1. Cinshi nalimo camupapwishe ilyo mwaebeleko abantu bambi ifyo mwalesambilila mu Baibolo pa muku wa kubalilapo?

BUSHE muleibukisha ifyo cali ilyo mwaishibe ukuti namusanga icine? Tacamukosele ukumfwikisha fyonse ifyo mwalesambilila mu Baibolo! Mwalemona kwati uuli onse kuti atemwa ukusambilila ifyo mwalesambilila. Mwalishininkishe ukuti ifyaba mu Baibolo kuti fyalenga abantu bonse baba ne nsansa pali ino nshita no kuba ne subilo lya kuti ifintu fikawama ku ntanshi. (Amalu. 119:105) E ico mwalitemenwe ukwebako ifibusa fyenu fyonse na balupwa icine ico mwasambilile. Nomba finshi fyacitike? Mwalipapile ilyo bakeene ukusumina ifyo mwalebeba.

2-3. Finshi abantu abengi bacitile ilyo Yesu ali pano isonde?

² Tatufwile ukupapa nga ca kuti abantu bamo bakaana ukukutika ku mbila nsuma intu tubila. Ilyo Yesu ali pano isonde abantu abengi balimukeene, nangu ca kuti alicitile ifipesha amano ifyalelanga ukuti Lesa alemwafwa. Ku ca kumwenako, Yesu alibuushishe Lasaro. Ici cali cipesha amano ico na balemukaanya bashininkishe ukuti calicitike. Na lyo line, intungulushi sha baYuda tashasumiine ukuti Yesu ali ni Mesia, kabili shalefwaya no kwipaya Yesu na Lasaro!—Yoh. 11:47, 48, 53; 12:9-11.

³ Yesu alishibe ukuti abantu abengi tabali no kusumina ukuti ali ni Mesia. (Yoh. 5:39-44) Aebele abasambi ba kwa Yohane Kabatisha ati: “Alipaalwa umuntu uushisanga ica kuipununako muli ine.” (Mat. 11:2, 3, 6) Cinshi abantu abengi bakaanine Yesu?

4. Finshi twalasambilila muli cino cipande?

 ⁴ Muli cino cipande na mu cikonkelepo, twalalanda pali fimo ifyalengele abantu abengi ukukaana ukutetekela Yesu ilyo ali pano isonde. Twalasambilila na pa co abengi muno nshiku bakaanina ukukutika ku mbila nsuma tubila. Ne cacindama sana, twalasambilila ico tulingile ukucetekela sana Yesu pa kuti twikaleka ukumukonka.

5. Mulandu nshi nalimo abantu bamo bakaanine ukuti Yesu e wali Mesia walaiwe?

⁵ Abantu abengi balikeene Yesu pa mulandu na uko akulile. Balisumine ukuti Yesu ali ni kasambilisha umusuma kabili alecita ne fipesha amano. Lelo balemumona ukuti ali fye mwana wa kwa kabasa umupiina. Kabili akuliile mu Nasarete, umusumba uo nalimo abantu balemona ukuti tawacindeme. Nangu fye ni Natanaele uwaishileba umusambi wa kwa Yesu pa kubala alandile ukuti: “Bushe mu Nasarete kuti mwafuma icisuma?” (Yoh. 1:46) Natanaele nalimo tatemenwe umusumba umo Yesu aleikala. Nelyo nalimo aletontonkanya pa busesemo bwaba pali Mika 5:2, ubwalandile ukuti Mesia ali no kufyalilwa mu Betelehemu, te mu Nasarete.

