ICIPANDE CA KUSAMBILILAMO 5
“Ukutemwa kwa kwa Kristu E Kutucincisha”
“Ukutemwa kwa kwa Kristu e kutucincisha, . . . pa kuti aba mweo belaikalila abene beka kano ukulaikalila uwabafwilile kabili uwabuushiwe.”—2 KOR. 5:14, 15.
ULWIMBO 13 Tupashanya Kristu
IFYO TWALASAMBILILA a
1-2. (a) Tumfwa shani nga twatontonkanya pa fyo Yesu acitile e lyo na pa mfwa yakwe? (b) Finshi twalasambilila muli cino cipande?
NGA CA kuti lupwa wesu nelyo cibusa wesu afwa, tulamufuluka icine cine. Pa kubalilapo kuti tuleumfwa sana ububi nga twatontonkanya pa fyo lupwa wesu nelyo cibusa wesu ali ilyo ashilafwa, maka maka nga aliculile sana. Lelo nga papitako inshita, tulatendeka ukumfwako bwino nga twatontonkanya pali fimo ifyo atucitile, ifyo atusambilishe, nelyo pa mashiwi yamo ayo atukoseleshe.
2 Ifi fine e fyo tumfwa nga twabelenga pa fyo Yesu aculile, e lyo ne fyo afwile. Nga kuli Icibukisho, tulatontonkanya sana pa fyo imfwa ya kwa Yesu yacindamina. (1 Kor. 11:24, 25) Na lyo line, tulomfwa bwino nga twatontonkanya pa fintu ifyo Yesu alandile, e lyo ne fyo acitile ilyo ali pano isonde. Na kabili ukutontonkanya pa fyo alecita pali ino nshita, e lyo ne fyo akatucitila ku ntanshi kulatukoselesha. Nga fintu twalasambilila muli cino cipande, ukutontonkanya pali ifi fintu e lyo na pa kutemwa uko Yehova na Yesu batulanga kuti kwalenga tuletasha pa fyo batucitila.
NGA TULETASHA TUKALAUMFWILA YESU
3. Cinshi cingalenga tuletasha pa cilubula?
3 Tulatasha sana nga twatontonkanya pa bumi bwa kwa Yesu e lyo na pa mfwa yakwe. Ilyo Yesu ali pano isonde, alisambilishe abantu ifintu ifisuma ifyo Ubufumu bwa kwa Lesa bukacita. Twalitemwa sana ifyo Baibolo itusambilisha pa cilubula, e lyo ne fisuma ifyo twakwata pa mulandu wa cilubula. Tulatasha sana pa cilubula pantu cilalenga twaba ifibusa na Yehova e lyo na Yesu. Abacetekela Yesu balikwata isubilo lya kwikala umuyayaya, e lyo ne lya kumona balupwa lwabo ne fibusa na kabili. (Yoh. 5:28, 29; Rom. 6:23) Tapali ifyo twacita pa kupokelela amapaalo yonse aya, kabili tapali ifyo twingapeela Lesa na Kristu pa fyo batucitila. (Rom. 5:8, 20, 21) Lelo kuti twalanga Yehova na Yesu ukuti tulatasha sana pa fyo batucitila. Kuti twacita shani pa kuti tulange ukuti tulatasha?
Bushe ukutontonkanya pa fyo Maria Magadala acitile, kuti kwalenga shani twalatasha? (Moneni amaparagrafu 4-5)
