1-2. Cinshi cicitika ilyo umuntu alebatishiwa, kabili finshi twalasambilila muli cino cipande?

 Bushe mwalimonapo abantu abaleya mu kubatishiwa? Kuti mwaumfwa ba-asuka mu kupongomoka amepusho yabili ayo babepusha ilyo bashilaya mu kubatishiwa. Kabili kuti mwamona ne fyo balupwa lwabo ne fibusa bali ne nsansa. Ilyo bafuma mu menshi, mwaumfwa uko abantu batoota kabili mwamona ne fyo uwabatishiwa amoneka ukuti ali ne nsansa. Cila mulungu abantu abengi balaipeela kuli Yehova Lesa no kubatishiwa.

² Na imwe bene nga muletontonkanya pa kubatishiwa, ninshi mwalicindama sana kuli Lesa muli cino calo cabipa pantu ninshi ‘mulefwaya Yehova.’ (Amalu. 14:1, 2) Cino cipande ni mwe balembeele, nampo nga muli baice nelyo muli bakalamba. Na ifwe bene fwe babatishiwa kale, tulafwaya ukutwalilila ukubombela Yehova umuyayaya. Kanshi natulandeko pa milandu itatu iilenga tulebombela Yehova.

3. Mulandu nshi ababomfi ba kwa Yehova batemenwa icine no bulungami? (Amalumbo 119:128, 163)

³ Yehova aebele abantu bakwe ‘ukutemwa icine.’ (Seka. 8:19) Yesu na o aebele abasambi bakwe ukufwaya ubulungami. (Mat. 5:6) Ici cilolele mu kuti umuntu alingile ukulacita ifintu ifyo Lesa amona ukuti fisuma kabili fyalilungama. Bushe mwalitemwa icine no bulungami? Tatuletwishika no kutwishika ukuti mwalitemwa icine no bulungami. Mwalipata ubufi na fyonse ifyabipa. (Belengeni Amalumbo 119:128, 163.) Umuntu uubepa ubufi ninshi apashanya Satana, kateka  wa cino calo. (Yoh. 8:44; 12:31) Cimo ico Satana afwaisha, konaula ishina lya mushilo ilya kwa Yehova Lesa. Ukutula fye mwi bala lya Edeni, Satana alitwalilila ukulanda ifya bufi pali Lesa wesu. Afwaya abantu balemona ukuti Yehova ali-itemwa kabili wa bufi, alafisa ne fisuma ku bantu. (Ukute. 3:1, 4, 5) Ifya bufi ifyo Satana atwalilila ukubepesha Yehova fyalilenga abantu balamona ukuti Yehova mubi. Abantu nga basalapo ‘ukukanatemwa icine,’ Satana kuti alenga balacita ifintu ifyabipa icine cine.—Rom. 1:25-31.

4. Bushe Yehova alanga shani ukuti ni “Lesa wa cishinka”? (Moneni ne cikope.)

⁴ Yehova ni “Lesa wa cishinka,” kabili alaitemenwa ukusambilisha abantu abamutemwa icine. (Amalu. 31:5) Ici cilenga belabepwa na Satana. Yehova na kabili alasambilisha ababomfi bakwe ukuba aba cishinka kabili abalungami. Ici cilenga balemona ukuti balicindama kabili cilenga baba no mutende. (Amapi. 13:5, 6) Bushe ifi e fyo mumfwa ilyo mulesambilila Baibolo? Mwalisambilila ukuti ifyo Yehova atusambilisha filawamina abantu bonse ukubikako fye na imwe bene. (Amalu. 77:13) Kanshi mulafwaya ukucita ifyo Lesa alanda ukuti fyalilungama. (Mat. 6:33) Mulafwaya abantu baishiba icine no kwishiba ukuti ifyo Satana alanda pali Lesa wesu Yehova, fya bufi. Kuti mwacita shani ifi?

5. Kuti mwalanga shani ukuti mwalitemwa icine no bulungami?

⁵ Kuti mwasalapo ukulacita ifintu ifingalanga ukuti mwalikaana ubufi bwa kwa Satana no kuti mulatungilila icine. Kuti mwalanga ukuti mulafwaya Yehova e o alemuteka kabili mulafwaya ukucita ifyalungama. Kuti mwacita shani ifi twalandapo? Mufwile ukupepa kuli Yehova no kumulaya ukuti mwakulamubombela umuyayaya. Lyena mufwile ukubatishiwa pa kuti mulange ku cintubwingi ukuti mwali-ipeela. Ukutemwa icine no bulungami fifwile ukumulenga mwasalapo ukubatishiwa.

