1-2. Mafya nshi ba Nte abengi bakwata?

UMUTUMWA Paulo alikoseleshe Timote, ukubikako fye na Bena Kristu bonse, ukulabombesha mu mulimo wabo onse. (2 Tim. 4:5) Na ifwe tulakonka ifyo Paulo alandile, kabili tulabomba umulimo wa kwa Lesa apapela amaka yesu. Na lyo line, inshita shimo tulakwata amafya. Bamunyinefwe na bankashi abengi balomfwa umwenso wa kuya mu kubila imbila nsuma. (2 Tim. 4:2) Ku ca kumwenako, tontonkanyeni pali bamunyinefwe na bankashi abekala mu fyalo umo bakaanya imilimo yesu imo nelyo fye umo babinda ukupepa kwesu. Balatwalilila ukubila imbila nsuma nangu ca kuti balishiba ukutila kuti babekata no kubakaka!

² Abantu ba kwa Yehova balakwata amafya ayalekanalekana ayengalenga bafuupuka. Ku ca kumwenako, bamo balabomba ama-awala ayengi pa kuti bafwaile indupwa shabo ifyo shikabila. Balafwaya ukuti balebombesha mu mulimo wa kubila imbila nsuma, lelo balanaka sana pa mpela ya mulungu. Bambi nabo balafilwa ukubombesha mu mulimo wa kwa Yehova pa mulandu wa kuti balalwalilila nelyo balikota, ica kuti nalimo te kuti bafume na pa ng’anda. E lyo bambi nabo bomfwa ukuti Yehova abamona kwati tabacindama. Nkashi Mary * uwikala ku Middle East atile: “Nga nimfuupuka ndesha na maka pa kuti ntendeke ukutontonkanya pa fisuma. Nomba ukucita ifi kulaanasha sana kabili kulansendela inshita. Pa numa ndomfwa ububi pantu ici cilalenga nafilwa ukuya mu kubila imbila nsuma.”

3. Finshi twalasambilila muli cino cipande?

³ Nangu twingaba na mafya ya musango shani, Yehova kuti atupeela amaka ayo tulekabila pa kuti tutwalilile ukumubombela apapela amaka yesu. Ilyo tatulasambilila pa fyo Yehova engatwafwa,  lekeni tumone ifyo akoseshe Paulo na Timote pa kuti batwalilile ukubombesha, nangu ca kuti baleba na mafya.

4. Mafya nshi Paulo akwete?

⁴ Paulo alikwete amafya ayengi. E ico alekabila ukumukosha sana, maka maka ilyo bamuumine, ilyo bamupoolele amabwe, na lintu bamukakile mu cifungo. (2 Kor. 11:23-25) Paulo alandile ukuti inshita shimo ale-esha na maka ukuleka ukutontonkanya pa fyalemufuupula. (Rom. 7:18, 19, 24) Kabili alilwele ubulwele ubwali kwati “muunga mu mubili,” uo alefwaya sana ukuti Lesa aufumye.—2 Kor. 12:7, 8.

5. Milimo nshi Paulo abombele nangu ca kuti alekwata amafya?

⁵ Yehova alikoseshe Paulo pa kuti atwalilile ukubomba umulimo wa kubila imbila nsuma, nangu ca kuti alekwata amafya. Tontonkanyeni pa fyo Paulo abombele. Ku ca kumwenako, ilyo bamukakiile pa ng’anda mu Roma ali uwacincila ukubila imbila nsuma ku bengi. Alibilile ku ntungulushi sha baYuda, nalimo na ku balashi ba mu buteko. (Imil. 28:17; Fil. 4:21, 22) Na kabili, alibilile ku balinshi abengi aba kwa Kateka, e lyo na kuli bonse abaleya mu kumutandalila. (Imil. 28:30, 31; Fil. 1:13) Pali ilya ine nshita, Paulo alilembele amakalata ayakoseleshe Abena Kristu ba cine abaliko pali ilya nshita, kabili ayatukoselesha na muno nshiku. Ifyo Paulo acitile fyalikoseshe abali mu cilonganino ca mu Roma, kabili ici calengele aba bwananyina “ukukosa ukulanda icebo ca kwa Lesa ukwabula umwenso.” (Fil. 1:14) Nangu ca kuti Paulo talekumanisha ukubomba ukulingana ne fyo alefwaya, ale-esha ukubomba ifyo engakumanisha. Kabili ifi alecita ‘fyalilundulwile imbila nsuma.’—Fil. 1:12.

