1. Bushe Yehova omfwa shani nga ca kuti uwalekele ukumubombela atendeka ukumubombela na kabili?

NGA FINTU twasambilile mu cipande cafumineko, Yehova aipashanya kuli kacema musuma uusakamana bwino sana impaanga shakwe. Kabili alafwaya abaleka ukumubombela. Aebele abena Israele abalekele ukumubombela ati: “Bweleleni kuli ine, na ine nkabwelela kuli imwe.” Twalishiba ukuti ifi fine e fyo omfwa na pali ino nshita pantu alilanda ukuti: “Nshayaluka iyo.” (Mal. 3:6, 7) Yesu alandile ukuti Yehova na bamalaika balasekelela nga nshi nga ca kuti umubomfi wa kwa Yehova uwalekele ukumubombela abwelela kuli ena.—Luka 15:10, 32.

2. Finshi twalasambilila muli cino cipande?

² Twalasambilila pa filangililo fitatu ifyo Yesu alandile ifilanda pa kwafwa abaleka ukubombela Yehova. Twalasambilila na pa mibele tulingile ukuba nayo pa kuti twafwe impaanga ishaluba ukubwelela kuli Yehova. Kabili twalasambilila na pa cishinka ca kuti tukalasekelela nga nshi nga twa-afwa abanaka ukubwelela kuli Yehova.

3-4. Cinshi calengele umwanakashi balandapo pali Luka 15:8-10 afwaye sana indalama alufishe?

³ Tufwile ukubombesha pa kuti tusange abalefwaya ukubwelela kuli Yehova. Mu cilangililo calembwa mwi buuku lya Mbila Nsuma ilya kwa Luka, Yesu alondolwele ifyo umwanakashi alefwaya indalama ya drakima iyo alufishe iyali iyacindama nga nshi. Icacindama sana muli ici cilangililo fintu umwanakashi alebombesha pa kufwaya indalama ya drakima.—Belengeni Luka 15:8-10.

⁴ Yesu alilondolwele ifyo umwanakashi aleumfwa nga asanga indalama ya drakima iyo alufishe. Ilyo Yesu ali pano isonde, limo abafyashi abanakashi abaYuda balepeela umwana umwanakashi  indalama sha drakima 10 pa bushiku aleupwa. Nalimo iyi ndalama yali iyacindama sana ku mwanakashi Yesu alandilepo pantu yali pali shilya ndalama banyina bamupeele. Umwanakashi aletunganya ukuti indalama yaponene pa nshi. E ico alisanike inyali no kufwailisha, lelo taimwene. Nalimo inyali yakwe tayakwete sana ulubuuto ulwali no kulenga amone akandalama akanono aka silfere. Pa numa alipyangile ing’anda yonse pa kuti asange indalama yakwe. Lyena amwene indalama yakwe iya drakima iyali iyacindama ninshi ili mu fisooso. Alisekelele icine cine ilyo aisangile! Alitile ifibusa fyakwe na bena mupalamano bakwe pa kuti abebe ukuti nasanga indalama yakwe.

5. Cinshi nalimo cingalenga catukosela ukusanga abanaka?

⁵ Kuli ici icilangililo Yesu alandile tulesambililako ukuti nga twalufya cimo tulingile ukubombesha ukucifwaya. Ifi fine e fyo nalimo twingabombesha pa kuti tusange abaitalusha ku cilonganino ca kwa Lesa. Nalimo palipita imyaka iingi ukufuma apo balekela ukwisa mu kulongana. Limbi kuti balikuukila na ku cifulo cimbi uko aba bwananyina bashabeshiba. Lelo tufwile ukwishiba ukuti pali ino nshita, abanaka bamo pali aba balafwaya ukubwelela kuli Yehova. Balafwaya ukulabombela Yehova na kabili pamo na bamunyinabo na bankashi, nomba te kuti batendeke nga tatubaafwile.

