1, 2. (a) Bushe Inte sha kwa Yehova bomfwa shani pali Baibolo? (b) Libuuku nshi ilya mu Baibolo ilyo mwatemwa sana?

FWE Nte sha kwa Yehova, twalitemwa Baibolo pantu twalicetekela ifyo itufunda kabili ilatusansamusha no kutupeela isubilo. (Abena Roma 15:4) Baibolo te citabo umwaba amano ya bantu, lelo “cebo ca kwa Lesa.”—1 Abena Tesalonika 2:13.

² Nalimo bonse twalikwata iciputulwa cimo ica Baibolo ico twatemwa sana. Bamo batemwa amabuuku ya Mbila Nsuma pantu yalanga imibele iisuma iyo Yesu alelanga, iilanga ifyo Yehova aba. (Yohane 14:9) Bamo batemwa amabuuku yalanda pa kusesema ayalanga “ifili no kucitika bwangu bwangu,” pamo nga ibuuku lya Ukusokolola. (Ukusokolola 1:1) E lyo bamo balasansamuka nga babelenga ibuuku lya Amalumbo, bambi nabo balitemwa ukubelenga ukupanda amano ukwaba mwi buuku lya Amapinda. Ukwabula no kutwishika, Baibolo citabo ico balembela fye abantu bonse.

3, 4. (a) Bushe tumfwa shani pa mpapulo shesu? (b) Ni mpapulo nshi shimbi ishilanda pali Baibolo isho tupokelela?

³ Apo twalitemwa Baibolo, twalitemwa ne mpapulo shesu ishilanda pali Baibolo. Ifitabo fyonse, amabroshuwa,  magazini, e lyo ne mpapulo shimo isho tupokelela, ni Yehova e utupekanishisha. Ishi mpapulo shilatwafwa ukupalama kuli Yehova no kuba ne citetekelo icakosa.—Tito 2:2.

⁴ Impapulo shesu ishingi, balembela Inte sha kwa Yehova. Lelo impapulo shimo balembela ibumba limo ilya bantu, pamo nga abacaice nelyo abafyashi. Na lyo line ifipande ifingi pamo na mavidio ayo babika pa webusaiti yesu, bapekanishisha abantu abashili Nte sha kwa Yehova. Impapulo shonse ishi shilanga fye ukuti Yehova alafikilisha ubulayo bwakwe ubwa kupekanishisha abantu bonse ifyebo ifya kubatungulula.—Esaya 25:6.

5. Finshi ifyo Yehova engatutashishapo?

⁵ Fwe bengi kuti twatemwa ukukwata inshita iikalamba iya kulabelenga Baibolo ne mpapulo shesu. E ico nalimo inshita tupoosa pa kubelenga impapulo isho tupokelela kuti yapusana. Ukwabula no kutwishika Yehova alatemwa nga twabomfya bwino inshita yesu ku kubelenga no kusambilila Baibolo ne mpapulo shesu. (Abena Efese 5:15, 16) Na lyo line kwaliba ifintu fimo ifyo tulingile ukucenjelako. Fintu nshi ifyo fine?

6. Finshi fingalenga twafilwa ukunonkelamo mu fyo Yehova atupekanishisha?

⁶ Nga tatucenjele, kuti twalamona kwati ifyebo ifyaba mu fiputulwa fimo ifya mu Baibolo nelyo mu mpapulo shimo tafitukuma. Ku ca kumwenako, mucita shani nga ca kuti ifyo iciputulwa cimo ica mu Baibolo cilelandapo tafimukumine, nelyo nga ca kuti te ifwe balembeele ifyebo ifili mu lupapulo? Bushe tubelenga ifyo fyebo lubilo lubilo nelyo tatufwaya fye no kufibelenga? Ifi nga e fyo tucita, ninshi te kuti tunonkelemo mu fyebo ifisuma ifyo batulembela. Kuti twacita shani pa kuti twilacita ifi? Tuleibukisha ukuti ifyebo fyonse ifyo tupokelela fifuma kuli Yehova. Baibolo itila: “Ine, ne Yehova, nine Lesa obe, uukusambilisha ifingakuwamina.” (Esaya 48:17) Muli cino cipande, twalalanda pa fintu fitatu ifingatwafwa ukulanonkelamo muli fyonse ifyo Yehova atupekanishisha.

