BUSHE mwalikwetepo ubwafya kabili tamwakwete umuntu nangu umo uwa kumwafwa? Apo tuleikala mu “nshita ishayafya nga nshi,” kuti twafuupuka kabili kuti twaumfwa kwati takuli umuntu nangu umo uwa kutwafwa. (2 Tim. 3:1) Nangu caba ifi, nga natukwata amafya twalikwata abantu abengatwafwa. Baibo yalilanda pa busuma bwa kukwata ifibusa fya cine mu “nshita ya macushi.”​—Amapi. 17:17.

Ilyo umutumwa Paulo alebomba umulimo wa bumishonari, aleba ne fibusa fyakwe, kabili ifi fibusa fyakwe fyalemwafwa mu nshila ishingi. (Kol. 4:7-11) Ilyo Paulo bamukakile mu Roma, ifibusa fyakwe fyalebomba imilimo iyo ashali no kukumanisha ukulabomba. Ku ca kumwenako, Epafroditi alitwalile Paulo ifintu ifyo aba bwananyina mu Filipi bamutumiine. (Fil. 4:18) Tukiki alibombele umulimo wa kutwalila aba bwananyina amakalata ayo Paulo alebalembela. (Kol. 4:7) Pa mulandu wa kuti Paulo alikwete ifibusa ifyalemwafwa, alekoselesha aba bwananyina mu filonganino na lintu bamukakiile mu ng’anda na mu cifungo. Kuti mwacita shani pa kuti mube cibusa wa cine?

Ifyo bamunyinefwe na bankashi bacita muno nshiku, filalanga ifyo ifibusa fya cine fyafwana. Natulande pa fyo nkashi umo alangile ukuti ali ni cibusa wa cine uwa kwa nkashi Elisabet, painiya wa nshita ku Spain. Ilyo banyina ba ba Elisabet balwele kansa, uyu nkashi aletumina ba Elisabet ama meseji umo alebalembela Amalembo ayalebakoselesha. Ba Elisabet batile: “Ifyo uyu nkashi alenembela, fyalensansamusha. Fyalelenga naishiba ukuti uwa bwananyina alimbikileko amano, kabili fyalenkosha.​—Amapi. 18:24.

Kuti twakosha bucibusa bwesu na ba bwananyina nga ca kuti tulebafwa pa kuti baye mu kubila imbila nsuma na mu kulongana. Ku ca kumwenako, bushe kuti mwasendako munyinefwe nelyo nkashi umukalamba muli motoka yenu pa kuya mu kulongana nelyo mu kubila imbila nsuma? Nga mwacita ifi kuti mwakoselesha aba bwananyina, nabo bene kuti bamukoselesha. (Rom. 1:12) Nomba aba bwananyina bamo balafilwa no kufuma pa ng’anda. Kuti twacita shani pa kuti tube ifibusa fya cine ku ba bwananyina ba musango uyu?

Aba bwananyina bamo tabakumanisha ukuya mu kulongana ku Ng’anda ya Bufumu pa mulandu wa kuti balilwala sana nelyo pa mulandu wa fintu fimbi. Natulande pali ba David abalwele kansa ya mu mulopa. Aba ku cipatala baleundapa ba David ukucila pa myeshi 6. Pa myeshi yonse iyo balebondapa, ba David na bena mwabo ba Lidia balebomfya fye Intaneti pa kulongana.

Bushe aba bwananyina ba mu cilonganino balebafwa shani? Pa numa ya kulongana, aba bwananyina bamo pa Ng’anda ya Bufumu balelandako na  ba David na ba Lidia pa Intaneti. Kabili ba David na ba Lidia nga ba-asukapo ilyo balelongana, aba bwananyina balebatumina ama meseji ya kubakoselesha. Bushe ifi fyalengele ba David na ba Lidia baleumfwa shani? Fyalengele baleumfwa ukuti aba bwananyina balibatemenwe!