6. Bushe aba mu cilonganino bonse kuti babombako shani umulimo wa kufwaya abanaka?

⁶ Ni bani bengabombako umulimo wa kufwaya abanaka? Bakasabankanya bonse mu cilonganino kuti babombako umulimo wa kufwaya abanaka, ukubikako na baeluda, bapainiya, na bonse abakwata balupwa abanaka. Bushe mwalikwata cibusa nelyo lupwa uwanaka mu fya kwa Lesa? Kuti mwacita shani nga mwasanga uwanaka ilyo mulebila imbila nsuma ku ng’anda ne ng’anda nelyo ku cintubwingi? Nga kuti atemwa ukulanga baeluda apo ekala nelyo ukubapeela inamba yakwe iya foni, mufwile ukubalanga nelyo ukubapeela inamba yakwe iya foni.

7. Finshi mwasambililako ku fyo ba Thomas baeluda balandile?

⁷ Finshi fimo ifyo baeluda bengacita pa kuti basange abalefwaya ukubwelela kuli Yehova? Ba Thomas, * baeluda abekala ku Spain, aba-afwa aba bwananyina ukucila pali 40 ukubwelela kuli Yehova balandile ukuti: “Mbalilapo ukwipusha bamunyinefwe na bankashi abalekanalekana nga balishiba apekala aba bwananyina abanaka. Limo ndepusha bakasabankanya nga ca kuti kwaliba abo baishiba abaleka ukwisa mu kulongana. Abengi mu cilonganino balatemwa ukunjeba pantu balafwaisha ukubombako umulimo wa kufwaya abanaka. Lyena nga natandalila bamunyinefwe nelyo bankashi abanaka, ndabepusha pa bana babo na pali balupwa lwabo. Aba bwananyina bamo baleisa na bana babo mu kulongana ilyo bashilanaka, kabili bamo abana babo nalimo bali ni bakasabankanya pa nshita imo. Kanshi nabo bene balakabila ukubafwa ukubwelela kuli Yehova.”

8. Bushe wishi wa mu cilangililo ca mwana walubile icaba pali Luka 15:17-24, acitile shani ilyo umwana wakwe alapiile?

⁸ Mibele nshi tufwile ukuba nayo pa kuti twafwe abalefwaya ukubwelela kuli Yehova? Natusambilileko fimo ku cilangililo Yesu alandile ica mwana umwaume uwafumine pa ng’anda. (Belengeni Luka 15:17-24.) Yesu alilondolwele ifyo ulya mwana ailwike ukuti alilufyenye ne fyo apingwilepo ukubwelela ku ng’anda. Wishi alimubutukile kabili alimukumbatile pa kuti amulange ukuti alimutemenwe. Umwana alyumfwile ububi pa fyo acitile ica kuti alemona kwati talingile ukupokelelwa ngo mwana. Ilyo alelondolola ifyo aleumfwa, wishi alimumfwilile uluse.  Lyena wishi alicitilepo fimo pa kulanga umwana wakwe ukuti alimupokelele. Talemumona kwati mubomfi, lelo alemumona ukuti mwana wakwe uo atemwa. Wishi alipekanishishe umwana wakwe umutebeto kabili alimupeele ne cakufwala icisuma, pa ku mulanga ukuti alimutemenwe kabili alimupokelele.

9. Mibele nshi tulingile ukuba nayo pa kuti twafwe abanaka ukubwelela kuli Yehova? (Moneni akabokoshi akaleti “ Ifyo Twingacita pa Kwafwa Abafwaya Ukubwelela kuli Yehova.”)

⁹ Yehova aba kwati ni wishi wa mu cilangililo. Alitemwa bamunyinefwe na bankashi abanaka kabili afwaya babwelela kuli ena. Nga tulepashanya Yehova kuti twabafwa ukubwelela kuli ena. Pa kuti tubafwe ukubwelela kuli Yehova, tufwile ukutekanya, ukulabalangulukilako, no kubatemwa. Cinshi tulingile ukubela na iyi imibele, kabili kuti twacita shani pa kuba nayo?

