ICIPANDE CA KUSAMBILILAMO 4
Mulandu Nshi Tusangilwa ku Cibukisho?
“Mulecita ici ku kunjibukisha.”—LUKA 22:19.
ULWIMBO 20 Mwatupeele Umwana Mwatemwisha
IFYO TWALASAMBILILA *
1-2. (a) Ni lilali bamo batontonkanya sana pa bantu babo abafwa? (b) Finshi Yesu acitile ubushiku ilyo ashilafwa?
NANGU pengapita imyaka iingi ukutula apo abantu abo twatemenwe bafwila, tatubalabako. Bamo batontonkanya sana pa bantu babo abafwa, ubushiku bafwililepo nga bwafika.
2 Cila mwaka, tuba pa bantu abengi sana mwi sonde lyonse abalongana ku kwibukisha imfwa ya muntu uo twatemwa sana, Yesu Kristu. (1 Pet. 1:8) Tulalongana ku kwibukisha imfwa ya muntu uwapeele ubumi bwakwe icilubula ukutulubula ku lubembu ne mfwa. (Mat. 20:28) Na kuba Yesu aebele abasambi bakwe ukulaibukisha imfwa yakwe. Mu nshita ya bushiku ilyo ashilafwa, atendeke Umulalilo wa kwa Shikulu, kabili aebele abatumwa bakwe ati: “Mulecita ici ku kunjibukisha.”—Luka 22:19.
3. Finshi twalasambilila muli cino cipande?
3 Bantu fye abanono pa basangwa ku Cibukisho ca mfwa ya kwa Kristu, abakwata isubilo lya kuya ku muulu. Lelo na bantu abengi abakwata isubilo lya kwikala pe sonde nabo bene balasangwako. Muli cino cipande twalasambilila ico ababa muli aya amabumba yonse yabili bafwaisha ukulasangwa ku Cibukisho cila mwaka. Twalasambilila ne fyo tunonkelamo nga twasangwako. Natubalilepo ukulanda pa co abasubwa basangilwako.
UMULANDU ABASUBWA BASANGILWA KU CIBUKISHO
4. Mulandu nshi abasubwa baliilako umukate no kunwako umwangashi pa Cibukisho?
4 Cila mwaka abasubwa abasangwako ku Cibukisho, balalyako umukate no kunwako umwangashi. Mulandu nshi bacitila ifi? Pa kwasuka ici cipusho natulandeko pa fyacitike mu nshita ya bushiku ilyo Yesu ashilafwa. Pa numa Yesu asefya Ica Kucilila na batumwa bakwe, atendeke Umulalilo wa kwa Shikulu. Apeele abatumwa bakwe 11 aba cishinka umukate no mwangashi kabili abebele ukulya no kunwa. Yesu alanshenye na bena pa fipangano fibili, e kutila icipangano cipya e lyo ne cipangano ca Bufumu. * (Luka 22:19, 20, 28-30) Ifi ifipangano fyalengele abatumwa e lyo na bantu bambi abanono ukukwata isubilo lya kuba ishamfumu kabili bashimapepo ku muulu. (Ukus. 5:10; 14:1) Abasubwa abacili pe sonde ababa muli ifi fipangano fibili e bafwile ukulyako umukate no kunwako umwangashi pa Cibukisho.
5. Finshi abasubwa baishiba pe subilo bakwata?
5 Cimbi icilenga abasubwa ukulafwaisha ukusangwa ku Cibukisho ca kuti: Icibukisho cilalenga baletontonkanya sana pe subilo bakwata. Yehova alibapeela isubilo ilisuma icine cine, bali no kuba no mweo uushingafwa ku muulu, bali no kulabombela pamo na Yesu Kristu e lyo na ba 144,000 banabo kabili ne cacilapo ukucindama bali no kuba ku cinso ca kwa Yehova Lesa. (1 Kor. 15:51-53; 1 Yoh. 3:2) Abasubwa balishiba ukuti aya e mapaalo bakapokelela nga baya ku muulu. Nomba pa kuti bakaye ku muulu abasubwa bafwile ukutwalilila aba cishinka mpaka ne fwa yabo. (2 Tim. 4:7, 8) Abasubwa balaba sana ne nsansa nga baletontonkanya pe subilo lyabo. (Tito 2:13) Nga ba mu mpaanga shimbi? (Yoh. 10:16) Mulandu nshi basangilwa ku Cibukisho?
