1. Cine nshi mwaishileishiba ilyo mwatendeke ukusambilila Baibo?

 BUSHE muleibukisha ifyo cali ilyo mwatendeke ukusambilila Baibo? Nalimo mwalipapile ilyo mwasambilile ukuti Lesa alikwata ishina. Mufwile mwalitemenwe ilyo mwasambilile ukuti Lesa toca abantu mu mulilo. Kabili mufwile mwalitemenwe sana ilyo mwasambilile ukuti mukaba na batemwikwa benu abafwa kabili mukekala nabo mu paradaise pano isonde.

2. Cinshi cimbi ico mwacitile ilyo mwasambilile icine icaba mu Baibo? (Abena Efese 5:1, 2)

² Ilyo mwaile mulesambilila ifingi ifyaba mu Cebo ca kwa Lesa, mwaile muletemenwako Yehova. Ukutemwa Yehova e kwalengele ukuti mulecita ifyo mwalesambilila. Kwalengele mulesalapo bwino ifyakucita ukubomfya amashinte ya mafunde aya mu Baibo. Mwalyalwike mu fyo mwaletontonkanya ne fyo mwalecita pantu mwalefwaya ukulalenga Lesa ukulasekelela. Nga filya fine umwana apashanya wishi uwamutemwa, e fyo na imwe mwalepashanya Shinwe wa ku muulu.—Belengeni Abena Efese 5:1, 2.

3. Mepusho nshi twingatontonkanyapo?

³ Kuti twatontonkanya ukuti: ‘Bushe ino nshita nalitemwa sana Yehova ukucila ifyo namutemenwe ilyo nabatishiwe? Ukutula apo nabatishiwilwa, bushe ndapashanya Yehova mu fyo ntontonkanya na mu fyo ncita ifintu, maka maka ukutemwa aba bwananyina?’ Nga ca kuti pali ino nshita tamwatemwa Yehova nge fyo mwamutemenwe ilyo mwabatishiwe, tamufwile ukufuupuka. Ifi fine e fyacitikile na Bena Kristu ba kubalilapo.  Yesu takeene Abena Kristu ba kubalilapo, na ifwe bene takatukaane. (Ukus. 2:4, 7) Alishiba ukutila kuti twamutemwa na kabili nge fyo twamutemenwe ilyo twasambilile fye icine.

4. Finshi twalasambilila muli cino cipande?

⁴ Muli cino cipande twalasambilila ifyo twingatwalilila ukutemwa sana Yehova e lyo na ba bwananyina. Lyena twalasambilila pa fisuma ifingacitika nga twatemwa Yehova e lyo na ba bwananyina.

5-6. Mafya nshi ayo umutumwa Paulo akwete ilyo alebomba umulimo wa kwa Yehova, lelo cinshi calengele atwalilile ukubombela Yehova?

⁵ Umutumwa Paulo aleba sana ne nsansa ilyo alebombela Yehova. Na lyo line, alekwata amafya ayengi. Ilingi ale-enda intamfu iitali, kabili pali ilya nshita, abengi nga bali pa lwendo balekwata amafya. Inshita shimo nga ali pa lwendo, ‘aleponenwa na masanso pa mimana,’ kabili ‘alesanswa ku fipondo.’ Kwaleba ne nshita shimbi ilyo abalwani bakwe balemuuma. (2 Kor. 11:23-27) Abwananyina limo tabaletasha pa fyo Paulo alebabombela.—2 Kor. 10:10; Fil. 4:15.

⁶ Cinshi calengele Paulo atwalilile ukubombela Yehova? Paulo alisambilile ifingi pali Yehova e lyo na ku fyamucitikile. Aishileshininkisha ukuti Yehova Lesa alimutemenwe icine cine. (Rom. 8:38, 39; Efes. 2:4, 5) Ne ci calengele atemwe sana Yehova. Paulo alilangile ifyo atemenwe Yehova ilyo atwalilile ‘ukwafwa aba mushilo.’—Heb. 6:10.