6. Finshi fyali no kwafwa abantu abaliko ilyo Yesu ali pano isonde ukusumina ukuti e wali Mesia?

⁶ Finshi Amalembo yalandapo? Kasesema Esaya asobele ukuti abalwani ba kwa Yesu tabali no kubika amano “ku ntuntuko” ya kwa Mesia. (Esa. 53:8) Ifyebo ifingi ifyalelanda pali Mesia fyalisobelwe. Kanshi abantu abakeene Yesu abafwailisha ifishinka fyonse, nga balishibe ukuti Yesu afyalilwe mu Betelehemu no kuti afumine mu lupwa lwa Mfumu Davidi. (Luka 2:4-7) Yesu afyalilwe mu musumba uo ubusesemo bwaba pali Mika 5:2 bwalandilepo. Nomba cinshi calubene? Abantu balyangufyenye ukupingula. Tabaishibe ifishinka fyonse. Kabili ici e calengele bakaane Yesu.

7. Cinshi abantu abengi muno nshiku bakaanina ukukutika ku mbila nsuma Inte sha kwa kwa Yehova babila?

⁷ Bushe ifyalecitika ilyo Yesu ali pano isonde filacitika na muno nshiku? Ee filacitika. Abantu ba kwa Yehova abengi te bakankaala. Kanshi abantu abengi babamona ukuti “bantu abashasambilila kabili abantu yaweyawe.” (Imil. 4:13) Abantu bamo balanda ukuti ba Nte tabafwile ukulasambilisha ifya mu Baibolo, pantu tabasambilila mu masukulu ayalumbuka umo basambilisha ifya mapepo. Bambi nabo batila Inte sha kwa Yehova “Mipepele ya ku America,” lelo icishinka ca kuti ba Nte abengi tabekala na ku America. E lyo bambi nabo babeba ukuti ba Nte tabasumina muli Yesu. Pa myaka iingi Inte sha kwa Yehova babeta ukuti “Inengu sha ku America,” kabili babeba no kuti “balapondokela ubuteko.” Abantu abengi tabafwaya ukuba Inte sha kwa Yehova pantu balomfwa aya amalyashi, kabili tabaishiba ne cishinka.

8. Ukulingana na Imilimo 17:11, finshi abantu balingile ukucita nga balefwaya ukwishiba abantu ba kwa Lesa muno nshiku?

⁸ Finshi umuntu engacita pa kuti atwalilile ukuba ne citetekelo? Abantu bafwile ukwesha na maka ukwishiba ifishinka. Ifi fine e fyo na Luka kalemba wa Baibolo acitile. Alyeseshe apo engapesha ukukonka “fyonse bwino bwino ukufuma pa kutendeka.” Alefwaya abakalabelenga ibuuku alembele bakeshibe ukuti ifyo baumfwile pali Yesu fya cishinka. (Luka 1:1-4) AbaYuda abaleikala mu Berea bali kwati ni Luka. Ilyo baumfwile imbila nsuma pali Yesu pa muku wa kubalilapo, balifwailishe mu Malembo ya ciHebere pa kuti bashininkishe ukuti ifyo basambilile fya cine. (Belengeni Imilimo 17:11.) Na muno nshiku  mwine abantu bafwile ukulafwailisha ifishinka. Balingile ukulalinganya ifyo abantu ba kwa Lesa babasambilisha ku fyo Amalembo yalanda. Bafwile no kusambilila pa fyo ababomfi ba kwa Yehova bacita muno nshiku. Nga “bafwailisha ifishinka,” tabakulakonkelela ifyo abantu balanda pa bantu ba kwa Yehova ifishili fya cine.

9. Finshi fyacitike ilyo Yesu akeene ukulanga abantu icishibilo icafuma ku muulu?

⁹ Abantu bamo balefwaya ubushininkisho na bumbi ukucila pa fyo Yesu alesambilisha. Balefwaya ukuti abalange “icishibilo icafuma ku muulu” pa kulanga ukuti ali ni Mesia. (Mat. 16:1) Nalimo ico balefwaila ukuti acite ifi, mulandu wa fyo babelengele pali Daniele 7:13, 14. Lelo tayali ni nshita ya kwa Yehova iya kuti ubu busesemo bufikilishiwe. Ifyo Yesu alesambilisha fyali no kulenga bashininkisha ukuti ali ni Mesia, kanshi tabalekabila ubushininkisho na bumbi. Lelo ilyo akeene ukubalanga icishibilo ico balefwaya, balimukeene.—Mat. 16:4.

