Umulopa wa kwa Yesu uo apeele ilambo e ulenga ukuti Lesa aletubelela uluse pa membu shesu. (Efes. 1:7) Nomba nangu caba ifi, Baibo itila: “Lesa aeleele imembu ishacitilwe kale,” e kutila ilyo Yesu ashilatuula ilambo. (Rom. 3:25) Bushe Yehova kuti aelela shani imembu ishacitilwe ilyo Yesu ashilatuula ilambo kabili pa nshita imo ine atwalilila ukuba no mulinganya?

Yehova alaile ukuti kukaba “umwana” uukapususha bonse abakamucetekela kabili abakacetekela fyonse ifyo atulaya. Ilyo Yehova alaile ifi, cali kwati Yesu natuula ne lambo kale. (Ukute. 3:15; 22:18) Lesa taletwishika nangu panono ukuti Umwana wakwe uwafyalwa eka ali no kupeela icilubula pa nshita ilya ine Wishi alefwailapo ukuti apeele. (Gal. 4:4; Heb. 10:​7-10) Ilyo Yesu ali pano calo, Lesa alimupeele amaka ya kwelela imembu ninshi talatuula no mweo wakwe. Yesu ale-elela imembu sha bantu abali ne citetekelo pantu alishibe ukuti ilambo ali no kutuula lyali no kufimba pa membu shabo.—Mat. 9:​2-6.