Muli kalata umutumwa Paulo alembeele Timote eluda munankwe amulembeele ati: “Ndekukonkomesha pa menso ya kwa Lesa, aya kwa Kristu Yesu na ya bamalaika abasalwa ukuti ulekonka ifi fintu ukwabula akapaatulula nelyo umusobolola.”—1 Tim. 5:21.

Ica kubalilapo, twalalanda pali bamalaika abo tushingalanda ukuti e “bamalaika abasalwa.” Ukwabula no kutwishika, te ba 144,000, pantu ilyo Paulo alembeele Timote kalata ninshi Abena Kristu basubwa tabalatendeka ukuya ku muulu. Abatumwa e lyo na bambi abasubwa ninshi tabalaba bamalaika. Kanshi “bamalaika abasalwa” te ba 144,000.—1 Kor. 15:​50-54; 1 Tes. 4:​13-17; 1 Yoh. 3:2.

Na kabili, “bamalaika abasalwa” te kuti babe ni bamalaika abapondokele Lesa ilyo kwali Ilyeshi. Aba bamalaika baishileba ku lubali lwa kwa Satana, basangwike ifibanda kabili baishileba abalwani ba kwa Yesu. (Ukute. 6:2; Luka 8:​30, 31; 2 Pet. 2:4) Ku ntanshi, Yesu akabakaka pa myaka 1,000 kabili pa numa akabonawila pamo na Satana Kaseebanya.—Yuda 6; Ukus. 20:​1-3, 10.

Kanshi “bamalaika abasalwa” abo Paulo alelandapo bafwile ukuba ni bamalaika aba ku muulu ababa ne cishinka kuli Lesa na kuli Kristu Yesu.

Kwaliba iminshipendwa ya bamalaika ababa ne cishinka kuli Lesa. (Heb. 12:​22, 23) Cimoneka ukuti Yehova tabapeela umulimo umo wine pa nshita imo ine. (Ukus. 14:​17, 18) Ku ca kumwenako, inshita imo Yehova aebele malaika umo ukwipaya abashilika abena Asiria 185,000. (2 Isha. 19:35) Nalimo bamalaika abengi balibapeela umulimo wa ‘kulonganika fyonse ifilenga abantu baleipununa no kufifumya mu Bufumu bwa kwa Yesu pamo na bumpulamafunde.’ (Mat. 13:​39-41) Bamalaika bambi nalimo balibapeela umulimo wa ‘kulonganika pamo abasalwa’ ku muulu. (Mat. 24:31) E lyo bamalaika bambi nabo balabeba ukuti ‘baletucingilila konse uko twaya.’—Amalu. 91:11; Mat. 18:10; linganyeniko Mateo 4:11; Luka 22:43.

“Bamalaika abasalwa” abo Baibo yalandapo pali 1 Timote 5:21 bafwile ukuba ni bamalaika abo bapeele umulimo wa kusakamana ifilonganino. Muli ici cipandwa, Paulo alelanda pa fyo baeluda bafwile ukulabomba imilimo yabo, e lyo ne fyo aba mu cilonganino bafwile ukulabacindika. Paulo alandile ukuti baeluda tabalingile ukuba na “akapaatulula nelyo umusobolola” ilyo balebomba imilimo yabo, kabili tabalingile ukupingula ukwabula ukutontonkanyapo bwino sana. Lyena alibebele umulandu uukalamba uo balingile ukulakonkela ifi alandile. Atile baeluda babombela aba bwananyina “pa menso ya kwa Lesa, aya kwa Kristu Yesu na ya bamalaika abasalwa.” Cailanga fye apabuuta tuutu ukuti bamalaika bamo balabapeela umulimo wa kubombela aba mu cilonganino pamo nga ukubacingilila, ukutungulula umulimo wa kubila imbila nsuma, kabili baleba Yehova ifyo balemona.—Mat. 18:10; Ukus. 14:6.