1. Mulandu nshi ulubatisho lwacindamina? (Moneni icikope pa muulu.)

CILA mwaka abasambi ba Baibolo abengi nga nshi balabatishiwa. Abengi ababatishiwa, bacaice abali ne myaka ukutendekela pali 9 ukufika pali 19. Bamo nalimo bakulila mu ndupwa sha ba Nte. Bushe na iwe walibatishiwa? Nga walibatishiwa ninshi walicita bwino. Umuntu alingile ukubatishiwa pa kuti abe Umwina Kristu, kabili ulubatisho lwalicindama nga ulefwaya ukwisapusuka.—Mat. 28:19, 20; 1 Pet. 3:21.

2. Mulandu nshi umuntu ashilingile ukutiinina ukuiipeela kuli Yehova?

² Nangu ca kuti nga twabatishiwa kuti twapaalwa sana, kwaliba ifyo tulingile ukulakonka. Cinshi twalandila ifi? Pa bushiku wabatishiwe, walyaswike ukuti ee kuli ici cipusho, “Pa mulandu we lambo lya cilubula ilya kwa Yesu Kristu, bushe namulapila ku membu shenu no kuipeela kuli Yehova ku kucita ukufwaya kwakwe?” Ilyo wabatishiwe, walangile ukuti waliipeele kuli Yehova. Ilyo waipeele kuli Yehova walimulaile ukuti wakulamutemwa  kabili wakulabika intanshi ukufwaya kwakwe. Ukuipeela te cintu ca kusenda buyefya buyefya. Bushe ufwile ukulalanguluka icalengele ukuti uipeele kabili ubatishiwe? Awe, taulingile ukulalanguluka. Tawalufyenye ukuleka Yehova alekutungulula. Natulangilile! Umuntu uushifwaya ukutungululwa na Yehova, atungululwa na Satana. Satana Kaseebanya tafwaya ukuti ukapusuke. Na kuba kuti atemwa sana nga waba ku lubali lwakwe no kukaana imitekele ya kwa Yehova pa kuti wikapokelela umweo wa muyayaya.

3. Mapaalo nshi yaba mu kuipeela kuli Yehova?

³ Apo waliipeela kabili walibatishiwa, tontonkanya pa mapaalo wakwata. Ifi waipeela kuli Yehova, kuti walanda ukufuma pa nshi ya mutima ukuti: “Yehova ali na ine; nshakatiine. Cinshi ico umuntunse engancita?” (Amalu. 118:6) Takuli nangu cimo icingacila pa kuba ku lubali lwa kwa Lesa no kwishiba ukuti alikutemwa.

4, 5. (a) Mulandu nshi twingalandila ukuti umuntu umwine e ufwile ukuisalila ukuipeela kuli Yehova? (b) Mafya nshi ayo abacaice na bakalamba bakwata?

⁴ Apo walibatishiwa, bucibusa bobe na Yehova tabwaba nge cipe ca lupwa nelyo impanga ya lupwa iyo wingapyana. E ico, we mwine ni we ufwile ukulabombela ipusukilo lyobe, nangu ca kuti ucili wikala pa bafyashi bobe. Mulandu nshi uo ulingile ukulaibukishisha ici cishinka? Pantu te lyonse wingeshiba amafya ukakwata ku ntanshi. Ku ca kumwenako, nga ca kuti wabatishiwa ninshi uli ne myaka pa kati ka 9 na 13, ilyo wileulekula kuti watendeka ukukwata amafya ayo ushalekwata kale kabili ne fyo umfwa fikaluka. Umukashana uuli ne myaka 18 atile: “Ilingi line umwana umunono te kuti omfwe ububi ukuti ni Nte ya kwa Yehova pa mulandu fye wa kuti ilyo ali ku sukulu taliileko keke iyo bapangiile uwalesefya ubushiku bwa kufyalwa. Nomba nga akulako panono, insuuna ya kufwaya ukulaala no muntu ilakula, kanshi alingile ukushininwa sana ukuti amafunde ya kwa Yehova kuti yamucingilila nga aleyakonka.”

⁵ Kwena te bacaice fye beka abakwata amafya pa numa ya kubatishiwa, lelo na babatishiwe ninshi bakalamba nabo bene balakwata amafya ayengi ayo bashaleenekela ukutila kuti yalenga bafilwa ukutwalilila ukuba ne citetekelo cakosa. Limo kuti yaba mafya mu fyupo, ukulwala, nelyo ukweshiwa pa ncito. Kanshi bonse fye, nampo nga baice nelyo bakalamba, balakwata amafya ayo bengacimfya fye nga baba ne cishinka kuli Yehova.—Yako. 1:12-14.