UMULANDU ABA MU MPAANGA SHIMBI BASANGILWA KU CIBUKISHO
6. Mulandu nshi aba mu mpaanga shimbi basangilwa ku Cibukisho cila mwaka?
6 Aba mu mpaanga shimbi balasangwa ku Cibukisho nangu ca kuti tabalyako umukate nelyo ukunwako umwangashi. Mu 1938 e muku wa kubalilapo abakwata isubilo lya kwikala pe sonde babetile ukusangwako ku Cibukisho. Ulupungu lwa kwa Kalinda ulwa March 1, 1938 lwatile: “Kuti cawama aba mu mpaanga shimbi basangwa kuli uku kulongana pa kuti bamone ificitika, nga basangwako nabo bene bakasekelela.” Nga filya fine abo betako ku bwinga basekelela nga baya, e fyo caba na ku baba mu mpaanga shimbi, nabo bene balasekelela nga baya ku Cibukisho.
7. Cinshi aba mu mpaanga shimbi batemenwa ukukutika ku lyashi lya Cibukisho?
7 Aba mu mpaanga shimbi nabo balatontonkanya pe subilo lyabo. Balatemwa sana ukukutika ku lyashi lya Cibukisho pantu lilanda sana pa fyo Kristu na ba 144,000 bakacitila abantu ba cishinka ilyo bakalateka pa myaka 1,000. Ba 144,000 bakabombela pamo ne Mfumu Kristu ku kulenga isonde likabe paradaise no kulenga abantu ba cumfwila bakabe abapwililika. Abantu abengi nga nshi abasangwa ku Cibukisho balasekelela sana nga batontonkanya pa fyo amasesemo ya mu Baibolo yakafikilishiwa. Amasesemo pamo nga yaba pali Esaya 35:5, 6; 65:21-23 e lyo na Ukusokolola 21:3, 4. Nga baletontonkanya pa fyo ifintu fikaba mu calo cipya ilyo bakaba na balupwa lwabo ne fibusa fyabo, isubilo lyabo lilakoselako kabili balafwaya ukutwalilila ukubombela Yehova.—Mat. 24:13; Gal. 6:9.
8. Mulandu nshi na umbi uo aba mu mpaanga shimbi basangilwa ku Cibukisho?
8 Natulandeko na pali cimbi icilenga aba mu mpaanga shimbi ukusangwa ku Cibukisho. Bafwaya ukulanga abasubwa ukuti balibatemwa kabili balabatungilila. Icebo ca kwa Lesa casobele ukuti abasubwa e lyo na bakwata isubilo lya kwikala pano sonde, bali no kulabombela pamo. Bali no kulabombela shani pamo? Natulandeko pa masesemo yamo.
9. Bushe ubusesemo bwaba pali Sekaria 8:23 bulanga shani ifyo aba mu mpaanga shimbi bamona abasubwa?
9 Belengeni Sekaria 8:23. Ubu busesemo bulalondolola bwino sana ifyo aba mu mpaanga shimbi bamona bamunyinabo abasubwa. Amashiwi ya kuti “umuYuda” e lyo na ya kuti “imwe” yalanda pe bumba lya basubwa abacili pe sonde. (Rom. 2:28, 29) “Abantu 10 aba mu ndimi shonse isha nko” bemininako aba mu mpaanga shimbi. “Bekata” abasubwa ilyo balepepela capamo nabo mu kupepa kwasanguluka. Kanshi pa bushiku bwa Cibukisho, aba mu mpaanga shimbi balanga ukuti babombela pamo na basubwa nga ca kuti basangwa nabo ku Cibukisho.
10. Finshi Yehova acita pa kufikilisha ubusesemo bwalembwa pali Esekiele 37:15-19, 24, 25?
10 Belengeni Esekiele 37:15-19, 24, 25. Yehova alifikilisha ubu busesemo pa kulenga abasubwa e lyo naba mu mpaanga shimbi ukulabombela pamo. Ubu busesemo bwalilanda pa misambo ibili. Abakwata isubilo lya kuya ku muulu baba ngo musambo wa kwa “Yuda” e kutila umukowa umwalefuma imfumu ishaleteka abena Israele. E lyo abakwata isubilo lya kwikala pe sonde, baba ngo musambo wa kwa “Efraimu.” * Yehova ali no kubika pamo aya mabumba yabili pa kuti yaba “umusambo umo.” Ici calolele mu kuti bali no kulabombela pamo kabili Imfumu Yesu Kristu e wali no kulabatungulula. Cila mwaka abasubwa e lyo naba mu mpaanga shimbi tabalongana Icibukisho nga mabumba yabili ayapusana lelo balongana ngo “mukuni umo” utungululwa “na kacema umo.”—Yoh. 10:16.