6. Ukulingana na Amalumbo 45:4, cinshi cingalenga mwatemwa Yesu Kristu?

⁶ Mulandu nshi mwatemenwa Yesu Kristu? Pa Amalumbo 45:4, paliba imilandu iisuma iyalenga mutemwe Yesu. (Belengeni.) Yesu alitemwa icine, ali-icefya kabili alitemwa ubulungami. Nga ca kuti mwalitemwa icine no bulungami, ninshi mufwile ukutemwa na Yesu Kristu. Alilangile ukuti alitemwa icine  no bulungami. (Yoh. 18:37) Nomba bushe alangile shani ukuti ali-icefya?

7. Finshi mwatemwa pali Yesu ifi aba uwaicefya?

⁷ Ifyo Yesu acita e filanga ukuti ali-icefya. Ku ca kumwenako, tafwaya ukuti abantu balemulumbanya, lelo afwaya ukuti balelumbanya Wishi. (Marko 10:17, 18; Yoh. 5:19) Bushe ifi Yesu aicefya filenga muleumfwa shani? Filenga mwatemwa Umwana wa kwa Lesa no kuba umusambi wakwe. Mulandu nshi Yesu aicefesha? Pantu alitemwa Wishi uwaicefya kabili alamupashanya. (Amalu. 18:35; Heb. 1:3) Bushe ifi tafilenga mwatemwa sana Yesu uupashanya imibele ya kwa Yehova?

8. Mulandu nshi twatemenwa Yesu ukuba Imfumu yesu?

⁸ Twalitemwa ifi Yesu ni Mfumu yesu pantu ni Kateka umusuma. Yehova umwine e wasambilishe Umwana wakwe no kumusonta ukuba Imfumu. (Esa. 50:4, 5) Tontonkanyeni na kabili ifyo Yesu alanga ukuti alitutemwa sana. (Yoh. 13:1) Apo Yesu ni Mfumu yenu, mufwile ukumutemwa. Eta abantu abamutemwa ukuti fibusa fyakwe, kabili alandile ukuti balanga ukuti balimutemwa nga balekonka amafunde yakwe. (Yoh. 14:15; 15:14, 15) Ala lishuko sana ukuba cibusa wa Mwana wa kwa Yehova!

9. Bushe ulubatisho lwa Bena Kristu lwapalana shani no lubatisho lwa kwa Kristu?

⁹ Ifunde limo ilyo Yesu aebele abasambi bakwe, lya kuti balingile ukubatishiwa. (Mat. 28:19, 20) Yesu na o alibatishiwe. Kwaliba fimo ifyalenga ukuti ulubatisho lwa kwa Yesu lupusaneko no lwa basambi bakwe. (Moneni akabokoshi akaleti “ Bushe Ulubatisho lwa kwa Yesu Lwapusana Shani no Lubatisho lwa Basambi Bakwe?.”) Lelo kwalibako mumo umo ulubatisho lwa kwa Yesu lwapalana no lubatisho lwa basambi bakwe. Ilyo abatishiwe, ali-ipeele ukucita ukufwaya kwa kwa Wishi. (Heb. 10:7) Abasambi ba kwa Kristu nabo nga babatishiwa, ninshi balanga pa cintubwingi ukuti bali-ipeela ukucita ukufwaya kwa kwa Yehova Lesa. Nga baipeela, babika sana amano ku kucita ukufwaya kwa kwa Lesa, te ku kucita ifyo abene balefwaya. Nga balecita ifi, ninshi balepashanya Shikulwibo.

10. Mulandu nshi mwatemenwa Yesu, kabili bushe ukutemwa Yesu kufwile ukumulenga ukucita cinshi?

¹⁰ Mwalisumina ukuti Yesu Mwana wa kwa Yehova uwafyalwa eka, no kuti e Mfumu iyo Lesa asonta ukututeka. Mwalishiba ukuti Yesu ali-icefya kabili alapashanya sana Wishi. Mwalisambilila ukuti aleliisha abali ne nsala, alesansamusha abali no bulanda kabili aleundapa na balwele. (Mat. 14:14-21) Mwalimona ifyo atungulula icilonganino cakwe muno nshiku. (Mat. 23:10) Apo ni Mfumu ya Bufumu bwa kwa Lesa, mwalishiba ukuti ku ntanshi akacita ifintu ifingi ifisuma. Kuti mwalanga shani ukuti mwalimutemwa? Mufwile ukulamupashanya. (Yoh. 14:21) Cimo ico mwingacita pa kuti mulemupashanya, kuipeela kuli Yehova no kubatishiwa.

