ICIPANDE CA KUSAMBILILAMO 5
“Mulebomfya Bwino Inshita”
“Cenjeleni, mwilaenda kwati bawelewele lelo mule-enda nga ba mano, mulebomfya bwino inshita yonse iyo mwashukila.”—EFES. 5:15, 16.
ULWIMBO 8 Yehova Cubo Cesu
IFYO TWALASAMBILILA *
1. Bushe kuti twaba shani pamo na Lesa?
TULOMFWA bwino sana ukuba pamo na bantu abo twatemwa. Abaupana ababa ne nsansa balatemwa ukuba pamo. Abacaice balatemwa ukuba pamo ne fibusa fyabo. Kabili bonse tulatemwa ukuba pamo na ba bwananyina. Ne cacilapo ukucindama, tulatemwa ukuba pamo na Lesa. Tuba pamo na Lesa nga tulepepa kuli ena, tulebelenga Icebo Cakwe, kabili tuletontonkanya na pa fyo afwaya ukucita e lyo na pa mibele yakwe iisuma. Inshita tuba pamo na Yehova yalicindama sana!—Amalu. 139:17.
2. Finshi fingalenga twafilwa ukulapepa no kuisambilisha Baibolo?
2 Nangu ca kuti tulatemwa ukupepa no kuisambilisha Baibolo, twalikwata ifya kucita ifingi. Kanshi limo cilatwafya ukusangako inshita ya kucitamo ifya kwa Lesa. Ifintu pamo nga incito, ukusakamana ulupwa e lyo ne fintu fimbi, kuti fyalenga twalafilwa ukukwata inshita iya kupepa, ukuisambilisha Baibolo e lyo no kulatontonkanya pa fyo tulesambilila.
3. Finshi fimbi ifingalatuliila inshita?
3 Kwaliba na fimbi ifingalatusendela inshita. Nga tatucenjele kuti tulecita ifintu ifyaba fye bwino lelo ifingalatusendela sana inshita iyo tufwile ukubomfya ku kupalama kuli Yehova. Natulandeko pa fya kuleseshamo icitendwe. Bonse tulomfwa bwino mu nshita mu nshita ukuleshako icitendwe. Ifya kuleseshamo icitendwe ifyo tusalapo nalimo kuti fyaba fye bwino lelo kuti fyalatusendela inshita iyo tufwile ukubomfya ku kucitamo ifya kwa Lesa. Tufwile ukulaibukisha ukuti ifya kuleseshamo icitendwe tafyacindama sana.—Amapi. 25:27; 1 Tim. 4:8.
4. Finshi twalasambilila?
4 Muli cino cipande twalasambilila umulandu tulingile ukwishibila ifyacilapo ukucindama. Kabili twalasambilila pa fyo twingacita pa kuti tulekwata inshita ya kupepa e lyo no kuisambilisha Baibolo. Na kabili twalasambilila ifyo tunonkelamo nga tulebomfya bwino inshita.
MULESALA BWINO IFYA KUCITA KABILI MULEISHIBA IFYACILAPO UKUCINDAMA
5. Bushe amashiwi yaba pa Abena Efese 5:15-17 kuti yalenga shani uwacaice ukusala bwino ifya kucita?
5 Mulepingulapo bwino ifya kucita mu bumi. Abacaice abengi tabeshiba ifyo bali no kucita ku ntanshi. Bakafundisha e lyo na balupwa lwabo abashili ni Nte sha kwa Yehova, kuti balabakoselesha ukuya ku Universiti pa kuti bakalebomba incito iisuma no kulakwata indalama ishingi. Ukuya ku Universiti kuti kwalenga belakwata inshita ya kucitamo ifya kwa Lesa. Nomba abafyashi e lyo ne fibusa mu cilonganino kuti balakoselesha abacaice ukulabombesha mu mulimo wa kwa Yehova. Cinshi cingafwa uwacaice uwatemwa Yehova ukupingulapo bwino ifyo ali no kucita? Kuti cawama nga abelengele Abena Efese 5:15-17 no kutontonkanya sana pa mashiwi yaba pali ili lembo. (Belengeni.) Pa numa ya kubelenga ifi fikomo, uwacaice kuti atontonkanya pa mepusho pamo nga: ‘Cinshi Yehova alefwaya ukuti ncite? Cinshi ningapingulapo icingalenga asekelela? Cinshi ningasalapo icikalenga nkalebomfya bwino inshita?’ Muleibukisha ukuti “ishi nshiku sha bubifi” kabili cino calo ico Satana ateka cili no kupwa. Kanshi kuti caba bwino ukupingulapo ifya kucita ifingalenga Yehova asekelela.