10. Cinshi tulingile ukubela abatekanya pa kwafwa uwa bwananyina ukupalama kuli Yehova na kabili?

¹⁰ Tufwile ukuba abatekanya pantu palapita inshita pa kuti umuntu abwelele kuli Yehova. Abengi abalipo abanaka balanda ukuti balibatandalile pa miku iingi kuli baeluda na ba mu cilonganino pa kuti batendeke ukubombela Yehova na kabili. Nkashi Nancy uwikala ku Asia alembele ukuti: “Cibusa wandi mu cilonganino alingafwile sana. Alenjibukishako utushita utusuma uto twaleipakisha nankwe. Alintemenwe kwati fye ndi mukalamba wakwe. Aletekanya kabili alekutikisha nga ndemulondolwela ifyo naleumfwa, kabili taleshingashinga ukumpandako amano. Alinangile ukuti ali ni cibusa wa cine uwaleitemenwa ukungafwa pa nshita iili yonse.”

11. Mulandu nshi tulingile ukulangulukilako uo bakalifye?

¹¹ Umuntu nga nafulwa ciba kwati ali ne cilonda icilekalipa. Ukulangulukilako kwaba kwati  muti uwingalenga aumfwako bwino. Abanaka bamo balibakalifye ku wa mu cilonganino, kabili nalimo palipita ne myaka iingi lelo bacili balomfwa ububi. Ici cilenga belafwaya ukubwelela kuli Yehova. Nalimo bamona ukuti balibafyengele. Nalimo balafwaya umuntu uwingakutika kuli bena kabili uwingabomfwikisha. (Yako. 1:19) Ba María abalipo abanaka inshita imo batile: “Nalefwaya umuntu uwingakutika kuli ine, uwingansansamusha kabili uwingampandako amano no kungafwa.”

12. Langilileni ifyo ukutemwa kwa kwa Yehova kwaba kwati mwando.

¹² Baibolo yapashanya ukutemwa kwa kwa Yehova ku mwando. Bushe ukutemwa kwa kwa Lesa kwaba shani kwati mwando? Lekeni tulangilile: Elenganyeni ukuti mwaponena muli bemba umuli amabimbi kabili umuli amenshi ayatalala. Mwatendeka ukwibila, e lyo umuntu umo amupoosela ica kwikatako pa kuti mule-elela. Mwatemwa sana. Nomba mufwile ukufuma mu menshi. Kanshi kuti mwafwaya abali mu bwato bamupoosela umwando uwa kuti mwikateko pa kuti bamutintile mu bwato. Yehova aebele abena Israele abalekele ukumubombela ukuti: “Nalebakulila ku myando ya kutemwa.” (Hos. 11:4) Ifi fine e fyo Lesa omfwa na muno nshiku pa babomfi bakwe abaleka ukumubombela kabili ababa sana na mesho na masakamika. Afwaya baishiba ukuti alibatemwa kabili alafwaya ukubafwa ukubwelela kuli ena. Kabili Yehova kuti amubomfya pa kubalanga ukuti alibatemwa.

13. Bushe ilyashi lya ba Pablo lilelanga shani ifyo ukutemwa aba bwananyina kwingalenga babwelela kuli Yehova?

¹³ Calicindama sana ukulaeba abanaka ukuti Yehova alibatemwa e lyo no kulabalanga ukuti na ifwe twalibatemwa. Ba Pablo abo  twalandilepo mu cipande cafumineko balinakile pa myaka ukucila 30. Balandile abati: “Ulucelo lumo ilyo nalefuma pa ng’anda, nalikumenye nkashi umukalamba uwali sana ne cikuuku, kabili alilandile na ine mu nshila iisuma. Natendeke ukulila ngo mwana umunono. Naebele ulya nkashi nati cali kwati Yehova e wamutumine ukwisalanda na ine. Ici calengele nsalepo ukubwelela kuli Yehova.”

