1. Cintu nshi cimo icalenga fwe bantu tucindame ukucila inama?

CIMO icalenga abantu bacindame ukucila inama, ni co Yehova alibapeela kampingu. Ifi fine e fyo caba ukutula fye ilyo Lesa abumbile abantu pano isonde. Ilyo Adamu na Efa bapulile mwi funde ilyo Yehova abapeele, baliilefisama. Ifi bacitile filanga ukuti kampingu yabo yalibacushishe.

2. Bushe kampingu yesu yaba shani nge ca kupindulwilako ubwato? (Moneni icikope pa muulu.)

² Bonse ababa na kampingu iyo bashasambilisha kuti twabapashanya ku bwato ubukwete ica kupindulwilako icishilebomba bwino. Umuntu kuti aba mu busanso nga aya pa bulendo no bwato ubuli ne ca kupindulwilako ico bashawamya. Umwela na mabimbi kuti fyalenga ubwato bwaya kumbi. Nga ca kuti ica kupindulwilako cilebomba bwino, uulensha ubwato kuti abupindulula bwino aya na uko emiine. Kampingu yesu yaba nge ca kutupindulwilako pa kuti tube ne mibele iisuma. Kampingu ni nte iyaba mu kati iitweba  ukuti ici cisuma, ne ci ciibi. Lelo pa kuti iletutungulula bwino, tulingile ukuisambilisha bwino.

3. Finshi fingacitika nga ca kuti kampingu tatwaisambilisha bwino?

³ Nga ca kuti umuntu tasambilisha bwino kampingu yakwe, te kuti ilemukaanya ukucita ifyabipa. (1 Tim. 4:1, 2) Kampingu ya musango uyu kuti yalatweba no kuti “ububi . . . busuma.” (Esa. 5:20) Yesu asokele abasambi bakwe ati: “Inshita ileisa ilyo onse uwamwipaya akatila alebombela Lesa.” (Yoh. 16:2) Ifi fine e fyo abaipeye umusambi Stefani balemona, kabili e fyo na bantu bambi bamona. (Imil. 6:8, 12; 7:54-60) Ku ca bulanda abantu abengi ababa mu mipepele balipaya abantu lelo batila ifi bacita balabombela Lesa. Nomba icishinka ca kuti balapula mwi funde lya kwa Lesa! (Ukufu. 20:13) Ukwabula no kutwishika kampingu yabo yalibalufya!

4. Finshi tulingile ukucita pa kuti kampingu yesu ilebomba bwino?

⁴ Finshi tufwile ukucita pa kuti kampingu yesu ilebomba bwino? Amafunde na mashinte ya mafunde ayaba mu Cebo ca kwa Lesa “ya mulimo ku kusambilisha, ku kukalipila, ku kulungika ifintu, ku kusalapwila mu bulungami.” (2 Tim. 3:16) Kanshi nga tulebelenga Baibolo, tuletontonkanya sana pa fyo ilanda kabili tulekonka ifyo ilanda muli fyonse ifyo tucita cila bushiku, tukasambilisha kampingu yesu ica kuti ikalatwafwa ukulamona ifintu nga fintu Lesa afimona, lyena kuti yalatutungulula bwino. Natulande pa fyo amafunde na mashinte ya mafunde ya kwa Yehova yengatwafwa ukusambilisha kampingu yesu.

5, 6. Bushe ubumi bwesu buba shani nga tulekonka amafunde ya kwa Lesa?

⁵ Pa kuti amafunde ya kwa Lesa yaletwafwa, tatulingile ukulayabelenga fye nelyo ukuyeshiba fye. Tufwile ukuyatemwa no kulayakonka. Baibolo itila: “Pateni ububi, no kutemwa ubusuma.” (Amose 5:15) Nomba kuti twacita shani ifi? Icikalamba ico tufwile ukucita kulamona ifintu nge fyo Yehova afimona. Natulangilile: Elenganyeni ukuti mulefilwa ukulaala bwino. Dokota amweba ifya kulya mulingile ukulalya, ifyo mulingile ukulatukusha umubili ne fyo mulingile ukulaisunga. Pa numa ya kucita ifyo amwebele, mwamona ukuti mwatendeka ukulaala bwino! Nalimo kuti mwatasha nga nshi dokota wenu pa kulenga ubumi bwenu bwawaminako.