7. Cinshi cimo ico twingacita pa kuti tutemwe sana Yehova?

⁷ Kuti twatemenwako Lesa nga tulebika amano ku kusambilila Icebo cakwe. Ilyo mulebelenga Baibo, mule-esha ukumona ifyo ilyashi mulebelenga lilemusambilisha pali Yehova. Muletontonkanya pali aya mepusho: ‘Bushe ili lyashi nabelenga lilelanga shani ukuti Yehova alintemwa? Bushe finshi nabelenga ifyalalenga natemenwako Yehova?’

8. Bushe ukupepa kuti kwalenga shani twatemenwako Lesa?

⁸ Cimbi ico twingacita pa kuti tutemenweko Yehova, kulapepa kuli ena cila bushiku no kulamweba fyonse ifyo tuleumfwa. (Amalu. 25:4, 5) Yehova na o akaasuka amapepo yesu. (1 Yoh. 3:21, 22) Ba Khanh, bankashi ba ku Asia batile: “Pa kubala icalengele ntemwe Yehova fintu nasambilile pali ena. Nomba ilyo namwene ifyo aleasuka amapepo nalepepa, nalimutemenwe sana. Ici calelenga ndefwaisha ukulacita ifintu ifilenga alesekelela.” b

9. Bushe Timote alangile shani ukuti alitemenwe aba bwananyina?

⁹ Ilyo papitile imyaka iingi ukutula apo Paulo abelele Umwina Kristu, aishileishibana no mulumendo Timote. Timote alitemenwe Yehova kabili alitemenwe na bantu. Paulo aebele abena Filipi ukuti: “Nshikwete umuntu umbi uwakwata umutima uwalingana no [wa kwa Timote], uwingamusakamana icine cine.” (Fil. 2:20) Pali ili lembo Paulo talelanda pa fyo Timote alebombesha nelyo ifyo alelanda bwino amalyashi ku cintubwingi, lelo alimwene ukuti Timote alitemenwe sana aba bwananyina. Ukwabula no kutwishika aba mu filonganino abo Timote alebombela, balefwaisha sana ukuti aleya mu kubatandalila.—1 Kor. 4:17.

10. Bushe ba Anna na bena mwabo balangile shani ukuti balitemwa aba bwananyina?

¹⁰ Na ifwe bene tulatontonkanyako pa fyo twingacita pa kuti tuleafwa aba bwananyina. (Heb. 13:16) Natulandeko pa fyacitile ba Anna abo twalandilepo mu cipande cafumineko. Ilyo kwali sana imfula ya cimwela, ba  Anna na bena mwabo baile mu kutandalila aba bwananyina bamo. Lyena basangile ukuti umutenge wa ng’anda yabo waliponeene mu kati. Pa mulandu ne fyacitike, ulu lupwa talwakwete ifya kufwala ifya busaka. Ba Anna batile: “Twalisendele ifya kufwala fyabo, twalifiwashishe no kuficiisa e lyo twababwesesha. Uyu mulimo twabombele wali fye uunono, lelo ifi twacitile fyalengele twaba ifibusa sana ukufika na ino nshita.” Ukutemwa uko ba Anna na bena mwabo batemenwe aba bwananyina kwalengele baafwe aba bwananyina.—1 Yoh. 3:17, 18.

11. (a) Bushe abantu ilingi bomfwa shani nga twabacitila fimo ifilanga ukuti twalibatemwa? (b) Ukulingana na mashiwi yaba pa Amapinda 19:17, bushe Yehova omfwa shani nga twalanga ukutemwa kuli bambi?

