Yehova aebele Esekiele ukusesema pa fyo uluko lwa bena Israele lwali no kwikatana nga lwabwelela ku Calo ca Bulayo. Ubu busesemo bwalesobela ne fyo abantu ba kwa Lesa bali no kwikatana mu nshiku sha kulekelesha.

Yehova aebele kasesema Esekiele ukulemba pa misambo ibili. Pa musambo umo alembelepo ati, “Kuli Yuda na ku bana ba kwa Israele abanankwe.” Pa musambo umbi alembelepo ati, “Kuli Yosefe, umusambo wa kwa Efraimu, na ba mu ng’anda ya kwa Israele bonse abanankwe.” Iyi misambo ibili ali no kuibika pamo pa kuti ibe “umusambo umo” mu minwe ya kwa Esekiele.—Esek. 37:15-17.

 Bushe “Efraimu” e mininako cinshi? Imfumu ya kubalilapo iya bufumu bwa ku kapinda ka ku kuso ubwa mikowa 10 ali ni Yeroboamu umwina Efraimu. Pali ilya nshita uyu e wali umukowa wa maka sana. (Amala. 33:13, 17; 1 Isha. 11:26) Uyu mukowa watuntwike ku mwana wa kwa Yosefe, Efraimu. (Impe. 1:32, 33) Yosefe balimupaalile mu nshila iyaibela kuli wishi Yakobo. Kanshi, calilingile ukuti umusambo uwaleimininako imikowa 10 uleitwa ati “umusambo wa kwa Efraimu.” Ilyo Esekiele alembele ubu ubusesemo pa misambo ibili, ninshi abena Israele abali mu bufumu bwa ku kapinda ka ku kuso balibasenda muli bunkole ku Asiria mu mwaka wa 740 ninshi Yesu talaisa pano isonde. (2 Isha. 17:6) Kanshi pali iyi nshita ninshi Babiloni yalicimfya Asiria kabili abena Israele abengi balisalanganine mu Babiloni monse.

Mu mwaka wa 607 ninshi Yesu talaisa pano isonde, abaleikala mu bufumu bwa ku kapinda ka ku kulyo aka mikowa ibili na bashele mu bufumu bwa ku kapinda ka ku kuso, balibasendele muli bunkole ku Babiloni. Imfumu isha mu mukowa wa kwa Yuda e shaleteka iyi imikowa ibili, kabili bashimapepo baleikala mu bufumu bwa mikowa ibili pantu balebombela pe tempele mu Yerusalemu. (2 Imila. 11:13, 14; 34:30) Kanshi umusambo wa kwa “Yuda” waleimininako ubufumu bwa mikowa ibili.

Bushe ni lilali iyi misambo ya mampalanya ibili yabikilwe pamo? Ni lintu abena Israele babweleele ku Yerusalemu ku kukuula itempele cipya cipya mu mwaka wa 537 ninshi Yesu talaisa pano isonde. Aba mu bufumu bwa mikowa ibili na aba mu bufumu bwa mikowa 10 babweleele pamo ukufuma muli bunkole. Ilyo abana ba kwa Israele bonse babwelele, bali fye uluko lumo. (Esek. 37:21, 22) Abena Israele balikatene mu kupepa Yehova na kabili. Kasesema Esaya na kasesema Yeremia nabo balisobele ukuti abena Israele bali no kwikatana.—Esa. 11:12, 13; Yer. 31:1, 6, 31.

Cinshi icacindama ico ubu busesemo bwalandapo pa kupepa kwa cine? Ico bwalandapo ni ci: Yehova akalenga bakapepa bakwe ‘bakabe umusambo umo.’ (Esek. 37:18, 19) Bushe ubu busesemo bwalifikilishiwa muno nshiku? Ee. Pa kubala ubu busesemo bwatendeke ukufikilishiwa mu 1919 ilyo Lesa aile aleteyanya no kwikatanya abantu bakwe. Satana alesha ukubalekanya lelo alafilwa.

Pali iyi nshita abengi abo alonganike bali ne subilo lya kuba ishamfumu na bashimapepo mu muulu pamo na Yesu. (Ukus. 20:6) Mu mampalanya bali nga umusambo wa kwa Yuda. Lelo mu kupita kwa nshita abantu abengi abakwete isubilo lya kwikala pano isonde batendeke ukuilunda ku baYuda ba ku mupashi. (Seka. 8:23) Aba bena bali nga umusambo wa kwa Yosefe kabili tabakwete isubilo lya kuteka pamo na Kristu.

Aya amabumba yabili yalabombela Yehova pamo kabili yatungululwa ne Mfumu imo, Yesu Kristu, iyo ukusesema kwalandapo ukuti “mubomfi wandi Davidi.” (Esek. 37:24, 25) Yesu apepele ati abasambi bakwe bonse ‘babe umo, filya Wishi aba muli ena, na ena muli Wishi.’ * (Yoh. 17:20, 21) Na kabili Yesu asobele ukuti umukuni uunono uwa basubwa ne “mpaanga shimbi” bali no kuba “umukuni umo.” Bonse bali no kulatungululwa na “kacema umo.” (Yoh. 10:16) Ala aya amashiwi yalalondolola bwino ifyo abantu ba kwa Yehova baikatana muno nshiku te mulandu ne subilo bakwata!