:4, 5 yatusambilisha finshi?
4 Isambililo lya kubalilapo ilyo twingasambilila ku cilangililo Paulo abomfeshe lya kuti bonse fye twalikwata umulimo uwacindama mu lupwa lwa kwa Yehova. Mu cilangililo Paulo alandile, abalilepo ukulanda ukuti: “Pantu filya umubili wesu waba ne filundwa ifingi, e lyo ifilundwa fyonse tafyaba no mulimo umo wine, e fyo na ifwe, nangu twaba abengi, tuli mubili umo muli Kristu, kabili umuntu onse cilundwa ca munankwe.” (Rom. 12:4, 5) Ni mwi Paulo aloseshe ilyo alandile aya mashiwi? Aloseshe mu kuti imilimo twakwata mu cilonganino yalipusanapusana, lelo bonse twalicindama.
Imilimo twakwata mu cilonganino yalipusanapusana, lelo bonse twalicindama (Moneni paragrafu 5 ukushinta ku 12) *
5. “Fya bupe” nshi Yehova apeela icilonganino cakwe?
5 Nga mwatontonkanya pa bakwata imilimo mu cilonganino ca kwa Lesa, nalimo kuti mwabalilapo ukutontonkanya pa batungulula. (1 Tes. 5:12; Heb. 13:17) Ca cine Yehova alipeela icilonganino cakwe “ifya bupe ku bantu,” ukubomfya Kristu. (Efes. 4:8) Pali ifi “ifya bupe ku bantu” paba na baba mwi Bumba Litungulula, abo basonta ukwafwilisha Ibumba Litungulula, ababa mu Makomiti ya Musambo, bakangalila wa muputule, abasambilisha mu masukulu ya bulesa, baeluda, e lyo na babomfi batumikila. Aba bamunyinefwe bonse basontwa no mupashi wa mushilo ku kusakama impaanga sha kwa Yehova ishacindama nga nshi na ku kukosha icilonganino.—1 Pet. 5:2, 3.
6. Ukulingana na 1 Abena Tesalonika 2:6-8, finshi bamunyinefwe abasontwa no mupashi wa mushilo besha na maka ukulacita?
6 Bamunyinefwe basontwa no mupashi wa mushilo ku kubomba imilimo iyalekanalekana. Nga filya fine ifilundwa fya mubili pamo nga amaboko na molu filenga umubili onse ukunonkelamo, bamunyinefwe abasontwa no mupashi wa mushilo balabombesha pa kuti balenge icilonganino conse ukunonkelamo. Tabafwaya ukuti abantu balebalumbanya. Lelo balesha na maka ukukosha bamunyinabo na bankashi. (Belengeni 1 Abena Tesalonika 2:6-8.) Ala tulatasha Yehova pali aba bamunyinefwe abafikapo kabili abashaba na bukaitemwe!
7. Mapaalo nshi ababa mu mulimo wa nshita yonse bakwata?
7 Bamo mu cilonganino ca kwa Lesa kuti babasonta ukuba bamishonari, bapainiya baibela, nelyo bapainiya ba nshita yonse. Na kuba, bamunyinefwe bamo na bankashi mwi sonde lyonse balisalapo ukulabomba umulimo wa nshita yonse uwa kushimikila no kulenga abantu baba abasambi. Ici calilenga bafwe abengi ukuba abasambi ba kwa Kristu Yesu. Nangu ca kuti aba aba bwananyina ababomba umulimo wa nshita yonse tabakwata ifingi lwa ku mubili, Yehova alibapaala icine cine. (Marko 10:29, 30) Twalitemwa sana aba bamunyinefwe na bankashi, kabili tulatasha pa kuba nabo mu cilonganino ca kwa Lesa!