6. Ukulingana na 2 Abena Korinti 12:9, 10, cinshi calengele Paulo alebombesha mu mulimo wa kubila imbila nsuma?

⁶ Paulo alishibe ukuti ni Lesa e wamwafwile ukubomba imilimo yonse iyo abombele mu mulimo wa kwa Yehova, te ku maka yakwe abombeele. Alandile ukuti amaka ya kwa Lesa yalemonekela mu kunaka kwakwe. (Belengeni 2 Abena Korinti 12:9, 10.) Yehova alibomfeshe umupashi wakwe uwa mushilo pa kupeela Paulo amaka ya kubomba umulimo wa kubila imbila nsuma, nangu ca kuti balemucusha, balemukaka, kabili alekwata amafya na yambi.

7. Mafya nshi Timote akwete ayali no kulenga camukosela ukulabombesha mu mulimo wa kubila imbila nsuma?

⁷ Timote uwacaice uwalebombela pamo na  Paulo na o alingile ukushintilila pa maka ya kwa Lesa pa kuti atwalilile ukubomba umulimo wa kubila imbila nsuma. Timote aleya na Paulo pa nyendo sha bumishonari ishitali. Na kabili, Paulo alimutumine pa nyendo na shimbi ishitali isha kuya mu kukoselesha ifilonganino. (1 Kor. 4:17) Timote nalimo alemona kwati tafikilepo ukubomba uyu umulimo. Nalimo e co Paulo amwebele ukuti: “Wileka umuntu nangu umo asuule ubulumendo bobe.” (1 Tim. 4:12) Pali iyi inshita Timote na o alikwete umuunga mu mubili, e kutila ‘alelwalilila.’ (1 Tim. 5:23) Lelo alishibe ukuti umupashi wa mushilo uwa maka uwa kwa Yehova wali no kumupeela amaka ayo alekabila pa kuti alebila imbila nsuma no kubombela aba bwananyina.—2 Tim. 1:7.

8. Bushe Yehova akosha shani ababomfi bakwe muno nshiku?

⁸ Muno nshiku Yehova alapeela ababomfi bakwe “amaka yacila aya bantunse” pa kuti batwalilile ukumubombela ne cishinka. (2 Kor. 4:7) Lekeni tulande pa fintu 4 ifyo Yehova abomfya pa kutukosha no kutwafwa ukutwalilila ukuba aba cishinka kuli ena, e kutila ipepo, Baibolo, ukuba pamo na Bena Kristu banensu, no mulimo wa kubila imbila nsuma.

9. Bushe ipepo kuti lyatwafwa shani?

⁹ Ipepo kuti lyatukosha. Nga fintu Baibolo ilanda pa Abena Efese 6:18, Paulo atukoseleshe ukulapepa kuli Lesa “lyonse.” Nga tulepepa lyonse, Lesa akala-asuka amapepo yesu kabili akalatukosha. Ba Jonnie abekala ku Bolivia balimwene ifyo Yehova abafwile ilyo bakwete amafya ayengi. Abafyashi ba ba Jonnie bonse babili e lyo na bena mwabo balilwele sana pa nshita imo ine. Kanshi taca-angwike kuli ba Jonnie ukulacita fyonse ifyo balingile ukucita pa kuti basakamane aba batatu. Banyina ba ba Jonnie balifwile, kabili calisendele inshita iitali pa kuti abafyashi babo abaume na bena mwabo bapole. Ba Jonnie batile: “Lyonse icalengafwa nga nasakamikwa sana, kupepa kuli Yehova no kumulondolwela fyonse ifyo ndeumfwa.” Yehova alipeele ba Jonnie amaka balekabila pa kuti bashipikishe. Ba Ronald ba eluda aba ku Bolivia nabo baishileishiba ukuti banyina balilwala kansa. Kabili pa numa fye ya mweshi umo balifwile. Cinshi ca-afwile ba Ronald ukushipikisha? Batile: “Nga ndepepa kuli Yehova ndamweba fyonse ifyo ndeumfwa. Nalishiba ukuti aleshiba bwino ifyo ndeumfwa ukucila ifyo umuntu uuli onse engeshiba, kabili ukucila ne fyo ne mwine ningeshiba.” Inshita shimo nalimo kuti twalamona kwati te kuti tushipikishe amafya, nelyo fye ukwishiba ifyo twingapepelapo. Lelo Yehova alitweba ukuti tulepepa kuli ena, nangu tatwishibe bwino ifya kumulondolwela ifyo tuleumfwa.—Rom. 8:26, 27.

10. Nga fintu Baibolo ilanda pa AbaHebere 4:12, cinshi cacindamina ukulabelenga Baibolo lyonse no kulatontonkanya sana pa fyo tulebelenga?

