ICIPANDE CA KUSAMBILILAMO 4
Yehova Alatupaala nga Twabombesha Ukusangwa ku Cibukisho
“Mulecita ici ku kunjibukisha.”—LUKA 22:19.
ULWIMBO 19 Umulaalilo wa kwa Shikulu
IFYO TWALASAMBILILA a
1-2. Mulandu nshi tusangilwa ku Cibukisho cila mwaka?
NAPAPITA imyaka mupepi na 2,000 ukutula apo Yesu atufwilile. Ici calenga ukuti tube ne subilo lya kuba no mweo wa muyayaya. Pa bushiku ilyo Yesu ashilafwa, aebele abasambi bakwe ukulaibukisha imfwa yakwe. Abomfeshe umukate e lyo no mwangashi pa kubalanga ifyo bali no kulacita pa kwibukisha imfwa yakwe.—1 Kor. 11:23-26.
2 Tulomfwila ifyo Yesu atwebele pantu twalimutemwa icine cine. (Yoh. 14:15) Cila mwaka mu nshita ya Cibukisho, tulalanga ifyo tutasha pa fyo acitile nga tuletontonkanya no kupepela pa fyo imfwa yakwe yacindama. Na kabili tulabombesha ukwitako abantu abengi ukuti bakesesangwako kuli uku kulongana kwacindama. Tatufwaya icintu nangu cimo ukutulesha ukusangwa ku Cibukisho.
3. Finshi twalasambilila muli cino cipande?
3 Muli cino cipande twalasambilila pa fintu fitatu, ifilanga ifyo abantu ba kwa Yehova babombesha pa kwibukisha imfwa ya kwa Yesu: (1) balakonka filya fine Yesu acitile pa kwibukisha imfwa yakwe, (2) baleta abantu ukwisasangwako, na (3) balebukisha imfwa ya kwa Yesu nangu nabakwata amafya.
BALAKONKA FILYA FINE YESU ACITILE PA KWIBUKISHA IMFWA YAKWE
4. Finshi tusambilila cila mwaka pa Cibukisho, kabili mulandu nshi ukwishibila ifyo tusambilila kwacindamina? (Luka 22:19, 20)
4 Cila mwaka pa Cibukisho tulakutika ilyashi lya Baibolo ilyasuka ifipusho ifingi. Tulasambilila umulandu abantu bakabila ukulubulwa, e lyo ne fyo imfwa ya muntu umo yalubula abantu abengi. Na kabili tulasambilila ne fyo umukate no mwangashi fimininako, na balingile ukulyako ifimpashanya. (Belengeni Luka 22:19, 20.) Tulatontonkanya na pa mapaalo ayo Yehova akapeela abakekala pano isonde. (Esa. 35:5, 6; 65:17, 21-23) Ukwishiba ifi fishinka kwalicindama sana. Pantu abantu abengi tabafishiba, kabili tabamona ukuti imfwa ya kwa Yesu yalicindama. Tabakonka ne fyo Yesu acitile pa kwibukisha imfwa yakwe. Cinshi calenga belacita ifi?
5. Ilyo abatumwa abengi bafwile, finshi abantu abengi batendeke ukucita pa kulaibukisha imfwa ya kwa Yesu?
5 Ilyo abatumwa ba kwa Yesu abengi bafwile, Abena Kristu aba bufi balingile mu cilonganino. (Mat. 13:24-27, 37-39) Balelanda “ifyanyongana pa kuti bongole abasambi, balebakonka.” (Imil. 20:29, 30) Fimo “ifyanyongana” ifyo balesambilisha fya kuti Yesu tatuulile ilambo “umuku fye umo capwa pa kuti asende imembu sha bengi,” lelo alekabila ukulaituula fye lyonse. (Heb. 9:27, 28) Ifi fine e fyo abantu abengi muno nshiku basuminamo. Balaya ku macalici yabo cila mulungu, nelyo cila bushiku ku kwibukisha imfwa ya kwa Kristu ico beta ukuti “Ukupoka Ulukalisitiya.” b Bambi nabo tabebukisha imfwa ya kwa Yesu cila bushiku nelyo cila mulungu. Na lyo line, tabaishiba ifyo imfwa ya kwa Yesu yatucitila. Bamo kuti batontonkanya ukuti: ‘Bushe ca cine imfwa ya kwa Yesu kuti yalenga imembu shandi ukwelelwa?’ Mulandu nshi bengatontonkanishisha ifi? Limo icilenga, ni co kwaliba abantu bamo abatila imfwa ya kwa Yesu te kuti ilenge umuntu ukwelelwa imembu. Bushe abasambi ba kwa Yesu balenga shani abantu baishiba umulandu imfwa ya kwa Yesu yacindamina, e lyo ne fyo balingile ukulakonka pa kulaibukisha imfwa yakwe?