7. Mulandu nshi uo tulingile ukubela no mutima wa kufwaya ukusambilila ilyo tulebelenga Baibolo?

⁷ Muleba no mutima wa kusambilila. Ca cine ukuti ifyebo ifyaba mu fiputulwa fimo ifya mu Baibolo balembeele umuntu umo nelyo ibumba lya bantu. Lelo Baibolo ilanda fye mu kulungatika ukuti, “Amalembo yonse aya mushilo yafuma kuli Lesa kabili ya mulimo ku kusambilisha.” (2 Timote 3:16) Uyu e mulandu tulingile ukulabela no mutima wa kusambilila ilyo tulebelenga Baibolo. Munyinefwe umo asanga ukutila mu lyashi fye limo ilya mu Baibolo kuti asambililamo ifintu ifingi. Ici calenga aletontonkanya sana pa fyo engasambilila ku fyo alebelenga. Kanshi ilyo tatulatendeka ukubelenga Baibolo, tulingile ukulomba Yehova ukuti atupeele umutima wa kufwaya ukusambilila e lyo atupeele na mano ya kumfwikisha ifyo alefwaya tusambilile ku fyo tulebelenga.—Esra 7:10; belengeni Yakobo 1:5.

8, 9. (a) Mepusho nshi tulingile ukuyipusha ilyo tulebelenga Baibolo? (b) Finshi twingasambilila pali Yehova ifi abikako ififwaikwa pa kuti umo abe eluda?

⁸ Muleyipusha amepusho. Nga mwabelenga ifyebo fimo mu Baibolo, mulebala mwakutumana e lyo mwayipusha amepusho yakonkapo: ‘Bushe ifi nabelenga filensambilisha finshi pali Yehova? Kuti nabomfya  shani ifi fyebo? Kuti nabomfya shani ifi fyebo pa kwafwa bambi?’ Nga tuletontonkanya sana pali aya mepusho, tukalanonkelamo sana ilyo tulebelenga Baibolo. Natulangilile. Baibolo yalilanda pa fifwaikwa pa kuti umuntu abe eluda. (Belengeni 1 Timote 3:2-7.) Nomba fwe bengi tatuli baeluda, kanshi kuti twalatontonkanya ukuti ifi fyebo te kuti fitwafwe nangu panono. Lelo natubomfye amepusho yatatu ayo tulandilepo pa kuti tumone ifyo ififwaikwa pa kuti umo abe eluda fingatwafwa bonse.

⁹ “Bushe ifi nabelenga filensambilisha finshi pali Yehova?” Yehova alibikako ififwaikwa pa kuti umo abe eluda, pantu alafwaya ukuti abaume abo apeela umulimo wa kusakamana icilonganino babe abafikapo. Ici cilanga fye ukuti Yehova alitemwa sana icilonganino cakwe. Baibolo ilanda ukuti acishitile “mu mulopa wa Mwana wakwe.” (Imilimo 20:28) Kanshi Yehova enekela baeluda ukuba ifya kumwenako ifisuma, kabili bakalubulula kuli ena pa fyo basunga aba mu cilonganino. Yehova afwaya ukuti ilyo baletutungulula, tuleumfwa abacingililwa. (Esaya 32:1, 2) Kanshi ilyo tulebelenga pali ifi fifwaikwa pa kuti umo afikepo ukuba eluda, tulasambililako ifyo Yehova atusakamana.

10, 11. (a) Ilyo tulebelenga pa fifwaikwa pa kuti umuntu abe eluda, kuti twabomfya shani ifyo fyebo? (b) Bushe kuti twabomfya shani ifyo fyebo pa kwafwa abantu bambi?

 ¹⁰ “Kuti nabomfya shani ifi fyebo?” Nga ca kuti ni mwe baeluda, mulingile ukulapitulukamo lyonse muli ifi fifwaikwa no kulawamyako umo mushicita bwino. E lyo nga ca kuti ‘mulefwaya ukuba kangalila,’ mulingile ukwesha na maka ukufikapo pali ifi ififwaikwa. (1 Timote 3:1) Lelo fwe Bena Kristu bonse kuti twasambililako kuli ifi ififwaikwa pa kuti umuntu abe eluda. Ku ca kumwenako, Yehova enekela ifwe bonse ukuti tuleba aba mutembo no kulapingula bwino pa fintu. (Abena Filipi 4:5; 1 Petro 4:7) Nga ca kuti baeluda baba “abantu abo umukuni wingapashanya,” kuti twasambililako kuli bena kabili kuti ‘tulepashanye icitetekelo cabo.’—1 Petro 5:3; AbaHebere 13:7.