4. Bushe Maria Magadala alangile shani ukuti aletasha pa fyo Yesu amucitile? (Moneni icikope.)
4 Natulandeko pa mwanakashi umuYuda, Maria Magadala. Alecula sana pantu alikwete ifibanda 7 ifyalemucusha. Afwile alemona kwati takwali nangu umo uwali no kumwafwa. Elenganyeni ifyo atashishe Yesu ilyo amulubwile ku fibanda ifyalemucusha! Ifyo atashishe fyalengele aba umusambi wa kwa Yesu, kabili alebomfya inshita yakwe, amaka, e lyo ne fyuma akwete ku kutungilila Yesu. (Luka 8:1-3) Nangu ca kuti Maria aletasha sana pa fyo Yesu amucitile, nalimo taishibe ifyo Yesu ali no kumucitila ku ntanshi. Ali no kupeela ubumi bwakwe pa kuti “onse uumutetekela” akabe no mweo wa muyayaya. (Yoh. 3:16) Na lyo line, Maria alelanga ukuti aletasha pa fyo Yesu amucitile, pa kuba uwa cishinka. Ilyo Yesu alecula pa cimuti, Maria e po ali, alesakamana Yesu e lyo no kukoselesha abalipo. (Yoh. 19:25) Ilyo Yesu afwile, Maria e lyo na banakashi bambi babili baliletele ifyanunkila pa kuti basube Yesu ilyo bashilamubika mu nshiishi. (Marko 16:1, 2) Yehova alilambwile Maria pantu ali uwa cishinka kuli Yesu. Ilyo Yesu abuukile, alimonene na Maria kabili alilanshenye nankwe. Kwena basambi fye abanono abamwenepo Yesu ilyo abuukile no kulanshanya nankwe.—Yoh. 20:11-18.
5. Bushe kuti twalanga shani ukuti tulatasha pa fyo Yehova na Yesu batucitila?
5 Na ifwe kuti twalanga ukuti tulatasha pa fyo Yehova na Yesu batucitila nga tulebomfya inshita yesu, amaka yesu, e lyo ne fyuma ku kutungilila Ubufumu. Ku ca kumwenako, kuti twaipeelesha ukubombako nga kuli ukuwamya nelyo ukukuula icikuulwa ca kupepelamo.
UKUTEMWA YEHOVA NA YESU KULALENGA TWATEMWA ABANTU BAMBI
6. Mulandu nshi twingalandila ukuti icilubula bupe ubo Lesa atupeela?
6 Nga twatontonkanya pa fyo Yehova na Yesu batutemwa, na ifwe tulabatemenwako. (1 Yoh. 4:10, 19) Na kuba, tulabatemwa sana nga twatontonkanya pa fyo Yesu atufwilile. Umutumwa Paulo alishibe ici cishinka, e ico alembeele Abena Kristu mu Galatia ukuti: ‘Umwana wa kwa Lesa, alintemenwe no kuipeela pa mulandu wa ine.’ (Gal. 2:20) Pa mulandu wa cilubula, Yehova alimukula pa kuti mube icibusa cakwe. (Yoh. 6:44) Mufwile mulasansamuka sana nga mwatontonkanya ukutila Yehova alimona ifisuma muli imwe, kabili alilipililapo ne cilubula pa kuti mube ifibusa fyakwe. Ici nalimo cilalenga mutemenweko Yehova na Yesu. Kuti cawama ukutontonkanya pali ici cipusho, ‘Bushe ukutemwa uko Yehova na Yesu bantemwa kufwile ukulenga ndecita cinshi?’
Ukutemwa Lesa na Kristu kulalenga twalabila imbila ya Bufumu ku bantu bonse (Moneni paragrafu 7)
7. Nga fintu tulemona pa cikope, kuti twalanga shani ukuti twalitemwa Yehova na Yesu? (2 Abena Korinti 5:14, 15; 6:1, 2)
7 Ukutemwa uko twatemwa Lesa na Kristu kulalenga tuletemwa abantu. (Belengeni 2 Abena Korinti 5:14, 15; 6:1, 2.) Inshila imo iyo tulangilamo ukuti twalitemwa abantu, kulabila imbila nsuma lyonse. Tulabila imbila nsuma ku bantu fye bonse te mulandu wa kuti ba mushobo umbi, nelyo umutundu. Na kabili tulabila fye ku bantu bonse, nampo nga bakankaala, balisambilila, nelyo bapiina kabili tabasambilila. Nga tulebila imbila nsuma ku bantu bonse abo twasanga, ninshi tulecita ukufwaya kwa kwa Yehova “uufwaya ukuti abantu balekanalekana bakapusuke no kwishiba bwino bwino icine.”—1 Tim. 2:4.