6. Cinshi Maria asalilepo ukucita, kabili mulandu nshi twingalandila ukuti alisalile bwino?
6 Muleishiba ifyacilapo ukucindama. Inshita shimo tufwile ukusalapo pa fintu fibili ifishabipa pa kuti tubomfye bwino inshita. Ifi fine e fyo tusambilila ku fyacitike ilyo Yesu atandalile Maria na Marita. Marita uwali kapekape alitemenwe ukupokelela Yesu kabili alefwaya ukumupekanishisha ifya kulya ifingi. Lelo nkashi nankwe Maria aikele ku makasa ya kwa Yesu alekutika ku fyo alesambilisha. Ifyo Marita alefwaya ukucita tafyabipile lelo Yesu atile Maria ‘alisalile icintu icisuma.’ (Luka 10:38-42) Ilyo papitile inshita, Maria nalimo alilabile ifyo balile pali bulya bushiku lelo afwile aleibukisha ifyo asambilile kuli Yesu. Nga filya fine Maria amwene ukuti inshita ali pamo na Yesu yalicindeme, na ifwe tumona ukuti inshita tuba pamo na Yehova yalicindama. Bushe kuti twabomfya shani bwino inshita tuba pamo na Yehova?
MULEBOMFYA BWINO INSHITA IYO MUBA PAMO NA YEHOVA
7. Mulandu nshi cacindamina ukupepa, ukuisambilisha Baibolo e lyo no kulatontonkanya pa fyo tulesambilila?
7 Mufwile ukwishiba ukuti ipepo, ukuisambilisha Baibolo e lyo no kutontonkanya pa fyo tulesambilila lubali lwa kupepa. Nga tulepepa ninshi tulelanda na Shifwe wa ku muulu uwatutemwa icine cine. (Amalu. 5:7) Nga tuleisambilisha Baibolo ninshi tulesambilila kuli Yehova uwakwatisha mano. (Amapi. 2:1-5) Nga tuletontonkanya sana pa fyo tulesambilila pali Yehova, tukalatontonkanya pa mibele yakwe iisuma, kabili tukalaibukisha ifyo Yehova atulaya ukutucitila, e lyo ne fyo alaya ukucitila abantu bonse. Nga tulecita ifi ninshi tulebomfya bwino inshita yesu. Nomba cinshi icingalenga tulebomfya bwino inshita?
Mulefwayako incende ukushili ifya kupumfyanya ilyo muleisambilisha Baibolo (Moneni paragrafu 8 na 9)
8. Cinshi twingasambilila ku fyo Yesu abomfeshe inshita yakwe ilyo ali mu matololo?
8 Mulefwayako incende ukushingaba ifya kupumfyanya. Natulandeko pa fyo Yesu alecita. Ilyo Yesu ashilatendeka umulimo wakwe, aikele mu matololo pa nshiku 40. (Luka 4:1, 2) Ilyo ali mu matololo, alepepa kuli Yehova kabili aletontonkanya sana pa fyo Wishi alefwaya ukuti acite. Ukucita ifi kwali no kulenga Yesu aipekanye ku mafya ali no kukwata. Finshi mwingasambililako ku fyo Yesu acitile? Nalimo te kuti musange incende ukushingaba ifya kupumfyanya nga ca kuti pa ng’anda mwaba paba abantu abengi. Kanshi nalimo kuti mwayako pa nse no kufwayako incende apashingaba ifya kupumfyanya. Ifi fine e fyo ba Julie bacita nga balefwaya ukupepa kuli Yehova. Bena na bena mwabo bekala mu muputule uunono ku France, kabili cilabafya sana ukusangako inshita ya kuti bali fye beka balepepa ukwabula ifya kubapumfyanya. Batile: “Cila bushiku ndaya neka mu kwenda mu parka kabili ilyo ndi neka e lyo njeba Yehova fyonse ifili ku mutima.”
