Bushe mwalibelenga bwino bwino magazini ya Ulupungu lwa kwa Kalinda iya uno mwaka? Moneni nga kuti mwa-asuka aya mepusho:

Bushe tufwile ukulamona shani Abena Kristu basubwa?

Tulatasha pa fyo baba sana ne citetekelo; lelo tatubacindika ukucila mu cipimo. Tatubamona ukuti ‘balicindama’ ukucila bambi. (Yuda 16) Tatubepusha amepusho ayo tushikwetepo insambu pamo nga ifyo cali pa kuti basubwe.—w20.01, ibu. 29.

Finshi fingalenga mwashininkisha ukuti Yehova alimubikako amano?

Baibolo itila Yehova alimumwene ilyo mushilafyalwa. Kabili alakutika amapepo yenu. Yehova aleshiba ifili mu mutima wenu, kabili aleshiba ne fyo muletontonkanya. Kabili ifyo mucita kuti fyalenga Yehova alasekelela nelyo kuti fyalenga aba no bulanda. (1 Imila. 28:9; Amapi. 27:11) Alilenga mwapalama kuli ena.—w20.02, ibu. 12.

Kuti twaishiba shani inshita ya kulanda ne nshita ya kwikala tondolo?

Tulatemwa sana ukwebako abantu pali Yehova. Nga twamona ukuti uwa bwananyina atendeka ukucita ifingalenga acita ulubembu, tulingile ukulanda nankwe. Baeluda balasala inshita yalinga pa kulanda no wa bwananyina nga bamona ukuti alekabila ukumufunda. Tatulingile ukwipusha (nelyo ukwebako bambi) pa fyo aba bwananyina babomba umulimo wa kubila imbila nsuma mu calo umo babinda umulimo wesu. Tatulingile ukwebako bambi ifyebo fya nkama.—w20.03, amabu. 20-21.

Bushe makanta uo Baibolo yalandapo muli Yoele icipandwa 2 apusana shani na uo balandapo mu Ukusokolola icipandwa 9?

Baibolo pali Yoele 2:20-29 itila Lesa ali no kutamfya makanta kabili alilaile no kuti ali no kubwesha ifyo makanta aliile. Lyena alipongolwelele umupashi wakwe pa bantunse bonse. Ifi fyalifikilishiwe ilyo abena Babiloni basanshile abena Israele. Ukusokolola 9:1-11, kulanda pa babomfi ba kwa Yehova abasubwa ukuti baba nga makanta, ilyo balebila ubupingushi bwa kwa Lesa ubwakuma cino calo icabipa, kabili ici cilalenga abaitumpa mu fya calo baumfwa ububi.—w20.04, amabu. 3-6.

Ni bani bemininako imfumu ya ku kapinda ka ku kuso pali ino nshita?

Buteko bwa Russia na mabuteko ya fyalo ifibombela pamo nabo. Bulacusha sana abantu ba kwa Lesa, bwalibinda umulimo wa kubila imbila nsuma kabili bulacita ifilanga ukuti bwalipata Inte sha kwa Yehova. Imfumu ya ku kapinda ka ku kuso ilalwishanya ne mfumu ya ku kapinda ka ku kulyo.—w20.05, ibu. 13.

Bushe imibele 9 iyo Baibolo yalandapo pa Abena Galatia 5:22, 23 e “fisabo fya mupashi” fye epela?

Awe. Umupashi wa mushilo kuti watwafwa ukuba ne mibele iisuma na imbi, pamo nga ubulungami. (Efes. 5:8, 9)—w20.06, ibu. 17.

Bubi nshi bumo ubwaba mu kubika ifikope, ifyebo na mavidio pa Intaneti ifilelanda pali imwe?

Nalimo ifyo mubika pa Intaneti te kuti filenge abantu balamona ukuti mwali-icefya lelo kuti fyalenga balamona ukuti mulayumfwa.—w20.07, amabu. 6-7.

Finshi bakabila ba mbila nsuma bengasambilila ku balondo abaishiba bwino ukubomba umulimo wa kwipaya isabi?

Ilingi line abalondo baya uko beshibe ukuti eko isabi lingasangwa kabili baya pa nshita bengalisanga. Balasambilila ifya kubomfya bwino ifyo babomfya pa kwikata isabi. Balaba abashipa ilyo balebomba umulimo wabo na lintu ifintu fishili bwino. Ifi fine e fyo na ifwe tulingile ukucita ilyo tulebila imbila nsuma.—w20.09, ibu. 5.

Finshi fimo ifyo twingacita pa kuti twafwe abasambi ba Baibolo ukutemwa sana Yehova?

Tulingile ukubakoselesha ukulabelenga Baibolo cila bushiku no kulatontonkanya sana pa fyo balebelenga. Kabili tulingile no kubasambilisha ifya kupepa.—w20.11, ibu. 4.

Ni bani baba pabo Baibolo ilanda ukuti: “E fyo na bonse bakalengelwa aba mweo muli Kristu”?—1 Kor. 15:22.

Umutumwa Paulo talandile ukuti abantunse bonse bakabuushiwa. Alelanda pa Bena Kristu basubwa, “abasangululwa muli Kristu Yesu.” (1 Kor. 1:2; 15:18)—w20.12, amabu. 5-6.

Finshi abasubwa bakacita pa numa ya ‘kwalulwa mu kukapakapa kwa linso, ilyo ipenga lya kulekelesha likalila’?—1 Kor. 15:51-53.

Bakabombela pamo na Kristu ukucema abantu ukubomfya inkonto ya cela. (Ukus. 2:26, 27)—w20.12, amabu. 12-13.