6. Finshi abasambi ba Baibolo baishileumfwikisha mu 1872?
6 Mu 1870, ibumba lya basambi ba Baibolo ilyaletungululwa na ba Charles Taze Russell, balitendeke ukufwailikisha sana no kubelenga Amalembo. Balefwaya ukwishiba umulandu imfwa ya kwa Yesu yacindamina e lyo ne fyo tufwile ukulacita pa kulaibukisha imfwa yakwe. Mu 1872, balisangile ukuti ca cine, Yesu alifwilile abantu abengi. Ilyo baishibe ifyo Baibolo isambilisha, balitendeke ukusambilishako bambi ukubomfya ifitabo, amanyunshipepala, e lyo na ma magazini. Tapakokwele balitendeke ukucita nge fyo Abena Kristu ba kubalilapo balecita, e kutila ukulongana umuku umo mu mwaka ku kwibukisha imfwa ya kwa Yesu.
7. Bushe na ifwe tunonkelamo shani muli filya abasambi ba Baibolo basangile kale?
7 Muno nshiku, tucili tulanonkelamo mu fyo balya baume ba cishinka basangile. Tunonkelamo shani? Yehova alilenga twaishiba umulandu imfwa ya kwa Yesu yacindamina, kabili alilenga twaishiba ne fyo ikacitila abantu ku ntanshi. (1 Yoh. 2:1, 2) Na kabili twalisambilila mu Baibolo ukuti abantu abalenga Lesa ukulasekelela, bamo bakaya ku muulu uko bashakalefwa, e lyo abengi bakaba pe sonde kabili bakekala umuyayaya. Tulapalama sana kuli Yehova nga twatontonkanya pa fyo atutemwa e lyo na pa fyo tunonkelamo mu mfwa ya kwa Yesu. (1 Pet. 3:18; 1 Yoh. 4:9) Kanshi nga filya fine bamunyinefwe aba ku kale balecita, na ifwe tuleta abantu ukwisaibukishisha pamo na ifwe imfwa ya kwa Yesu, filya fine aebele abasambi ukuti e fyo bafwile ukulacita.
ABANTU BA KWA YEHOVA BALETA ABANTU KU CIBUKISHO
Finshi mwingacita pa kuti mubombeko umulimo wa kwita abantu ku Cibukisho? (Moneni amaparagrafu 8-10) e
8. Ukufuma na kale, finshi abantu ba kwa Yehova bacita pa kwita abantu ku Cibukisho? (Moneni icikope.)
8 Pa myaka iingi abantu ba kwa Yehova baleta abantu abengi ukwisasangwa ku Cibukisho. Mu Ulupungu lwa kwa Kalinda ulwa mu 1881, mwali ukubilisha umo baitile aba bwananyina ukuti bakalongane Icibukisho mu ng’anda imo mu Allegheny, Pennsylvania. Pa numa, cila cilonganino calitendeke ukulaikwatila Icibukisho. Mu March 1940, bakasabankanya balibebele ukutila kuti baitako bonse abalefwaya ukusangwa ku Cibukisho. Mu 1960, e wali umuku wa kubalilapo ku Bethel ukupulinta utupepala twa kwitilapo abantu ku Cibukisho. Ukufuma ilya nshita, tulapeela abantu abengi utupepala twa kubetilapo ku Cibukisho. Mulandu nshi tubombesesha ukwita abantu ku Cibukisho?
9-10. Ni bani banonkelamo nga tuleita abantu ku Cibukisho? (Yohane 3:16)
9 Umulandu umo uukalamba uo twitila abantu ku Cibukisho wa kuti, abesako pa muku wa kubalilapo balasambilila pa fyo Yehova na Yesu batucitila. (Belengeni Yohane 3:16.) Tufwaya ukuti ifyo bamona no kumfwa pa Cibukisho, fyalenga bafwaya ukusambilila pali Yehova, e lyo no kufwaya ukumubombela. Lelo kulaba na bambi abanonkelamo nga baisa ku Cibukisho.