9. Nangu ca kuti Yesu alikwete ifya kucita ifingi, finshi alecita pa kuti alekwatako inshita ya kupepa kuli Yehova?
9 Yesu alikwete ifya kucita ifingi. Ilyo alebomba umulimo wakwe pano isonde, abantu abengi balemukonka kabili bonse balefwaya ukulaba nankwe inshita yonse. Bushiku bumo, “aba mu musumba bonse balongene pa mwinshi” pa kuti bamumone. Na lyo line Yesu alisangileko inshita ya kupepa kuli Yehova. Ku macaca alifwaile incende “ukushali abantu” pa kutila akwateko inshita ya kulanda na Wishi.—Marko 1:32-35.
10-11. Ukulingana na Mateo 26:40, 41, finshi Yesu aebele abasambi bakwe ukucita ilyo bali mwi bala lya Getsemane, lelo finshi bacitile?
10 Mu nshita ya bushiku pa bushiku bwa kulekeleshako ilyo ashilafwa, Yesu alifwaileko incende ukushali ifya kumupumfyanya pa kutila apepe no kutontonkanya sana pa fyali no kumucitikila. E ico aile mwi bala ya Getsemane. (Mat. 26:36) Bulya bushiku Yesu aebele abasambi bakwe umulandu cacindamine ukuti balepepa.
11 Nomba moneni ifyacitike. Ilyo bafikile mwi bala ya Getsemane, bwali bushiku nalimo ubushiku pa kati. Lyena Yesu aebele abasambi bakwe ukuti ‘akuloleni,’ kabili aile mu kupepa. (Mat. 26:37-39) Nomba ilyo alepepa, abasambi bakwe balileele. Ilyo abwelele asangile nabalaala, e ico Yesu abebele na kabili ukuti “loleni kabili akupepeni.” (Belengeni Mateo 26:40, 41.) Yesu alishibe ati abasambi bakwe balibombeshe kabili balinakile sana. E calengele abebe ukuti “umubili naunaka.” Pa miku ibili Yesu aliile mu kupepa kabili nga abwela alesanga abasambi bakwe nabalaala mu cifulo ca kuti balepepa.—Mat. 26:42-45.
Mulesalako inshita ya kupepa ilyo mushinakile sana (Moneni paragrafu 12)
12. Kuti twacita shani nga ca kuti inshita shimo tulanaka sana ica kuti twafilwa no kupepa?
12 Mulesala inshita iisuma. Inshita shimo tulanaka sana ica kuti tulafilwa no kupepa. Ifi nga fyalimucitikilapo, te imwe mweka fyacitikilapo. Nomba finshi mwingacita? Abantu bamo abatemenwe ukupepa pa kuya mu kulaala basanga ukuti cilaba bwino ukupepa ilyo bashilaya mu kulaala pantu ninshi tabalanaka sana. Bambi basanga ukuti ifyo bacita ilyo balepepa filabafwa ukukanapumbulwa. Ku ca kumwenako bambi balitemwa ukwikala nelyo ukufukama ilyo balepepa. Nomba kuti mwacita shani nga ca kuti namusakamikwa sana nelyo namufuupulwa sana ica kutila mulefilwa no kupepa? Mufwile ukweba Yehova ifyo muleumfwa. Kabili mufwile ukucetekela ukuti Shifwe wa luse akakutika.—Amalu. 139:4.
Mwilatumishanya amameseji ya pa foni nelyo aya pa Intaneti ilyo muli pa kulongana (Moneni paragrafu 13 na 14)
13. Bushe amafoni nelyo amatabuleti kuti yatupumbula shani ilyo tuleisambilisha Icebo ca kwa Lesa nelyo ilyo tuli pa kulongana?