14. Nga fintu Baibolo ilanda pali Luka 15:4, 5, finshi kacema alecita nga asanga impaanga iyalubile?

¹⁴ Nga twasanga abanaka tufwile ukutwalilila ukubafwa no kubakoselesha. Nga filya cali ku mwana walubile mu cilangililo ico Yesu alandile, nalimo kuti papita inshita iitali pa kuti baleke ukumfwa ububi. Na kabili apo balilekele ukubombela Yehova, tababa ifibusa fyakwe nge fyo bali kale. Tufwile ukubafwa ukukosha icitetekelo cabo muli Yehova. Mu cilangililo ca mpaanga iyalubile, Yesu alilondolwele ifyo kacema alesenda impaanga yakwe pa mabeya no kuibwesesha ku mukuni. Kacema alepoosa inshita iikalamba na maka pa kufwaya impaanga iyalubile. Lelo alishibe no kuti apo tayakwete amaka ya kuyendela, alingile ukuisendela pa mabeya pa kuibwesesha ku mukuni.—Belengeni Luka 15:4, 5.

15. Kuti twa-afwa shani abanaka abalefwaya ukubwelela kuli Yehova? (Moneni akabokoshi akaleti “ Icibombelo Icisuma Sana.”)

¹⁵ Nalimo kuti twapoosa inshita iikalamba na maka, pa kuti twafwe abanaka ukucimfya amafya ayalenga cilebakosela ukutendeka ukubombela Yehova na kabili. Lelo umupashi wa kwa Yehova, Icebo cakwe, ne mpapulo icilonganino cakwe capekanya kuti fyatwafwa pa kubafwa ukukosha bucibusa bwabo na Yehova. (Rom. 15:1) Finshi twingacita pa kubafwa? Eluda  umo uwabomba imyaka iingi alandile ukuti: “Abanaka abengi balakabila ukutendeka ukusambilila Baibolo nga basalapo ukubwelela kuli Yehova.” * Kanshi nga bamweba ukutendeka ukusambilisha uwanaka Baibolo mufwile ukusumina ukubomba uyu mulimo ne nsansa. Uyu eluda alandile no kuti: “Kasabankanya uuletungulula isambililo ku wanaka afwile ukumupanga cibusa ica kutila kuti ca-angukila uwanaka ukumucetekela no kumwebako ifili ku mutima.”

16. Twaishiba shani ukuti bamalaika balatwafwa?

¹⁶ Kwaliba ifingi ifilanga ukuti bamalaika balatwafwa ukusanga abanaka abafwaya ukubwelela kuli Yehova. (Ukus. 14:6) Ku ca kumwenako ba Silvio aba ku Ecuador abali abanaka balipepele kuli Yehova ukumupaapaata ukuti abafwe ukubwelela ku cilonganino cakwe. Ilyo balepepa, baeluda babili balikonkonseshe pa ciibi. Bulya bwine bushiku baeluda balitemenwe sana ukutendeka ukwafwa ba Silvio.

17. Kuti twaumfwa shani nga twa-afwa uwanaka ukubwelela ku cilonganino?

¹⁷ Tukalasekelela nga nshi nga twa-afwa abanaka ukubwelela kuli Yehova. Ba Salvador bapainiya ababika sana amano ku banaka balandile abati: “Nga natontonkanya pa banakile ababwelela kuli Yehova, ndomfwa bwino ica kuti inshita shimo ndalukusha ne filamba. Ndaba sana ne nsansa nga naishiba ukuti nimombela pamo na Yehova ukwafwa umubomfi wakwe uo atemwa ukufuma mu calo ca kwa Satana no kubwelela ku cilonganino.”—Imil. 20:35.

18. Finshi mufwile ukwishiba nga ca kuti mwalinaka?

¹⁸ Nga ca kuti mwalileka ukulongana no kubila imbila nsuma, mufwile ukwishiba ukuti Yehova acili alimutemwa. Afwaya mwabwelela kuli ena. Mufwile ukucitapo fimo pa kuti mwafwe abanaka ukubwelela kuli Yehova. Yehova aba kwati ni wishi wa mu cilangililo ca mwana walubile ico Yesu alandilepo, afwaya mwabwelela kuli ena kabili akatemwa sana nga mwabwela.