Bushe mwalibelenga bwino bwino magazini ya Ulupungu lwa kwa Kalinda iya uno mwaka? Moneni nga kuti mwa-asuka aya mepusho:

Bushe amashiwi ya kuti Yehova “wa nkumbu nga nshi” na ya kuti “wa luse” ayaba pali Yakobo 5:11 yalenga twacetekela cinshi?

Twalishiba ukuti apo Yehova wa luse, alafwaisha ukutwelela nga twalufyanya. Yakobo 5:11 itweba no kuti alafwaisha ukutwafwa nga twaba na mafya. Nga ca kuti twaba no luse ninshi tulepashanya Yehova uwaba no luse.—w21.01, ibu. 21.

Cinshi Yehova abikileko bumutwe?

Icalenga Yehova abikeko bumutwe ni co alitemwa ulupwa lwakwe. Bumutwe bulalenga mu lupwa lwa kwa Yehova mwaba umutende kabili umwabula icimfulunganya. Aba mu lupwa abakonka ifi baleshiba uulingile ukupingula ifya kucita e lyo no uulingile ukushininkisha ukuti ifyo bapingula fyabombelwapo.—w21.02, ibu. 3.

Cinshi Abena Kristu bafwile ukubela abacenjela ilyo balebomfya amaprogramu ya kutumishanishishanyapo amameseji ukubomfya Intaneti?

Umwina Kristu nga asalapo ukulabomfya amaprogramu ya kutumishanishishanyapo amameseji afwile ukushininkisha ukuti asala bwino aba kutumishanya nabo. Nomba Taca-anguka ukusala ifibusa ifisuma, maka maka nga mwaba mwi bumba ilikalamba ilya kutumishanishishanyapo amameseji. (1 Tim. 5:13) Kuti twalalanda pa malyashi ayo tushishibe bwino nelyo ukubomfya amabumba ya kutumishanishishanyapo ifyebo ku kucitilapo amakwebo.—w21.03, ibula. 31.

Cinshi Lesa asuminishishe ukuti Yesu acule no kufwa?

Ica kubalilapo, Yesu alingile ukukulikwa pa cimuti pa kuti alubule abaYuda ku citiipu. (Gal. 3:10, 13) Icalenga bubili ca kuti Yehova alemusambilisha ifyo ali no kwisabomba umulimo uwa kuba Shimapepo Mukalamba. Ne calenga butatu ca kuti filya Yesu atwalilile ukuba uwa cishinka mpaka imfwa fyalenga caishibikwa ukuti abantu kuti batwalilila ukuba aba cishinka te mulandu na mafya. (Yobo 1:9-11)—w21.04, amabu. 16-17.

Cinshi mwingacita nga ca kuti abantu tabasangwa pa ng’anda ilyo mulebila imbila nsuma?

Kuti muleya mu kubila imbila nsuma pa nshita nalimo bengaba pa mayanda yabo. Mule-eshako no kuya mu kubila imbila nsuma ku fifulo ifyapusanapusana. Na kabili mule-eshako inshila shimbi isha kubililamo imbila nsuma pamo ukulemba amakalata.—w21.05, amabu. 15-16.

Bushe umutumwa Paulo aloseshe mwi ilyo alandile ukuti: “Mu mafunde e mo nafwilile ukuti nitekwa ku mafunde”? (Gal. 2:19)

Amafunde ya kwa Mose yalengele bumpulamafunde bwa bantunse ukumoneka kabili yaletungulula abena Israele kuli Kristu. (Gal. 3:19, 24) Ici calengele Paulo ukucetekela Kristu. Kanshi Paulo alifwile mu mafunde kabili alilekele ukuyakonka.—w21.06, ibu. 31.

Finshi ifyo Yehova ashipikishako?

Yehova alishipikisha pa fyo baseebanya ishina lyakwe, ifyo abantu abengi bamukaana kabili bakaana no kuti alebateka. Alashipikisha pa mulandu wa kuti abana bakwe bamo balimupondokela, na pa fyo Satana Kaseebanya atwalilila ukubepa ubufi. Na kabili alashipikisha ababomfi bakwe abo atemwa nga balecula, alashipikisha ukukanaba pamo ne fibusa fyakwe abafwa, kabili alashipikisha abantu ababipa nga balecusha abanabo, ne fyo abantu bonaula isonde.—w21.07, amabu. 9-12.

Finshi Yosefe acitile ifilangilila ukuti alelolela pali Yehova?

Alishipikishe ilyo bamunyina balemucusha. Ici calengele bamubepesha ubufi e lyo no kumukaka mu Egupti pa myaka iingi.—w21.08, ibu. 12.

Bushe ukutensha inko uko Hagai 2:6-9, 20-22 ilandapo, kutensha kwa musango nshi?

Nangu ca kuti inko ishingi shilakaana ukukutika ku mbila nsuma, abantu abengi balisambilila icine. Nomba line inko shikatenshiwa ilyo shikonaulwa.—w21.09, amabu. 15-19.

Mulandu nshi tushilingile ukunenuka ilyo tulebomba umulimo wa kubila imbila nsuma?

Yehova alatemwa nga amona ifyo tubombesha. Nga tatunenwike, tukaba no mweo wa muyayaya.—w21.10, amabu. 25-26.

Bushe ifyaba mwi buuku lya Ubwina Lebi icipandwa 19 kuti fyalenga shani twalaumfwila ukufunda kwa kuti: “Mube aba mushilo mu myendele yenu yonse”? (1 Pet. 1:15)

Aya amashiwi Petro alandile, nalimo a-ambwile amashiwi yaba pa Ubwina Lebi 19:2. Mu Ubwina Lebi icipandwa 19 mwaliba amasambililo na yambi ayengi ayo twingabomfya pa kukonka ukufunda kwaba pali 1 Petro 1:15.—w21.12, amabu. 3-4.