13 Mwilapumbulwa ilyo muleisambilisha Baibolo. Ipepo telilenga fye bucibusa bwesu na Yehova bukose. Ukuisambilisha Icebo ca kwa Lesa no kusangwa ku kulongana nako kuti kwatwafwa ukupalama kuli Lesa. Bushe pali ifyo mwingacita pa kuti mulebomfya bwino inshita ilyo muleisambilisha Icebo ca kwa Lesa na lintu mulelongana? Nalimo kuti mwatontonkanya pa mepusho yakonkapo, ‘Bushe finshi fimpumbula ilyo ndi pa kulongana nelyo ilyo ndeisambilisha Baibolo?’ Bushe ni co ndaasuka foni nelyo ndabelenga amameseji pa foni nelyo pa tabuleti? Muno nshiku abantu abengi balikwata amafoni na matabuleti. Abafwailisha pa fintu basanga ukuti cilafya ukubika amano ku fyo ulecita nga ca kuti foni ili mupepi. Profesa umo atile: “Takuba ukubika amano ku fyo ulecita pantu ninshi naubika amano ku fintu fimbi.” Nga tuli pa kulongana kwa citungu nelyo ukwa muputule, lyonse balatweba ukuti tubike amafoni nelyo amatabuleti apa kuti yelapumfyanya abantu. Bushe te kuti tulecita cimo cine pa kuti tatupumbwilwe ilyo tuleisambilisha Icebo ca kwa Lesa, ilyo tulepepa nelyo ilyo tuli pa kulongana?
14. Ukulingana na Abena Filipi 4:6, 7, bushe Yehova kuti atwafwa shani ukukanapumbulwa ilyo tuleisambilisha nelyo ilyo tuli pa kulongana?
14 Mulelomba Yehova ukuti alemwafwa ukukanapumbulwa. Ilyo muli pa kulongana nelyo ilyo muleisambilisha Icebo ca kwa Lesa nga mwatendeka ukutontonkanya pa fintu fimbi mulelomba ukuti Yehova alemwafwa ukukanapumbulwa. Nga ca kuti namusakamikwa te kuti canguke ukuleka ukutontonkanya pa mafya mukwete no kubika amano ku fya kwa Lesa, lelo ifi fine e fyo mufwile ukucita. Mulepepa ukuti Lesa alemupeela umutende uukalalinda imitima yenu e lyo “na matontonkanyo yenu.”—Belengeni Abena Filipi 4:6, 7.
TULANOKELAMO NGA TULESANGAKO INSHITA YA KUBA PAMO NA YEHOVA
15. Tukanonkelamo shani nga ca kuti tuleisambilisha Icebo ca kwa Lesa, tuletontonkanyapo sana, e lyo no kupepa?
15 Nga mulekwatako inshita ya kulanda na Yehova, ukukutika kuli ena e lyo no kutontonkanya pa fyo mulesambilila pali ena, muli no kunonkelamo icine cine. Mukanonkelamo shani? Ica kubalilapo, mwakulapingula bwino pa fintu. Baibolo itila: “Uule-enda na ba mano akaba uwa mano.” (Amapi. 13:20) Kanshi nga muleisambilisha pali Yehova, Intulo ya mano, muletontonkanya sana pa fyo mulesambilila, mukaba na mano. Muli no kwishiba ifyo mulingile ukucita pa kuti mulelenga alesekelela e lyo ne fyo mushifwile ukucita pa kuti mwilamukalifya.
16. Bushe ukwishiba bwino Yehova kuti kwalenga shani twalasambilisha bwino?
16 Icalenga bubili, mukalasambilisha bwino. Nga tulesambilisha umusambi Baibolo ico tufwaya sana, kumwafwa ukupalama kuli Yehova. Nga tulepepa lyonse kuli Yehova no kulasambilila pali ena, e lyo tukamutemenwako kabili tukasambilisha no musambi wesu ukutemwa Yehova. Ifi fine e fyo na Yesu alecita. Alelanda ifisuma pali Wishi, ica kuti abasambi bakwe nabo baishiletemwa sana Yehova.—Yoh. 17:25, 26.