8. Kuti twalanga shani ukuti twalitemwa bamunyinefwe na bankashi?
8 Na kabili tulanga ukuti twalitemwa Lesa na Kristu nga tuletemwa bamunyinefwe na bankashi. (1 Yoh. 4:21) Tulababikako amano kabili tulabatungilila nga bali na mafya. Tulabasansamusha nga nabafwilwa, tulabapempula nga nabalwala, kabili tulabakoselesha nga nabafuupulwa. (2 Kor. 1:3-7; 1 Tes. 5:11, 14) Tulatwalilila ukubapepelako pantu twalishiba ukuti “ilyo umulungami apepa ipepo lya kupapaata, ipepo lyakwe lilaba na maka ayengi pantu lilasukwa.”—Yako. 5:16.
9. Cinshi cimbi ico twingacita pa kulanga ukuti twalitemwa aba bwananyina?
9 Tulalanga ukuti twalitemwa aba bwananyina, nga tuleba aba mutende kuli bena. Tulapashanya ifyo Yehova eleela abantu. Nga ca kuti Yehova ali-itemenwe ukuleka Umwana wakwe ukufwa pa membu shesu, na ifwe tulingile ukulaelela aba bwananyina nga batulufyanya. Tatufwaya ukuba ngo musha umubi uo Yesu alandilepo mu cilangililo. Nangu ca kuti shikulu wakwe alisuulileko ku nkongole ishingi isho amukwatile, ena alikeene ukusuulako ku nkongole ishinono isho umusha munankwe amukwatile. (Mat. 18:23-35) Nga ca kuti mwalipusana no wa bwananyina mu cilonganino, bushe kuti mwayalanshanya nankwe pa kuti mutendeke ukumfwana ilyo mushilaya ku Cibukisho? (Mat. 5:23, 24) Nga mwacita ifi, mukalanga ukuti mwalitemwa sana Yehova na Yesu.
10-11. Bushe baeluda kuti balanga shani ukuti balitemwa Yehova na Yesu mu nshita ya Cibukisho? (1 Petro 5:1, 2)
10 Bushe baeluda kuti balanga shani ukuti balitemwa Yehova na Yesu? Inshila imo, kulasakamana impaanga sha kwa Yesu. (Belengeni 1 Petro 5:1, 2.) Yesu alilengele umutumwa Petro aishiba ukuti alingile ukulasakamana impaanga shakwe. Ilyo Petro akeene Yesu imiku itatu, afwile alefwaya sana ukulanga ukuti alitemenwe Yesu. Pa numa ilyo Yesu abushiiwe, aipwishe Petro ukuti: “Simone mwana Yohane, bushe walintemwa?” Te kuti tutwishike no kutwishika ukuti Petro alicitile fyonse ifyo alingile ukucita pa kulanga ukuti alitemenwe Shikulu wakwe. Yesu aebele Petro ukuti: “Cema utwana twandi utwa mpaanga.” (Yoh. 21:15-17) Kabili Petro alesakamana impaanga sha kwa Shikulu wakwe mpaka ne mfwa yakwe, ici calelangilila ukuti alitemenwe Yesu.
11 Baeluda, kuti mwalanga shani ukuti amashiwi Yesu aebele Petro yalicindama ukuyabomfya mu nshita ya Cibukisho? Kuti mwalanga ifyo mwatemwa Yehova na Yesu nga ca kuti lyonse mulecema impaanga sha kwa Lesa, kabili muleafwilisha aba bwananyina abaleka ukubombela Yehova ukubwelela kuli ena. (Esek. 34:11, 12) Na kabili kuti mulekoselesha abasambi ba Baibolo e lyo na bonse abeshile ku Cibukisho. E lyo mufwile no kulanga abeshile ku Cibukisho ukuti namutemwa ifi beshile, pantu namwishiba ukuti nabo bene kuti baba abasambi ba kwa Yesu.
