ICIPANDE CA KUSAMBILILAMO 31
“Beni Abashangila, Abashitelententa”
“Mwe bamunyinane abatemwikwa, beni abashangila, abashitelententa.”—1 KOR. 15:58.
ULWIMBO 122 Beni Abashangila, Abashitelententa!
IFYO TWALASAMBILILA a
1-2. Bushe Umwina Kristu aba shani nge cikuulwa icitali? (1 Abena Korinti 15:58)
MU 1978, mu Tokyo ku Japan, balikuulile icikuulwa icitali sana, ica ntunti 60. Abantu bamo baletwishika nga ca kuti cilya cikuulwa cali no kutwalilila ukubako, pantu muli ulya musumba mwalecitika sana ifinkukuma. Finshi abalekuula cilya cikuulwa bacitile pa kuti tacibongolweke nga kwaba icinkukuma? Bainjiniya abalekuula ici cikuulwa, bacikulile mu musango wa kutila kuti catenkana lelo te kuti cibongoloke. Abena Kristu nabo baba kwati ni cilya cikuulwa. Baba shani nga cilya icikuulwa?
2 Nangu ca kuti Umwina Kristu afwile ukuba uushitelententa, tafwile ukuumina kumo. Lyonse afwile ukuba uwakosa kabili uwashangila pa kuti aleumfwila amafunde ya kwa Yehova. (Belengeni 1 Abena Korinti 15:58.) Alaba “ne cumfwila” muli fyonse. Na lyo line, ‘tapampamina fye pa cintu cimo,’ lelo alaaluka nga nacilinga ukwaluka. (Yako. 3:17) Umwina Kristu uwasambilila ukucita ifi, takalepampamina fye cintu cimo nelyo ukutekelesha fimo. Muli cino cipande, twalasambilila ifyo twingacita pa kuti tatuletelententa. Kabili twalasambilila na pa fintu 5 ifyo Satana acita pa kuti twitwalilila ukuba abashangila ne fyo twingacita pa kuti tumucimfye.
KUTI TWACITA SHANI PA KUTI TUBE ABASHANGILA?
3. Mafunde nshi Yehova atupeela ayaba pa Imilimo 15:28, 29?
3 Yehova e utupeela amafunde, kabili lyonse alashinikisha ukuti amafunde atupeela yantu ya-anguka ukumfwa. (Esa. 33:22) Ku ca kumwenako, ibumba litungulula ilya mu nshiku sha Bena Kristu bakubalilapo, lyalandile pa fintu fitatu umo Abena Kristu balingile ukuba abashangila: (1) ukukanapepa utulubi, lelo ukulapepa fye Yehova eka, (2) ukumfwila ifunde lya kwa Yehova ililanda ukuti umulopa wa mushilo, na (3) ukulaumfwila ifunde lya mu Baibo ililanda pa kutaluka ku bulalelale. (Belengeni Imilimo 15:28, 29.) Bushe Abena Kristu muno nshiku kuti baumfwila shani Yehova muli ifi fitatu twalandapo?
4. Finshi ifyo tushicita pa kuti tulepepa fye Yehova eka? (Ukusokolola 4:11)
4 Tatupepa utulubi, lelo tupepa fye Yehova eka. Yehova aebele abena Israele ukuti balingile ukulamupepa fye eka. (Amala. 5:6-10) Ilyo Yesu bamutunkile kuli Satana, atile tufwile ukulapepa fye Yehova epela. (Mat. 4:8-10) E ico tatupepa utulubi. Na kabili tatupepa abantu. Ku ca kumwenako, tatumona intungulushi sha mapepo, bapolitishani, nelyo abateya ifyangalo abaishibikwa, nelyo bakemba, ukuti ni tulesa. Tupepa fye Yehova “uwabumbile ifintu fyonse.”—Belengeni Ukusokolola 4:11.