11. Mulimo nshi uukalamba uo ababa mu “mpaanga” isho balandapo pali Mateo 25:31-36, 40 babombela pamo na bamunyina ba kwa Kristu?
11 Belengeni Mateo 25:31-36, 40. “Impaanga” isho Yesu alandilepo muli ici cilangililo, bantu abalungama abaleikala mu nshiku sha kulekelesha abakwata isubilo lya kwikala pe sonde e kutila impaanga shimbi. Balatungilila bamunyina ba kwa Kristu abasubwa maka maka mu mulimo uukalamba uo bakwata uwa kubila imbila nsuma mwi sonde lyonse e lyo no kulenga abantu baba abasambi.—Mat. 24:14; 28:19, 20.
12-13. Ni muli finshi fimbi umo aba mu mpaanga shimbi batungilila bamunyina ba kwa Kristu?
12 Cila mwaka ilyo kwashala imilungu inono ukuti kube Icibukisho, aba mu mpaanga shimbi balalanga ukuti balatungilila bamunyina ba kwa Kristu ilyo babombela pamo nabo muli kampeni ya kwita abantu ku Cibukisho. (Moneni akabokoshi kaleti “ Bushe Muleipekanya Ukubombako mu Nshita ya Cibukisho?”) Na kabili balapekanya bwino Icibukisho mu filonganino ifyaba mwi sonde lyonse nangu ca kuti mu filonganino ifingi tamwaba abasubwa. Aba mu mpaanga shimbi balaitemenwa ukwafwa bamunyina ba kwa Kristu muli ishi nshila twalandapo. Aba mu mpaanga shimbi balishiba ukuti nga baleafwa abasubwa ninshi baleafwa Yesu.—Mat. 25:37-40.
13 Finshi fimbi ifilenga tulesangwa ku Cibukisho nampo nga isubilo lyesu lya kuya ku muulu nelyo lya kwikala pano isonde?
UMULANDU BONSE TUSANGILWA KU CIBUKISHO
14. Bushe Yehova na Yesu balanga shani ukuti balitutemwa?
14 Tulatasha pa fyo Yehova na Yesu batutemwa. Yehova alitulanga ukuti alitutemwa mu nshila ishalekanalekana. Lelo inshila imo iyo atulangiilemo ukuti alitutemwa sana kutuma Umwana wakwe uo atemwa ukwisacula no kufwa pa mulandu wesu. (Yoh. 3:16) Yesu nankwe alilangile ukuti alitutemwa ilyo aipeeleshe ukwisa tufwila. (Yoh. 15:13) Tapaba ifyo twingalipila pa fyo Yehova na Yesu batutemwa. Lelo kuti twalanga ukuti tulatasha mu fyo tucita cila bushiku. (Kol. 3:15) Kabili tulasangwa ku Cibukisho pa kuti tuletontonkanya pa fyo Yehova na Yesu batutemwa e lyo no kubalanga ifyo twabatemwa.
15. Mulandu nshi abasubwa elyo na ba mu mpaanga shimbi batashisha pa cilubula?
15 Tulatasha sana pa cilubula. (Mat. 20:28) Icilubula calicindama sana ku basubwa pantu e cilenga baba ne subilo bakwata. Pa mulandu wa kuti balicetekela ilambo lya kwa Kristu, Yehova abamona ukuti balungami kabili alibabula ukuba abana bakwe. (Rom. 5:1; 8:15-17, 23) Aba mu mpaanga shimbi nabo balatasha pa cilubula. Pa mulandu wa kuti balicetekela ilambo lya kwa Kristu, Lesa abamona ukuti balisanguluka kabili kuti bamubombela umulimo wa mushilo no kuba ne subilo lya kuba pa bakafuma “mu bucushi bukalamba.” (Ukus. 7:13-15) Inshila imo iyo abasubwa e lyo na ba mu mpaanga shimbi balanga ukuti balatasha pa cilubula, kulasangwa ku Cibukisho cila mwaka.
16. Mulandu nshi na umbi uo tusangilwa ku Cibukisho?
16 Umulandu umbi uo tusangilwa ku Cibukisho wa kuti tufwaya ukumfwila ifyo Yesu atwebele. Te mulandu ne subilo twakwata bonse tulomfwila ifyo Yesu atwebele pa bushiku atendeke Icibukisho ilyo atile: “Mulecita ici ku kunjibukisha.”—1 Kor. 11:23, 24.
