ICIPANDE CA KUSAMBILILAMO 6
ULWIMBO 18 Tulatasha pa Cilubula
Tulatasha pa fyo Yehova Atubelela Uluse
“Lesa atemenwe nga nshi aba pano calo ica kuti apeele Umwana wakwe uwafyalwa eka.”—YOH. 3:16.
IFYO TWALASAMBILILAPO
Ifyo twalasambililapo fyalalenga tuletasha sana pa fyo Yehova atubelela uluse. Twalasambilila na pa fyo Yehova acitile pa kuti aletubelela uluse.
1-2. Bushe fwe bantunse twaba shani ngo mulumendo tulandilepo mu paragrafu ya kubalilapo?
ELENGANYENI ukuti umulumendo umo akulila mu lupwa ulukankaala. Lelo ubushiku bumo abafyashi bakwe bonse babili bafwa mu busanso. Ifi fyacitika fyalenga aba no bulanda sana. Nomba kuli na fimbi ifyabipa ifyo aishiba. Aishiba ukuti abafyashi bakwe balyonawile icuma ca lupwa kabili balikwete inkongole ishingi. Nomba tontonkanyeni pali ici. Mu cifulo ca kuti uyu mulumendo apyane icuma, apyana inkongole kabili abo abafyashi bakwe bakongweleko balefwaya ukuti ababweseshe indalama shabo ilyo line. Lelo takwete indalama nangu shimo isha kubwesesha abo abafyashi bakwe bakongweleko.
2 Na fwe bantunse twaba kwati ni uyu umulumendo. Abafyashi besu aba kubalilapo Adamu na Efa bali abapwililika kabili baleikala mu paradaise iisuma. (Ukute. 1:27; 2:7-9) Balikwete isubilo lya kuba ne nsansa umuyayaya. Lelo kwali icabipa icacitike, balibembwike. Ici calengele ukuti Yehova abafumye mwi bala lya Edeni kabili tabali no kwikala umuyayaya. Bushe abana abo bali no kukwata, finshi bali no kupyana? Baibo itila: “Pantu nga filya fine ulubembu lwaingilile mu mwaume umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Rom. 5:12) Twalipyana ulubembu ululenga tulefwa. Ulu ulubembu twapyana lwaba kwati ni nkongole ishingi isho umuntu nangu umo ashingabwesha.—Amalu. 49:8.
3. Mulandu nshi Baibo ilinganishisha imembu shesu ku “nkongole”?
3 Baibo ilinganya imembu ku nkongole. (Mat. 6:12; Luka 11:4) Nga twabembuka ciba kwati twakongola kuli Yehova. Yehova afwaya twabwesha ishi inkongole. Nga twafilwa ukubwesha, tufwile ukufwa, ninshi e lyo shapwa.—Rom. 6:7, 23.
4. (a) Bushe fwe bantu kuti twaba shani nga ca kuti Yehova tatwafwile? (Amalumbo 49:7-9) (b) Bushe Baibo nga yalanda ukuti “ulubembu,” finshi ilandapo? (Moneni akabokoshi akaleti “ Ulubembu.”)
4 Ku maka yesu te kuti tukwate ifyo Adamu na Efa bapanishe. (Belengeni Amalumbo 49:7-9.) Yehova nga tatwafwile, te kuti tukwate isubilo lya kuba no mweo nelyo ilya kubuushiwa. Na kuba nga tufwa fye nga filya fine inama ishishakwata ne subilo lya kubuushiwa shifwa.—Luk. Mil. 3:19; 2 Pet. 2:12.
5. Finshi Shifwe wa ku muulu uwatutemwa acita pa kutwafwa pa kuti tubweshe inkongole sha lubembu isho twapyana? (Moneni icili pa nkupo.)
5 Tontonkanyeni na kabili pali ulya umulumendo twacilandapo mu paragrafu ya kubalilapo. Bushe kuti aumfwa shani nga ca kuti umuntu umukankaala amweba ukuti ali no kumulipililako inkongole shonse isho abafyashi bakwe bakongwele? Ukwabula no kutwishika, uyu mulumendo kuti atasha sana kabili kuti asumina ubwafwilisho bwa musango uyu. Ifi fine e fyo na Shifwe Yehova uwatutemwa acita. Alitupeela ubupe ubwalenga tubweshe inkongole sha lubembu ulo twapyana kuli Adamu. Yesu alandile pali ubu bupe ati: “Pantu Lesa atemenwe nga nshi aba pano calo ica kuti apeele Umwana wakwe uwafyalwa eka, pa kuti onse uumutetekela ekonaika, lelo akabe no mweo wa muyayaya.” (Yoh. 3:16) Na kabili ubu bupe bwalilenga tuleba ifibusa na Yehova.