5. Mulandu nshi tumfwila ifunde lya kwa Yehova ililanda ukuti umweo no mulopa fya mushilo?
5 Tulomfwila ifunde lya kwa Yehova ililanda ukuti ubumi no mulopa fya mushilo. Mulandu nshi tumfwilila ili funde? Pantu Yehova atila umulopa wimininako umweo, ubupe ukufuma uli ena. (Lebi 17:14) Ilyo Yehova aebele abantu kuti balelya inama, abebele ukuti tabalingile ukulya umulopa. (Ukute. 9:4) Alibwekeshepo ili ifunde ilyo apeele abena Israele Amafunde ya kwa Mose. (Lebi 17:10) Kabili aebele ibumba litungulula ilyaliko mu nshiku sha Bena Kristu bakubalilapo, ukweba Abena Kristu bonse ukuti ‘baletaluka . . . ku mulopa.’ (Imil. 15:28, 29) Tulomfwila ili funde ilyo tulesalapo ifyo bengatundapa. b
6. Cinshi tucita pa kuti tuleumfwila ifunde lya kwa Yehova ilya kutaluka ku bulalelale?
6 Tulomfwila ifunde lya mu Baibo ililanda pa kutaluka ku bulalelale. (Heb. 13:4) Umutumwa Paulo atwebele “ukwipaya ifilundwa fya mubili wesu” e kutila ukubombesha apo twingapesha ukukanaba ne mibele yonse iyabipa. E ico tatutamba ifili fyonse, nelyo ukucita ifili fyonse ifingalenga twacita ubulalelale. (Kol. 3:5; Yobo 31:1) Nga twatunkwa ukucita ifyabipa, tatutontonkanya pa kucita ifili fyonse ifingalenga bucibusa bwesu na Lesa bwapwa.
7. Cinshi tufwile ukulafwaisha ukucita, kabili mulandu nshi?
7 Yehova atwenekela ukuba “ne cumfwila ica kufuma ku mutima.” (Rom. 6:17) Ifyo atweba ukucita lyonse filaba fye bwino, kabili te kuti twalule amafunde yakwe. (Esa. 48:17, 18; 1 Kor. 6:9, 10) Tulesha apo twingapesha ukulenga Yehova ukulasekelela, kabili tupashanya ifyo uwaimbile amalumbo ali, uwatile “Nayalwila umutima wandi ku kukonka amafunde yenu umuyayaya, ukufika ku mpela.” (Amalu. 119:112) Na lyo line, Satana alacita ifintu ifilenga catukosela ukuba abashipa. Finshi fimo ifyo Satana acita pa kutunenuna?
BUSHE SATANA ESHA SHANI UKUTUNENUNA?
8. Bushe Satana abomfya shani ukutucusha pa kuti atunenune?
8 Ukutucusha. Satana alabomfya ukutucusha nelyo ukutupatikisha ukucita fimo ifyo Yehova alesha pa kuti fye atunenune. Ico afwaisha ‘kutulya,’ pa kuti apwishe bucibusa bwesu na Yehova. (1 Pet. 5:8) Abena Kristu bakubalilapo balebatiinya, baleboma, kabili balebepaya, pa fyo balefwaya ukutwalilila aba cishinka kuli Yehova. (Imil. 5:27, 28, 40; 7:54-60) Na muno nshiku mwine Satana alacusha abantu ba kwa Yehova. Tulamona ifyo abalwani besu baba no bunkalwe kuli bamunyinefwe na bankashi mu fyalo pamo nga Russia. Kabili mu calo fye conse abalwani besu balacusha aba bwananyina mu nshila ishalekanalekana.
9. Landeni pa ca kumwenako icilelangilila ifyo tulingile ukuba abacenjela pa kuti tabatupatikishe ukucita ifyo Lesa alesha.
9 Ukutupatikisha ukucita ifyo Lesa alesha. Satana tatusansa fye mu kulungatika, lelo alabomfya ne “micenjelo” pa kuti apwishe bucibusa bwesu na Yehova. (Efes. 6:11) Natulandeko pa fyacitikile munyinefwe Bob uo batekele mu cipatala pa kuti bamulepule. Aebele badokota ukuti nangu ifintu fyafye shani, tali no kusumina ukumubikamo umulopa. Badokota balisumine ukuti bali no kukonka ifyo alandile. Nomba ubushiku ilyo bashilaya mu kubalepula, dokota umbi alishile mu kumona munyinefwe Bob ninshi ulupwa lwakwe naluya. Ulya dokota aebele ba Bob ukuti badokota nalimo tabakababikemo umulopa, lelo bakaubika fye mupepi pa kuti nga ca-afya kuti baubomfya. Nalimo uyu dokota aletontonkanya ukuti ba Bob bali no kwalula ifyo basalilepo ifi takwali balupwa lwabo. Lelo ba Bob balitwalilile ukuba abashangila kabili batile tabali no kubabikamo umulopa.