6. (a) Apo waliipeela kuli Yehova, calola mwi ukulamubombela lyonse? (b) Finshi wingasambilila pe lembo lya Abena Filipi 4:11-13?

⁶ Pa kuti lyonse uleba uwa cishinka kuli Yehova, uleibukisha ukuti waliipeela ukucita ukufwaya kwakwe nangu ifintu fyafye shani. Ici cilolele mu kuti, walyeba Kateka wa muulu ne sonde ukuti ukatwalilila ukumubombela nangu ifibusa nelyo balupwa baleka ukumubombela. (Amalu. 27:10) Kanshi ulingile ukulalomba Yehova ukuti alekwafwa ukufishapo umulapo walapa kuli ena.—Belengeni Abena Filipi 4:11-13.

7. Ni mwi calola ukubombela ipusukilo lyobe “no mwenso no kututuma”?

⁷ Yehova afwaya ukuti ube cibusa wakwe. Lelo ulingile ukubombesha pa kuti utwalilile ukuba cibusa wakwe na pa kuti ubombele ipusukilo lyobe. Na kuba pa Abena Filipi 2:12 patila: “Mulebombela ipusukilo lyenu no mwenso no kututuma.” Aya mashiwi yalangilila ukuti ulingile ukutontonkanya pa fyo ulingile ukucita pa kuti ukatwalilile ukuba cibusa wa kwa Yehova no kuba ne cishinka kuli ena nangu  ifintu fyafye shani. Taulingile ukuicetekela sana. Nangu fye bantu bamo ababombela Lesa pa myaka iingi balaleka ukuba aba cishinka. Nomba finshi ulingile ukucita pa kuti ulebombela ipusukilo lyobe?

8. Finshi ufwile ukucita ilyo uleisambilisha, kabili mulandu nshi ulingile ukulacitila ifi?

⁸ Pa kuti utwalilile ukuba cibusa wa kwa Yehova ulingile ukulakutika kuli ena no kulalanda nankwe. Nga tuleisambilisha Baibolo ninshi tulekutika kuli Yehova. Kanshi ulingile ukulabelenga Icebo cakwe ne mpapulo ishilanda pali Baibolo e lyo no kulatontonkanya sana pa fyo ulebelenga. Ilyo ulecita ifi, uleibukisha ukuti taulingile fye ukuswatila ifishinka ifyo Baibolo isambilisha nga filya wingacita ku sukulu pa kuti ukapite amashindano. Ilyo uleisambilisha ulingile ukufwailapo ifishinka na fimbi no kwishibilapo na fimbi pa fyo Yehova aba. Nga ulecita ifi ukapalama sana kuli Lesa, kabili na o akapalama kuli iwe.—Yako. 4:8.

9. Finshi wabomfyapo pa kuisambilisha Baibolo?

⁹ Icilonganino ca kwa Yehova calipekanya impapulo ishingi ishingakwafwa ukuisambilisha bwino Baibolo. Ku ca kumwenako, kuti waya pa jw.org/bem e lyo watinika pa “Imisepela.” Mu cipande citila “Ifingamwafwa Ukusambilila Baibolo,” mwaliba amasambililo ayengakwafwa ayalanda pa fyalecitika kale ifyo Baibolo yalandapo. Na kabili pa jw.org/bem paliba icipande citila ifya kubomfya pa kusambilila, kabili mu kati mwaba ifipande ifinono ifitila “Bushe Cinshi Baibolo Isambilisha?” kuti fyakwafwa ukushininkisha ukuti ifyo wasuminamo fya cine. Ifyaba muli ici cipande kuti fyakwafwa ukwishiba ifyo wingalondolwela bambi ifyo wasuminamo. Kuti wabomfyako ne fyaba mu cipande icitila “Abacaice Bepusha Ukuti . . . Kuti Nacita Shani pa Kuti Ndeipakisha Ukubelenga Baibolo?” icaba muli Loleni! iya July 2009. Nga ulebelenga no kutontonkanya sana pa fyo ulebelenga cikalenga ukalebombela ipusukilo lyobe.—Belengeni Amalumbo 119:105.