10. Bushe Yesu afikilishe shani ifyo Esaya alembele pali Mesia?

¹⁰ Finshi Amalembo yalandapo? Kasesema Esaya alembele pali Mesia ukuti: “Takapunde nangu ukusansula ishiwi lyakwe, kabili takaleke ishiwi lyakwe ukumfwika mu musebo.” (Esa. 42:1, 2) Ilyo Yesu alebila imbila nsuma talecita ifyali no kulenga abantu babika sana amano kuli ena. Takuulile amatempele, talefwala ifya kufwala ifyaibela, nelyo ukufwaya abantu balemwita amashina ayo baleita intungulushi sha mapepo. Na lintu Imfumu Herode yalemulubulwisha, Yesu tacitile icipesha amano pa kuti fye asekeshe Herode. (Luka 23:8-11) Nangu ca kuti Yesu alicitilepo ifipesha amano, ico abikileko sana amano kubila imbila nsuma. Aebele abasambi bakwe ukuti, “E co naishila.”—Marko 1:38.

11. Finshi ifyo abantu batemwa ifishacindama ifyo tushicitako?

¹¹ Bushe ifyalecitika ilyo Yesu ali pano isonde filacitika na muno nshiku? Ee filacitika. Muno  nshiku abantu balitemwa ifikuulwa fya mapepo ifya lulumbi kabili ifyo bayemfya sana, amashina ayo babomfya pa kwita intungulushi sha mapepo, e lyo no kusefya uko abengi bashaishiba uko kwatuntuka nelyo ifyo kupilibula. Lelo abantu abaya kuli aya amacalici tabasambilila ifingi pali Lesa na pa bufwayo bwakwe. Nomba abantu abasangwa ku kulongana kwesu ukwa Bwina Kristu, balasambilila pa fyo Yehova afwaya tulecita. Amayanda yesu aya Bufumu yalamoneka aya busaka, lelo te ya lulumbi kabili tatuyayemfya ukucila mu cipimo. Abatungulula tabafwala ifya kufwala ifyaibela, nelyo ukufwaya ukuti abantu balebeta amashina ayo beta intungulushi sha mapepo. Ifyo tusambilisha ne fyo twasuminamo fifuma mu Baibolo. Na lyo line, abengi muno nshiku balakaana ukukutika ku mbila nsuma intu tubila pantu tatucitako ifingi ifyo bacita mu mipepele yabo. Kabili ifyo tusambilisha filapusana ne fyo bafwaya ukumfwa.

12. Nga fintu Baibolo ilanda pa AbaHebere 11:1, 6, finshi fingalenga twaba ne citetekelo icakosa?

¹² Finshi tufwile ukucita pa kuti tutwalilile ukuba ne citetekelo? Umutumwa Paulo aebele Abena Kristu abaleikala mu Roma ukuti: “Umuntu atetekela ilyo aumfwa amashiwi. Na ya mashiwi yomfwika ilyo umuntu alanda pali Kristu.” (Rom. 10:17) Kanshi pa kuti tukoshe icitetekelo cesu tufwile ukulasambilila Baibolo, te kulasangwa ku kusefya uko aba mapepo basefya ukwapusana ne fyo Baibolo ilanda, nangu kwingamoneka kwati kusuma. Tufwile ukuba ne citetekelo icakosa icashimpwa pa kwishiba bwino Baibolo, pantu “ukwabula icitetekelo te kuti tusekeshe Lesa.” (Belengeni AbaHebere 11:1, 6.) Kanshi tatukabila icishibilo icaibela ukufuma ku muulu ica kulanga ukuti natusanga icine. Nga tulesambilila ifyaba mu Baibolo ifingakosha icitetekelo cesu, tukashininkisha ukuti twalisanga icine kabili kuti twaleka ukutwishika.