¹¹ “Kuti nabomfya shani ifi fyebo pa kwafwa bambi?” Kuti twabomfya ififwaikwa pa kuti umo afikepo ukuba eluda pa kusambilisha umusambi e lyo na balefwaya ukwishibilapo na fimbi pali Baibolo ukwishiba ubupusano bwaba pali baeluda na bashimapepo ba mu macalici. Ififwaikwa pa kuti umuntu abe eluda kuti fyatwafwa ukulatontonkanya pa fyo baeluda babombesha mu cilonganino cesu. Nga tulecita ifi tukalacindika sana aba bamunyinefwe. (1 Abena Tesalonika 5:12) Kabili nga tulebacindika, e lyo bakalabomba umulimo wabo ne nsansa.—AbaHebere 13:17.

12, 13. (a) Kuti twabomfya shani impapulo isho twakwata pa kufwailapo ifyebo na fimbi? (b) Langilileni ifyo ifyalecitika ilyo balelemba ibuuku limo fingalenga twasambilila ifyo tushabala atutontonkanyapo.

¹² Mulefwailapo ifyebo na fimbi. Ilyo tulebelenga Baibolo, tulefwaya amasuko kuli aya mepusho yakonkapo:

• Nani walembele ili buuku lya mu Baibolo?

• Ni lilali alembele kabili cifulo nshi alembeleko?

• Finshi fyalecitika pa nshita alembele ili buuku?

Ukwishiba amasuko kuli aya mepusho, kuti kwatwafwa ukusambilila pa fintu ifingi ifyo tushabala atutontonkanyapo.

¹³ Ku ca kumwenako, Baibolo pali Esekiele 14:13, 14 yalanda ukuti: “Icalo nga cabembukila ine pa kucita ubusangu, na ine nkatambalikila ukuboko kwandi pali cena no kucilika intulo ya fya kulya, nkatumamo ne cipowe no kulofya umuntu ne nama. ‘Kabili amuba mu kati ka ciko aba bantu batatu, Noa, Daniele, na Yobo, bena pa mulandu wa bulungami bwabo kuti bapokolola imyeo yabo,’ e fyasosa Shikulu Mulopwe Yehova.” Nga twafwailapo ifyebo na fimbi pali ili lembo, tusanga ukuti Esekiele alembele aya mashiwi nalimo imyaka 612 ilyo Kristu ashilaisa pano isonde. Pali iyi nshita ninshi palipita ne myaka iingi ukutula apo Noa na Yobo bafwilile, lelo Yehova talabile imilimo yabo. Pali iyi inshita ninshi Daniele ena e po aba. Cimoneka kwati ilyo Yehova alandile ukuti Daniele ali umulungami nga Noa na Yobo, ninshi Daniele ali ne myaka nalimo  20. Finshi twasambilila kuli ili lyashi? Twasambililako ukuti Yehova alamona kabili alatasha ababomfi bakwe aba cishinka, ukubikako fye na bacaice.—Amalumbo 148:12-14.

14. Bushe ifyebo balembela abacaice fibafwa shani, kabili bambi kuti banonkelamo shani nga balebelenga ifyo fyebo? (Moneni icikope pa ntendekelo ya cino cipande.)

¹⁴ Impapulo balembela abacaice. Natusambilila ukutila kuti twanonkelamo nga tulebelenga amabuuku yonse aya mu Baibolo. Na kabili kuti twanonkelamo nga tulebelenga impapulo shesu shonse. Natulangilile. Mu myaka ya nomba line, Yehova alipekanishisha abacaice ifyebo ifingi. ^[1] (Moneni ifyebo na fimbi.) Ifi fyebo filabafwa ukukanalakonkelela ifibusa fya pa sukulu e lyo filabafwa na mu mafya bakwata ilyo balekula. Bushe ifwe bonse kuti twanonkelamo shani nga tulebelenga impapulo balembela abacaice? Nga tulebelenga ishi mpapulo, kuti twaishiba amafya abacaice bakwata kabili kuti twaishiba ifyo twingabafwa e lyo ne fyo twingabakoselesha.