8. Mulandu nshi cila kasabankanya wa mbila nsuma acindamina kuli Yehova?
8 Bushe bamunyinefwe basontwa ukulatungulula e lyo na baba mu mulimo wa nshita yonse e bakwata fye imilimo mu cilonganino? Awe nakalya! Cila kasabankanya wa mbila nsuma alicindama kuli Lesa na ku cilonganino. (Rom. 10:15; 1 Kor. 3:6-9) Pantu na kuba, umulimo wa kulenga abantu baba abasambi ba kwa Shikulwifwe Yesu Kristu waba pa fintu ifyacindama sana ifyo icilonganino cifwile ukucita. (Mat. 28:19, 20; 1 Tim. 2:4) Bonse ababombako umulimo wa kubila imbila nsuma, bakasabankanya ababatishiwa na bashabatishiwa, bamona uyu umulimo ukuti e cintu icacindamisha mu bumi bwabo.—Mat. 24:14.
9. Cinshi tutashisha Yehova pali bankashi?
9 Yehova alipeela bankashi umulimo uwacindama mu cilonganino pa kulanga ukuti alibacindika. Alitemwa sana bankashi abaupwa, abakwata abana, abafwilwa, e lyo na bashimbe abamubombela ne cishinka. Baibolo yalilanda pa banakashi abengi abalebombela Lesa ne cishinka. Aba banakashi balilangile ukuti bali aba mano, aba citetekelo, abacincila, abashipa, bakapekape, kabili balebomba imilimo iisuma. (Luka 8:2, 3; Imil. 16:14, 15; Rom. 16:3, 6; Fil. 4:3; Heb. 11:11, 31, 35) Tulatasha sana Yehova pali bankashi ababa mu filonganino fyesu, ababa ne mibele iisuma nga nshi iyo abanakashi abengi abalembwa mu Baibolo bali nayo!
10. Cinshi twatemenwa sana abakoloci twaba nabo mu filonganino fyesu?
10 Tulatasha na pa kukwata abakoloci abengi mu cilonganino ca kwa Lesa. Mu filonganino fimo mwaliba bamunyinefwe na bankashi abakoloci ababombela Yehova ne cishinka ubumi bwabo bonse. Abakoloci bamo nalimo e lyo basambilile fye icine. Nampo nga balibombela Yehova pa myaka iingi nelyo e lyo batendeke, abakoloci abengi balalwalilila pa mulandu no mushinku. Ici kuti calenga balafilwa ukubombako imilimo imo mu cilonganino kabili nalimo te kuti balebombesha na mu mulimo wa kubila imbila nsuma. Na lyo line, aba bamunyinefwe na bankashi abakalamba balesha apo bengapesha ukubombako umulimo wa kubila imbila nsuma, kabili balabomfya amaka yabo yonse ku kukoselesha no kusambilisha bambi! Na kabili tulanonkelamo mu fyo baishiba. Ukwabula no kutwishika baliyemba kuli Yehova na kuli ifwe.—Amapi. 16:31.
11-12. Bushe abacaice mu cilonganino cenu bamukoselesha shani?
11 Tontonkanyeni na pa bacaice twakwata mu cilonganino. Balaba na mafya pantu bakulila muli cino calo icitungululwa na Satana Kaseebanya kabili umwaba abantu abengi abamukonkelela. (1 Yoh. 5:19) Na lyo line, bonse tulakoseleshiwa nga twamona abacaice baleasukapo pa kulongana no kubombako umulimo wa kubila imbila nsuma, e lyo ne fyo baba abashipa ilyo balelanda pa fyo basuminamo. Ukwabula no kutwishika mwe bacaice na imwe mwalicindama mu cilonganino ca kwa Yehova!—Amalu. 8:2.
12 Nomba bamunyinefwe na bankashi bamo cilabakosela ukusumina ukuti balicindama mu cilonganino. Cinshi cingatwafwa ifwe umo umo ukulaumfwa ukuti twalicindama mu cilonganino? Natwasuke ici cipusho.
MULEIBUKISHA UKUTI MWALICINDAMA MU CILONGANINO
13-14. Cinshi nalimo cingalenga bamo batendeka ukumona kwati tabacindama mu cilonganino?
