ICIPANDE CA KUSAMBILILAMO 30
Twalilileni Ukwenda mu Cine
“Takuli icintu nangu cimo icinsansamusha nga nshi ukucila pa kumfwa ukuti abana bandi bale-enda mu cine.”—3 YOH. 4.
ULWIMBO 54 “Iyi E Nshila”
IFYO TWALASAMBILILA *
1. Nga fintu Baibolo ilanda pali 3 Yohane 3, 4, cinshi cilenga tuleba ne nsansa?
BUSHE kuti mwaelenganya ifyo umutumwa Yohane atemenwe ilyo aumfwile ukuti abo aafwile ukusambilila icine balitwalilile ukubombela Yehova ne cishinka? Balekwata amafya ayengi, kabili Yohane alebombesha pa kukosha icitetekelo ca aba Abena Kristu ba cishinka abo alemona ukuti bana bakwe aba ku mupashi. Na ifwe bene, tulatemwa sana nga ca kuti abana besu nelyo abo tusambilisha Baibolo baipeela kuli Yehova kabili batwalilila no kumubombela.—Belengeni 3 Yohane 3, 4.
2. Cinshi Yohane alembeele amakalata?
2 Mu mwaka wa 98 ninshi Yesu alibwelelamo ku muulu, Yohane nalimo aleikala mu Efese nelyo lwa mupepi no uyu musumba. Nalimo aileko ilyo afumine pa cishi ca Patmo apo bamukakiile. Kabili nalimo pali ilya ine nshita e lyo umupashi wa kwa Yehova wamulengele ukulemba amakalata yatatu. Ico Yohane alembeele yalya amakalata kukoselesha Abena Kristu ba cishinka ukutwalilila ukuba ne citetekelo muli Yesu no kutwalilila ukwenda mu cine.
3. Mepusho nshi twala-asuka?
3 Yohane e wali umutumwa wa kulekeleshako ukufwa, kabili alisakamikwe pa fyo cali no kuba filya bakasambilisha ba bufi baingile mu cilonganino. * (1 Yoh. 2:18, 19, 26) Balya abasangu baleitunga ukuti balishibe Lesa, lelo tabalekonka amafunde yakwe. Lekeni tusambilile pa fyo Yohane afundile balya Abena Kristu mu makalata alembele. Ilyo tulesambilila twala-asuka amepusho yatatu: Calola mwi ukwenda mu cine? Finshi fingalenga twaleka ukwenda mu cine? Kabili finshi twingacita pa kuti tuleafwana ukutwalilila ukwenda mu cine?
CALOLA MWI UKWENDA MU CINE?
4. Ukulingana ne fyo Baibolo ilanda pali 1 Yohane 2:3-6 na 2 Yohane 4, 6, finshi tulingile ukucita pa kuti tule-enda mu cine?
4 Pa kuti tule-enda mu cine, tulingile ukwishiba icine icaba mu Cebo ca kwa Lesa, Baibolo. Na kabili tufwile ‘ukulakonka amafunde ya kwa [Yehova].’ (Belengeni 1 Yohane 2:3-6; 2 Yohane 4, 6.) Yesu aleumfwila sana Yehova. Kanshi cimo icacindama ico tucita pa kulaumfwila Yehova kulakonka sana mu ntampulo sha kwa Yesu.—Yoh. 8:29; 1 Pet. 2:21.
5. Finshi tulingile ukushininkisha?
5 Pa kuti tutwalilile ukwenda mu cine, tufwile ukushininkisha ukuti Yehova ni Lesa wa cine, no kuti fyonse ifyo atweba mu Cebo cakwe Baibolo fya cine. Na kabili tufwile ukushininkisha ukuti Yesu e Mesia walaiwe. Abengi muno nshiku balatwishika ukuti Yesu alisontwa ukuba Imfumu ya Bufumu bwa kwa Lesa. Yohane alilandile ukuti kwali no kuba “bakabepa abengi,” abali no kulufya abashatetekele sana icine pali Yehova na pali Yesu. (2 Yoh. 7-11) Yohane alembele ukuti: “Bushe uwa bufi te ukaana, ati, Yesu te Kristu?” (1 Yoh. 2:22) Icingatwafwa fye ukukanabepwa kulasambilila Icebo ca kwa Lesa. Nga tulecita ifi e lyo twingeshiba Yehova na Yesu. (Yoh. 17:3) Kabili e lyo tukashininkisha ukuti ifyo tusambilila fya cine.
