1-2. Mulandu nshi mushilingile ukufuupuka nga ca kuti tamulafikapo ukubatishiwa? (Moneni icikope icili pa nkupo.)

 NGA MULEFWAYA ukubatishiwa, namusalapo ukucita icintu icisuma. Nomba bushe namufikapo ukubatishiwa? Nga mulemona ukuti namufikapo, kabili na baeluda basuminishako, ninshi mwikekata na ku cani mukabatishiwe pa kulongana kukonkelepo. Nga mwabatishiwa mukaba ne nsansa ilyo mukalabombela Yehova.

² Inga ca kuti kwaliba abamwebapo ukuti mulingile ukwalukako muli fimo pa kuti mufikepo ukubatishiwa? Nangu bushe mwe bene mwalimona umo mulingile ukwaluka? Ifi nga e fyo caba, tamulingile ukufuupulwa. Kuti mwafikapo ukubatishiwa, nampo nga muli bakalamba nelyo muli baice.

3. Finshi cilolo umwina Etiopia aipwishe Filipi, kabili cipusho nshi twingepusha? (Imilimo 8:36, 38)

³ Belengeni Imilimo 8:36, 38. Cilolo wa ku Etiopia aipwishe Filipi kabila wa mbila nsuma ukuti: “Cinshi cilendesha ukubatishiwa?” Uyu mwina Etiopia alefwaya ukubatishiwa, nomba bushe alifikilepo ukubatishiwa?

4. Bushe umwina Etiopia alangile shani kuti alefwaya ukutwalilila ukusambilila?

⁴ Umwina Etiopia “aile ku Yerusalemu ku kupepa Lesa.” (Imil. 8:27) Kanshi afwile asangwike fye umuYuda. Afwile asambilile pali Yehova mu Malembo ya mushilo aya ciHebere. Na  lyo line, alefwaya ukusambililapo na fimbi. Na kuba ilyo Filipi asangile uyu cilolo, amusangile ninshi alebelenga mu cimfungwa ca kwa kasesema Esaya. (Imil. 8:28) Ifyo alebelenga fyalikosele ukumfwa. Lelo uyu cilolo talefwaya fye ukusambilila amasambililo ya kutendekelapo aya mu Baibolo, alefwaya ukutwalilila ukusambilila.

5. Bushe umwina Etiopia abomfeshe shani ifyo alesambilila?

⁵ Uyu mwaume ali ni cilolo wa kwa namfumu Kandake uwa ku Etiopia, kabili ‘e walesunga icuma ca kwa namfumu conse.’ (Imil. 8:27) Kanshi afwile alikwete imilimo iingi sana iya kubomba. Na lyo line, alesangako inshita ya kupepa Yehova. Talefwaya ukupelela fye pa kusambilila icine, lelo alecita ne fyo alesambilila. E calengele eme ubulendo bwa kufuma ku Etiopia ukuya kwi tempele mu Yerusalemu pa kuti fye apepe Yehova. Pa kuti aye ku Yerusalemu alipooselepo indalama ne nshita. Lelo te mulandu ne fi fyonse, aliile ku Yerusalemu pantu alefwaisha ukupepa Yehova.

6-7. Cinshi calengele ukuti umwina Etiopia atwalilile ukutemwa Yehova?

⁶ Umwina Etiopia alisambilile na fimbi kuli Filipi, cimo ico asambilile ca kuti Yesu e wali Mesia. (Imil. 8:34, 35) Uyu cilolo alitemenwe ilyo asambilile ifyo Yesu amucitile. Finshi acitilepo? Nga alefwaya nga tacitilepo nangu cimo, nga twalilile fye ukulaya mu kupepa ku Yerusalemu. Lelo ifyo asambilile fyalengele atemenwako Yehova no Mwana wakwe. E calengele asalepo ukubatishiwa no kuba umusambi wa kwa Yesu Kristu. Ilyo Filipi amwene ukuti uyu mwaume alifikilepo ukubatishiwa, alimubatishe.

⁷ Nga mwacita ifyo umwina Etiopia acitile, na imwe bene kuti mwafikapo ukubatishiwa. Kuti mwayipusha amuti: “Cinshi cilendesha ukubatishiwa?” Kuti mwacita shani pa kuti mucite nge fyo umwina Etiopia acitile? E kutila filya atwalilile ukusambilila, filya alecita ifyo alesambilila, e lyo na filya atwalilile ukutemwa Lesa.