UKUTEMWA KRISTU KULALENGA TWABA ABASHIPA
12. Mulandu nshi ukutontonkanishisha pa mashiwi Yesu alandile ilyo ashilafwa, kulengela twaba abashipa? (Yohane 16:32, 33)
12 Mu nshita ya bushiku ilyo Yesu ashilafwa, aebele abasambi bakwe ukuti: “Pano calo mulacula, lelo shipeni! Ine nincimfya icalo.” (Belengeni Yohane 16:32, 33.) Cinshi calengele Yesu elatiina abalwani bakwe, lelo abe uwashipa kabili atwalilile ukuba uwa cishinka mpaka ne mfwa? Ni co ashintilile pali Yehova. Apo alishibe ukuti na basambi bakwe bali no kukwata amafya yamo yene na yo akweteko, alombele Yehova ukuti alebacingilila. (Yoh. 17:11) Bushe ici cilenga shani twaba abashipa? Pantu twalishiba ukuti Yehova wa maka nga nshi ukucila abalwani besu. (1 Yoh. 4:4) Yehova alamona fye fyonse. Twalicetekela ukuti nga twashintilila pali ena, kuti twaleka ukuba no mwenso kabili kuti twaba abashipa.
13. Bushe Yosefe uwa ku Arimatea alangile shani ukuti ali uwashipa?
13 Natulandeko pali Yosefe uwa ku Arimatea. AbaYuda balimucindike sana. Alebomba mu Sanhedrini, icali icilye icikalamba ica baYuda. Lelo ilyo Yesu alebomba umulimo wakwe pano isonde, Yosefe tali uwashipa. Yohane atile Yosefe ali “musambi wa kwa Yesu lelo uwa mu bumfisolo pa mulandu wa kutiina abaYuda.” (Yoh. 19:38) Nangu ca kuti Yosefe alitemenwe sana imbila ya Bufumu, talefwaya abantu beshibe ukuti alicetekele Yesu. Aletontonkanya ukuti abantu nga baishiba ukuti ali musambi wa kwa Yesu, bali no kuleka ukumucindika. Lelo Baibolo itweba ukuti ilyo Yesu afwile, Yosefe “alishipile no kuya kuli Pilato no kulomba icitumbi ca kwa Yesu.” (Marko 15:42, 43) Ukufuma ilya nshita, Yosefe alilekele ukufisa ukuti ali musambi wa kwa Yesu.
14. Finshi mufwile ukucita nga ca kuti mulatiina abantu?
14 Bushe na imwe mulatiina abantu nga filya Yosefe aletiina? Bushe mulomfwa insoni sha kweba abantu ukuti muli Nte ya kwa Yehova, ilyo muli ku sukulu nelyo ku ncito? Bushe mulatiina ukuba kasabankanya nelyo ukubatishiwa, pantu mulatiina ifyo abantu bakulamumona nga mwabatishiwa? Mwilaleka ukutontonkanya ifi kulemulenga mulefilwa ukucita icalungama. Mulepepa kuli Yehova. Mulemulomba ukuti alelenga muleba abashipa pa kuti mulecita ifyo afwaya. Nga mwamona ifyo Yehova akala-asuka amapepo yenu, mukaba abashipa icine cine.—Esa. 41:10, 13.
NGA TULESEKELELA TUKATWALILILA UKUBOMBELA YEHOVA
15. Bushe insansa isho abasambi bakwete ilyo Yesu abushiiwe, shalengele batwalilila ukucita cinshi? (Luka 24:52, 53)
15 Abasambi ba kwa Yesu bali sana no bulanda ilyo afwile. Elenganyeni ifyo baleumfwa. Cibusa wabo alifwile kabili balemona kwati tabakwete isubilo. (Luka 24:17-21) Na lyo line, ilyo Yesu abushiiwe, alibalondolwelele ifyo afikilishe amasesemo ya mu Baibolo. Na kabili alibapeele umulimo uwacindama uwa kubomba. (Luka 24:26, 27, 45-48) Ilyo Yesu aleya ku muulu, ninshi palipita inshiku 40 ukutula apo abuushiwilwe, abasambi bakwe tabali no bulanda lelo balesekelela. Balesekelela pantu balishibe ukuti Shikulu wabo ali uwa mweo, kabili ali no kubafwa ukubomba umulimo uo abapeele. Ifyo balesekelela fyalengele baletwalilila ukulumbanya Yehova.—Belengeni Luka 24:52, 53; Imil. 5:42.