10 Na bambi abo twita ku Cibukisho, ni balya abaleka ukubombela Yehova. Tufwaya baishiba ukuti Lesa acili alibatemwa. Abengi balesa nga twabeta, kabili tulatemwa sana ukubamona. Ukusangwa ku Cibukisho kulalenga baleibukisha ifyo balebombela Yehova kale. Natulande pali ba Monica. c Ilyo kwali icikuko ca COVID-19, e lyo batendeke ukubila imbila nsuma na kabili. Pa numa ya kusangwa ku Cibukisho caliko mu 2021, batile: “Ici Cibukisho nacicindama sana kuli ine. Uyu e muku wa kubalilapo pa myaka 20, ukutula apo nalekelesheko ukwita abantu ukwisasangwa ku Cibukisho. Nalyeseshe apo ningapesha ukwita abantu ku Cibukisho pantu ndatasha sana pa fyo Yehova na Yesu bancitila.” (Amalu. 103:1-4) Nampo nga bantu baisa ku Cibukisho nelyo tabeshile, tulatwalilila ukubeta pantu twalishiba ukuti Yehova alatasha pa fyo tubombesha.
11. Bushe Yehova atupaala shani ifi twesha na maka ukwita abantu ku Cibukisho? (Hagai 2:7)
11 Yehova alatupaala ifi twesha na maka ukwita abantu ku Cibukisho. Mu 2021, nangu ca kuti kwali icikuko ca COVID-19, abantu abasangilwe ku Cibukisho bali 21,367,603. Aba bantu bengi sana nga kubalinganya ku fyo Inte sha kwa Yehova baba mwi sonde lyonse! Kwena Yehova tabika fye amano ku mpendwa ya bantu abasangwa ku Cibukisho, lelo abika amano ku bantu abasangwako. (Luka 15:7; 1 Tim. 2:3, 4) Kuti twacetekela ukuti nga twaita abantu ku Cibukisho, ninshi ni Yehova alelenga ukuti tulefwaya abantu abafwaya ukukutika.—Belengeni Hagai 2:7.
ABANTU BA KWA YEHOVA BALASANGWA KU CIBUKISHO NANGU BALI NA MAFYA
Yehova alatupaala pa fyo tubombesha pa kuti tusangwe ku Cibukisho (Moneni paragrafu 12) f
12. Mafya nshi ayo twingakwata ayengalenga catukosela ukwibukisha imfwa ya kwa Yesu? (Moneni icikope.)
12 Yesu asobele ukuti mu nshiku sha kulekelesha tuli no kukwata amafya ayalekanalekana. Amafya pamo nga, aba mu lupwa lwesu ukutukaanya ukupepa Lesa, ukutucusha, inkondo, ifikuko, e lyo na mafya yambi. (Mat. 10:36; Marko 13:9; Luka 21:10, 11) Inshita shimo aya mafya yalalenga ciletukosela ukwibukisha imfwa ya kwa Yesu. Bushe bamunyinefwe na bankashi bacita shani pa kuti bebukishe imfwa ya kwa Yesu, kabili bushe Yehova abafwa shani?
13. Bushe Yehova apaalile shani ba Artem ilyo baleibukisha imfwa ya kwa Yesu mu cifungo?
13 Nga batubika mu cifungo. Aba bwananyina abo bakaka mu fifungo balesha apo bengapesha ukwibukisha imfwa ya kwa Yesu. Lekeni tulandeko pa fyacitile ba Artem. Ilyo kwali Icibukisho mu mwaka wa 2020, ninshi balibakaka mu cifungo mu kamuputule akanono umo bali 5. Babomfeshe ifyo bakwete nge fimpashanya, kabili balipekenye no kulanda ilyashi lya Cibukisho. Nomba abafungwa abali muli ako kamuputule, balepeepa sana fwaka kabili balelanda amashiwi ya musaalula. Finshi ba Artem bacitile? Balilombele abafungwa banabo ukuti baleke ukupeepa e lyo no kubomfya amashiwi ya musaalula pe awala fye limo. Ba Artem balipapile sana ilyo balya bafungwa basumine ukukanapeepa fwaka e lyo no kukanalanda amashiwi ayabipa pe awala limo. Ba Artem batile: “Nalibetile ukuti basangweko ku Cibukisho.” Nangu ca kuti balikene ukuti tabalefwaya ukumfwa ifili fyonse, ilyo bamwene no kumfwa ifyo ba Artem balecita pa kwibukisha imfwa ya kwa Yesu, balitendeke ukubepusha umwalolele ifyo bacitile.