10. Mulandu nshi amano ya muli ici calo yabipila? (1 Abena Korinti 3:19, 20)
10 Ifyo abasuula amafunde ya kwa Yehova batontonkanya. Nga tuletontonkanya nge fyo abasuula amafunde ya kwa Yehova batontonkanya, na ifwe kuti twatendeka ukusuula amafunde ya kwa Yehova. (Belengeni 1 Abena Korinti 3:19, 20.) Ilingi line “amano ya ici calo” yalenga abantu ukukanaumfwila Lesa. Abena Kristu bamo mu Pergamo na mu Tuatira balitendeke ukucita ubulalelale no kupepa utulubi, imibele iyaseekele sana mu misumba iyo baleikalamo. Yesu alibakalipile pantu baletekelesha ubulalelale. (Ukus. 2:14, 20) Na muno nshiku mwine, abantu balatupatikisha ukucita ifyabipa. Balupwa e lyo na bantu bambi kuti balatweba ukuti twalicilamo ukukonka amafunde, kabili inshita shimo kuti balafwaya twakaana ukumfwila Yehova. Ku ca kumwenako, kuti balalanda ukuti ukutwalilila ukuba abasanguluka takwacindama, e lyo ifyo Baibo ilanda fya kale tafibomba muno nshiku.
11. Ilyo tulefwaya ukuba aba cishinka kuli Lesa, finshi ifyo tatulingile ukucita?
11 Inshita shimo kuti twatendeka ukutontonkanya ukuti ifyo Yehova atweba ukucita fyalyafya ukufyumfwa. Limo kuti twaleka fye no ‘kukonka ifyalembwa.’ (1 Kor. 4:6) Ifi fine e fyo na bashimapepo mu nshiku sha kwa Yesu balecita. Bali-ipangile amafunde na yambi abene, kabili ici calyafishe abantu ukulayakonka. (Mat. 23:4) Yehova alatupeela amafunde yakwe mu Cebo cakwe, e lyo na mu cilonganino cakwe aya-anguka ukukonka. Kanshi tatufwile ukuipangila amafunde. (Amapi. 3:5-7) Tulakonka ifyalembwa mu Baibo kabili tatupangila aba bwananyina amafunde pa fyo Baibo ishalandapo.
12. Bushe Satana abomfya shani “ubucenjeshi” pa kulufya abantu?
12 Ubucenjeshi. Satana alabomfya ubucenjeshi ne “fintu fya fye ifya muli ici calo” ku kulufya abantu no kubalekanya. (Kol. 2:8) Mu nshita ya batumwa, mu bucenjeshi e lyo na mu fintu fya fye ifya muli ici calo mwali, amano ya bantunse, ifyo abaYuda balesambilisha ifishali mu Malembo, e lyo no kuti Abena Kristu balingile ukulakonka Amafunde ya kwa Mose. Ifi balesambilisha bwali bucenjeshi pantu fyalengele abantu bakaana ukubika amano kuli Yehova Intulo ya mano. Muno nshiku Satana alabomfya imilabasa e lyo na Intaneti ukusabankanya amalyashi ya bufi ayo bakateka balanda. Ifi fine e fyo cali ilyo kwali icikuko ca COVID-19. c Inte sha kwa Yehova abaleumfwila ifyo icilonganino ca kwa Yehova calebeba ifyakucita, tabasakamene sana nge fyo abantu abaleumfwila amalyashi ya bufi basakamene.—Mat. 24:45.
13. Mulandu nshi tushilingile ukupumbwilwa?
13 Ifya kutupumbula. Tufwile ukubika amano ku “fyacilapo ukucindama.” (Fil. 1:9, 10) Nga twapumbulwa, tulonaula inshita na maka yesu. Ifintu pamo nga ukulya, ukunwa, ukwangala, nelyo incito, kuti fyalatupumbula nga ca kutila e fyo tubikileko sana amano. (Luka 21:34, 35) Ukulunda pali ifi, tulomfwa amalyashi ayalanda pa fyo abantu balecita ifimfulunganya e lyo ne fyo aba mu buteko balelwishanya. Tufwile ukushininkisha ukuti tatupumbwilwe. Nga tatucenjele kuti twatendeka ukuitumpa mu fikansa fya calo. Ico Satana abomfesha ifi fyonse twalandapo, ni co afwaya ukutunenuna pa kuti twilacita icalungama. Nomba natusambilile pa fyo twingamukanya ne fyo twingatwalilila aba cishinka kuli Yehova.