13 Natulande pe sambililo lyalenga bubili ilyo twingasambilila ku cilangililo Paulo abomfeshe. Alilandile pa bwafya abengi bakwata muno nshiku. Abengi cilabakosela ukusumina ukuti balicindama mu cilonganino. Paulo alembele ukuti: “Ulukasa nga lwatila: ‘Ifi nshili minwe, kanshi nshili cilundwa ca mubili,’ te kutila ninshi ulukasa te cilundwa ca mubili iyo. Kabili ukutwi nga kwatila: ‘Ifi nshili linso, kanshi nshili cilundwa ca mubili,’ te kutila ninshi ukutwi te cilundwa ca mubili iyo.” (1 Kor. 12:15, 16) Finshi Paulo aletusambilisha?
14 Nga ca kuti muleilinganya kuli bambi mu cilonganino kuti mwatendeka ukumona kwati tamwacindama. Bamo mu cilonganino nalimo balasambilisha bwino, e lyo bambi balampanya bwino ifintu nelyo balabomba bwino umulimo wa bucemi. Nalimo mumona kwati te kuti mubombe nge fyo babomba. Ici cilanga fye ukuti mwali-icefya kabili mwalifuuka. (Fil. 2:3) Na lyo line, mufwile ukucenjela. Nga mwaikalila fye ukulailinganya ku bakwata ifya bupe ifyo imwe mushakwata, kuti mwafuupuka. Nalimo kuti mwatendeka fye no kulatontonkanya ukutila tamwacindama nangu panono mu cilonganino, nga fintu Paulo alandilepo. Finshi fingamwafwa ukuleka ukulaumfwa kwati tamwacindama?
15. Nga fintu Baibolo ilanda pali 1 Abena Korinti 12:4-11, finshi tulingile ukulaibukisha pa fya bupe ifyo twakwata?
15 Tontonkanyeni pali ici cishinka: Yehova apeele Abena Kristu bamo aba mu nshiku sha batumwa ifya bupe fya mupashi wa mushilo ifya kucita ifipesha amano, lelo te Bena Kristu bonse abapokelele ifya bupe fimo fine. (Belengeni 1 Abena Korinti 12:4-11.) Yehova abapeele ifya bupe ifyalekanalekana e lyo na maka ya kucita ifintu ayalekanalekana, lelo aba Bena Kristu bonse bali abacindama. Muno nshiku tatwakwata ifya bupe fya mupashi wa mushilo ifya kucita ifipesha amano nga filya Abena Kristu bamo aba mu nshiku sha batumwa bakwete. Na lyo line, tulasambililako icintu cimo icacindama. Tulasambililako ukutila nangu ca kuti ifya bupe twakwata fyalipusanapusana, bonse fye twalicindama kuli Yehova.
16. Finshi umutumwa Paulo alandile ifyo tulingile ukulakonka?
16 Mu cifulo ca kulailinganya ku Bena Kristu banensu, tulingile ukulakonka ifyo umutumwa Paulo alandile, atile: “Lelo umo na umo alange umulimo wakwe, e lyo akasansamuka pa mulimo wakwe, te kuilinganya ku muntu umbi iyo.”—Gal. 6:4.
17. Tukanonkelamo shani nga tulekonka ifyo Paulo alandile?
17 Nga tulekonka ifyo Paulo alandile kabili nga tulebika amano ku fyo tucita, kuti twatendeka ukulamona ukutila twalikwata ifya bupe ifyo abantu bambi bashakwata. Ku ca kumwenako, eluda nalimo te kuti akwate ica bupe ca kulanda bwino amalyashi pa cisebele, lelo nalimo alikwata ica bupe ca kubomba bwino umulimo wa kulenga abantu baba abasambi. Nelyo nalimo tapekanya bwino ifintu nge fyo baeluda bambi mu cilonganino bacita, lelo nalimo ni kacema wa cikuuku kabili uwatemwa bamunyinefwe na bankashi, ica kuti balatemwa ukumweba ukuti abapandeko amano ukubomfya Amalembo. Nalimo abengi balamona ukuti aliba sana ne cileela. (Heb. 13:2, 16) Nga twaishiba bwino ifya bupe twakwata, tukalaumfwa bwino ukucita ifingalenga icilonganino canonkelamo. Kabili tatwakulafimbila bamunyinefwe abakwata ifya bupe ifyapusana ne fyo twakwata.