Bushe te kuti ciwame twapekanya ukubila imbila nsuma na munyinefwe nelyo nkashi uushifuma pa ng’anda? Kuti twa-alulako fimo pa kuti twingabombako na ba bwananyina ba musango uyu. Nga twacita ifi bakalamona ukuti tatwabalabako. (Amapi. 3:27) Bushe te kuti ciwame mwatantika inshita iya kubila nabo imbila nsuma mu makalata nelyo pa foni? Baeluda kuti bapekanya ukuti aba bwananyina bamo balebomfya Intaneti pa kuti balesangwa ku kukumana kwa kuya mu kubila imbila nsuma. Ba David na ba Lidia baletasha sana pantu ifi fine e fyo baeluda ba mu cilonganino cabo bapekenye. Ba David batile: “Ukuba pamo na ba bwananyina ilyo twalekumana ukuya mu kubila imbila nsuma, no kupepela pamo nabo, kwaletukoselesha sana.” Kabili kuti cawama mwaipusha uwa bwananyina uushifuma pa ng’anda nga ca kutila kuti caba fye bwino nga mwasenda umusambi wa Baibo mwayatungulwila isambililo lya Baibo pa ng’anda pa mwakwe.

Nga tulebombela pamo na bamunyinefwe na bankashi aba kuti tabafuma pa ng’anda, tukeshiba imibele yabo iisuma iyo bakwata kabili tukaba ifibusa sana. Ku ca kumwenako, nga mulebila imbila nsuma na ba bwananyina ba musango uyu e lyo mwamona ifyo babomfya bwino Icebo ca kwa Lesa pa kufika umuntu pa mutima, mukabatemenwako. Nga muleafwa aba bwananyina pa kuti baleya mu kulongana na mu kubila imbila nsuma, mukakwata ifibusa ifingi.​—2 Kor. 6:13.

Ilyo Paulo akwete amafya, cibusa wakwe Tito alile mu kumumona, kabili ifi acitile fyalengele Paulo alaumfwako bwino. (2 Kor. 7:5-7) Ili lyashi litusambilisha ukuti tatulingile ukupelela fye pa kweba aba bwananyina amashiwi aya kubakoselesha, lelo kuti cawama twabako nabo kabili twacitapo fimo pa kubafwa.​—1 Yoh. 3:18.

Bamunyinefwe na bankashi ku Russia balafwana sana kabili tulingile ukulabapashanya. Natulandeko pali ba Sergey na bena mwabo ba Tatyana. Bakapokola balipikite ing’anda ya ba Sergey na ba Tatyana, pa numa balibasendele ku kapokola. Ba Tatyana e bo babalilepo ukulekako kabili balibwelele ku ng’anda. Ba Sergey batile: “Ilyo ba [Tatyana] bafikile fye pa ng’anda, nkashi umo uwashipa alifikile pa ng’anda. Tapakokwele, bamunyinefwe na bankashi na bambi balishile mu kutwafwa ukubika bwino ifintu mu ng’anda.”

Ba Sergey balandile no kuti: “Nalitemwa ifyo ilembo lya Amapinda 17:17 lilanda. Litila: ‘Cibusa wa cine alaba no kutemwa inshita yonse, kabili ni munyina uwingakwafwa mu nshita ya macushi.’ Pali iyi nshita iyo aba buteko batucusha pa mulandu ne citetekelo cesu, nalimona ukuti amashiwi ayaba pa Amapinda 17:17 ya cine pantu aba bwananyina balangafwa sana. Yehova alimpeela ifibusa ifyashipa ifingafwa.”

Apo tuleikala mu nshita ishayafya, tulakabila ifibusa ifingatwafwa. Ilyo kukaba ubucushi bukalamba, tukalakabila sana ifibusa. E ico natutwalilile ukulakoselesha aba bwananyina no kulabafwa!​—1 Pet. 4:7, 8.