¹⁰ Baibolo kuti yatukosha. Ukubelenga Amalembo kwalekosha Paulo kabili kwalemusansamusha. Kanshi na ifwe tufwile ukulabelenga Baibolo. (Rom. 15:4) Ilyo tulebelenga Icebo ca kwa Lesa no kutontonkanyapo sana, Yehova kuti abomfya umupashi wakwe uwa mushilo ukutwafwa ukwishiba ifyo twingabomfya Amalembo nga tuli no bwafya. (Belengeni AbaHebere 4:12.) Ba Ronald abo tulandilepo batile: “Nalitemwa sana ifi mbelenga Baibolo cila bushiku. Ndatontonkanya sana pa mibele ya kwa Yehova ne fyo asakamana ababomfi bakwe. Ukucita ifi kulalenga ndeba na maka.”

11. Bushe Baibolo ya-afwile shani nkashi uwafwililwe umwina mwakwe?

¹¹ Ukutontonkanya sana pa Cebo ca kwa Lesa kulalenga twilabika sana amano ku mafya tukwete. Moneni ifyo Baibolo ya-afwile mukamfwilwa  umo uwaleloosha. Eluda amwebele ukuti nga abelenga ibuuku lya kwa Yobo kuti asambililako amasambililo ayengi. Ilyo atendeke fye ukubelenga, alyangufyenye ukulengulula Yobo ukuti ifyo aletontonkanya tafyali bwino. Ilyo ale-elenganya mu mutima ale-eba Yobo ukuti: “Iwe Yobo! Wilatontonkanya fye pa mafya ukwete!” Lyena aishileiluka ukuti ifyo aletontonkanya fyalipalene sana ne fyo Yobo aletontonkanya. Ici calimwafwile ukwaluka mu fyo aletontonkanya kabili alitwalilile ukushipikisha ubwafya akwete ubwa kufwilwa umwina mwakwe.

12. Bushe Yehova atukosha shani ukubomfya bamunyinefwe na bankashi?

¹² Ukuba pamo na Bena Kristu banensu kuti kwatukosha. Inshila na imbi iyo Yehova akoseshamo Abena Kristu, kubomfya Abena Kristu banabo. Paulo alembele ukuti alefuluka ukumonana na ba bwananyina pa kuti ‘akabakoseleshe e lyo nabo bakamukoseleshe.’ (Rom. 1:11, 12) Ba Mary abo tulandilepo kale balitemenwe sana ukuba pamo na ba bwananyina. Batile: “Yehova alenkoselesha ukubomfya bamunyinane na bankashi abashaleishiba na mafya nalekwata. Ifyo balelanda na makardi balentumina fyalenkoselesha. Ifi fine e fyo nalekabila. Ifi balecita fyalilenga cilenyangukila ukulanda na bankashi abakwetepo amafya ayapalana nayo nakwata, kabili ndasambililako ku fyo bashipikishe. Na kabili baeluda nabo balalenga ndeumfwa ukuti aba bwananyina mu cilonganino balintemwa.”

13. Kuti twakoseleshanya shani na ba bwananyina ilyo tuli pa kulongana?

¹³ Inshita imo iisuma iyo twingakoseleshanya na ba bwananyina ni pa kulongana. Nga muli pa kulongana mule-esha ukweba bamunyinenwe ukuti mwalibatemwa, kabili mulebatasha pa fyo bacita pa kuti mulebakoselesha. Ku ca kumwenako, pa kulongana kumo ba Peter ba eluda baebele nkashi umo uo umwina mwakwe te Nte ya kwa Yehova ukuti: “Ala mulatukoselesha sana nga twamona mwaisa mu kulongana. Lyonse mulesa na bana benu 6, kabili balapekanya pa kuti baleasukapo pa kulongana.” Uyu nkashi alilukwishe ifilamba ku nsansa kabili atile: “Tamwishibe fye ifyo mwankoselesha. Amashiwi mwanjeba eyo nacilakabila ukumfwa buno bushiku.”

14. Bushe ukubila imbila nsuma kutwafwa shani?

¹⁴ Ukubila imbila nsuma kuti kwatukosha. Nga tule-ebako abantu icine tulomfwa bwino, nampo nga basumina ukukutika nelyo bakaana. (Amapi. 11:25) Nkashi Stacy alimwene ukuti ukubila imbila nsuma kuti kwatukosha. Ali sana no bulanda ilyo lupwa lwakwe atamfiwe kabili aleyipusha ukuti, ‘Bushe kwali na fimbi ifyo nalingile ukucita pa kuti imwafwe?’ Nkashi Stacy calemukosela ukuleka ukutontonkanya pa fyacitike. Nomba cinshi camwafwile ukushipikisha? Ukubila imbila nsuma e kwamwafwile! Nga aya mu kubila imbila nsuma, aletontonkanya sana pa kwafwa abantu abali mu cifulo alebombela. Atile: “Pali ilya ine nshita, Yehova alimpeele umusambi wa Baibolo uwalelunduluka bwangu sana. Ici calinkoseleshe nga nshi. Umulimo wa kubila imbila nsuma ulankoselesha sana.”