Yesu alebila imbila nsuma ya kuti atubelela uluse pa membu shesu pa mulandu wa cilubula (Yoh. 3:16) Yesu ali-itemenwe ukutufwila pa kuti abe icilubula (Moneni paragrafu 5)
6. Finshi twalasambililapo muli cino cipande, kabili mulandu nshi?
6 Kuti twanonkelamo shani muli ubu bupe ubusuma nga nshi ubwalenga Yehova aletubelela uluse pa membu shesu? Pa kwasuka ici cipusho, twalasambilila pa mashiwi yamo aya mu Baibo na umo yalola. Amashiwi pamo nga, ukubwelela kuli Lesa, icifuta mulandu, icilubula, ukulubuka na ifyo Lesa atumona ukuti twalilungama. Nga tuletontonkanya sana pa fyo aya mashiwi yapilibula, tukalatasha sana Yehova pa fyo acita pa kuti aletubelela uluse pa membu shesu.
ICO YEHOVA AFWAYA: KUBWELELA KULI ENA
7. (a) Finshi fimbi ifyo Adamu na Efa bapanishe? (b) Apo twatuntuka kuli Adamu na Efa, finshi tufwaisha? (Abena Roma 5:10, 11)
7 Ilyo Adamu na Efa babembwike, balipanishe ishuko lya kwikala umuyayaya kabili baishileba abalwani ba kwa Shibo, Yehova. Ilyo Adamu na Efa bashilabembuka, bali mu lupwa lwa kwa Lesa. (Luka 3:38) Lelo ilyo babembukiile Yehova, alibatamfishe muli ulu ulupwa ninshi tabalatampa no kukwata abana. (Ukute. 3:23, 24; 4:1) Nomba apo twatuntuka muli Adamu, tulingile ukubwelela kuli Yehova. (Belengeni Abena Roma 5:10, 11.) Nelyo kuti twatila tufwile ukuba ifibusa fyakwe. Icitabo cimo citila ishiwi lya ciGriki ilyo babomfya pali ili ilembo ilya kuti “ukubwelela,” lyalola mu kuti “ukuba cibusa wa muntu uwali umulwani.” Icitupapusha ca kuti Yehova e waitendekeleko ukucitapo cimo pa kuti tube ifibusa fyakwe. Finshi acitile?
IFYO YEHOVA ACITILE: ALIBIKILEKO ICIFUTA MULANDU
8. Bushe icifuta mulandu cinshi?
8 Icifuta mulandu ni nshila iyo Yehova abikako pa kuti fwe bantunse ababembu twingaba ifibusa fyakwe. Icifuta mulandu cifwile ukulingana no mulandu balefuta. Nga balipila icifuta mulandu, ninshi ico balefutilapo umulandu kuti cabwelelapo. Amalembo ya ciGriki aya Bena Kristu nayo yalilandapo pa fyo Yehova acitile pa kuti fwe bantunse twingaba ifibusa fyakwe.—Rom. 3:25.
9. Finshi Yehova acitile pali ilya nshita pa kuti alebelela abena Israele uluse pa membu shabo?
9 Kale, Yehova alibikileko inshila imo iyali no kulenga alebelela abena Israele uluse pa membu shabo, pa kuti bengalaba ifibusa fyakwe. Abena Israele balekwata ubushiku bwa cifuta mulandu cila mwaka. Pali ubu bushiku shimapepo mukalamba aletuulilako abantu amalambo ya nama. Kwena amalambo ya nama tayalelenga Yehova abelela umuntu uluse umupwilapo, pantu abantu balicindama ukucila inama. Nomba nga ca kuti umwina Israele uwalapila atuula ilambo ukulingana ne fyo Yehova alefwaya, Yehova aleitemenwa ukumubelela uluse pa membu shakwe. (Heb. 10:1-4) Na kabili amalambo ya nama ayo baletuula pa bushiku bwa cifuta mulandu na pa nshiku shimbi, yalelenga abena Israele baishiba ukuti bali babembu. Yalelenga baishiba no kuti balekabila icintu icacililepo ukucindama, icingalenga Yehova ababelela uluse umupwilapo pa membu shabo.
