Ba Mary na bena mwabo ba John, a bekala mu calo umo abantu abengi abafuma ku Philippines besa mu kwingila incito, kabili balatemwa ukubila imbila nsuma kuli aba bantu. Ilyo kwali icikuko ca COVID-19, Ba Mary balebila sana imbila nsuma kabili balitemenwe sana ukusambilisha abantu Baibo aba mu calo bekala e lyo na ba mu fyalo fimbi. Balecita shani pa kuti balesambilisha abantu Baibo mu calo bekala e lyo na mu fyalo fimbi?

Ba Mary baleipusha abo balesambilisha Baibo ukuti, “Bushe namwishibako na bambi abengatemwa ukusambilila Baibo?” Nga ba-asuka ukuti ee, balebepusha ifyo ningacita pa kuti nande nabo. Ilingi nga twaipusha umuntu ici cipusho, mulafuma ifisuma. Mulandu nshi twalandila ifi? Ni pa mulandu wa kuti ilingi line, abantu tubilako imbila nsuma balafwaya ukwebako balupwa lwabo ne fibusa ifyo balesambilila mu Baibo. Fisuma nshi fyafuminemo muli ifi ba Mary baleipusha abantu ici cipusho?

Ba Jasmin abo balesambilisha Baibo, balibebeleko pa bantu na bambi 4 abalefwaya ukusambilila Baibo. Bamo pali aba, bali ni ba Kristine, abatemenwe sana ifyo balesambilila ica kuti baebele ba Mary ukuti balefwaya ukulasambilila imiku ibili mu mulungu. Ilyo ba Mary baipwishe ba Kristine nga kwali na bambi abalefwaya ukusambilila Baibo, ba Kristine ba-aswike ukuti, “Ee ninkwata abanandi abengatemwa ukusambilila Baibo.” Pa numa ya milungu fye iinono, ba Kristine balyebele ba Mary pa bantu na bambi 4 abalefwaya ukusambilila. Mu kupita kwa nshita, ba Kristine balyebele ba Mary pa banabo na bambi abalefwaya ukusambilila Baibo, kabili bamo pali aba balibapeele amashina ya banabo abalefwaya ukusambilila Baibo.

Ba Kristine balefwaya ukuti balupwa lwabo abashele ku Philippines nabo batendeke ukusambilila Baibo. E ico balyebeleko umwana wabo umwanakashi Andrea. Pa kubala Andrea aletontonkanya ukuti, ‘Ba Nte kabungwe ka mapepo, akafuma ku mipepele imbi, tabasumina muli Yesu, kabili bakonka fye ifyaba mu Cipingo ca Kale.’ Pa numa ya kusambililako fye umuku umo, ailwike ukuti ifyo aishibe pali ba Nte fyali fya bufi. Ilyo balesambilila atemenwe ukulanda ukuti, “Nga ca kuti e fyo Baibo ilandile, ninshi fya cine!”

Mu kupita kwa nshita, Andrea alyebeleko ba Mary pa banankwe babili na uo alebomba nankwe. Kabili aba nabo balitendeke ukusambilila Baibo. Na kabili ba Mary tabaishibe ukuti ba Angela, banasenge Andrea abashimona balekutika ilyo balesambilila Baibo. Bushiku bumo, ba Angela baebele Andrea ukuti ebe ba Mary ukuti batendeke ukubasambilisha Baibo. Ba Angela balitemenwe ifyo balesambilila. Mu mweshi fye umo, balishibe Amalembo  ayengi kabili balefwaya ukusambilila imiku 4 mu mulungu! Andrea aleafwa ba Angela pa kuti balelongana lyonse pa Intaneti.

Ilyo ba Mary baishibe ukuti ba Joshua abena mwabo baba Kristine baleba mupepi ilyo balesambilila Baibo, ba Mary baipwishe ba Joshua nga kuti batemwa ukulasambilila Baibo. Ba Joshua batile, “Nakulakutikako fye, mwinjipushapo amepusho nangu yamo pantu nga mwanjipusha nalafumapo.” Mu mamineti fye 5, ba Joshua balipwishe amepusho ayengi ukucila ayo ba Kristine baipwishe kabili balefwaya ukutwalilila ukusambilila Baibo.

Icipusho ca-anguka ico ba Mary baleipusha abantu, calengele ukuti abengi batendeke ukusambilila Baibo. Apo abantu abengi balefwaya ukusambilila Baibo, ba Mary balyebeleko aba bwananyina na bambi ukuti babafweko. Abantu 28 e bo ba Mary batendeke ukusambilisha Baibo mu fyalo 4.

Ba Jasmin, abo ba Mary batendekelepo ukusambilisha Baibo, babatishiwe mu April 2021. Ba Kristine babatishiwe mu May 2022 kabili balibwelelamo kuli balupwa lwabo ku Philippines. Abasambi ba Baibo na bambi babili abo ba Kristine baebelepo ba Mary nabo bene balibatishiwa. Ilyo papitile imyeshi iinono, ba Angela balibatishiwe kabili pali ino nshita ni bapainiya wa nshita yonse. Ba Joshua abena mwabo ba ba Kristine, e lyo no mwana wabo Andrea, ukubikako fye na basambi ba Baibo bambi, balitwalilila ukusambilila Baibo.

Mu nshita ya batumwa abantu abengi bale-ebako balupwa lwabo ne fibusa ifyo balesambilila pali Yesu. (Yoh. 1:41, 42a; Imil. 10:24, 27, 48; 16:25-33) Bushe te kuti mwipushe abo musambilisha Baibo e lyo na bafwaya ukusambilila Baibo amuti, “Bushe namwishibako na bambi abengatemwa ukusambilila Baibo?” Nga mwaipusha ici cipusho ica-anguka, limbi kuti mwasanga abantu abengi abengafwaya ukusambilila Baibo.