⁶ Ifi fine e fyo na Kabumba wesu acita, alitupeela amafunde eyengatucingilila ku fyabipa ififuma mu kucita ulubembu kabili ifi fyalenga ubumi bwesu bwawaminako. Tontonkanyeni pa fyo ifintu fituwamina nga tulekonka amafunde ya mu Baibolo ayalanda pa kubepa, pa kupanga ukucita ifyabipa, pa kwiba, pa bulalelale, pa bunkalwe na pa kupupa imipashi. (Belengeni Amapinda 6:16-19; Ukus. 21:8) Nga twamona ifisuma ififuma mu kucita ifintu ukulingana ne fyo Yehova afwaya, tulatemenwako Yehova na mafunde yakwe.

7. Finshi tukalacita nga tulebelenga no kutontonkanya pa malyashi ya bantu abalembwa mu Baibolo?

⁷ Kwena tatulingile ukupula mu mafunde ya kwa Lesa pa kuti twishibe ububi bwaba mu kukanakonka amafunde yakwe. Kuti twasambililako ku filubo ifyo abantu bambi bacitile ifyalembwa mu Cebo ca kwa Lesa. Pa Amapinda 1:5 patila: “Uwa mano akomfwa no kulundako ukusambilila.” Lesa alatusambilisha bwino sana. Inshila imo atusambilishishamo ni lintu tulebelenga no kutontonkanya pa malyashi ya bantu abalembwa mu Baibolo. Ku ca kumwenako, tontonkanyeni pa fyo Imfumu Davidi yaumfwile ububi pa mulandu wa kuti yalicitile ubucende na Bati-sheba pantu tayakonkele amafunde ya kwa Yehova. (2 Sam. 12:7-14) Ilyo  tulebelenga ili lyashi, nalimo kuti twalayipusha atuti: ‘Finshi Imfumu Davidi yalingile ukucita pa kuti iba na mafya ayafumine mu kucita ubucende na Bati-sheba? Bushe nga nine natunkilwe, nga nalikwete amaka ya kukaana ukucita ubucende? Bushe nga nalifulumwike nga filya Yosefe acitile nelyo nga nalicitile ubucende nga fintu Davidi acitile?’ (Ukute. 39:11-15) Nga tuletontonkanya pa fyabipa ififuma mu kucita ifyabipa, kuti ‘twapata ububi.’

8, 9. (a) Bushe kampingu yesu itwafwa shani? (b) Bushe amashinte ya mafunde ya kwa Yehova yayampana shani na kampingu yesu?

⁸ Nalimo kuti twataluka ku fintu ifyo Lesa apata. Nomba kwaliba ifintu fimo ifyo amafunde ya mu Baibolo yashalandapo mu kulungatika. Pa fintu fya musango uyu kuti twaishiba shani ifyo tufwile ukucita ne fyo Lesa afwaya? Tufwile ukukonka ifyo kampingu iyo twasambilisha bwino Baibolo iletweba.

⁹ Pa mulandu wa kuti Yehova alitutemwa, alitupeela amashinte ya mafunde ya mu Baibolo ayatwafwa ukusambilisha kampingu yesu. Yehova umwine alanda ati: “Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo.” (Esa. 48:17, 18) Nga tuletontonkanya pa mashinte ya mafunde ya mu Baibolo, ninshi tulelungika, tuletungulula kabili ninshi tulesambilisha kampingu yesu. Nga tulecita ifi, tukalasala bwino ifya kucita.

10. Bushe amashinte ya mafunde ni finshi, kabili Yesu aleyabomfya shani bwino?

¹⁰ Ishinte lye funde cine icitutungulula mu fyo tutontonkanya, icitwafwa ukulasala bwino ifya kucita. Pa kuti twishibe ishinte lye funde, tulingile ukwishiba ifyo uwatupeela Amafunde afwaya, ne co atupeelela amafunde yamo. Ilyo Yesu alebila imbila nsuma, alesambilisha abantu amashinte ya mafunde pa kubafwa ukwishiba ifingacitika nga bali ne mibele imo nelyo nga bacita fimo. Ku ca kumwenako, alesambilisha ukuti ulupato kuti lwalenga umuntu aba umunkalwe kabili umuntu nga ali no lunkumbwa kuti acita ubucende. (Mat. 5:21, 22, 27, 28) Pa kuti tusambilishe bwino kampingu yesu, tufwile ukuleka amashinte ya mafunde yaletutungulula, lyena tukalalenga Lesa alecindikwa.—1 Kor. 10:31.