¹¹ Nga tuli ne cikuuku ku bantu e lyo no kutemwa, balamona ukuti tulefwaya ukupashanya sana Yehova. Kabili kuti balatasha sana pa fyo tubalanga icikuuku ukucila ne fyo twingatontonkanya. Ba Khanh abo tulandilepo kale, balebukisha sana ababafwilepo. Batile: “Ndatasha sana bankashi abalensendako pa kuti tuye mu kubila imbila nsuma. Baleisa mu kunsenda ku ng’anda, balenjitako ukuti tuliile pamo ifya kulya, kabili balembwesesha na ku ng’anda. Pali ino nshita e lyo naisamona ukuti balebombesha icine cine pali ifi balecita. Kabili icalelenga balencitila ifi fyonse, ni co balintemenwe.” Kwena te bonse abengatutasha pa fyo tubacitila. Ba Khanh balandile pa bantu ababafwile ukuti: “Kuti nafwaisha sana na ine ukubacitila ifisuma, nomba nshaishiba uko baba bonse. Lelo Yehova ena alishiba uko baba, kanshi ndapepa ukuti akabalambule.” Ifi ba Khanh balandile fya cine. Yehova alamona ifisuma tucitila bambi nangu ficepe shani. Yehova alamona ifyo tuipeelesha ukwafwa bambi kabili amona ukuti e o tulekongwesha pantu e ukatulambula.—Belengeni Amapinda 19:17.

12. Bushe bamunyinefwe kuti balanga shani ukuti balitemwa aba mu cilonganino? (Moneni ne cikope.)

 ¹² Nga ca kuti ni mwe bamunyina, kuti mwalanga shani ukutemwa ku ba bwananyina kabili kuti mwalanga shani ukuti mulafwaisha ukubafwa? Jordan munyinefwe umulumendo aipwishe eluda ifyo engalabombesha pa kuti aleafwa aba bwananyina mu cilonganino. Eluda alitashishe Jordan pa fyo alebomba kabili alimwebeleko na fimbi ifyo engalacita pa kuti alebombesha. Ku ca kumwenako, amwebele ukuti alefika bwangu pa Ng’anda ya Bufumu pa kuti alesengela aba bwananyina, aleasukapo pa kulongana, alebila lyonse imbila nsuma na baba mwi bumba lyakwe, kabili aletontonkanya na pali fimo ifyo engacita pa kwafwa aba bwananyina. Ilyo Jordan alecita ifyo bamwebele, alisambilile ifya kubomba imilimo imo kabili alisambilile ne fya kutemwa aba bwananyina. Jordan asambilile ukuti munyinefwe afwile ukula-afwa aba bwananyina ilyo bashilamusonta ubutumikila, lyena nga bamusonta ukuba umutumikila, afwile ukutwalilila ukula-afwa aba bwananyina.—1 Tim. 3:8-10, 13.

13. Bushe ukutemwa kwalengele shani munyinefwe Christian ukufikapo ukuba eluda na kabili?

¹³ Inga ca kuti akale mwali ababomfi batumikila nelyo baeluda? Yehova alebukisha imilimo mwabombele no kutemwa ukwalelenga ukuti mulebomba iyi milimo. (1 Kor. 15:58) Na kabili alamona ukutemwa uko mwakwata na pali ino nshita. Munyinefwe Christian alyumfwile ububi ilyo bamufuutile pali bueluda. Lelo atile: “Nalisalilepo ukuti nkatwalilila ukubombela Yehova apapela amaka yandi pa mulandu wa kuti nalimutemwa nangu ca kuti te ine eluda.” Mu kupita kwa nshita, ba Christian balibasontele ukuba baeluda na kabili. Ba Christian batile: “Nali no mwenso ukutendeka ukubomba  bueluda na kabili. Lelo natontonkenyepo ukuti nga e fyo Yehova alefwaya ukuti mombe bueluda na kabili pa mulandu wa kuti wa luse, kuti nabomba pantu nalimutemwa kabili nalitemwa na ba bwananyina.”