10. Finshi Yehova acitile pa kuti ale-elela abantu umupwilapo?
10 Finshi Yehova acitile pa kuti ale-elela abantu umupwilapo? Alilengele Umwana wakwe uo atemwa ‘aituula umwine ilambo umuku wa limo pa kuti asende imembu sha bantu abengi.’ (Heb. 9:28) Yesu ‘apeele umweo wakwe icilubula pa kuti alubule abengi.’ (Mat. 20:28) Bushe icilubula ni cinshi?
AMALIPILO AYO YEHOVA ALIPILE: ICILUBULA
11. (a) Bushe Baibo itila icilubula ni cinshi? (b) Bushe umuntu uwalingile ukulipila ici icilubula, alingile ukuba muntu wa musango shani?
11 Ukulingana na fintu Baibo ilanda, icilubula malipilo ayo Yehova alipile pa kuti tubwelele kuli ena, na pa kuti tube ifibusa fyakwe. a Ukulingana ne fyo Yehova amona ifintu, icilubula cikalenga tukakwate ico Adamu na Efa bapanishe. Cikalenga shani tukakwate ico Adamu na Efa bapanishe? Ibukisheni ukuti Adamu na Efa balipanishe ubumi ubwapwililika ne shuko lya kwikala umuyayaya. E ico icilubula calingile ukulingana ne co Adamu na Efa bapanishe. (1 Tim. 2:6) Uwalingile fye ukulipila ici icilubula mwaume umukalamba, (1) uwali uwapwililika; (2) uwali no kwikala umuyayaya pano isonde; na (3) uwali no kuitemenwa ukutufwila. Ubumi bwa mwaume wa musango uyu, e bwali fye no kubwesha ubumi ubo Adamu na Efa bapanishe.
12. Cinshi twingalandila ukuti Yesu e walingile fye ukulipila icilubula?
12 Natulande pa fintu fitatu ifilanga ukuti Yesu alilingile ukulipila cilya icilubula. (1) Ali uwapwililika, “tacitilepo ulubembu.” (1 Pet. 2:22) (2) Pa mulandu wa kuti ali uwapwililika kabili tacitilepo ulubembu, nga alikele umuyayaya pano isonde. (3) Ali-itemenwe ukutufwila no kutuula ubumi bwakwe ubwapwililika pa mulandu wesu. (Heb. 10:9, 10) Yesu ali mwaume uwapwililika, nga filya fine umwaume wa kubalilapo Adamu ali ilyo ashilabembuka. (1 Kor. 15:45) E ico pa mulandu wa kuti Yesu alitufwilile, alilipiile amalipilo yalekabilwa pa kuti ubumi ubo Adamu na Efa bapanishe bubwele. (Rom. 5:19) E ico Yesu aishileba “Adamu wa kulekelesha.” Fwe bantunse tatukabila umuntu na umbi uwapwililika uwa kutulipililako icilubula na kabili pa bumi ubo Adamu apanishe. Yesu afwilile “umuku wa limo.”—Heb. 7:27; 10:12.
13. Bupusano nshi bwaba pa cifuta mulandu ne cilubula?
13 Nomba bushe bupusano nshi bwaba pa cifuta mulandu ne cilubula? Icifuta mulandu fintu Lesa acita pa kuti fwe bantunse twingaba ifibusa fyakwe na kabili. Icilubula malipilo ayo Lesa alipiile pa kufutilako fwe bantunse imembu. Umulopa wa kwa Yesu uo atuulile umwine pa mulandu wesu, e wimininako amalipilo ayo Lesa alipiile.—Efes. 1:7; Heb. 9:14.
IFYAFUMAMO: YEHOVA ALITULUBULA KU LUBEMBU NE MFWA KABILI ATUMONA UKUTI TWALILUNGAMA
14. Finshi nomba twalasambililapo, kabili mulandu nshi?
14 Fisuma nshi fyafumamo muli ifi Yehova atupeela icifuta mulandu? Pa kwasuka ici icipusho, twalalanda pa bupilibulo bwa mashiwi yabili aya mu Baibo ayalalenga twishibe ifyo tunonkelamo pali ifi Yehova atubelela uluse.
15-16. (a) Bushe Baibo itila cinshi calenga ‘tulubuke’? (b) Tumfwa shani pali ifi twalubuka?
15 Baibo itila apo Yehova alitupeela icilubula, twalilubuka. Umutumwa Petro alandile ati: “Mwalishiba ukuti tabomfeshe ifintu ifyonaika, ifili nga silfere atemwa golde, pa kumulubula ku mibele yenu iya fye iyo mwapyene ku fikolwe fyenu. Lelo amulubwilile ku mulopa wa mutengo, nga ulya uwa mwana wa mpaanga uwabula akalema kabili uwabula akabi, e kuti ku mulopa wa kwa Kristu.”—1 Pet. 1:18, 19.
