Amasesemo yamo ayo balandilepo pali ino charti yalelanda pa fyacitike pa nshita imo ine. Amasesemo yonse aya yalelanga fye apabuuta tuutu ukuti tuleikala mu “nshita ya ku mpela.”—Dan. 12:4.

• Ilembo Ukus. 11:7; 12:13, 17; 13:1-8, 12

  Ubusesemo “iciswango” caliteka abantu pa myaka ukucila 3,000. Mu nshiku sha kulekelesha umutwe walenga 7 uwa ici ciswango baliucenene. Ilyo papitile inshita walipolele kabili ‘bonse aba pe sonde’ balitendeke ukukonka iciswango. Satana abomfya ici ciswango ‘ku kulwa na abashalapo.’

  Ukufikilishiwa Pa numa ya Lyeshi, amabuteko ayapatile Yehova yalitendeke ukuteka abantu. Ilyo papitile imyaka ukucila pali 3,000 ubuteko bumo pa mabuteko yakwatishe amaka, e kutila ubuteko bwa Britain balibupokele amaka ilyo kwali Inkondo ya Calo iya Kubalilapo. Lelo bwalishilekwata amaka na kabili ilyo bwaumene akapi no buteko bwa America. Mu nshita ya ku mpela, Satana alabomfya amabuteko yonse aya pano isonde pa kucusha abantu ba kwa Lesa.

• Ilembo Dan. 11:25-45

  Ubusesemo Mu nshita ya ku mpela imfumu ya ku kapinda ka ku kuso ne ya ku kapinda ka ku kulyo shilalwishanya.

  Ukufikilishiwa Ubuteko bwa Germany bwalelwisha ubuteko bwa Anglo-America. Mu 1945, ubuteko bwa Soviet Union na mabuteko ya fyalo ifyalebombela pamo nabo yaishileba imfumu ya ku kapinda ka ku kuso. Mu 1991, ubuteko bwa Soviet Union bwaliwile, kabili ilyo papitile inshita ubuteko bwa Russia na mabuteko ya fyalo ifibombela pamo nabo yaishileba imfumu ya ku kapinda ka ku kuso.

• Amalembo Esa. 61:1; Mal. 3:1; Luka 4:18

  Ubusesemo Yehova alitumine “inkombe” ku ‘kuwamya inshila’ ilyo Ubufumu bwa bu Mesia tabulapangwa. Iyi inkombe yatendeke ukubila “imbila nsuma ku bafuuka.”

  Ukufikilishiwa Ukutendekela mu 1870 munyinefwe C.  T.  Russell na banankwe balibombeshe pa kusambilila Baibolo pa kuti beshibe icine. Mu 1881, baishileishiba ukuti ababomfi ba kwa Lesa balingile ukulabila imbila nsuma. Balisabankenye ifipande fyalelanda pa kubila imbila nsuma pamo nge caleti: “Bakashimikila 1,000 Balefwaikwa” ne caleti “Abasubwa ku Kushimikila.”

• Ilembo Mat. 13:24-30, 36-43

  Ubusesemo Umuntu atanda ingano mwi bala, lyena umulwani aisatandamo ifyani. Ifyani fyakula kabili fyafimbilikisha ingano. Pa nshita ya kulobolola ifyani bafipaatula ku ngano.

  Ukufikilishiwa Ukutendeka mu 1870, Abena Kristu ba cine na Bena Kristu ba bufi balishibikwe. Mu nshita ya ku mpela Abena Kristu ba cine balilonganikwe mu cilonganino kabili balipaatwilwe ku Bena Kristu ba bufi.

• Ilembo Dan. 2:31-33, 41-43

  Ubusesemo Amakasa ayatobenkanamo icela ne bumba aya cimpashanya icapangwa ne fyela fyalekanalekana.

  Ukufikilishiwa Ibumba, limininako abantu yaweyawe abo ubuteko bwa Anglo-America buteka abalwisha ubu buteko pa kuti bakwate insambu shabo. Pa mulandu ne fyo aba bantu bacita, ubu ubuteko bulafilwa ukubomfya sana amaka nelyo ukuba ubwakosa sana nga filya icela cakosa.

• Ilembo Mat. 13:30; 24:14, 45; 28:19, 20

  Ubusesemo “Ingano” bashilonganika mu “butala” kabili “umusha wa cishinka kabili uwashilimuka” asontwa ukuba kangalila pa “ba mu ng’anda.” “Imbila nsuma . . . iya bufumu” yatendeka ukubilwa “ku bantu bonse aba pe sonde.”

  Ukufikilishiwa Mu 1919 umusha wa cishinka alisontelwe. Ukutula ulya mwaka abasambi ba Baibolo balebila sana imbila nsuma. Muno nshiku Inte sha kwa Yehova balabila imbila nsuma mu fyalo ukucila pali 200, kabili balapeela abantu impapulo ishilanda pali Baibolo mu ndimi ukucila 1,000.

