Mulandu nshi kalubula uo bashalumbula ishina alandiile ukuti nga aupa Ruti ali no ‘konaula’ ubupyani bwakwe? (Ruti 4:1, 6)

Mu nshita balelemba Baibolo, umwaume uwaupa nga afwa ukwabula ukukwatapo umwana, balefwaya ukwishiba ifyali no kucitika ku mpanga yakwe, e lyo ne fyo bali no kucita pa kuti ishina lyakwe talilobele. Mu Mafunde ya kwa Mose e mwali ifyo balingile ukucita.

Bushe caleba shani nga ca kuti umuntu nakwata impanga e lyo afwa, nelyo aba umupiina kabili ashitisha impanga yakwe? Munyina nelyo lupwa lwakwe uwapalamisha e wali no kushita ilya mpanga. Ukucita ifi kwalelenga ukuti impanga itwalilile ukuba iya lupwa.—Lebi 25:23-28; Impe. 27:8-11.

Balecita shani pa kuti ishina lya muntu uufwile talilobele? Kwaleba icupo ca pali bumulamu, kabili ifi fine e fyo cali kuli Ruti. Munyina wa ufwile e waleupa mukamfwilwa pa kuti akakwate umwana uo bali no kwinika ishina lya wafwile kabili e wali no kupyana impanga. Ifi Yehova apekenye fyalelenga ukuti mukamfwilwa balemusakamana bwino.—Amala. 25:5-7; Mat. 22:23-28.

Tontonkanyeni pa fyo cali kuli Naomi. Aupilwe kuli Elimeleke. Ilyo Elimeleke na bana bakwe abaume babili bafwile, takwali umwaume mu lupwa lwakwe uwali no kulamusakamana. (Ruti 1:1-5) Ilyo Naomi abwelelemo ku Yuda na nafyala Ruti, aebele Ruti ukuti ebe Boasi ukuti ashite impanga ya kwa Elimeleke. Boasi ali ni lupwa wapalamisha uwa kwa Elimeleke. (Ruti 2:1, 19, 20; 3:1-4) Lelo Boasi alishibe ukuti kwali lupwa wa kwa Elimeleke uwapalamishe sana, uo Baibolo ishalumbula ishina. Kanshi e walingile ukubalilapo ukulanda nga ca kuti ali no kusumina ukuba kalubula nelyo iyo.—Ruti 3:9, 12, 13.

Pa kubala, uyu muntu alisumine ukushita impanga. (Ruti 4:1-4) Alishibe ukuti pa kuti ashite impanga ali no kupoosapo indalama, kabili alishibe ukuti Naomi alikulile, tali no kukwata umwana uwali no kupyana impanga ya kwa Elimeleke. Kanshi nga ashita impanga yali no kuba yakwe, e ico amwene ukuti cali fye bwino ukushita ilya mpanga.

Nomba ilyo aishibe ukuti nga ashita impanga alingile no kuupa Ruti, alikeene ukushita impanga. Atile: “Nafilwa ukushita, epali naonaula ubupyani bwandi.” (Ruti 4:5, 6) Mulandu nshi akaanine ukushita?

Nga ca kuti uyu kalubula nelyo umuntu fye uuli onse aupa Ruti, kabili Ruti akwata umwana umwaume, umwana uwali no kufyalwa e wali no kupyana impanga ya kwa Elimeleke. Nomba bushe ici cali no kulenga shani “ubupyani” bwa kwa kalubula ukonaika? Kwena Baibolo tayalandapo nangu fimo, lelo nalimo ifi twalalandapo e fyalengele akaane.

• Ica kubalilapo, camoneke kwati ali no konaula fye indalama aali no kushitamo impanga, pantu tayali no kuba yakwe. Impanga yali no kuba ya mwana uo Ruti ali no kufyala.

• Icalenga bubili, e wali no kulasunga Naomi na Ruti.

• Icalenga butatu, nga ca kuti Ruti ali no kukwata abana kuli uyu kalubula, aba bana bali no kwakana ifya bupyani na bana ba kwa kalubula abo akwete kale.

• Icalenga 4, nga ca kuti uyu kalubula takwete abana bambi, ninshi umwana Ruti ali no kufyala ali no kupyana impanga ya kwa Elimeleke e lyo ne ya kwa kalubula iine. Kanshi nga afwa, impanga ya kwa kalubula yali no kuba ya mwana uwainikwe ishina lya kwa Elimeleke. Uyu kalubula talefwaya ukonaula ubupyani bwakwe pa kwafwa Naomi. Amwene ukuti cali fye bwino ukuti Boasi e o abe kalubula. Boasi alisumine ukuba kalubula pantu alefwaya “ukubukulula ishina lya wafwa.”—Ruti 4:10.

Kalubula uo bashalumbula ishina ali ni kaitemwe. Talefwaya ishina lyakwe ukuloba, talefwaya no kuti impanga yakwe ibe ya muntu umbi. Nangu ca kuti talefwaya ishina lyakwe ukuloba, ifi fine e fyacitika, tatwaishiba ishina lyakwe. Na kabili alipanishe ishuko ilyaibela ilyo Boasi akwete, ilya kuba mu lupwa umwafumine Mesia, Yesu Kristu. Uyu kalubula uo bashalumbula ishina, ushalefwaya ukwafwilisha Naomi alipanishe ifintu ifingi pa mulandu wa kuti ali ni kaitemwe!—Mat. 1:5; Luka 3:23, 32.