16 Icilubula calilenga tulubuke ku lubembu ne mfwa. Ulubembu ne mfwa filalenga tulecula sana. (Rom. 5:21) Cine cine tulatasha sana Yehova na Yesu pantu balitulubula ukupitila mu mulopa wa kwa Yesu.—1 Kor. 15:22.
17-18. (a) Bushe amashiwi ya kuti Lesa atumona ukuti twalilungama yalola mwi? (b) Bushe tunonkelamo shani ifi Lesa atumona ukuti twalilungama?
17 Yehova atumona ukuti twalilungama. Ici cipilibula ukuti alitwelela imembu shesu kabili alishifuuta. Ifi Yehova acita tacipilibula ukuti alipula mu mafunde yakwe ayalanda pa kuba no mulinganya. Yehova atumona ukuti twalilungama, lelo te pa mulandu wa kuti twalicitapo fimo ifilanga ukuti twalilungama. Na kabili Yehova atumona ukuti twalilungama, lelo te pa mulandu wa kuti alatekelesha abacita imembu. Icilenga Yehova aletubelela uluse pa membu shesu, ni co twalicetekela ifyo ena na Yesu bacita pa kutupeela icilubula.—Rom. 3:24; Gal. 2:16.
18 Bushe tunonkelamo shani muli ifi Yehova atumona ukuti twalilungama? Abo Lesa asala pa kuti bakaye mu kuteka na Yesu ku muulu, Lesa abamona ukuti balilungama kabili bana bakwe. (Tito 3:7; 1 Yoh. 3:1) Lesa alibabelela uluse pa membu shabo. Abamona fye kwati tabacitapo ne membu. E ico alibasuminisha ukuba mu Bufumu bwakwe. (Rom. 8:1, 2, 30) Bambi abo Lesa amona ukuti balilungama, bantu bakwata isubilo lya kwikala pano isonde. Alibabelela uluse pa membu shabo kabili abamona ukuti fibusa fyakwe. (Yako. 2:21-23) Ababa mwi bumba ilikalamba abakapusuka inkondo ya Armagedone bakakwata ishuko lya kukanafwa. (Yoh. 11:26) “Abalungama” na “bashalungama” abafwa, bali no kubuushiwa. (Imil. 24:15; Yoh. 5:28, 29) Na mu kulekelesha, bonse ababomfi ba kwa Yehova aba cishinka aba pano isonde ‘bakalubuka ku busha bwa kubola kabili bakaba abana ba kwa Lesa.’ (Rom. 8:21) Ala tulafwaisha inshita ikafike iya kuti tukabe abana ba kwa Yehova Lesa abapwililika!
19. Bushe ifintu fyatuwamina shani ifi Yehova abikako icifuta mulandu, na pali ifi atupeela icilubula? (Moneni na kabokoshi akaleti “ Ifyo Aya Amashiwi Yapilibula.”)
19 Cine cine, ilyo Lesa ashilatulubula twali nga ulya umulumendo uo tulandilepo mu paragrafu ya kubalilapo uushakwete nangu cimo, kabili uwakwete inkongole ishingi isho ashakwete amaka ya kubwesha. Nomba Yehova alitulubula. Pali ino nshita twalikwata isubilo pantu Yehova alibikako icifuta mulandu kabili alitupeela ne cilubula. Pa mulandu wa kuti twalitetekela Yesu Kristu, twalilubuka ku lubembu ne mfwa. Na kabili Yehova nga atwelela ciba kwati tatwacitapo ne membu. Ne cacilapo ukuwama ca kuti, nomba kuti twaba ifibusa fya kwa Yehova Shifwe wa ku muulu uwatutemwa.
20. Finshi tukasambililapo mu cipande cikonkelepo?
20 Nga twatontonkanya sana pa fyo Yehova na Yesu batucitila, tulabatasha icine cine. (2 Kor. 5:15) Yehova na Yesu abakanacitapo nangu cimo pa kuti batwafwe, nga tatwakwata isubilo nangu limo! Mu cipande cikonkelepo tukasambilila pa filangililo fimo ifyo Baibo yalandapo ifilanga ifyo tunonkelamo mu cilubula.
ULWIMBO 10 Lumbeni Yehova, Lesa Wesu!
a Mu ndimi shimo ishiwi lya kuti “icilubula” balipilibula ukuti “amalipilo ya bumi” nelyo “amalipilo.”