FINSHI FINGALENGA TWALEKA UKWENDA MU CINE?
6. Cinshi cimo icingalenga Abena Kristu bacaice baleka ukwenda mu cine?
6 Abena Kristu bonse bafwile ukuba abacenjela pa kuti tabakonkelele amano ya buntunse. (1 Yoh. 2:26) Abena Kristu bacaice e bafwile ukucenjela sana kuli ici iciteyo. Nkashi Alexia, * uwa ku France uuli ne myaka 25 atile: “Ilyo naleya ku sukulu, baletusambilisha ukuti ifintu fyaishilebako fye ifine. Ifi baletusambilisha fyalilengele natendeka ukutwishika nga ca kuti ifyo Baibolo isambilisha fya cine. Inshita shimo, naletemwa ukusambilila pali ici cisambilisho. Lelo nalishibe ukutila te kuti cibe bwino ukusumina fye fyonse ifyo baletusambilisha ukwabula ukuti njishibe ifyo Yehova alandapo.” Ba Alexia balisambilile icitabo citila Life—How Did It Get Here? By Evolution or by Creation? Mu milungu fye iinono, balilekele ukutwishika nga ca kuti Lesa e wabumbile ifintu fyonse. Ba Alexia batile: “Nalishininkishe ukuti ifyo Baibolo ilanda fya cine. Kabili nalimwene ukuti ukulakonka ifyo ilanda kwali no kulenga naba ne nsansa no mutende.”
7. Finshi ifyo tushifwile ukulacita, kabili mulandu nshi?
7 Abena Kristu bonse, abakalamba na baice, bafwile ukwesha na maka ukukanalacita ifyabipa mu bumfisolo. Yohane alandile ukutila te kuti tule-enda mu cine, e lyo uku ninshi tulecita ifyabipa. (1 Yoh. 1:6) Nga tulefwaya ukuba ifibusa fya kwa Yehova pali ino nshita e lyo na ku ntanshi, tulingile ukulaibukisha ukuti Yehova alamona fyonse ifyo tucita. Kanshi kuti twatila takwaba ulubembu ulwa fisama, pantu Yehova alamona fyonse.—Heb. 4:13.
8. Finshi ifyo abantu balanda ifyo tushilingile ukukonkelela?
8 Tatufwile ukulamona ukucita ulubembu nge fyo aba muli cino calo bakumona. Umutumwa Yohane alembele ukuti: “Nga twasosa atuti: ‘Tatuli na lubembu,’ ninshi tuleibepa fye, kabili ninshi muli ifwe tamwaba ne cine.” (1 Yoh. 1:8) Ilyo Yohane ali pano calo, abasangu balelanda abati umuntu kuti atwalilila ukuba cibusa wa kwa Lesa nangu ca kuti alecita imembu. Twikala mu calo umwaba abantu abatontonkanya nge fyo abasangu baletontonkanya. Abengi balanda ukuti balitetekela muli Lesa, lelo tabamona ulubembu nge fyo Yehova alumona, maka maka ukucita ubulalelale. Ifyo Yehova amona ukuti lubembu, abantu ba muli cino calo bena balanda ukutila kuti waficita nga ulefwaya.