18. Finshi tulingile ukucita pa kuti tulewamyako imisambilishishe yesu?
18 Te mulandu ne milimo twakwata mu cilonganino, bonse fye tufwile ukulaesha na maka ukulawamyako ifyo tubomba umulimo wesu e lyo ne misambilishishe yesu. Pa kuti tulewamyako ifyo tubomba iyi imilimo, Yehova alatusambilisha ukubomfya icilonganino cakwe. Ku ca kumwenako, pa kulongana kwa mu kati ka mulungu, tulasambilila ifyo twingalabomba bwino umulimo wa kubila imbila nsuma. Bushe mulabomfya ifyo tusambilila pali uku kulongana?
19. Finshi mwingacita ifingamwafwa ukufikapo ukuya kwi Isukulu lya Bakabila ba Bufumu?
19 lsukulu lya Bakabila ba Bufumu ni nshila na imbi iisuma iyo Yehova abomfya pa kutusambilisha. Bamunyinefwe na bankashi ababa mu mulimo wa nshita yonse kabili abali ne myaka 23 ukufika ku 65, kuti baya kuli ili isukulu. Nalimo kuti mwalamona kwati te kuti mufikepo ukuya kuli ili sukulu. Nomba mu cifulo ca kulabika amano ku fingalenga mwafilwa ukuya kuli ili sukulu, mufwile ukubika amano ku fingalenga mulefwaya ukuyako. Lyena mulingile ukutantika ifya kucita pa kuti mukafikepo pa fifwaikwa ukuya kuli ili sukulu. Nga mwabombesha ukukonka ifyo mwatantika, Yehova akamwafwa kabili mukacita ifyo mumona kwati te kuti mukumanishe.
MULEBOMFYA IFYA BUPE MWAKWATA KU KUKOSHA ICILONGANINO
20. Finshi twingasambilila ku fyaba pa Abena Roma 12:6-8?
20 Isambililo lyalenga butatu ilyo twingasambilila ku cilangililo Paulo abomfeshe lyaba pa Abena Roma 12:6-8. (Belengeni.) Na pali ili line ilembo Paulo alilandile pa cishinka ca kuti aba mu cilonganino balikwata ifya bupe fyaibela. Nomba alandile sana pa cishinka ca kuti tulingile ukulabomfya ifya bupe twakwata ku kukuula no kukosha icilonganino.
21-22. Finshi twingasambilila kuli ba Robert na ba Felice?
21 Tontonkanyeni pali munyinefwe Robert. * Pa numa ya kubombela mu calo cimbi, ba Robert balibebele ukuya mu kubombela pa Bethel ya mu calo cabo. Nangu ca kuti bamunyinefwe balilondolwelele ba Robert ukuti tapali ico balufyenye icalengele babapeele umulimo umbi, ba Robert batile: “Pa myeshi iingi nshaleba ne nsansa pantu nalemona kwati nalifililwe ukubomba bwino umulimo bampeele pa kubala uwa kubombela ku calo cimbi. Inshita shimo nalefwaya no kuleka ukubombela pa Bethel.” Finshi fyalengele ba Robert babe ne nsansa na kabili? Eluda munabo alibebukisheko ukuti icalengele Yehova atupeele imilimo imo ni co alefwaya ukutusambilisha ifya kubomba bwino umulimo atupeela pali ino nshita. Ba Robert balilwike ukuti balingile ukuleka ukubika sana amano ku mulimo balebomba kale, no kutendeka ukulabika amano ku fyo bengabomba bwino umulimo babapeela pali ino nshita.