11. Mulandu nshi uukalamba uo mulingile ukubatishiwilwa, kabili mulandu nshi mwalandila ifyo?

¹¹ Mulandu nshi uwacindama uo mulingile ukubatishiwilwa? Yesu alilandile ifunde ilikalamba ilyo atile: “Muletemwa Yehova Lesa wenu no mutima wenu onse, no mweo wenu onse, no kutontonkanya kwenu konse, na maka yenu yonse.” (Marko 12:30) Bushe ifi e fyo mwatemwa Lesa?

12. Cinshi mwatemenwa Yehova? (Moneni ne cikope.)

¹² Kwaliba ifintu ifingi ifilenga twatemwa Yehova. Ku ca kumwenako, mwalisambilila ukuti e “ntulo ya mweo” kabili “ica bupe conse icisuma no bupe bonse ubwapwililika” fifuma kuli ena. (Amalu. 36:9; Yako. 1:17) Shifwe  uwatutemwa e umupeela ifintu fyonse ifisuma ifyo mwakwata.

13. Mulandu nshi icilubula cabela e bupe ubusuma sana ubo Yehova atupeela?

¹³ Icilubula bupe ubusuma sana ubo Yehova atupeela. Mulandu nshi twalandila ifi? Tontonkanyeni pa fyo Yehova na Yesu batemwana. Yesu atile: ‘Tata alintemwa.’ Alandile no kuti “nalitemwa Tata.” (Yoh. 10:17; 14:31) Yehova na Yesu balikele pamo imyaka iingi sana, e calenga ukuti batemwane. (Amapi. 8:22, 23, 30) Nomba tontonkanyeni pa fyo Lesa aumfwile ububi ilyo alekele Umwana wakwe alecula no kufwa. Yehova alitemwa abantu, ukubikako fye na imwe bene, ica kuti ali-itemenwe ukupeela Umwana wakwe uo atemwa nge lambo pa kuti imwe na bantu bambi mukekale umuyayaya. (Yoh. 3:16; Gal. 2:20) Uyu e mulandu uukalamba twatemenwa Lesa.

14. Cinshi icacindama sana ico mufwile ukulafwaisha ukucita?

¹⁴ Mwalitemenwako Yehova pantu mwalisambilila ifingi pali ena. Ukwabula no kutwishika mulafwaya ukupalama sana kuli ena pali ino nshita, e lyo no muyayaya. Kabili kuti mwapalama. Alafwaya mulelenga umutima wakwe ukusekelela. (Amapi. 23:15, 16) Kuti mwalenga alasekelela ku fyo mulanda e lyo ne fyo mucita. Ifyo mucita kuti fyalanga ukuti cine cine mwalitemwa Yehova. (1 Yoh.  5:3) Ici e cintu icacindama sana ico mufwile ukulafwaisha ukucita.

15. Kuti mwalanga shani ukuti mwalitemwa Yehova?

¹⁵ Kuti mwalanga shani ukuti mwalitemwa Yehova? Ica kubalilapo, mufwile ukupepa no kuipeela kuli Lesa wa cine. (Amalu. 40:8) Icalenga bubili, mulingile ukubatishiwa pa kuti mulange ukuti mwali-ipeela. Nge fyo tulandilepo kale, ulubatisho lwalicindama kabili ilaba ni nshita ya nsansa. Nga mwabatishiwa tamwikala ukulingana ne fyo mwe bene mulefwaya, lelo mwikala ukulingana no kufwaya kwa kwa Yehova. (Rom. 14:8; 1 Pet. 4:1, 2) Mufwile ukulatontonkanya ukuti ukupingulapo ukubatishiwa kwalicindama pantu mulafuma ifisuma nga mwabatishiwa. Finshi ifyo fine?