8. Bushe amashiwi ayaba pali Yohane 17:3 yalanda ukuti finshi mufwile ukucita?

⁸ Belengeni Yohane 17:3 na futunoti. Bushe amashiwi Yesu alandile ayaba pali ili lembo e yalengele mutendeke ukusambilila Baibolo? Fwe bengi e yalengele tutendeke. Bushe aya mashiwi Yesu alandile yalola na mu kuti tufwile ukutwalilila ukusambilila? Ee. Pantu tukatwalilila ‘ukwishiba Lesa wa cine eka.’ (Luk. Mil. 3:11) Tukatwalilila fye ukusambilila pali Lesa umuyayaya. Ilyo tukalaya tulesambilila ifingi pali ena, tukalamupalama sana.—Amalu. 73:28.

9. Finshi tufwile ukucita nga twasambilila amasambililo ya kubalilapo ayaba mu Baibolo?

 ⁹ Nga twatendeka ukusambilila pali Yehova, tusambilila fye amasambililo ya kubalilapo aya mu Baibolo. Muli kalata Umutumwa Paulo alembeele AbaHebere, aitile aya masambililo ukuti, “ifya kubalilapo ukwishiba.” Paulo taleti amasambililo ya kubalilapo tayacindama. Lelo ayapashenye ku mukaka uulenga umwana alekula bwino. (Heb. 5:12; 6:1) Paulo alekoselesha Abena Kristu bonse ukukanapelela fye pa masambililo ya kubalilapo, lelo balingile no kusambilila icine icashika icaba mu Cebo ca kwa Lesa. Bushe mulafwaya ukusambilila ifyashika ifyaba mu Baibolo? Bushe mulefwaya ukuba abakalamba mu fya kwa Lesa, no kutwalilila ukusambilila pali Yehova ne fyo afwaya?

10. Mulandu nshi abantu abengi cibafisha ukusambilila?

¹⁰ Fwe bengi cilatukosela ukuisambilisha. Bushe na imwe cilamukosela? Ilyo mwali ku sukulu bushe mwalisambilile ifya kubelenga no kuisambilisha bwino? Bushe ilyo mwali ku sukulu mwaletemwa ukusambilila? Nelyo mwalemona ukuti te kuti musambilile nga ca kuti muleibelengela fye mu fitabo? Ifi fine e fyo abantu abengi batontonkanya. Nomba Yehova kuti amwafwa. Alishiba sana ukusambilisha.

11. Bushe Yehova alanga shani ukuti ni “Kasambilisha Uwapulamo”?

¹¹ Yehova umwine atila ni “Kasambilisha wenu Uwapulamo.” (Esa. 30:20, 21) Ni Kasambilisha uwa cikuuku kabili uutekanishisha abo alesambilisha. Afwayamo ifisuma mu bo alesambilisha. (Amalu. 130:3) Tenekela ukutila kuti twacita ifyo tushingakumanisha. Muleibukisha ukuti e wapangile bongobongo yesu, ubupe ubwawama icine cine. (Amalu. 139:14) Lesa atupangile ukuti tulefwaya ukusambilila. Kabumba wesu afwaya twatwalilila ukusambilila, kabili tuleipakisha na lintu tulesambilila. E ico tufwile ukulafwaisha ukusambilila icine icaba mu Baibolo pali ino nshita. (1 Pet. 2:2) Kuti mwapangako ukucita ifyo mwingakumanisha, kabili mulebelenga lyonse Baibolo no kuisambilisha ukulingana ne fyo mwatantika. (Yosh. 1:8) Yehova nga amwafwa, mukaya muletemenwako ukubelenga no kusambilila pali ena.

12. Mulandu nshi tulingile ukulaisambilisha pali Yesu, e lyo na pa mulimo abombele ilyo ali pano isonde?

¹² Lyonse mulesangako inshita ya kutontonkanya pali Yesu e lyo na pa mulimo alebomba ilyo ali pano isonde. Calicindama ukulapashanya sana Yesu nga tulefwaya ukulabombela Yehova muli ino nshita ya-afya. (1 Pet. 2:21) Yesu tapitile mu mbali ilyo alandile pa mafya abasambi bakwe bali no kulakwata. (Luka 14:27, 28) Lelo alicetekele ukuti abasambi bakwe aba cishinka bali no kutwalilila ukubombela Lesa ne cishinka nga fintu acitile. (Yoh. 16:33) Mulesambilila ifingi pali Yesu, kabili mulemupashanya cila bushiku.

13. Finshi mulingile ukutwalilila ukulomba Yehova, kabili mulandu nshi mulingile ukutwalilila ukumulomba?

¹³ Tatufwile ukupelela fye pa kuisambilisha. Pantu icilenga tuleisambilisha, kufwaya ukwishiba ifingi pali Yehova pa kuti tumutemwe kabili tube ne citetekelo muli ena. (1 Kor. 8:1-3) Ilyo muletwalilila ukusambilila, mulepepa kuli Yehova ukuti amulundileko icitetekelo. (Luka 17:5) Yehova alasuka amapepo ya musango uyu. Nga ca kuti mwaliba ne citetekelo pa mulandu wa kuti mwalishiba bwino bwino Lesa, muli no kulafwaya ukucita fimo pa fyo mulesambilila pa kuti mulunduluke.—Yako. 2:26.