IFYO BONSE TUNONKELAMO MU KUSANGWA KU CIBUKISHO
17. Bushe ukusangwa ku Cibukisho kulenga shani twapalama kuli Yehova?
17 Tulapalama sana kuli Yehova. (Yako. 4:8) Nga fintu twasambilila, ukusangwa ku Cibukisho kulalenga tuletontonkanya sana pe subilo Yehova atupeela e lyo na pa kutemwa ukukalamba uko atulanga. (Yer. 29:11; 1 Yoh. 4:8-10) Nga twatontonkanya pe subilo lya cine cine ilyo twakwata e lyo no kutemwa ukushipwa uko Lesa atulanga, filalenga twatemenwako Yehova e lyo tulakosha na bucibusa twakwata nankwe.—Rom. 8:38, 39.
18. Bushe ukutontonkanya pa fyo Yesu atucitile kulenga twalafwaisha ukucita cinshi?
18 Kulalenga twalapashanya Yesu. (1 Pet. 2:21) Ilyo kwashala inshiku ishinono ukuti kube Icibukisho tulabelenga sana pa malyashi ya mu Baibolo ayalanda sana pa fyalecitika mu mulungu wa kulekeleshako ilyo Yesu ali pano sonde, pa mfwa yakwe, e lyo na pa fyacitike ilyo abuushiwe. Lyena pa bushiku bwa Cibukisho, ilyashi lya Cibukisho lilatwibukishako ifyo Yesu atutemwa. (Efes. 5:2; 1 Yoh. 3:16) Ilyo tulebelenga pa fyo Yesu atucitile no kutontonkanyapo sana, na ifwe tukalafwaisha ukuba ne mibele “iyo na Yesu aali na yo.”—1 Yoh. 2:6.
19. Kuti twatwalilila shani ukuba ifibusa fya kwa Yehova?
19 Kulenga twalafwaisha ukuba Ifibusa fya kwa Yehova. (Yuda 20, 21) Tutwalilila ukuba ifibusa fya kwa Yehova nga tulemumfwila, tulelenga ishina lyakwe lyaba ilya mushilo e lyo no kucita ifingalenga asekelela. (Amapi. 27:11; Mat. 6:9; 1 Yoh. 5:3) Ukusangwa ku Cibukisho kulalenga tulecita ifintu ifilanga ukuti tulefwaya ukutwalilila ukuba ifibusa fya kwa Yehova!
20. Mulandu nshi tufwile ukusangilwa ku Cibukisho?
20 Nampo nge subilo lyesu lya kuya ku muulu nelyo lya kwikala pano isonde, bonse tulingile ukulasangwa ku Cibukisho. Cila mwaka ilyo tulongana pali bulya bushiku, tulebukisha imfwa ya muntu twatemwa Yesu Kristu. Ne cacilapo ukucindama tulatontonkanya pa fyo Yehova atutemwa sana pa kutupeela Umwana wakwe ukuba icilubula cesu. Uno mwaka Icibukisho cikabako icungulo pali Cisano pa 15 April, 2022. Twalitemwa Yehova no Mwana wakwe, e ico pa bushiku bwa Cibukisho tufwile fye ukusangwako.
ULWIMBO 16 Lumbeni Jah pa Mwana Wakwe Uwasubwa
^ Nampo isubilo lyesu lya kwikala ku muulu nelyo pano sonde, cila mwaka tulafwaisha ukusangwa ku Cibukisho. Muli cino cipande twalasambilila ifyo Amalembo yalandapo pa kusangwa ku Cibukisho e lyo no mulandu tusangilwako. Na kabili twalasambilila ne fyo tunonkelamo nga twasangwa ku Cibukisho.
^ Nga mulefwaya ukwishibilapo na fimbi pa cipangano cipya e lyo ne cipangano ca Bufumu, moneni icipande citila: Mukaba “Ubufumu bwa Bashimapepo” icaba mu Ulupungu lwa kwa Kalinda ulwa October 15, 2014 amabu. 15-17.
^ Nga mulefwaya ukwishibilapo na fimbi pa busesemo ubulanda pa misambo ibili ubwaba muli Esekiele icipandwa 37, moneni “Amepusho Ukufuma ku Babelenga” mu Ulupungu lwa kwa Kalinda ulwa July 2016.
