Awe. Te fyo alemona, lelo amashiwi alandile yali ya cine.

Natulandeko ifyo alembele muli ici cikomo e lyo ne fikomo fimbi ifyakwata amashiwi ayapalana na mashiwi ayaba muli ici cikomo: “Nakulalumbanishisha ishina lyenu pa cilimba umuyayaya, pa kuti ndefishapo imilapo yandi ubushiku no bushiku.” “Ndemulumbanya, mwe Yehova Lesa wandi, no mutima wandi onse, kabili nakulacindika ishina lyenu umuyayaya, nkamusansabika, mwe Lesa wandi, mwe Mfumu, kabili nkacindika ishina lyenu umuyayaya, kabili pe na pe.” “Nakulamucindika akasuba konse, kabili nakulalumbanya ishina lyenu umuyayaya, kabili pe na pe.”—Amalu. 61:8; 86:12; 145:1, 2.

Ilyo Davidi alembele aya amashiwi yonse talemona kwati takafwe. Alishibe ukuti Yehova alilandile ukuti apo abantu balibembwike bali no kulafwa, na Davidi umwine alisumine ukuti ali mubembu. (Ukute. 3:3, 17-19; Amalu. 51:4, 5) Na kabili alishibe no kuti na baume abali ifibusa fya kwa Lesa pamo nga Abrahamu, Isaki, na Yakobo, balifwile. Davidi alishibe ukuti na o wine ali no kufwa. (Amalu. 37:25; 39:4) Lelo amashiwi alandile ayalembwa pa Amalumbo 61:8 yalanga ukuti alefwaya ukulalumbanya Yehova umuyayaya, e kutila mpaka ne mfwa yakwe.—2 Sam. 7:12.

Nga twabelenga utulembo twa pa muulu utwaba pa Amalumbo 18, 51, na 52, tulamona ukuti inshita shimo Davidi alelemba pa fyalemucitikila. Mu Amalumbo 23, Davidi alandile ukuti Yehova ni kacema uutungulula impaanga shakwe, ukushisakamana, no kushicingilila. Ifi fine e fyo Davidi ali ilyo ali kacema. Kabili alefwaya ukulabombela Lesa ‘inshiku sha mweo wakwe shonse.’—Amalu. 23:6.

Tatulingile ukulaba no kuti Yehova ewale-eba Davidi ifyo ali no kulemba. Pa fyo alembele pali na masesemo ayali no kufikilishiwa ku ntanshi sana. Ku ca kumwenako, pa Amalumbo 110, Davidi alandile pa nshita ilyo Shikulu wakwe ali no kwikala “ku kwa kulyo [kwa kwa Lesa]” ku muulu no kupokelela amaka ayengi. Mulandu nshi Shikulu wakwe ali no kwikalila ku kwa kulyo kwa kwa Lesa? Pa kuti alecimfya abalwani ba kwa Lesa e lyo no ‘kupingula inko’ pe sonde. Davidi ali cikolwe ca kwa uyu Shikulu, e kutila Mesia, uwali no kulatekela ku muulu no kuba “shimapepo umuyayaya.” (Amalu. 110:1-6) Yesu atile ubusesemo bwaba pa Amalumbo 110 bwalelanda pali ena, kabili bwali no kufikilishiwa ku ntanshi.—Mat. 22:41-45.

Kanshi Yehova aebele Davidi ukulemba pa fyali no kucitika ilyo ali no mweo, e lyo ne fyali no kucitika ku ntanshi ilyo akabushiwa kabili akalalumbanya Yehova umuyayaya. Ici cilenga twaishiba no kuti amashiwi yaba pa Amalumbo 37:10, 11, 29, yalanda pa fyo ifintu fyali mu Israele. Na kabili yalanda na pa fyo ifintu fili no kuba ku ntanshi ilyo Lesa akacita fyonse ifyo alaya abantu.—Moneni paragrafu 8 mu cipande cileti “Uli no Kuba na ine mu Paradaise” muli luno lwine Ulupungu lwa kwa Kalinda.

Amashiwi yaba pa Amalumbo 61:8 na mashiwi yaba pa fikomo fimbi ayapalana na aya mashiwi, yalanga fye ukuti Davidi alefwaya ukulumbanya Yehova mu Israele mpaka ne mfwa yakwe. Na kabili yalanga ifyo Davidi ali no kucita ku ntanshi ilyo Yehova akamubuusha.