14. Finshi mwasambililako ku fyo bankashi ba ku Georgia balandile?

¹⁴ Ababomfi ba kwa Yehova balitemwa na bantu banabo. (Mat. 22:37-39) Ku ca kumwenako, ba Elena, bankashi aba ku Georgia batile: “Pa kubalilapo, icalelenga ukuti ndebila imbila nsuma, kutemwa Yehova. Nomba ilyo naile ndetemenwako Shifwe wa ku muulu, nalitendeke no kutemwa abantu. Naletontonkanya pa mafya abantu balekwata e lyo ne fyebo ifyo ningalanda ifingabafika pa mutima. Kabili ilyo naletontonkanya sana pa bantu, nalefwaisha ukubafwa.—Rom. 10:13-15.

15-16. Nga fintu tulemona pa cikope, tupaalwa shani nga twatemwa abantu?

¹⁵ Nga tuletemwa aba bwananyina, na bantu bambi balanonkelamo. Ilyo icikuko ca COVID-19 catendeke, munyinefwe Paolo na bena mwakwe balisambilishe bankashi abakalamba abengi ifya kubomfya amafoni, amatabuleti nelyo amakompyuta pa kubila imbila nsuma. Nkashi umo umukalamba uo cakosele ukusambilila ifya kubomfya foni, asukile asambilila. Alibomfeshe foni pa kwita balupwa lwakwe ukuti bakasangwe ku Cibukisho. Balupwa lwakwe abali 60 balisangilweko ku Cibukisho ukubomfya Intaneti. Uyu nkashi na balupwa lwakwe balinonkelemo muli filya ba Paolo na bena mwabo bamusambilishe ifya kubomfya  foni. Pa numa, uyu nkashi alembeele ba Paolo ukuti: “Twatasha sana pa kusambilisha fwe bakalamba ifya kubomfya foni na ma tabuleti. Nshakalabe ifyo Yehova atusakamana ne fyo mwabombeshe pa kutusambilisha.”

¹⁶ Ba Paolo balisambilileko isambililo lyacindama kuli ifi fyacitike. Basambilileko ukuti ukutemwa abantu kwalicindama sana ukucila ifyo twaishiba nelyo ifyo twacenjelamo. Batile: “Nali kangalila wa muputule. Pali ino nshita naisamona ukuti nangu ca kuti aba bwananyina nalimo tabebukisha amalyashi ayo nalelanda, balebukisha ifisuma ifyo nalebacitila.”

17. Ni bani bambi abanonkelamo nga tuli no kutemwa?

¹⁷ Na ifwe bene tulanonkelamo nga ca kuti natutemwa abantu. Ba Jonathan abekala ku New Zealand bamona ukuti ici cishinka. Bushiku bumo pa Cibelushi ninshi akasuba nakabalika sana, ba Jonathan bamwene munyinefwe painiya alebila imbila nsuma mu musebo eka. Ba Jonathan balipekenye ukulabomba na uyu painiya lyonse pa Cibelushi akasuba. Pa kubala, tabaishibe ifyo bali no kunonkelamo muli ifi bacitile. Batile: “Pali iyi nshita nakumenye uyu painiya ninshi nshatemwa ukubila imbila nsuma. Nomba ilyo namwene ifyo uyu painiya alesambilisha ne fisuma ifyalefumamo, nalitendeke ukutemwa ukubila imbila nsuma. Na kabili uyu painiya aishileba cibusa wandi kabili alilengele natemwa ukulabila imbila nsuma no kuba cibusa wa kwa Lesa.”

18. Cinshi Yehova afwaya ukuti tulecita?

¹⁸ Yehova afwaya ukuti bonse tulemutemwa sana no kutemwa aba bwananyina. Nga fintu tusambilile, kuti twatemwa sana aba bwananyina nga tulebelenga Icebo cakwe, tuletontonkanya pa fyo tulebelenga e lyo no kulalanda nankwe lyonse mwi pepo. Kuti twatemwa sana bamunyinefwe na bankashi nga tulebapeelako ifyo balekabila. Nga tuletemwa abantu, tukapalama sana kuli Yehova e lyo na kuli bamunyinefwe na bankashi. Kabili tukaba ifibusa fya kwa Yehova e lyo na ba bwananyina umuyayaya!