Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Ilyo abafyashi abalebeshi baleyafwa abana babo, mulandu nshi balingile ukutontonkanishisha na pa lulimi?

Abana benu basambilila ukulanda ululimi balanda mu calo muleikala ku sukulu na ku bantu bambi. Abana kuti banonkelamo nga basambilila indimi shibili. Abafyashi balingile ukumona nga ca kuti abana kuti baishiba bwino icine no kulundulula nga bali mu cilonganino icilanda ululimi lwa mu calo bekala nelyo nga bali mu cilanda ululimi lwa ku calo bafuma. Abafyashi Abena Kristu balingile ukubika amano ku fingafwa abana babo mu fya kwa Lesa ukucila ukubika fye amano ku fyo abafyashi abene balefwaya.—w17.05, amabu. 9-11.

Ilyo Yesu aipwishe Petro ati: “Bushe Walintemwa Ukucila Isabi Ili?” aloseshe mwi? (Yoh. 21:15)

Cimoneka kwati Yesu alelanda pe sabi ilyali mupepi nelyo pa bulondo. Pa numa ya mfwa ya kwa Yesu, Petro alibwelele ku mulimo wa kwipaya isabi. Abena Kristu balingile ukumona nga ca kuti incito e yo babika intanshi mu bumi bwabo.—w17.05, amabu. 22-23.

Mulandu nshi Abrahamu aebele umukashi wakwe ukulanda ukuti ali ni nkashi yakwe? (Ukute. 12:10-13)

Ca cine Sara ali ni nkashi ya kwa Abrahamu. Nga ca kuti Sara alilandile ukuti ali mukashi wa kwa Abrahamu, nalimo Abrahamu nga balimwipeye kabili nga takwete umwana uo Lesa amulaile.—wp17.3, amabu. 14-15.

Bushe Elias Hutter alecita shani pa kusambilisha abantu abalefwaya ukusambilila iciHebere?

Alefwaya ukwafwa abasambi bakwe ukwishiba ubupusano bwali pa kwafumine ishiwi lya ciHebere ilya mu Baibolo e lyo na mashiwi balundako ifilembo ku kwamba kwe shiwi nelyo ku mpela. Alelemba amashiwi ukubomfya ifilembo ifyatikama, e lyo ifilembo fimbi ifyo balunda kuli ilyo ishiwi alefilemba mu filembo ifyabula ukutikama. Ifi fine e fyo bacita na mu mafutunoti ya muli Baibolo ya New World Translation of the Holy Scriptures—With References.—wp17.4, amabu. 11-12.

Finshi fingafwa Umwina Kristu ukwishiba nga kuti akwata imfuti ya kuicingila ku bantu banankwe?

Fimo ifingamwafwa: Lesa amona ukuti ubumi bwa mushilo. Yesu taebele abasambi bakwe ukusenda impanga pa kuicingilila. (Luka 22:36, 38) Tulingile ukufula impanga shesu ukuti shibe baplao. Ubumi bwalicindama sana ukucila pa fyo twakwata. Twalicindika kampingu ya bantu bambi, kabili tufwaya abantu baletupashanya. (2 Kor. 4:2)—w17.07, amabu. 31-32.

Mulandu nshi ifyo Mateo alembele pa bumi bwa kwa Yesu ilyo ali umwaice fyapusanina ne fyo Luka alembele?

Mateo alembele sana pa fyacitike ifyakumine Yosefe, pamo nga ifyo Yosefe acitile ilyo aishibe ukuti Maria ali ne fumo ne fyo malaika amucincishe ukufulumukila ku Egupti ne fyo amwebele ukubwelelamo ku Israele. Luka ena alembele sana pa fyacitike ifyakumine Maria. Ku ca kumwenako, ifyo Maria atandalile lupwa lwakwe Elisabete e lyo ne fyo acitile ilyo Yesu ashele pe tempele.—w17.08, ibu. 32.

Finshi fimo ifyali no kulenga Baibolo itwalilila ukubako?

Mu kupita kwa nshita amashiwi babomfeshe no bupilibulo bwa mashiwi yamo ayo balembele mu Baibolo fyalyalwike. Ukwaluka kwa mitekele limo limo kwalilenga abantu baleka ukulanda ululimi balelanda pa nshita imo no kutendeka ukulanda ululimi lumbi. Kwali abalelesha abantu ukupilibula Baibolo mu ndimi isho abantu yaweyawe balelanda.—w17.09, amabu. 19-21.

Bushe Twalikwata Malaika Uutulinda?

Iyo. Yesu alandile ukuti bamalaika ba basambi bakwe balemona icinso ca kwa Lesa. (Mat. 18:10) Aloseshe mu kuti bamalaika balabika sana amano ku basambi bakwe, taloseshe mu kuti cila muntu alikwata malaika uumucingilila.—wp17.5, ibu. 5.

Kutemwa kwa musango nshi ukwacila ukutemwa konse?

Kutemwa ukutungululwa na mashiwi ya kwa Lesa ayaba mu Cebo cakwe (a·gaʹpe), e kwacila pa kutemwa konse. Umuntu uwakwata ukutemwa kwa musango uyu tapelela fye pa kumfwa ukuti alitemwa abantu, lelo alacitapo fimo ifilanga ukuti alibatemwa.—w17.10, ibu. 7.