Yehova afwaya abaupana ukuba ne nsansa, no kutemwana sana. (Mat. 19:4-6) Nga ca kuti muletontonkanya pa kuupa nelyo ukuupwa, kuti mwasanga shani uwa kuupana nankwe uwalinga? Apo Yehova e watubumbile, alishiba ifyo tulingile ukucita pa kuti tube ne nsansa mu cupo. Kanshi nga tulekonka amashinte ya mafunde ayo atupeela, tukaba ne nsansa. Lekeni tulandeko pa mashinte ya mafunde yamo aya mu Baibolo.

Ica kubalilapo, tufwile ukwishiba ukuti: “Umutima wa bucenjeshi ukucila fyonse, kabili walipelelwa.” (Yer. 17:9) Nga ca kuti abantu babili abalefwaya ukuupana batendeka ukwishishanya, balatemwana bwangu sana. Nga ca kuti batemwana sana, kuti cabakosela ukupingulapo bwino ifyo balingile ukucita. Ilingi line nga ca kuti abantu baupana pa mulandu fye wa kuti nabatemwana, tabesa mu kuba ne nsansa. (Amapi. 28:26) E mulandu wine cishabela bwino ku baleishishanya ukulaebana amashiwi ya cintemwa nelyo ukulalayana ifintu ifikalamba ilyo bashilaishibana bwino.

Baibolo pa Amapinda 22:3 itila: “Uwasalapuka nga amona ububi alabelama, lelo imbulwa mano shena shiya fye no kukandwa.” Bubi nshi bwaba mu kubomfya amawebusaiti ya kufwailapo uwa kuupana nankwe? Ku ca bulanda abantu bamo balatendeka ukwishibana na bantu pa mawebusaiti no kutendeka ukwishishanya nabo. Lyena pa numa besa mu kusanga ukuti umuntu baleishishanya nankwe alibabepele. Na kabili abantu abashaba ne cishinka balabika ifyebo ifya bufi pa Intaneti ifya kuilondolola pa kuti babeleleke abantu no kubebila indalama. Inshita shimo abantu abacita ifya musango uyu balabepa no kuti ni Nte sha kwa Yehova.

Moneni ububi na bumbi ubwaba mu kubomfya amawebusaiti ya kufwailapo uwa kuupana nankwe. Aya amawebusaiti yamo yabomfya programu ya pa kompyuta iilinganya ifyebo ifyo abalefwaya uwa kuupana nankwe babikapo, e lyo yasala uo umuntu engalinga ukwishishanya nankwe. Na lyo line, takwaba ifilanga ukuti iyi inshila ilabomba fye bwino. Te kuti ciwame ukucetekela programu ya pa kompyuta iyapangwa na bantu, ilyo tulesalapo ukucita icintu icacindama sana pamo ngo kufwaya uwa kuupana nankwe. Te kuti twenekele ukuti programu ya pa kompyuta kuti yatwafwa nge fyo amashinte ya mafunde yatwafwa.—Amapi. 1:7; 3:5-7.

Baibolo pa Amapinda 14:15 itila: “Uushaishiba atetekela fye fyonse ifyo aumfwa, lelo uwacenjela alalolekesha apo alenyanta.” Ilyo mushilapingulapo nga ca kuti uo muleishishanya nankwe kuti alinga  ukuupana nankwe, mulingile ukumwishiba bwino sana. Nomba nga mulelanshanya fye no muntu pa Intaneti kuti ca-afya ukumwishiba bwino. Nangu ca kutila mulamona ifyebo uyo muntu abika pa Intaneti kabili na o alamona ifyo mubikapo, tacilepilibula ukuti ninshi mwalishiba bwino uyo muntu. Bamo abalemona kwati nabasanga uwa kuupana nankwe pa Intaneti, balipapile sana ilyo bamonene no yo muntu no kusanga ukuti ifyo bale-enekela te fyo aba.