Mwe bacaice, mufwile ukwishiba ico Yehova alandila ukuti ifintu fimo fisuma e lyo fimbi ukuti fibi. Lyena cikalamwangukila ukulondolola ico mukaanina ukucitako ifyabipa (Moneni paragrafu 9) *
9. Bushe abacaice banonkelamo shani nga ca kuti balekonka ifyo Baibolo ilanda ukuti e fyalungama?
9 Abena Kristu bacaice maka maka, nalimo kuti cabakosela ukulamona ubulalelale nge fyo Yehova abumona nga ca kuti bali pamo na bana be sukulu banabo nelyo abo babomba nabo abashimona ubulalelale nge fyo Yehova abumona. Ifi twalandapo e fyacitikiile na ba Aleksandar. Balandile ukuti: “Abakashana bamo pa sukulu balempatikisha ukuti ndecita nabo ubulalelale. Balelanda ukuti apo nshakwete umukashana nale-enda nankwe, ninshi mfwile nalikwete umwaume munandi uo nalelala nankwe.” Nga ca kuti mwaba no bwesho bwa musango uyu, muleibukisha ukuti ukukonka ifyo Baibolo ilanda ukuti e fyalungama, kukalenga mukabe ne nsansa no kuicingilila ku malwele. Tamwakaleumfwa sana ububi kabili mukatwalilila ukuba ifibusa fya kwa Yehova. Na kabili nga tamulekonkelela abacita ifyabipa, cikalamwangukila ukucita ifyalungama. Muleibukisha no kuti Satana e walenga abantu ba muli cino calo balemona ukuti ukucita ubulalelale takwabipa. Kanshi nga mwakaana ukulatontonkanya nge fyo aba muli cino calo batontonkanya, ninshi ‘mwacimfya umubifi.’—1 Yoh. 2:14.
10. Bushe ifyaba pali 1 Yohane 1:9 kuti fyatwafwa shani ukulabombela Yehova na kampingu ya sanguluka?
10 Twalishiba ukuti Yehova e wakwata insambu sha kutweba ukuti ifi lubembu no kuti ifi te lubembu. Kabili tulesha na maka ukukanacita ulubembu. Lelo nga twabembuka, tulapepa kuli Yehova no kumulondolwela ulubembu tucitile. (Belengeni 1 Yohane 1:9.) E lyo nga twacita ulubembu ulukalamba, tuleba baeluda ukuti batwafwe pantu e bo Yehova asonta ukuti baletusakamana. (Yako. 5:14-16) Na lyo line, tatulingile ukulaumfwa ububi pa membu isho twacitile kale. Mulandu nshi? Pantu Shifwe uwatutemwa alitupeela ilambo lya Mwana wakwe pa kuti imembu shesu shile-elelwa. Yehova alilanda ukuti akulabelela uluse abalapila, kabili ifi fine e fyo acita. Kanshi takuli icingatulesha ukulabombela Yehova na kampingu iyasanguluka.—1 Yoh. 2:1, 2, 12; 3:19, 20.
11. Kuti twaicingilila shani ku fyo abasangu basambilisha ifingalenga icitetekelo cesu canaka?
11 Tatufwile ukukutika ku fyo abasangu basambilisha. Ukutula fye apo icilonganino ca Bena Kristu capangiilwe, Satana Kaseebanya alabomfya bakabepa abengi pa kunasha icitetekelo ca babomfi ba kwa Lesa aba cishinka. Kanshi tufwile ukwishiba ifya kucita pa kuti tuleiluka icishinka no bufi. * Abalwani besu kuti babomfya Intaneti pa kuti balenge tuleke ukucetekela sana Yehova na ba bwananyina. Muleibukisha uulenga abalwani balecita ifi, kabili mwilabakonkelela!—1 Yoh. 4:1, 6; Ukus. 12:9.