KUTI TWACITA SHANI PA KUTI TUBE ABASHANGILA?
Pa kuti tube abashangila tufwile ukulatontonkanya pa fyo twaipeele no kubatishiwa, ukulabelenga Icebo ca kwa Lesa no kutontonkanya pa fyo tulebelenga, ukuba no mutima wa cishinka, no kucetekela Yehova (Moneni paragrafu 14-18)
14. Cinshi cimo icingalenga twatwalilila ukuba ku lubali lwa kwa Yehova?
14 Muletontonkanya pa co mwaipeelele kuli Yehova no kubatishiwa. Mwaliipeele kuli Yehova no kubatishiwa pantu mwalefwaya ukuba ku lubali lwakwe. Muleibukisha icalengele mushininkishe ukuti na musanga icine. Mwaishileishiba bwino Yehova kabili mwalitemenwe Shinwe wa ku muulu. Mwali ne citetekelo kabili mwalilapile. Mwalilekele ukucita ifyo Lesa apata kabili mwalitendeke ukucita ifilenga alasekelela. Mwalitemenwe ilyo mwaishileishiba ukuti Yehova alimwelele imembu. (Amalu. 32:1, 2) Mwalitendeke ukulalongana no kulaebako bambi ifisuma ifyo mwalesambilila. Apo mwali-ipeela no kubatishiwa, mwaba mu musebo wa ku bumi, kabili tamufwaya icili conse calenga mwafuma muli uyu musebo.—Mat. 7:13, 14.
15. Mulandu shi ukubelenga Icebo ca kwa Lesa no kutontonkanya pa fyo tulebelenga kwacindamina?
15 Mulebelenga Icebo ca kwa Lesa kabili muletontonkanya na pa fyo mulebelenga. Icimuti kuti catwalilila ukuba icakosa nga ca kuti imishila yaliya sana pa nshi. Na ifwe nga natucetekela sana Yehova, kuti twatwalila ukuba abashangila. Ilyo icimuti cilecilekula, imishila ilailako pa nshi kabili ilasalangana. Nga tulebelenga Icebo ca kwa Lesa no kutontonkanya pa fyo tulebelenga, icitetekelo cesu cilakosa kabili tulacetekela sana ukuti ifyo Lesa atweba ukucita fisuma. (Kol. 2:6, 7) Muletontonkanya pa fyo ifyo Yehova alesambilisha, aletungulula, no kucingilila ababomfi bakwe ku kale, fyalebafwa. Ku ca kumwenako, Esekiele alibikileko amano ilyo malaika alepima itempele ilyo Esekiele amwene mu cimonwa. Ici cimonwa calikoseshe sana Esekiele, kabili cilalenga na ifwe twasambililako amasambililo yacindama ayalenga twatwalila ukutungilila ukupepa kwa kwa Yehova ukwasanguluka. d (Esek. 40:1-4; 43:10-12) Na ifwe tulanonkelamo nga tulesangako inshita ya kusambilila no kutontonkanya pa fyashika ifyaba mu Cebo ca kwa Lesa.
16. Bushe ukuba no mutima wa cishinka kwacingilile shani ba Bob? (Amalumbo 112:7)
16 Muleba no mutima wa cishinka. Imfumu Davidi yalandile ukuti tayakaleke ukutemwa Yehova. Yaimbile aiti: “Umutima wandi uli uwa cishinka, mwe Lesa” (Amalu. 57:7) Na ifwe bene kuti twaba ne cishinka no kucetekela Yehova. (Belengeni Amalumbo 57:7.) Ukuba no mutima wa cishinka kwalyafwile ba Bob abo tulandilepo kale. Ilyo babebele ukuti balabika umulopa mupepi, pa kuti nga kwaba ifya-afya nalimo kuti bababikamo, ilyo line fye ba Bob baebele badokota ukuti, nga ca kuti ca-afya bamona kuti balingile fye ukubabikamo umulopa, bali no kufuma mu cipatala. Pa numa ba Bob balandile ukuti: “Nshaletwishika ifyo nalingile ukucita, kabili nshasakamene na pa fyali no kucitika.”