Uwaimbileko amalumbo atile: “Nshaikala pamo na ba bufi; kabili nshendela pamo na ba bumbimunda.” (Amalu. 26:4) Abantu abengi batontonkanya ukuti caliba fye bwino ukubika ifyebo fya bufi pa webusaiti ya kufwailapo uwa kuupana nankwe pa kuti babatemwe. Nalimo kuti bafisa imibele yakwe iyabipa kabili abo balanshanya nabo te kuti beshibe iyi imibele, nga ca kuti babelenga fye amameseji ayo babatumina. Calicindama ukutontonkanya pa mepusho yakonkapo: Nangu ca kuti abantu bamo abalemba ifyebo pa Intaneti batila ni Nte sha kwa Yehova, bushe ca cine balibatishiwa? Bushe bakalamba mu fya kwa Lesa? Bushe balikwata bucibusa bwakosa na Yehova? Bushe balibacindika ku ba cilonganino? Nelyo bushe baliba ne mibele iyabipa nelyo baba pa bantu abo Baibolo ilanda ukuti tatufwile “ukwampana pamo” nabo? (1 Kor. 15:33; 2 Tim. 2:20, 21) Kabili bushe balikwata ubuntungwa bwa kuupa nelyo ukuupwa ukulingana na Malembo? Mufwile ukwishiba amasuko kuli aya mepusho. Lelo kuti ca-afya ukusanga amasuko kuli aya mepusho nga ca kuti tamuleipushako Abena Kristu bambi abaishiba bwino uyo muntu. (Amapi. 15:22) Na kabili umubomfi wa kwa Yehova uwa cishinka te kuti atontonkanye pa kuupana no muntu uushatetekela no kuba “kwi koli limo line” nankwe.—2 Kor. 6:14; 1 Kor. 7:39.

Apo mwaliba ububi mu kubomfya amawebusaiti ya kufwailapo uwa kuupana nankwe, kwaliba inshila ishisuma isho mwingabomfya pa kufwaya no kwishiba bwino uo mulefwaya ukuupana nankwe. Ni kwi mwingasanga uo mwingopana nankwe? Nga ca kuti ubuteko tabuleseshe ukukumana pamo, Inte sha kwa Yehova baleshibana ilyo bali pa kulongana kwa pa cilonganino, ukwa muputule, ukwa citungu, e lyo na lintu baleangalila pamo.

Nga ca kuti ubuteko bwalesha ukukumana pamo pa mulandu ne fyacitika pamo ngo bulwele bwa COVID-19, tulabomfya amaprogramu ya pa Intaneti pa kulongana kwa pa cilonganino. Kabili pali uku kulongana, tuleshibana na bamunyinefwe na bankashi abashimbe. Kuti mwaumfwa ifyo balanda amalyashi, e lyo ne fyo balanga icitetekelo cabo ilyo baleasukapo pa kulongana. (1 Tim. 6:11, 12) Na kabili pa numa ya kulongana, kuti mwamonana no kulanshanya na bamunyinefwe na bankashi abashimbe ilyo kwaba ukuya mu tumabumba utunono utwa pa programu ya pa Intaneti iyo mubomfya pa kulongana. Ilyo mulelanshanya na ba bwananyina muli utu utumabumba, kuti mwamona ifyo umuntu mulefwaya ukutendeka ukwishishanya nankwe acita ilyo alelanshanya na bantu, kabili ici kuti calenga mwaishiba imibele yakwe. (1 Pet. 3:4) Mu kupita kwa nshita ilyo muleya muleishibana, kuti mwamona nga ca kuti ifyo mufwaya ukucita fimo fine, nelyo nga ca kutila kuti mwaba ne nsansa nga mwaupana.

Nga ca kuti abashimbe balekonka amashinte ya mafunde ya mu Baibolo ilyo balefwaya uwa kuupana nankwe, bakaba ne nsansa mu cupo cabo. Cikaba fye nga filya fine Baibolo ilanda pa Amapinda 18:22 ukuti: “Bushe umuntu nasanga umukashi [nelyo umulume] umusuma? Uyo muntu nasanga icisuma, kabili napaalwa kuli Yehova.”