16. Ukulingana na Amalumbo 41:12, bushe Yehova akalambula shani bonse abamubombela?

¹⁶ Yehova ni kapekape. Te mulandu ne fyo mwingamupeela, kuti amupeelelapo ifingi. (Marko 10:29, 30) Kuti alenga mwalaikala bwino, mwaba ne nsansa na muli cino calo cabipa. Te ifi fyeka ifyo engamucitila. Ulubatisho luba fye ni ntendekelo. Kuti mwatwalilila ukubombela Yehova umuyayaya. Ukutemwa uko mwatemwa Shinwe kukalaya kulekulilako fye. Kabili mukekala umuyayaya nga filya fine Yehova abako umuyayaya.—Belengeni Amalumbo 41:12.

17. Cinshi mwingapeela Yehova ico ashakwata?

¹⁷ Nga mwaipeela no kubatishiwa, ninshi mulepeela Shinwe icintu icisuma sana. Alimupeela ifintu ifisuma ifilenga muleba ne nsansa. Na imwe bene kuti mwapeela Kabumba wa muulu ne sonde icintu ico ashakwata, e kutila ukuipeelesha ukumubombela ne cishinka. (Yobo 1:8; 41:11; Amapi. 27:11) Nga mwacita ifi, ninshi mwacita icintu icacindama sana. Ukwabula no kutwishika, ukutemwa uko mwatemwa Yehova e kulingile ukulenga mwabatishiwa.

18. Mepusho nshi mulingile ukutontonkanyapo?

¹⁸ E ico kuti mwa-asuka shani nga balimwipwishe  ukuti, Bushe mukabatishiwa? Ni mwe fye mwingasuka ici cipusho. Lelo mulingile ukuyipusha amuti: ‘Cinshi cilendesha ukubatishiwa?’ (Imil. 8:36) Muleibukisha ifishinka fitatu ifyo twasambilila. Ica kubalilapo, mwalitemwa icine no bulungami. Tontonkanyeni pa cipusho ca kuti, ‘Bushe ndafwaya ukwisamonako ilyo abantu bonse bakalalanda icine no kucita icalungama?’ Icalenga bubili, mwalitemwa Yesu Kristu. Muleyipusha amuti, ‘Bushe ndafwaya Umwana wa kwa Lesa ukuba Imfumu yandi, kabili bushe ndafwaya ukulamupashanya? Icalenga butatu kabili icacindama ca kuti mwalitemwa Yehova. Muletontonkanya pa cipusho ca kuti, ‘Bushe ndafwaya ukulabombela Yehova pa kuti ndelenga alesekelela?’ Nga cakutila kuti mwa-asuka ukuti ee kuli aya mepusho, ninshi cinshi cilemulesha ukubatishiwa?—Imil. 8:36.

19. Mulandu nshi mushilingile ukulashingashinga ukubatishiwa? Langilileni. (Yohane 4:34)

¹⁹ Nga ca kutila mulashingashinga ukubatishiwa, tontonkanyeni pa mashiwi Yesu alandile. (Belengeni Yohane 4:34.) Yesu apashenye ukucita ukufwaya kwa kwa Wishi ku fya kulya. Mulandu nshi? Pantu ifya kulya filalenga twaba no bumi ubusuma. Yesu alishibe ukuti fyonse ifyo Yehova atweba ukucita fyabelako ku busuma bwesu. Yehova tafwaya twacita ifili fyonse ifingatuletela amafya. Bushe Yehova afwaya ukuti mubatishiwe? Ee. (Imil. 2:38) Kanshi nga mwakonka ili funde lya kuti mufwile ukubatishiwa, ifintu fikamuwamina. Nga ca kuti te kuti mushingashinge ukulya ifya kulya ifisuma, mulandu nshi mwingalashingashingila ukubatishiwa?

20. Finshi tukasambilila mu cipande cikonkelepo?

²⁰ Mulandu nshi bamo bashingashingila ukubatishiwa? Abengi baasuka ukuti, “Nshilaipekanya.” Icishinka ca kuti ukuipeela kuli Yehova no kubatishiwa e cintu icacindama sana ico mulingile ukusalapo ukucita. Palapita inshita pa kuti ifi ficitike, kanshi mulingile ukutontonkanyapo sana ilyo mushilasalapo, kabili mulingile ukubombesha pa kuti mufikepo ukubatishiwa. Nomba nga ca kuti mulefwaya ukubatishiwa, finshi mulingile ukucita pali ino nshita pa kuti mufikepo ukubatishiwa? Tuli no kwasuka ici cipusho mu cipande cikonkelepo.