14. Bushe umutumwa Petro alandile ukuti cinshi cacindamina ukubomfya ifyo tulesambilila? (Moneni ne cikope.)

¹⁴ Umutumwa Petro alilandile umulandu  cacindamina abasambi ba kwa Kristu ukulacita ifyo balesambilila. Alandile pa lyashi ilyalembwa mu Baibolo ilya kwa Noa. Yehova alyebele Noa ukuti ali no kubomfya ilyeshi ukonaula abantu abalecita ifyabipa pali ilya nshita. Nomba Noa no lupwa lwakwe tabali no kupusuka fye pa mulandu wa kuti balishibe ukuti kwali no kwisa ilyeshi. Ilyo Petro alelanda pali ili lyashi alelanda pa fyalecitika ilyo ilyeshi lishilaisa, “ilyo icibwato calepangwa.” (1 Pet. 3:20) Kanshi Noa no lupwa lwakwe balicitilepo fimo ilyo baumfwile ifyo Lesa abebele pe lyeshi, no kukuula icibwato. (Heb. 11:7) Lyena Petro alingenye ulubatisho ku fyo Noa acitile ilyo atile: “Icalingana ne ci e cilemupususha nomba, e kutila, ulubatisho.” (1 Pet. 3:21) Kanshi kuti twalinganya umulimo uo Noa no lupwa lwakwe babombele pa myaka iingi uwa kukuula icibwato ku fyo muleipekanya ukufikapo ukubatishiwa. Finshi mufwile ukucita pa kuti mufikepo ukubatishiwa?

15. Bushe calola mwi ukulapila ukufuma pa nshi ya mutima?

¹⁵ Cimo ico tufwile ukucita, kulapila ukufuma pa nshi ya mutima ku membu tucita. (Imil. 2:37, 38) Nga ca kuti twalapila ukufuma pa nshi ya mutima, kuti twa-aluka no kwaluka. Bushe mwalileka ukucita ifintu ifyo Yehova Lesa alesha, pamo ngo kucita ubulalelale, ukupeepa fwaka, nelyo ukulanda amashiwi ya musaalula? (1 Kor. 6:9, 10; 2 Kor. 7:1; Efes. 4:29) Nga ca kuti tamwaleka, twalilileni ukulaesha na maka ukuleka iyi mibele yabipa. Kuti mwaebako abamusambilisha Baibolo nelyo baeluda mu cilonganino pa kuti bamwebeko pa fyo mwingacita pa kuti muleke iyi mibele yabipa. Nga ca kuti muli baice e lyo mwikala pa ng’anda pa bafyashi benu, kuti mwabeba ukuti bamwafwe ukuleka imibele yabipa pa kuti mufikepo ukubatishiwa.

16. Finshi ifya kwa Lesa ifyo tufwile ukulacita lyonse?

¹⁶ Calicindama no kulasangako inshita ya kucitamo ifya kwa Lesa. Ici cilepilibula ukulalongana no kula-asukapo. (Heb. 10:24, 25) Kabili nga mwafikapo ukulabila imbila nsuma, mufwile ukulabila imbila nsuma lyonse. Nga ca kuti lyonse mulebila imbila nsuma, mukaya muletemenwako ukubila imbila nsuma. (2 Tim. 4:5) Nga ca kuti muli baice e  lyo mucili mwikala pa bafyashi, tontonkanyeni pali ifi fipusho: ‘Bushe abafyashi bandi lyonse banjibukishako fye ukuya mu kulongana no kuya mu kubila imbila nsuma? Nelyo bushe ndaitendekelako fye ne mwine ukuya mu kubila imbila nsuma no kulongana?’ Nga muleitendekelako fye ninshi mulelanga ukuti mwaliba ne citetekelo. Kabili ninshi mulelanga no kuti mwalitemwa Yehova Lesa kabili mulatasha na pali fyonse ifyo amucitila. Nga mulesangwa lyonse ku kulongana no kubila imbila nsuma, ninshi mulebomba “imilimo ya bukapepa” kabili iyi milimo yaba pa fya bupe ifyo tupeela Yehova. (2 Pet. 3:11; Heb. 13:15) Yehova alatasha nga tulemupeela ifya bupe mu kuitemenwa. (Linganyeniko 2 Abena Korinti 9:7.) Tulaitemenwa ukubombesha ilyo tulebombela Yehova pantu cilalenga tulesekelela.