10. Mulandu nshi Umwina Kristu uwabatishiwa alingile ukulapepela?

¹⁰ Tulakutika kuli Yehova nga tuleisambilisha Baibolo, lelo tulanda nankwe nga tulepepa kuli ena. Umwina Kristu talingile  ukupepela fye ico cine nelyo ukulamona kwati ipepo cishimba icingalenga alatunguluka mu fyo alecita. Lelo ipepo e nshila tulandilamo na Kabumba wesu. Yehova alafwaya ukukutika kuli iwe. (Belengeni Abena Filipi 4:6.) Nga wasakamana pali fimo, ufwile ukucita ifyo Baibolo itufunda, itila “Poosa icisendo cobe pali Yehova.” (Amalu. 55:22) Bushe walicetekela aya mashiwi? Bamunyinefwe na bankashi abengi nga nshi kuti bakweba ukuti ipepo lyalibafwa. Na iwe kuti lyakwafwa!

11. Mulandu nshi ulingile ukulatashisha Yehova lyonse?

¹¹ Taulingile fye ukulapepa ilyo ulefwaya ukuti Yehova akwafwe. Baibolo itila: “Muletootela.” (Kol. 3:15) Inshita shimo kuti twabika sana amano ku mafya tukwete ica kuti twalaba na mapaalo ayengi ayo tukwata. Nalimo kuti wapanga ukuti cila bushiku wakulatasha pa fintu nalimo fitatu ifyo Yehova akucitiile. Lyena mutashe mwi pepo pali ifyo fine fitatu. Abigail uuli ne myaka 18 uwabatishiwe ilyo ali ne myaka 12, atile: “Imona ukuti Yehova alilinga ukutasha ukucila uuli onse ku muulu na pano isonde. Tulingile ukumutasha lyonse pa fyo atupeela. Nalyumfwileko amashiwi yamo ayasuma aya kuti: Nga ca kuti ifyo twatashishapo Yehova buno bushiku e fyo tukakwata ubushiku bukonkelepo, fintu finga twingakwata?”

12, 13. Mulandu nshi cacindamina ukulatontonkanya pa busuma bwa kwa Yehova ubo wasonda?

¹² Imfumu Davidi iyo Yehova ayafwile ilyo yakwete amafya ayakalamba, yaimbile aiti: “Sondeni no kumona ukuti Yehova musuma, alipaalwa umuntu uuba muli ena.” (Amalu. 34:8) Ici cikomo cilanga ico cacindamina ukuimwena ubusuma bwa kwa Yehova. Ilyo ulebelenga Baibolo ne mpapulo shesu na lintu uli pa kulongana, ulomfwa ifyo Lesa ayafwa abantu bamo ukutwalilila aba cishinka. Lelo ilyo uleya ulekulilako mu fya kwa Lesa, ulingile ukulaimwena we mwine ifyo Yehova akwafwa. Bushe walisonda ubusuma bwa kwa Yehova?

¹³ Kwaliba inshila imo iyo Abena Kristu bonse basondelamo ubusuma bwa kwa Yehova. Bonse Lesa alibeta ukupalama kuli ena na ku Mwana wakwe. Yesu atile: “Takuli uwingesa kuli ine kano Tata uwantumine, amukula.” (Yoh. 6:44) Bushe umona ukuti Yehova alikukula? Uwacaice nalimo kuti atontonkanya ukuti, ‘Yehova akulile abafyashi bandi, ine nabakonkele fye.’ Nomba ilyo waipeele kuli Yehova no kubatishiwa wabatishiwa, waishileba cibusa wakwe. Kabili nomba Yehova alikwishiba. Baibolo itweba aiti: “Ngo muntu atemwa Lesa, uyu e waishibikwa kuli ena.” (1 Kor. 8:3) E ico uletasha pa mulimo Yehova akupeela mu cilonganino cakwe.

14, 15. Bushe umulimo wa kubila imbila nsuma kuti walenga shani icitetekelo cobe cakoselako?

¹⁴ Inshila na imbi wingasondelamo ubusuma bwa kwa Yehova ni lintu alekwafwa ukuba uwashipa ilyo ulebila imbila nsuma ku fifulo fimbi e lyo na pa sukulu. Abacaice bamo cilabakosela ukubila imbila nsuma kubo basambilila nabo. Nalimo na iwe ulomfwa umwenso pantu te kuti wishibe ifyo abanobe balacita nga wabebako pa fyo wasuminamo. Kuti cakwafya sana ukulanda kwi bumba ilikalamba ukucila ifyo cingakwafya ukulanda na uo usambilila nankwe. Finshi fingakwafwa?

¹⁵ Ica kubalilapo, ulingile ukutontonkanya pa calenga ushininkishe ukuti ifyo wasuminamo fya cine. Bushe pa jw.org paliba icipande icinono icitila ifya kubomfya pa kusambilila mu lulimi ulanda? Nga ca kuti tawaishiba nga  e po caba, kuti wayafwaya pa jw.org. Ici cipande bacilembela ukukwafwa ukulatontonkanya pa fyo wasuminamo, icalenga usuminine ifyo wasuminamo, ne fyo wingalanda pa kwebako bambi ifyo wasuminamo. Nga ca kuti washininwa sana kabili waipekanya bwino, ukalafwaya ukwebako bambi pe shina lya kwa Yehova.—Yer. 20:8, 9.