15. Mulandu nshi Abena Kristu abakalamba balingile ukulabelengela ifyebo balembela abacaice?

¹⁵ Abena Kristu abakalamba tabafwile ukulamona ukuti te kuti babelenge ifyebo balembela abacaice. Amafya ayengi ayo balandapo muli ishi impapulo, mafya ayo Abena Kristu bonse bakwata. Ku ca kumwenako, bonse fye tufwile ukulaebako abantu ifyo twasuminamo, tufwile ukulama ifyo tumfwa, tatufwile ukulakonkelela ifibusa, tufwile ukulasala bwino ifibusa ne fya kuleseshamo icitendwe. Kanshi nangu ca kuti ishi mpapulo balembela abacaice, ifyebo fya bamo fifuma mu Baibolo kabili Abena Kristu bonse kuti banonkelamo.

16. Finshi fimbi ifyo impapulo shesu shikoselesha abacaice ukulacita?

¹⁶ Impapulo isho balembela abacaice kuti shabafwa no kukosha bucibusa bwabo na Yehova. (Belengeni Lukala Milandu 12:1, 13.) Na bakalamba nabo bene kuti shabafwa. Ku ca kumwanako, muli Loleni! ya mu July 2009 mwali icipande caleti “Abacaice Bepusha Ukuti . . . Kuti Nacita shani pa Kuti Ndeipakisha Ukubelenga Baibolo?” Muli ici cipande mwali ifingatwafwa ifingi kabili mwali na kabokoshi ako mwingaputula no kusunga pa kuti mulekabomfya ilyo muleisambilisha Baibolo. Bushe abakalamba balinonkelemo muli ici cipande? Umwanakashi umo uwaupwa kabili uwakwata abana alandile ukuti ukubelenga Baibolo kwalimwafishe. Lelo alibomfeshe ifyo balandilepo muli ici icipande kabili nomba alitemwa sana ukubelenga Baibolo. Atile alatemwa ukumona ifyo ifyebo fyaba mu mabuuku ya mu Baibolo fyaikatana. Alandile no kuti, “nshabala ntemwapo ukubelenga Baibolo nge ifi.”

17, 18. Bushe kuti twanonkelamo shani nga tulebelenga impapulo isho balembela abantu bonse? Langilileni.

¹⁷ Impapulo balembela abantu bonse.  Ukutula mu 2008 tulakwata Ulupungu lwa kwa Kalinda ulwa kusambililamo. Abo balembela iyi magazini maka maka ni Nte sha kwa Yehova, lelo kwaliba na magazini iyo balembela abantu bonse. Bushe tunonkelamo shani muli aya ama magazini? Natulangilile. Nga mwaita umuntu ukwisa mu kulongana ku Ng’anda ya Bufumu e lyo no kwisa aisa, mulatemwa sana. Ilyo kalanda alelanda ilyashi, mulatontonkanya pa muntu mwitile. Mulatontonkanya ifyo uyu muntu aletontonkanya pa fyebo ifyo aleumfwa ne fyo ifyo fyebo fingaalula ubumi bwakwe. Ne ci cilenga mutemwe nga nshi ifyebo bacilandapo mu lyashi.

¹⁸ Ifi fine e fingacitika nga tulebelenga impapulo balembela abantu bonse. Ku ca kumwenako, mu Ulupungu lwa kwa Kalinda ulwa bantu bonse na mu fipande ifyo babika ba webusaiti yesu iya jw.org balandolola Baibolo ukubomfya amashiwi ayaanguka ukumfwa. Nga tulebelenga ifi fyebo, tulomfwikisha no kutemwa icine ica mu Baibolo ico twaishiba kale. Na kabili kuti twasambilila inshila ishipya isha kulondolwelamo ifyo twasuminamo ku bantu abo tuleshimikila imbila nsuma. Magazini ya Loleni! na yo ilalenga twacetekela sana ukuti kwaliba Kabumba, ilatwafwa no kwishiba ifyo twingalaebako bambi ifyo twasuminamo.—Belengeni 1 Petro 3:15.

19. Bushe kuti twalanga shani ukuti tulatasha Yehova pa fyo atupekanishisha?

¹⁹ Ukwabula no kutwishika, Yehova alatupekanishisha ifyebo ifingi ifingatunonsha. (Mateo 5:3) Natutwalilile ukubelenga no kubomfya ifyebo fyonse ifyo atupeela. Nga tulecita ifi, tukanonkelamo kabili tukalanga Yehova ukuti tulatasha pali fyonse ifyo atupekanishisha.—Esaya 48:17.