11. Bushe kampingu ya bantu yapusana shani?

¹¹ Kwena inshita shimo kampingu ya Mwina Kristu umo kuti yamusuminisha ukucita fimo ifyo kampingu ya Mwina Kristu umbi ingamukaanya ukucita. Natulande pa kunwa ubwalwa. Baibolo tayalesha ukunwa ubwalwa mu kulinga. Lelo yalilesha ukunwesha ubwalwa e lyo no kuba cakolwa. (Amapi. 20:1; 1 Tim. 3:8) Bushe ici cilolele mu kuti takuli fimbi ifyo Umwina Kristu alingile ukutontonkanyapo nga ca kuti anwa fye ubwalwa mu kulinga? Awe. Nangu ca kuti kampingu yakwe ilamusuminisha, afwile ukutontonkanya na pali kampingu ya bantu bambi.

12. Bushe amashiwi yaba pa Abena Roma 14:21 kuti yatwafwa shani ukulacindika kampingu ya bantu bambi?

¹² Paulo alilandile ukuti Umwina Kristu alingile ukulatontonkanya na pali kampingu ya bantu bambi, alembele ati: “Cawamapo ukukanalya inama nelyo ukukananwa umwangashi nelyo ukukanacita icingapunwisha munonko.” (Rom. 14:21) Bushe kuti mwaitemenwa ukukanacita ifyo mwakwata insambu sha kucita pa kuti mwipunwisha munyinenwe uo kampingu ingakaanya ukucita ifyo fintu? Ukwabula no kutwishika kuti mwacita. Ilyo aba bwananyina bamo bashilasambilila icine, balenwesha ubwalwa, lelo nomba tabafwaya nangu panono ukunwa. Kwena takuli nangu umo uwingafwaya alenga aba bwananyina ba musango uyu batendeka ukunwesha na kabili! (1 Kor. 6:9, 10)  Kanshi te kuti ciwame ukupatikisha uo twitile ku mwesu ukunwa ubwalwa nga ca kuti nakaana.

13. Finshi Timote acitile pa kuti imbila nsuma ileya pa ntanshi ifyo na ifwe bene tulingile ukulacita?

¹³ Ilyo Timote ali ne myaka pa kati ka 17 na 23 alisumine ukumusembulula nangu ca kuti ali no kumfwa ubukali, pantu talefwaya ukupunwisha abaYuda abo ali no kulashimikilako imbila nsuma. Ifi acitile fyalipalana ne fyo umutumwa Paulo acitile. (Imil. 16:3; 1 Kor. 9:19-23) Bushe na imwe mukalaitemenwa ukuipusulako fimo pa kuti ifintu fiwamine abantu bambi, nga fintu Timote acitile?

14, 15. (a) Finshi tufwile ukucita pa kuti tube abakalamba? (b) Bushe ukulanga ukuti twalitemwa abantu banensu kwayampana shani no kuba abakalamba mu fya kwa Lesa?

¹⁴ Abena Kristu bonse tabalingile ukupelela fye pa “masambililo ya kutendekelako pali Kristu,” lelo bafwile ‘ukubombesha ukulola ku bukalamba.’ (Heb. 6:1) Lelo ukuba umukalamba takwisa nga meno ya mu kanwa. Tulingile ‘ukubombesha.’ Tufwile ukulaishibilako icine no kulailuka. E mulandu wine lyonse batukoselesesha ukulabelenga Baibolo cila bushiku. (Amalu. 1:1-3) Bushe mulabelenga Baibolo cila bushiku? Nga mulebelenga kuti mwaishiba amafunde ya kwa Yehova na mashinte ya mafunde yakwe kabili mukeshibilako Icebo cakwe.