16. Finshi wingacita pa kuti wilashimunuka ukulanda pa fyo wasuminamo?

¹⁶ Kwena, nangu nauipekanya kuti washimunuka ukulanda pa fyo wasuminamo. Nkashi uuli ne myaka 18 uwabatishiwe ilyo ali ne myaka 13, atile, “Nalishiba ukuti ifyo nasuminamo e cine, lelo limo cilankosela ukulanda ifyo mpekenye.” Bushe acita shani? Atile, “Nanda kwati ndeshimika fye ilyashi. Abo nsambilila nabo tabomfwa umwenso pa kulanda ifyo bacita. Kanshi na ine nshifwile ukumfwa umwenso. E ico nanda fye amashiwi ayanono pamo nga, ‘bulya bushiku nalesambilisha abantu Baibolo, kabili . . . ’ Lyena ndakonkanyapo ukushimika ilyashi nacilashimika. Nangu ca kuti ilyashi nacilabashimikila te lya pali Baibolo, ilingi line bamo balafwaya ukwishiba ifyo ncita ilyo ndesambilisha abantu Baibolo. Inshita shimo balanjipusha amepusho pali Baibolo. Nga nacita ifi imiku iingi, cilanyangukila ukubebako ifyo nasuminamo. Nga nacita ifi, ndofwa bwino sana!”

17. Bushe ifyo umona ifyo wasuminamo kuti fyakwafwa shani ukulaebako bambi ukwabula umwenso?

¹⁷ Nga ulecita ifilanga ukuti naucindika abo ulelanda nabo, kabili naubabikako amano, nalimo kuti batemwa ukukutika. Olivia uuli ne myaka 17 uwabatishiwe ilyo ali ne myaka pa kati ka 9 na 13 atile: “Nalemona kwati nga nalanda pali Baibolo abantu bakulamona kwati nalicilamo fye ukulanda pali Baibolo.” Pa numa alyalwike. Mu nshita ya kuti aletontonkanya fye pa fyo bambi bengamumona, Olivia atontonkenye ukuti: “Abacaice abengi nga nshi tabaishiba nangu fimo pa Nte sha kwa Yehova. Ni fwe fye baishiba. Kanshi ifyo tucita kuti fyalenga basumina nelyo bakaana ifyo tulebeba. Kuti twacita shani nga ca kuti tuli ba nsoni nelyo tulafilwa ukulanda ifyo twasuminamo pa mulandu wa mwenso, nelyo tulafilwa ukulanda bwino nga twatendeka ukulanda pa fyo twasuminamo? Lyena kuti bamona kwati tatwatemwa ukuba Inte sha kwa Yehova. Nalimo kuti bakaana no kukutika pa mulandu wa kuti tatuicetekele ilyo tulelanda. Nomba nga natushininkisha ifyo twasuminamo kabili tulelanda ukwabula umwenso, no kulalandapo lyonse, abantu kuti batucindika.”

18. Finshi ulingile ukucita pa kuti ulebombela ipusukilo lyobe?

¹⁸ Nga fintu twasambilila, ukubombela ipusukilo lyobe te cintu ca kusenda buyefya buyefya. Ulingile ukulabelenga Icebo ca kwa Lesa no kulatontonkanyapo sana, ulingile ukulapepa kuli Yehova, no kulatontonkanya pa fyo Yehova akupaala. Nga uleibikilishako ukucita ifi, tawakulatwishika ukuti Yehova ni cibusa obe. Ici cikalenga ukaleebako bambi ifyo wasuminamo.—Belengeni Amalumbo 73:28.

19. Mulandu nshi ulingile ukuibikilishishako ukubombela ipusukilo lyobe?

¹⁹ Yesu atile: “Umuntu nga alefwaya ukunkonka, aikaane umwine, asende icimuti cakwe ica bucushi, e lyo alenkonka.” (Mat. 16:24) Kanshi, Umwina Kristu alingile ukuipeela no kubatishiwa pa kuti abe umusambi. Lelo nga mwaipeela no kubatishiwa mwabatishiwa, kuti mwapaalwa pali nomba kabili mukapokelela umweo wa muyayaya mu calo cipya ica kwa Lesa. Kanshi mulingile ukutwalilila ukubombela ipusukilo lyenu!