17-18. Mibele nshi iingalenga mwalunduluka no kufikapo ukubatishiwa, kabili bushe iyo mibele kuti yamwafwa shani? (Amapinda 3:3-6)

¹⁷ Ilyo mulebombesha ukufikapo ukubatishiwa, muli no kulakwata amafya. Abantu bamo bakulamupumya pa mulandu wa fyo mutendeke ukusuminamo. Kuti batendeka ukumukanya no kumucusha fye. (2 Tim. 3:12) Inshita shimo kuti mwacita ne fyabipa ifyo mulefwaisha ukuleka ukucita. Nelyo kuti mwaumfwa ububi no kufuupuka pa mulandu wa kuti tamulefikapo ukubatishiwa. Cinshi cingamwafwa ukukanafuupuka? Mulingile ukutemwa Yehova.

¹⁸ Mwalitemwa Yehova, kabili iyi mibele mwakwata isuma sana. (Belengeni Amapinda 3:3-6.) Ukutemwa mwatemwa Yehova, kukalenga mwatwalilila ukumubombela nangu muli na mafya. Baibolo ilalanda pa fyo Yehova atemwa ababomfi bakwe. Ici cipilibula ukuti Yehova takalekeleshe ababomfi bakwe nelyo ukuleka ukubatemwa. (Amalu. 100:5) Mwapangwa mu cipasho ca kwa Lesa. (Ukute. 1:26) Bushe na imwe kuti mwalanga shani ukutemwa uko Yehova atutemwa?

19. Kuti mwalanga shani ukuti mulatasha pali fyonse ifyo Yehova amucitila? (Abena Galatia 2:20)

¹⁹ Muletasha. (1 Tes. 5:18) Cila bushiku muleyipusha amuti: ‘Bushe Yehova anangile shani ukuti alintemwa?’ Lyena muletasha Yehova ilyo mulepepa kabili mulelandako mu kulungatika pali fimo ifyo amucitile. Mulemona ukuti ifyo Yehova acita, ni mwe acitila pantu alimutemwa. Ifi fine e fyo umutumwa Paulo aishileishiba ukuti Yehova alimutemenwe.  (Belengeni Abena Galatia 2:20.) Tontonkanyeni amuti: ‘Bushe naine ndafwaya ukumulanga ukuti nalimutemwa?’ Nga mwalitemwa Yehova, mukalakaana amatunko kabili mukalashipikisha ilyo muli na mafya. Na kabili mukalapepa lyonse, no kulanga Shinwe wa ku muulu kuti mwalimutemwa.

20. Finshi ifyo mufwile ukucita pa kuti muipeele kuli Yehova, kabili mulandu nshi ukucitila ifi kwacindamina?

²⁰ Mu kuya kwa nshita, ukutemwa uko mwatemwa Yehova kuli no kumulenga ukupepa ipepo lyaibela. Muli no kuipeela kuli Lesa. Muleibukisha ukuti nga mwaipeela kuli Yehova, muli no kukwata isubilo ilisuma nga nshi. Muli no kulamubombela umuyayaya. Nga mwaipeela kuli Yehova, ninshi mwamulaya ukulamubombela lintu muli na mafya na lintu mushikwete amafya. Na kabili tuipeela fye umuku umo. Ca cine ukuti nga twaipeela, ninshi twapingulapo ukucita icintu icacindama. Tontonkanyeni pali ici: Fingi mwingasalapo ukucita mu bumi, kabili fimo ifyo mwingasalapo fisuma. Lelo nga mwasalapo ukuipeela kuli Yehova, ninshi mwasalapo ukucita icintu icisuma sana. (Amalu. 50:14) Satana kuti afwaya mwaleka ukutemwa Shinwe pa kuti muleke ukuba aba cishinka kuli ena. Mwikaleka Satana akamucimfye! (Yobo 27:5) Ukutemwa uko mwatemwa Yehova kuli no kulenga mukafishepo ifyo mwamulaya ukuti muli no kumubombela, kabili kukalenga mukapalame sana kuli Shinwe wa ku muulu.

21. Bushe ulubatisho ni ntendekelo ya cinshi?

²¹ Nga mwaipeela kuli Yehova, mufwile ukweba baeluda ukuti mulefwaya ukubatishiwa. Lyonse muleibukisha ukuti ulubatisho ni ntendekelo fye. Ni ntendekelo ya kubombela Yehova umuyayaya. E ico pali ino nshita mulecita ifingalenga mwatemwa sana Shinwe. Mulepanga ukucita ifingalenga ukutemwa uko mwatemwa Yehova kulekulilako cila bushiku. Ukucita ifi kuli no kulenga mukafwaishe ukubatishiwa. Ala ubo bushiku bukaba bushiku bwa nsansa! Lelo ikaba ni ntendekelo fye. Kanshi twalilileni ukulatemwa Yehova no Mwana wakwe umuyayaya!