22 Ifyacitikiile munyinefwe Felice Episcopo fyalipalana ne fyacitikile munyinefwe Robert. Ba Felice na bena mwabo bapwishishe Isukulu lya Gileadi mu 1956 kabili baile mukubomba bukangalila bwa muputule mu Bolivia. Mu 1964 balikwete umwana. Ba Felice batile: “Calitukosele ukuleka ukubomba umulimo uo twatemenwe nga nshi. Ukulanda fye icishinka nalifuupwike nalimo pa mwaka umo. Lelo Yehova alingafwile, nalilekele ukumfwa ububi kabili natendeke ukubika amano ku mulimo nakwete uwa kukusha umwana.” Bushe na imwe mumfwa nge fyo ba Robert nelyo ba Felice baleumfwa? Bushe mulomfwa ububi pa mulandu wa kuti pali ino nshita tamubomba umulimo uo mwalebomba kale? Nga ca kuti mulomfwa ububi, kuti mwaba ne nsansa nga mwaleka ukubika sana amano ku mulimo mwalebomba kale, no kulabika amano ku fyo mwingacita pali ino nshita pa kuti mulebombela Yehova na bamunyinenwe. Lyonse mulebomfya ifya bupe mwakwata kukwafwa bambi, kabili mukaba ne nsansa ilyo mulekoselesha aba mu cilonganino.
23. Finshi tufwile ukulatontonkanyapo sana, kabili finshi tukasambilila mu cipande cikonkelepo?
23 Bonse fye twalicindama kuli Yehova. Afwaya twaba mu lupwa lwakwe. Nga tuletontonkanya pa fyo twingacita pa kuti tulekoselesha bamunyinefwe na bankashi kabili nga tulecita ne fyo fine, tatwakulaumfwa kwati tatwacindama mu cilonganino! Nomba tufwile ukulamona shani aba mu cilonganino? Kuti twalanga shani ukuti twalibatemwa kabili twalibacindika? Mu cipande cikonkelepo tukasambilila pa fyo tufwile ukulamona aba bwananyina, e lyo ne fyo twingalanga ukuti twalibatemwa kabili twalibacindika.
ULWIMBO 24 Iseni ku Lupili lwa kwa Yehova
^ para. 5 Bonse fye tulafwaya ukulaumfwa ukuti twalicindama kuli Yehova. Nomba inshita shimo kuti twalaumfwa kwati tatwacindama mu cilonganino. Cino cipande calalenga tushininkishe ukuti bonse twalicindama mu cilonganino.
^ para. 3 UBULONDOLOSHI: Amashiwi ya kuti umulimo twakwata mu cilonganino ca kwa Yehova, yalelosha ku fyo ifwe umo umo twingacita pa kulenga icilonganino caba icakosa. Bonse fye kuti twalenga icilonganino ukukosa te mulandu no mushobo wesu, umutundu wesu, indalama isho twakwata, intambi shesu, nelyo amasambililo twasambilila.
^ para. 21 Amashina yamo nabayalula.
^ para. 63 UBULONDOLOSHI BWA FIKOPE: Ifikope fitatu filelanga ificitika ilyo ukulongana kushilatendeka, pa kulongana, e lyo na pa numa ya kulongana. Icikope ca Kubalilapo: Eluda ali ne nsansa ilyo aleposha uwishile mu kulongana, munyinefwe wacaice alekulika ifisoselo, e lyo nkashi umo alelanshanya na nkashi umukalamba. Icikope Calenga Bubili: Abaice na bakalamba nabemya amaboko pa kuti basukepo pe Sambililo lya Ulupungu lwa kwa Kalinda. Icikope Calenga Butatu: Abaupana balebombako umulimo wa kuwamya Ing’anda ya Bufumu. Umufyashi umwanakashi aleafwa umwana ukubika indalama mu kabokoshi ka misangulo. Munyinefwe wacaice alebombela ku mpapulo, kabili munyinefwe umbi alekoselesha nkashi umukalamba.