• Amalembo Dan. 12:11; Ukus. 13:11, 14, 15

  Ubusesemo Iciswango ca nsengo shibili cile-eba abantu ukupanga “icimpashanya ca ciswango” no “kupuuta umupu wa mweo mu cimpashanya.”

  Ukufikilishiwa Ubuteko bwa Anglo-America e bwali pa ntanshi mu kupanga akabungwe ka League of Nations. Ifyalo na fimbi fyalingiile muli aka akabungwe. Mu kupita kwa nshita, imfumu ya ku kapinda ka ku kuso nayo yalingiile muli aka kabungwe ukufuma mu 1926 ukufika mu 1933. Abantu abengi balemona kwati aka kabungwe kali no kulenga mwi sonde lyonse mwaba umutende, lelo Ubufumu bwa kwa Lesa e bwingalenga fye pano isonde paba umutende. Ifi fine e fyo abantu batontonkanya na pa kabungwe ka United Nations (UN).

• Ilembo Dan. 8:23, 24

  Ubusesemo Imfumu ya cinso icikali “ikonaula mu cipesha amano.”

  Ukufikilishiwa Ubuteko bwa Anglo-America bwalipaya abantu abengi nga nshi kabili bwalyonaula ifintu ifingi. Ku ca kumwenako, ilyo kwali Inkondo ya Calo iya Cibili ubuteko bwa America bwaliponeshe amabomba ya maka pa calo icali icilwani ca buteko bwa Anglo-America. Takwatalile akuba amabomba ayaonawile ifintu ifingi nga nshi ukucila ifyo aya mabomba yaonawile.

• Amalembo Dan. 11:31; Ukus. 17:3, 7-11

  Ubusesemo “Iciswango icakashika ce” ica nsengo 10 cafuma mu cilindi cabula impela, kabili ici iciswango ni mfumu yalenga 8. Baibolo mwi buuku lya kwa Daniele ita iyi imfumu ukuti “ica bunani kabili ica bonaushi.”

  Ukufikilishiwa Akabungwe ka League of Nations kaliwile ilyo kwali Inkondo ya Calo iya Cibili. Pa numa ya iyi inkondo, akabungwe ka UN ‘kalimikwe.’ Abantu balapeela akabungwe ka UN umucinshi nga filya fine balecita ku kabungwe ka League of Nations. Uyu mucinshi e o balingile uku-upeela ku Bufumu bwa kwa Lesa. Akabungwe ka UN kakasansa ifilonganino fya mapepo.

• Amalembo 1 Tes. 5:3; Ukus. 17:16

  Ubusesemo Inko shabilisha ukuti “umutende no mutelelwe,” kabili “insengo ikumi (10) ne ciswango” fikasansa “cilende” no kumwipaya. Lyena inko shikonaulwa.

  Ukufikilishiwa Ifyalo fikaitunga ukuti nafilenga kwaba umutende no mutelelwe. Lyena ifyalo ifyaba mu kabungwe ka UN fikonaula ifilonganino fya mapepo fyonse ifya bufi. Iyi ikaba ni ntendekelo ya bucushi bukalamba. Ubu ubucushi bukapwa ilyo Yesu akonaula icalo ca kwa Satana conse mu nkondo ya Armagedone.

• Amalembo Esek. 38:11, 14-17; Mat. 24:31

  Ubusesemo Goge aingila mu calo ca bantu ba kwa Lesa. Lyena bamalaika balonganika “abasalwa.”

  Ukufikilishiwa Imfumu ya ku kapinda ka ku kuso ikabombela pamo na mabuteko yambi pa kusansa abantu ba kwa Lesa. Ilyo bakatendeka ukusansa abantu ba kwa Lesa, abasubwa abakaba pe sonde pali ilya nshita bakabalonganikila ku muulu.

• Amalembo Esek. 38:18-23; Dan. 2:34, 35, 44, 45; Ukus. 6:2; 16:14, 16; 17:14; 19:20

  Ubusesemo “Uwaikele” pali “kabalwe uwabuuta” apwishishisha “ukucimfya kwakwe” pa konaula Goge na bashilika bakwe. “Iciswango” ‘capooswa muli bemba wa mulilo’ kabili ilibwe lyashonaula icimpashanya icikalamba.

  Ukufikilishiwa Yesu imfumu ya Bufumu bwa kwa Lesa akapususha abantu ba kwa Lesa. Pa konaula inko ishikomana akapi pa kusansa ababomfi ba kwa Lesa, Yesu akabombela pamo na ba 144,000 abo akalateka nabo e lyo na bamalaika. Iyi ikaba e mpela ya calo ca kwa Satana.