12. Cinshi tulingile ukukosesha icitetekelo cesu mu cine ico twasambilila?
12 Pa kuti tulekaana ifyo Satana abomfya pa kunasha icitetekelo cesu, tulingile ukucetekela sana Yesu no mulimo akwata mu kufikilisha ukufwaya kwa kwa Lesa. Tufwile no kucetekela inshila imo fye iyo Yehova abomfya muno nshiku pa kutungulula icilonganino cakwe. (Mat. 24:45-47) Kuti twacetekela sana ifi twalandapo nga ca kuti lyonse tulesambilila Icebo ca kwa Lesa. Nga tulecita ifi, icitetekelo cesu cikaba ngo muti uwakwata imishila iyalimba sana mu mushili. Paulo na o alibomfeshe amashiwi yamo yene ilyo alembeele icilonganino ca mu Kolose kalata. Atile: “Apo mwalisumina muli Kristu Yesu Shikulu, mulekonka ifyo afwaya, mube abalimbwa muli ena kabili abakuulwa muli ena no kuba ne citetekelo icakosa.” (Kol. 2:6, 7) Nga twakosha icitetekelo cesu, Satana na ba mu konkelela tabakalenge tukaleke ukwenda mu cine.—2 Yoh. 8, 9.
13. Finshi tulingile ukulaenekela, kabili mulandu nshi?
13 Tufwile ukulaenekela ukutila abantu ba muli cino calo bakulatupata. (1 Yoh. 3:13) Yohane alatwibukishako ukuti “icalo conse calaala mu maka ya mubifi.” (1 Yoh. 5:19) Ilyo impela ya cino calo ilepalama, Satana alafulilwako. (Ukus. 12:12) Tabomfya fye imicenjelo pamo nga itunko lya kucita ubulalelale nelyo ubufi ubo abasangu balanda. Lelo alacusha na bantu ba kwa Lesa. Satana alishiba ukuti ashele fye ne nshita iinono iya kulesha umulimo wa kubila imbila nsuma nelyo ukulenga twaleka ukwenda mu cine. Kanshi te kuti tupape ifi amabuteko yakaanya umulimo wesu mu fyalo ifingi. Na lyo line, bamunyinefwe na bankashi ababa muli ifi fyalo balatwalilila ukushipikisha. Ifyo bacita filanga fye ukuti te mulandu ne fyo Satana e ngacita, kuti twatwalilila ukuba aba cishinka kuli Yehova!
MULEAFWANA UKUTWALILILA UKWENDA MU CINE
14. Finshi fimo ifyo twingacita pa kwafwa bamunyinefwe na bankashi ukutwalilila ukwenda mu cine?
14 Pa kuti tuleafwa bamunyinefwe na bankashi ukutwalilila ukwenda mu cine, tulingile ukulabalangulukilako. (1 Yoh. 3:10, 11, 16-18) Tatufwile ukutemwana fye ilyo ifintu fili bwino, lelo tufwile no kutemwana ilyo kwaba amafya. Ku ca kumwenako, bushe kwaliba uo mwaishiba uwafwililwe lupwa nelyo cibusa uulekabila ukumusansamusha nelyo ukumwafwa mu fyo alekabila? Nelyo bushe mwalyumfwako ukuti ifingi ifyo aba bwananyina bakwete fyalyonaike ilyo baponenwe no busanso ubukalamba, kabili balekabila ukubafwa ukukuula Amayanda ya Bufumu nelyo amayanda yabo? Tatulanga fye ifyo twatemwa aba bwananyina ne fyo tubalangulukilako mu fyo tulanda, lelo na mu fyo tucita.
15. Nga fintu ilembo lya kwa 1 Yohane 4:7, 8 lilanda, finshi tulingile ukucita?
15 Nga tuletemwana, ninshi tulepashanya Shifwe wa ku muulu uwatutemwa. (Belengeni 1 Yohane 4:7, 8.) Inshila imo iyacindama sana iyo tulangilamo ukutemwa kulabelelana uluse. Ku ca kumwenako, umuntu kuti atukalifya e lyo alomba ubwelelo. Kuti twalanga ukutemwa nga ca kuti twamweleela no kulabako ku fyo atukalifye. (Kol. 3:13) Munyinefwe Aldo alifulilwe ilyo munyinefwe uo acindike alandile ifyabipa pa nkulilo yakwe. Ba Aldo batile: “Nalepepa lyonse kuli Yehova ukuti angafwe ukukanalatontonkanya ifyabipa pali ulya munyinane uwalandile ifyankalifye.” Lelo kwali na fimbi ifyo ba Aldo bacitile. Baebele munyinefwe uwabakalifye ukuti bakaye nankwe mu kubila imbila nsuma. Ilyo baleshimikila, ba Aldo balilondolwele ifyo baumfwile pa mashiwi ulya munyinefwe alandile. Batile: “Ilyo nalondolwelele ulya munyinefwe ifyo naleumfwa, alilombele ubwelelo. Ifyo ishiwi lyakwe lyaleumfwika fyalilangile ukuti alyumfwile ububi pa fyo alandile. Ilyo twalanshenye, twalitendeke ukumfwana bwino na kabili.”