15. Finshi mulesambililako ku fyo ba Mary balandile?

¹⁵ Nalimo bamo kuti balamona kwati te kuti balebombesha mu mulimo wa kubila imbila nsuma pa mulandu ne fyo ifintu fyaba mu bumi bwabo. Ifi nga e fyo mumfwa, muleibukisha ukuti Yehova alatemwa nga mulebomba apapela amaka yenu. Tontonkanyeni pali ba Mary abo tulandilepo kale. Ilyo bakuukiile ku cifulo uko balanda ululimi ulo bashaishibe, balemona kwati te kuti babombe sana umulimo wa kubila imbila nsuma. Batile: “Inshita shimo nalekumanisha fye ukulanda utumashiwi utunono, ukubelenga icikomo ca mu Baibolo  nelyo ukupeela fye umuntu ka trakiti.” Nga bailinganya ku baishibe ukulanda bwino lulya ululimi, balemona ukutila te kuti babombeshe umulimo wa kubila imbila nsuma. Lelo ba Mary balyalwile ifyo baletontonkanya. Baishileiluka ukuti Yehova kuti abafwa ukulabombesha mu mulimo wa kubila imbila nsuma, nangu ca kuti tabaishibisha ululimi. Batile: “Ifyo Baibolo ilanda fyalyanguka ukumfwa kabili kuti fyalenga abantu ba-aluka.”

16. Finshi abashifuma pa mayanda pa mulandu wa kulwala bengacita pa kuti balebila imbila nsuma?

¹⁶ Yehova alamona kabili alatasha pa fyo tufwaisha ukulabombesha mu mulimo wa kubila imbila nsuma, nangu ca kutila te kuti tufume pa ng’anda pa mulandu wa kulwala. Kanshi kuti atwafwa ukushimikila ku batusakamana, kuli badokota nelyo banasi. Nga tulelinganya ifyo twalebomba kale ku fyo tulebomba pali ino nshita, kuti twafuupuka. Lelo nga tuletontonkanya pa fyo Yehova atwafwa pali ino nshita, tukaba na maka ya kutwalilila ukushipikisha amafya kabili tukalasekelela.

17. Ukulingana na Lukala Milandu 11:6, cinshi tufwile ukutwalilila ukulabila imbila nsuma nangu ca kuti abantu tabalekutika?

¹⁷ Pa mbuto sha cine isho tubyala, tatwaishiba ishikamena no kutendeka ukukula. (Belengeni Lukala Milandu 11:6.) Ku ca kumwenako, nkashi Barbara uuli ne myaka ukucila pali 80, ilingi line abila imbila nsuma ukubomfya foni nelyo amakalata. Muli kalata imo iyo alembele alibikilemo Ulupungu lwa kwa Kalinda ulwa March 1, 2014, umwali icipande icaleti, “Ifyo Lesa Atucitila.” Ukwabula ukwishiba atumine ilya kalata ku baupana bamo abatamfiwe. Aba abaupana balibelengele ilya magazini imiku iingi. Umulume aumfwile kwati Yehova alelanda nankwe mu kulungatika. Nangu ca kuti palipitile imyaka ukucila pali 27 ukufuma apo batamfiwilwe, aba abaupana balitendeke ukulongana, kabili balishileba Inte sha kwa Yehova na kabili. Ifi ifyacitike fyalikoseleshe sana nkashi Barbara!

18. Finshi tufwile ukucita pa kuti Lesa aletukosha?

¹⁸ Yehova alitupeela ifintu ifingi ifilenga tuleba na maka. Alitupeela ifintu pamo nga ipepo, Baibolo, bamunyinefwe na bankashi, e lyo no mulimo wa kubila imbila nsuma. Nga tulebomfya ifyo Yehova atupeela ninshi tulelanga ukuti twalicetekela ukutila kuti atwafwa kabili alafwaya ukutwafwa. Natulecetekela Shifwe wa ku muulu, uwatemwa ukulanga “amaka yakwe aya kwafwa ababa ne mitima ya cishinka kuli ena.”—2 Imila. 16:9.