Bushe kuti mwaibukisha ifyo mwabelenga mu Ulupungu lwa kwa Kalinda Ulwa uno mwaka? Natumone nga kuti mwaibukisha. Asukeni ifipusho fyakonkapo:

Bushe mumona abanakashi nge fyo Yehova abamona?

Yehova aliba no mulinganya ku banakashi kabili tamona ukuti abaume balicindama pa banakashi. Alakutika kuli bena, kabili alabika amano ku fyo bomfwa na ku fibasakamika. Alibacetekela ica kuti alibapeela ne milimo.—w24.01, amabu. 15-16.

Kuti twacita shani pa kuti tulekonka ifyo Baibo ilanda pa Abena Efese 5:​7, apatila: “Mwiampana na bo”?

Umutumwa Paulo aletusoka ukuti tatufwile ukula-ampana na bantu abengalenga catukosela ukulakonka Amafunde ya kwa Lesa. Abo twampana nabo kuti baba bantu abo tuba nabo nelyo abo tulanshanya nabo pa Intaneti.—w24.03, amabu. 22-23.

Finshi tufwile ukucita pa kuti tuicingilile ku malyashi ya bufi?

Tufwile ukucenjela ku malyashi ayo aba bwananyina bengatweba ayo bashishininkishe ukuti ya cine, amalyashi ayo batutumine pa Intaneti ayalanda pa bantu ba kwa Yehova aya kuti tatwebele abantu ukuti batutumine, kabili tulingile ukuicingilila na ku basangu abaifisa nelyo abafwaya twalamona kwati balefwaya ukukutika imbila nsuma.—w24.04, ibu. 12.

Finshi twaishiba kabili finshi tushaishiba pa fyo Yehova akapingula Imfumu Solomone, abantu abafwile mu Sodomu na mu Gomora, e lyo na bafwile ilyo kwali Ilyeshi?

Tatwaishiba nampo nga Yehova alibonaula umupwilapo. Na lyo line, twalishiba ukuti Yehova alishiba fyonse kabili wa luse icine cine.—w24.05, amabu. 3-4.

Bushe amashiwi ya kuti Lesa “Cilibwe” yalenga twacetekela cinshi? (Amala. 32:4)

Kuti twauba muli Yehova. Wa cishinka, lyonse alafikilisha ifyo alaya. Taaluka, lyonse alikwata imibele iisuma kabili alacita ifyo afwaya.—w24.06, amabu. 26-28.

Finshi mwingacita pa kuti mubelele nga mwakuukila ku cilonganino cimbi?

Muleshintilila pali Yehova, akamwafwa nga filya fine ayafwile ababomfi bakwe kale. Mwilalinganya icilonganino mwakuukilako ku cilonganino mwafumako. Mulebombela pamo na ba mu cilonganino ico mwakuukilako kabili mule-esha na maka yenu yonse pa kuti mulekwata ifibusa mu cilonganino ico mwakuukilamo.—w24.07, amabu. 26-28.

Finshi twingasambilila ku filangililo fitatu ifyaba mwi buuku lya kwa Mateo icipandwa 25?

Icilangililo ca mpaanga ne mbushi cilanda pa co cacindamina ukuba ne cishinka. Icilangililo ca banacisungu aba mano na bawelewele cilanda pa kuba abaipekanya kabili abalola. Kabili icilangililo ca matalanti cilanda pa busuma bwaba mu kubombesha.—w24.09, amabu. 20-24.

Bushe umuputule wa kwingililapo uwali mwi tempele lya kwa Solomone, wasanseme shani?

Mu amamanyuskripti yamo aya kale, pe lembo lya 2 Imilandu 3:4 paba ati imikono “120,” kabili ici cipilibula ukuti umuputule wasanseme amamita 53. Lelo ifyalembwa fimbi ifyo abantu bacetekela fitila uyu muputule wasanseme “imikono 20,” e kutila amamita nalimo 9. Ifi ifyalembwa fyalanda, nafilingana ne fyo ifibumba fye tempele lya kwa Solomone fyatikeme.—w24.10, ibu. 31.

Bushe amashiwi ayatila umubomfi utumikila afwile ukuba “umwaume uwakwata umukashi umo” ayaba pali 1 Timote 3:​12, yalola mwi?

Aya mashiwi yalola mu kuti afwile fye ukuupa umwanakashi umo kabili tafwile ukulacita ubucende. Na kabili tafwile ukulanga abanakashi bambi icintemwa.—w24.11, ibu. 19.

Cinshi twingalandila ukuti ifyo Baibo yalanda pali Yohane 6:53 te fyo tulingile ukulacita nga twakwata Umulaalilo wa kwa Shikulu?

Pali Yohane 6:53 Baibo ilanda pa kulya umubili wa kwa Yesu no kunwa umulopa wakwe. Yesu alandile aya amashiwi mu mwaka wa 32, ninshi ali mu Galili, kabili ale-eba abaYuda abalingile ukumutetekela. Lelo Yesu atendeke Umulaalilo wa kwa Shikulu mu mwaka wa 33 ninshi ali mu Yerusalemu. Pali iyi nshita Yesu alelanda na abasambi abo ali no kulateka nabo ku muulu.—w24.12, amabu. 10-11