16-17. Finshi tulingile ukulafwaisha ukucita?
16 Umutumwa Yohane alitemenwe sana aba bwananyina kabili alefwaya baba ne citetekelo icakosa. Ifyo alembele mu makalata yatatu fyalilangile ifyo abatemenwe ne fyo ababikileko amano. Ala tulatemwa nga nshi ukwishiba ukuti abaume na banakashi abakateka pamo na Yesu balitemwa abantu kabili balibabikako amano nga fintu Yohane ali!—1 Yoh. 2:27.
17 Natule-esha na maka ukulakonka ifyo twasambilila. Kabili natulefwaisha ukulaenda mu cine, ukulaumfwila Yehova muli fyonse ifyo tucita cila bushiku. Mulesambilila Icebo ca kwa Lesa no kucetekela ifyo mulesambilila. Mulecetekela sana Yesu. Mwilakonkelela amano ya bantunse ne fyo abasangu basambilisha. Mwilacita imembu mu bumfisolo kabili mwilakonkelela abacita ifyabipa. Lelo mulekonka amafunde ya kwa Yehova ayalanda pa kuba ne mibele iisuma. Kabili natutwalilile ukulaeleela aba bwananyina nga batukalifya no kubafwa mu fyo balekabila pa kuti icitetekelo cabo cilekoselako. Nga tulecita ifi, tukatwalilila ukwenda mu cine, te mulandu na mafya ayo twingakwata.
ULWIMBO 49 Ukulenga Umutima wa kwa Yehova Ukusekelela
^ para. 5 Twikala mu calo icitungululwa na wishi wa bufi, Satana. Kanshi limo cilatukosela ukwenda mu cine. Abena Kristu abaliko mu nshita ya batumwa, nabo inshita shimo calebakosela ukwenda mu cine. Yehova alengele umutumwa Yohane ukulemba amakalata yatatu pa kwafwa balya Abena Kristu e lyo na ifwe ukutwalilila ukwenda mu cine. Ifyaba muli aya makalata fyalatwafwa ukwishiba ifingalenga twaleka ukwenda mu cine e lyo ne fyo twingacita pa kuti tutwalilile ukulaenda mu cine.
^ para. 3 Moneni akabokoshi akaleti “ Icalengele Yohane Alembe Amakalata Yakwe.”
^ para. 6 Amashina yamo nabayalula.
^ para. 11 Moneni icipande ca kusambililamo icaba mu Ulupungu lwa kwa Kalinda ulwa August 2018 icitila “Bushe Namwishiba Ifishinka?”
^ para. 59 UBULONDOLOSHI BWA CIKOPE: Nkashi wacaice ilyo ali ku sukulu aleumfwa no kumona ifintu ifingi ifilenga camoneka kwati ubulalelale bwa baume nelyo abanakashi bekabeka bwaliba fye bwino. (Mu fyalo fimo umuntu nga nafwala ica kufwala umwaba amalangi yaba mu mukolamfula ninshi alelangilila ukuti alalaala no mwaume munankwe nangu no mwanakashi munankwe.) Pa numa ayafwailapo ifyebo na fimbi pa kuti akoshe icitetekelo cakwe mu fyo asuminamo. Ukucita ifi kuti kwamwafwa ukwishiba ifya kucita.