14. Bushe abantu ba kwa Yehova bacitile shani pa kuti balongane Icibukisho ilyo kwali icikuko ca COVID-19?
14 Icikuko ca COVID-19. Ilyo kwali icikuko, abantu ba kwa Yehova tabalelongana pamo Icibukisho. Lelo ici tacalengele ukuti beibukisha imfwa ya kwa Yesu. d Ifilonganino ifyakwete Intaneti, fyalelongana Icibukisho ukubomfya Intaneti. Inga abantu abengi abashakwete Intaneti balelongana shani? Mu fyalo fimo, balibikile ilyashi lya Cibukisho pa TV nelyo pa cilimba. Na kabili pa ma Bethel balikopele ilyashi ukucila mu ndimi 500, pa kuti na bali mu fifulo fya kutali balongane Icibukisho. Kabili aba bwananyina balitwaliile bamunyinefwe amalyashi ayakopwa muli ishi ncende sha kutali.
15. Cinshi mwasambilila ku fyacitike kuli ba Sue?
15 Balupwa nga baletukaanya. Bamo ubwafya bakwata ubulenga cabakosela ukusangwa ku Cibukisho, ni balupwa ukubakaanya. Natulande pa fyacitike kuli ba Sue, abalesambilila Baibolo. Mu 2021 ilyo kwashele ubushiku bumo ukuti kube Icibukisho, ba Sue baebele abalebasambilisha Baibolo ukuti tabakasangweko ku Cibukisho, pantu balupwa lwabo balibakenye. Abalesambilisha ba Sue Baibolo babelengele Luka 22:44. Lyena babalondolwelele ukuti nga twakwata amafya tufwile ukucita ifyo Yesu acitile, e kutila ukupepa kuli Yehova no kumucetekela ukuti alatwafwa. Ubushiku bwakonkelepo ba Sue balipangile umukate kabili balifwaile no mwangashi, kabili balitambile Amapepo ya Lucelo pa Bushiku bwa Cibukisho ayaba pa jw.org. Bulya bwine bushiku ilyo bali mu muputule wabo, balisangilwe ku Cibukisho ukubomfya foni. Pa numa ya Cibukisho, ba Sue balembeele abalebasambilisha Baibolo ukuti: “Mwalinkoselesha sana mailo. Nacicita fyonse ifyo mwankoseleshe kabili Yehova acingafwa ukusangwa ku Cibukisho. Ndetasha icine cine ifyo mwangafwile.” Bushe mulemona ukuti na imwe Yehova kuti amwafwa nga mwakwata ubwafya bumo bwine?
16. Mulandu nshi twingacetekelela ukuti Yehova akatupaala nga twasangwa ku Cibukisho? (Abena Roma 8:31, 32)
16 Yehova alatasha sana pa fyo tubombesha pa kwibukisha imfwa ya kwa Yesu. Kuti twacetekela ukuti akatupaala nga twatwalilila ukulanga ukuti tulatasha pa fyo atucitila. (Belengeni Abena Roma 8:31, 32.) Lekeni tukasangwe ku Cibukisho uno mwaka, kabili tukabombe apakapela amaka yesu mu mulimo wa kubila imbila nsuma mu nshita ya Cibukisho.
ULWIMBO 18 Tulatasha pa Cilubula
a Pali Cibili, pa 4 April 2023, abantu abengi bakalaibukisha imfwa ya kwa Kristu. Abengi, uyu ukaba e muku wa kubalilapo ukusangwa ku Cibukisho. E lyo na bamo abaleka ukubombela Yehova pa myaka iingi, bakesasangwako ku Cibukisho. Bamo bali no kukwata amafya ayengalenga ca-afya ukusangwako. Na lyo line, bakasangwako. Te mulandu na mafya mulekwata, kuti mwacetekela ukuti Yehova akasekelela nga mwasangwa ku Cibukisho.
b Abapepa kuli aya macalici basumina ukuti umukate no mwangashi filaaluka, no kuba umubili wa cine cine uwa kwa Kristu e lyo no mulopa wakwe. Baishiba ukuti nga balelya ulukalisitiya ninshi Yesu atuula ilambo.
c Amashina yamo nabayalula.
d Moneni icipande ca pa jw.org icileti “2021 Memorial Commemoration.”