16. Kuti twapashanya shani abasambi ba kwa Yesu?
16 Bushe kuti twapashanya shani abasambi ba kwa Yesu abalesekelela? Nga ca kuti tulepepa Yehova umwaka onse, te pa Cibukisho fye e lyo twingalasekelela. Pa kuti tulepepa Yehova umwaka onse, tufwile ukubika amano ku fya kwa Lesa. Ku ca kumwenako, abengi balicefyako ifya kucita pa kuti balebila imbila nsuma, balelongana, kabili balekwata na mapepo ya lupwa lyonse. Bambi nabo balisalapo ukukanakwata ifintu fimo ifyo abantu bamo bamona ukuti fyalicindama, pa kuti balebombesha mu cilonganino baba nelyo pa kuti baye ku cifulo cimbi uko aba kubila imbila nsuma bacepa. Nangu ca kuti tulakabila ukulashipikisha pa kuti tutwalilile ukubombela Yehova, alitulaya ukuti akatupaala nga nshi nga twatangisha ifya Bufumu.—Amapi. 10:22; Mat. 6:32, 33.
Mu nshita ya Cibukisho, mulefwayako inshita ya kutontonkanya pa fyo Yehova na Yesu bamucitila (Moneni paragrafu 17)
17. Cinshi mulefwaisha ukucita ilyo kukaba Icibukisho? (Moneni icikope.)
17 Tulefwaisha ukulongana Icibukisho pali Cibili pa 4 April, pa kuti tukebukishe imfwa ya kwa Yesu. Na lyo line, tamufwile ukulolela pa 4 April pa kuti mukatendeke ukutontonkanya pa fyo ubumi bwa kwa Yesu bwali, pa mfwa yakwe, na pa fyo Yehova na Yesu batutemwa. Lelo muletontonkanya pali ifi fyonse ilyo ubushiku bwa Cibukisho bushilafika na pa numa ya Cibukisho. Ku ca kumwenako, kuti mwafwayako inshita ya kubelenga no kutontonkanya pa fyacitikile Yesu, muli charti itila “Umulungu wa Kulekelesha uo Yesu ali Pano Isonde” iyaba mu katabo akatila Ukusambilila Icebo ca kwa Lesa. Ilyo mulebelenga, muletontonkanya pa Malembo ayengalenga mwalatasha pa fyo Yesu amucitile, mwamutemenwako, mwaba abashipa, kabili mwalasekelela. Lyena muletontonkanya pa fyo mwingacita pa kulanga ukuti mulatasha pa fyo Yesu amucitila. Kuti mwacetekela ukuti Yesu akatasha sana, pali fyonse ifyo mukacita pa kwibukisha imfwa yakwe uno mwaka.—Ukus. 2:19.
ULWIMBO 17 “Ndefwaya”
a Mu nshita ya Cibukisho, tufwile ukulatontonkanya sana pa fyacitikile Yesu e lyo na pa mfwa yakwe. Na kabili tufwile ukulatontonkanya pa fyo ena na Wishi batutemwa. Nga tuletontonkanya pali ifi, tukalatasha Yehova na Yesu pa fyo batucitila. Muli cino cipande, twalasambilila pa fyo twingalanga ukuti tulatasha pa cilubula, e lyo na pa fyo twingalanga ifyo twatemwa Yehova na Yesu. Na kabili twalasambilila ifyo Yehova atutemwa fingalenga twatemwa aba bwananyina, twaba abashipa, kabili twalasekelela ilyo tulemubombela.