Nga twalikwata icitetekelo cakosa tukatwalilila ukuba abashipa, te mulandu na mafya ayengi ayo twingakwata (Moneni paragrafu 17)
17. Finshi twingasambililako ku fyacitike kuli ba Bob? (Moneni ne cikope.)
17 Ba Bob bali no mutima wa cishinka pantu ilyo tabalaya na ku cipatala, balisaliilepo limo ifyo bali no kucita. Ica kubalilapo balefwaya ukulenga Yehova ukulasekelela. Icalenga bubili, balibelengele sana pa fyo umweo no mulopa fyacindama muli Baibo na mu mpapulo ishilanda pali Baibo. Icalenga butatu, balishininkishe ukuti Yehova ali no kubapaala nga ca kuti basunga amafunde yakwe. Na ifwe bene kuti twaba ne cishinka te mulandu na mafya twingakwata.
Baraki na bashilika bakwe balipepeke Sisera na bashilika bakwe (Moneni paragrafu 18)
18. Bushe ifyacitike kuli Baraki fitusambilisha shani ukucetekela Yehova? (Moneni icikope icili pa nkupo.)
18 Mulecetekela Yehova. Tontonkanyeni pa fyo Baraki acimfishe pa mulandu wa kuti alicetekele ifyo Yehova amwebele. Pali ilya nshita abena Israele tabaipekenye ukuya mu kulwa kabili tabakwete ne fyanso, lelo Yehova aebele Baraki ukuyalwa no mukalamba wa bashilika Sisera na bashilika bakwe abena Kanaani abakwete ifyanso ifingi. (Abapi. 5:8) Kasesema mwanakashi Debora aebele Baraki ukutentemuka no kuyalwa na Sisera na maceleta yakwe 900. Nangu ca kuti Baraki alishibe ukuti ukuyalwa na maceleta pa mpanga iyabatama kwali no kwafya, alyumfwilile ifyo bamwebele. Ilyo abashilika baletentemuka ulupili lwa Tabore, Yehova alengele ukuti imfula iloke iikalamba sana. Amaceleta ya kwa Sisera yalitikile mu matipa, ici calengele Baraki acimfye. (Abapi. 4:1-7, 10, 13-16) Na ifwe bene Yehova akaleka tukacimfye nga twamucetekela kabili twacetekela ne fyo atweba ukucita ukubomfya icilonganino cakwe.—Amala. 31:6.
MULEFWAISHA UKUBA ABASHANGILA
19. Cinshi mulefwaila ukutwalilila ukuba abashangila?
19 Tufwile ukutwalilila ukulwisha pa kuti tube abashangila pantu tucili twikala mu calo cabipa. (1 Tim. 6:11, 12; 2 Pet. 3:17) Twilaleka amafya, ukutupatikisha ukucita ifyo Lesa apata, amano ya buntunse, ubucenjeshi, e lyo no kupumbulwa, fyalenga twaleka ukuba aba cishinka kuli Lesa. (Efes. 4:14) Lelo natutwalilile ukuba abashangila kabili lyonse tuletemwa Yehova no kulaumfwila amafunde yakwe. Tatufwile no kulapampamina fye pa cintu cimo. Mu cipande cikonkelepo tukasambilila ifyo twingasambilila kuli Yehova na Yesu, ukukanapampamina fye pa cintu cimo.
ULWIMBO 129 Tukatwalilila Ukushipikisha
a Ukutula apo Adamu na Efa bapondekele, Satana alilenga abantu abengi ukulatontonkanya ukuti balingile ukuisalilapo icisuma ne cibi. Ifi fine e fyo afwaya na ifwe tuletontonkanya pa mafunde ya kwa Yehova, e lyo na pa fyo icilonganino cakwe citweba. Ifyo twalasambilila muli cino cipande, fyalalenga twilasuula amafunde ya kwa Lesa nge fyo abantu abapashanya Satana bacita. Kabili fyalalenga lyonse tulefwaisha ukulaumfwila Yehova.
b Nga mulefwaya ukwishibilapo na fimbi pa fyo Umwina Kristu engomfwila ifunde lya kwa Lesa ililanda pa mulopa, moneni isambililo 39 mu citabo icitila Kuti Mwaba ne Nsansa Umuyayaya!
c Moneni icipande citila “Ifyo Twingaicingilila ku Malyashi ya Bufi” pa jw.org.
d Nga mulefwaya ukwishibilapo na fimbi, moneni icipande 13 na 14 mu citabo icitila Pure Worship of Jehovah—Restored At Last!