¹⁵ Ifunde ilyacindama sana ku Bena Kristu, lifunde lya kutemwa. Yesu aebele abasambi bakwe ati: “Nga muletemwana, e lyo bonse bakeshiba ukuti muli basambi bandi.” (Yoh. 13:35) Yakobo munyina Yesu aitile ukutemwa ati “ifunde lya mfumu.” (Yako. 2:8) Paulo atile: “Ukutemwa e kufishapo amafunde.” (Rom. 13:10) Te kuti tupape ifi aba twalandapo balandile sana pa kutemwa pantu na kuba, Baibolo itila “Lesa kutemwa.” (1 Yoh. 4:8) Lesa talanda fye ukuti alitutemwa. Yohane alembele ati: “Kuli ici e ko ukutemwa kwa kwa Lesa kwamonekele muli ifwe, pantu Lesa atumine Umwana wakwe uwafyalwa eka ukwisa muli ici calo ukuti tukwatile umweo muli ena.” (1 Yoh. 4:9) Lesa alicitilepo fimo pa kulanga ukuti alitutemwa. Nga tulelanga ukuti twalitemwa Yehova, Umwana wakwe, Abena Kristu banensu, na bantu bambi, ninshi tulelanga ukuti tuli bakalamba mu fya kwa Lesa.—Mat. 22:37-39.

16. Nga tuleya tulekula mu fya kwa Lesa, mulandu nshi tutendekela ukulamona ukuti amashinte ya mafunde yalicindama?

 ¹⁶ Nga mulekulilako mu fya kwa Lesa, mukalamona ukuti amashinte ya mafunde yalicindama. Mulandu nshi twalandila ifi? Pantu amafunde kuti yabomba fye pa fintu fimo, lelo amashinte ya mafunde yena kuti yabomba pa fintu ifingi. Ku ca kumwenako, umwana umunono teshiba ububi bwaba mu kwampana na bantu ababa ne mibele yabipa, e co umufyashi uwiluka alamupangila amafunde pa kuti amucingilile. (1 Kor. 15:33) Lelo ilyo uyu mwana aleya alekula, alaya alekula mu mano kabili alatendeka ukubomfya amashinte ya mafunde ilyo alesala ifya kucita. Lyena kuti asala bwino ifibusa. (Belengeni 1 Abena Korinti 13:11; 14:20.) Nga tuletontonkanya pa mashinte ya mafunde ya mu Baibolo kampingu yesu ilatutungulula bwino kabili tulatontonkanya nga fintu Lesa atontonkanya.

17. Mulandu nshi twingalandila ukuti twalikwata ifingatwafwa ukulasala bwino ifya kucita?

¹⁷ Bushe twalikwata fyonse ifingatwafwa ukulasala ifingalenga Yehova alesekela? Ee, twalikwata. Nga tulekonka amafunde na mashinte ya mafunde ayaba mu Cebo ca kwa Lesa, tukaba ‘abafikapo bwino bwino, abaipangasha icine cine ukubomba umulimo onse uusuma.’ (2 Tim. 3:16, 17) Kanshi mulefwailisha amashinte ya mafunde ayaba mu Baibolo pa kuti “muleiluka icaba ukufwaya kwa kwa Yehova.” (Efes. 5:17) Mulebomfya bwino ifya kutwafwa ukusambilila ifyo icilonganino ca kwa Lesa catupekanishisha, pamo nga Icisontelelo ca Mpapulo sha Watch Tower, Icitabo ca Kwafwa Inte sha kwa Yehova Ukusanga Ifyebo, Watchtower Library iya pa kompyuta, Watchtower LAIBRARE YA PA INTANETI, na JW Library app. Nga tulebomfya ifi tukalasambilila ifingi sana ilyo tuleisambilisha nelyo nga tulecita amapepo ya lupwa.

18. Mapaalo nshi tukwata nga tulekonka amafunde ya kwa Yehova na mashinte ya mafunde yakwe?

¹⁸ Nga tulekonka amafunde ya kwa Yehova na mashinte ya mafunde yakwe, tulapaalwa. Ifi fine e fyo Amalumbo 119:97-100 yalanda, yatila: “Amafunde yenu naliyatemwa icine cine! Akasuba konse e yo ntontonkanyapo. Amafunde yenu yanenga ukuba uwa mano ukucila abalwani bandi, pantu yandi umuyayaya. Pali bakasambilisha bandi bonse tapaba nangu umo uwancila amano, pantu ifya kutwibukishako fyenu e fyo ntontonkanyapo, nalicila abakalamba mu kwiluka, pantu ndasunga ifipope fyenu.” Nga ‘tuletontonkanya’ sana pa mafunde ya kwa Lesa na pa mashinte ya mafunde yakwe, tulakwatilako amano, tuleluka sana, kabili tuleshibilako icine. Nga tulebika sana amano ku kuisambilisha amafunde ya kwa Lesa na mashinte ya mafunde yakwe, tukaba “abakalamba, ukufika ku ciimo ca kwa Kristu.”—Efes. 4:13.