13. Cinshi calengele ukuti abengi bakaane Yesu?

¹³ Ilyo Yesu ali pano isonde, abasambi ba kwa Yohane Kabatisha balipapile pantu  abasambi ba kwa Yesu bena tabalefunga nelyo ukuleka ukulya. Yesu alibalondolwelele ukuti tabalingile ukulaleka ukulya ilyo acili uwa mweo. (Mat. 9:14-17) Na lyo line, abaFarise e lyo na bambi abalekaanya Yesu balemupeela imilandu pantu talekonka intambi shabo. Balifulilwe ilyo aposeshe abalwele pe Sabata. (Marko 3:1-6; Yoh. 9:16) Intungulushi sha mapepo shalelanda ukuti shalesunga Isabata, lelo shalesuminisha abantu ukucita amakwebo pe tempele pa bushiku bwe Sabata. Balifulilwe ilyo Yesu abakalipile pa fyo balecita. (Mat. 21:12, 13, 15) Na kabili abo Yesu ashimikile mwi sunagoge lya mu Nasarete balikalipe ilyo abomfeshe icilangililo ca bena Israele pa kubeba ukuti bali ni bakaitemwe kabili tabakwete icitetekelo. (Luka 4:16, 25-30) Pa mulandu wa kuti Yesu alecita ifintu mu nshila bashale-enekela, abengi balimukeene.—Mat. 11:16-19.

14. Cinshi Yesu alandiile ukuti intambi sha bantunse ishapusene ne fyo Amalembo yalanda shalibipa?

¹⁴ Finshi Amalembo yalandapo? Yehova abomfeshe kasesema Esaya ukulanda ukuti: “Aba bantu bampalama no tunwa twabo, kabili bancindika fye pa kanwa, kabili balitalusha imitima yabo kuli ine, kabili bamona ukusambilila amafunde ya bantu ukuti e kuba na katiina kuli ine.” (Esa. 29:13) Yesu alilungike filya alandile ukuti intambi sha bantunse ishapusene ne fyo Amalembo yalanda shalibipile. Bonse abacindike amafunde ayo abantunse bapangile e lyo ne ntambi ukucila ifyo Amalembo yalanda, balikeene Yehova na Mesia uo atumine.

15. Cinshi abantu abengi muno nshiku bashatemenwa Inte sha kwa Yehova?

¹⁵ Bushe ifyalecitika ilyo Yesu ali pano isonde filacitika na muno nshiku? Ee filacitika. Abantu abengi balafulwa pa mulandu wa kuti Inte sha kwa Yehova tabasefyako intambi ishapusana ne fyo Baibolo ilanda. Ku ca kumwenako, tabasefyako inshiku sha kufyalwa na Krisimasi. Bambi nabo balakalipa nga bamona ukuti Inte sha kwa Yehova tabalesefyako ukusefya ukwingi ukwaba mu calo, nelyo nga bakaana ukukonka intambi sha pa cililo ishishumfwana ne fyo Icebo ca kwa Lesa cilanda. Abafulilwa Inte sha kwa Yehova pa mulandu wa kuti tabacitako ifi twalandapo, nalimo bamona ukuti balapepa Lesa ukulingana ne fyo afwaya. Lelo te kuti basekeshe Lesa nga ca kuti basalapo ukukonka intambi ukucila ifyo Baibolo isambilisha.—Marko 7:7-9.

16. Ukulingana na Amalumbo 119:97, 113, 163-165, finshi tulingile ukucita kabili finshi tushilingile ukucita?

¹⁶ Finshi tulingile ukucita pa kuti tutwalilile ukuba ne citetekelo? Tulingile ukutemwa sana amafunde ya kwa Yehova na mashinte ya mafunde. (Belengeni Amalumbo 119:97, 113, 163-165.) Nga twatemwa Yehova tatwakulakonka intambi shonse ishishimusekesha. Tatwakaleke icintu nangu cimo cikalenge twaleka ukutemwa Yehova.