17. Bushe ipepo no kuisambilisha Baibolo kuti fyakosha shani icitetekelo cesu?
17 Icalenga butatu, icitetekelo cenu cili no kukoselako. Tontonkanyeni pa ficitika nga ca kuti mwalomba Lesa ukuti amutungulule, amusansamushe, nelyo amwafwe. Lyonse Yehova nga aasuka amapepo yenu, icitetekelo cenu cilakoselako. (1 Yoh. 5:15) Cinshi cimbi icingakosha icitetekelo cenu? Kuisambilisha Baibolo. Pantu na kuba “umuntu atetekela ilyo aumfwa amashiwi.” (Rom. 10:17) Na lyo line pa kuti icitetekelo cesu cikose, tatulingile ukupelela fye pa kuisambilisha Baibolo. Cinshi cimbi twingacita?
18. Langilileni ico tufwile ukulatontonkanishisha sana pa fyo tulesambilila.
18 Tufwile ukulatontonkanya sana pa fyo tulesambilila. Natulandeko ifyacitikile uwalembele Amalumbo 77. Ali no bulanda sana pantu aletontonkanya ukuti Yehova alibalekeleshe. Aya masakamika yalelenga alefufya utulo. (Ifikomo 2-8) Nomba finshi acitilepo? Aebele Yehova ukuti: “Nkatontonkanyapo sana pa milimo yenu yonse, kabili nkabika amano ku mibombele yenu.” (Icikomo 12) Ca cine ukuti uwaimbile amalumbo alishibe ifyo Yehova acitiile abantu bakwe ku kale, na lyo line amasakamika akwete yalengele alatontonkanya ukuti: “Bushe Lesa alilaba ukumbelela uluse, nelyo bushe ku bukali bwakwe alicilikila inkumbu shakwe?” (Icikomo 9) Uwalembele amalumbo alitontonkenye pa fyo Lesa acitile abantu bakwe ku kale ne fyo ababelele uluse. (Icikomo 11) Ici calengele ashininkishe ukuti Yehova tali no kulekelesha abantu bakwe. (Icikomo 15) Na imwe bene icitetekelo cenu cikakoselako nga mwatontonkanya pa fyo Yehova acitila abantu bakwe e lyo na pa fyo amucitila.
19. Finshi fimbi tunonkelamo nga tuleisambilisha Icebo ca kwa Lesa no kulatontonkanya sana pa fyo tulesambilila?
19 Icalenga 4 kabili icacindama sana ca kuti, muli no kutemenwako Yehova. Nga namutemwa Yehova mukalamumfwila, mukalaipeelesha ukucita ifingalenga asekelela, kabili mwakulashipikisha amafya. (Mat. 22:37-39; 1 Kor. 13:4, 7; 1 Yoh. 5:3) Takwaba nangu cimo icacindama ukucila pa kuba cibusa wa kwa Yehova!—Amalu. 63:1-8.
20. Finshi mwakulacita pa kuti mulekwata inshita ya kupepa, ukuisambilisha Baibolo e lyo no kutontonkanya pa fyo mulesambilila?
20 Muleibukisha ukuti ipepo, ukuisambilisha Baibolo e lyo no kutontonkanya pa fyo tulesambilila, lubali lwa kupepa. Nga filya fine Yesu alecita, na imwe mufwile ukulafwaya incende ukushili icongo pa kutila mulepepa, muleisambilisha Icebo ca kwa Lesa no kulatontonkanya pa fyo mulesambilila. Mwilaleka icili conse cilemupumfyanya. Mulelomba Yehova ukuti alemwafwa pa kutila mwilapumbulwa ilyo mulecita ifya kwa Lesa. Nga mulebomfya bwino inshita yenu pali ino nshita, Yehova akamupeela umweo wa muyayaya mu calo cipya.—Marko 4:24.
ULWIMBO 28 Ukuba Cibusa wa kwa Yehova
^ Yehova ni Cibusa wesu uwa pa mutima. Twalitemwa sana ifi ni cibusa wesu kabili tulafwaya ukulamwishibilako. Palapita inshita pa kuti twishibe bwino umuntu. Ifi fine e fyo caba na kuli Yehova nga tulefwaya ukuba ifibusa fyakwe. Muno nshiku fwe bantu twalipamfiwa sana. Kuti twacita shani pa kuti tulekwatako inshita ya kukosha bucibusa na Shifwe wa ku muulu, kabili bushe tukanonkelamo shani?