17. Finshi abantu bale-enekela ifyalengele bakaane Yesu?

¹⁷ Ilyo Yesu ali pano isonde abantu bamo balefwaya ukwalula ubuteko. Bale-enekela ukutila Mesia ali no kubalubula ku buteko bwa bena Roma ubwalebatitikisha. Lelo ilyo baeseshe ukubika Yesu pa bufumu, alikeene. (Yoh. 6:14, 15) Abantu bamo, ukubikako fye na bashimapepo, balisakamikwe ukuti Yesu ali no kwalula ubuteko. Kabili balemona ukuti ici cali no kulenga abena Roma ukufulwa no kupoka amaka ayo bapeele bashimapepo. Ici calengele abaYuda abengi bakaane Yesu.

18. Masesemo nshi ayaba mu Baibolo ayalanda pali Mesia ayo abengi bakeene?

¹⁸ Finshi Amalembo yalandapo? Nangu ca kuti amasesemo ayengi yasobele ukuti Mesia  ali no kuba Umushilika uwali no kucimfya abalwani bakwe, amasesemo yambi yalanga ukuti ali no kubalilapo ukufwila pa membu shesu. (Esa. 53:9, 12) Nomba cinshi abaYuda baletontonkanishisha ifya bufi pali Mesia? Ilyo Yesu ali pano isonde, abengi tabalesumina amasesemo ayashalelanda pa kupwisha amafya ayo balekwata pali ilya nshita.—Yoh. 6:26, 27.

19. Finshi fimo ifyo abantu batwenekela ukucita ifyo tushicitako ifilenga abengi balekaana imbila nsuma intu tubila?

¹⁹ Bushe ifyalecitika ilyo Yesu ali pano isonde filacitika na muno nshiku? Ee filacitika. Abengi muno nshiku balatufulilwa pa mulandu wa kuti tatuitumpa mu fikansa fya calo. Benekela ukuti na ifwe tulesalako intungulushi. Nomba twalishiba ukuti nga twasala umuntu ukuti e o aletuteka ninshi twakaana Yehova. (1 Sam. 8:4-7) Abantu nalimo kuti balamona ukutila tulingile ukukuula amasukulu ne fipatala, e lyo no kubomba imilimo imbi iya kwafwa abantu. Balafulwa pantu twabika sana amano ku mulimo wa kubila imbila nsuma, te ku kwesha ukupwisha amafya abantunse bakwata.

20. Ukulingana na mashiwi Yesu alandile ayaba pali Mateo 7:21-23, cinshi tulingile ukubikako sana amano?

²⁰ Finshi twingacita pa kuti tutwalilile ukuba ne citetekelo? (Belengeni Mateo 7:21-23.) Tufwile ukubika sana amano ku kubomba umulimo uo Yesu atwebele ukubomba. (Mat. 28:19, 20) Tatufwile ukubika sana amano ku kwesha ukupwisha amafya abantunse bakwata. Twalitemwa abantu kabili twalibika amano na ku mafya bakwata. Lelo twalishiba ukuti inshila iisuma iyo twingafwilamo abantu, kubasambilisha pa Bufumu ba kwa Lesa e lyo no kubafwa ukuba ifibusa fya kwa Yehova.

21. Finshi tufwile ukulafwaisha ukucita?

²¹ Muli cino cipande, twasambilila pa fintu 4 ifyalengele abantu bakaane Yesu ilyo ali pano isonde, kabili ifingalenga bamo muno nshiku ukukaana ukukutika ku basambi ba kwa Yesu. Nomba bushe ifi twalandapo e fyo tufwile fye ukusengauka? Awe. Mu cipande cikonkelepo tukalanda na pali fimbi 4 ifyo tushifwile ukucita. Natutwalilile ukukanalacita nangu cimo icingalenga twaleka ukukonka Yesu, kabili natulekosha icitetekelo cesu!