1. Cinshi Yehova afwaya bakapepa bakwe ukulacita? (Moneni ne cikope.)

 NANI engatusansamusha nelyo ukutupandako amano ilyo tuli na mafya? Ukwabula no kutwishika natwishiba ne casuko. Kuti twapepa kuli Yehova. Na kuba, Yehova afwaya ukuti tulepepa kuli ena “ukwabula ukuleka.” (1 Tes. 5:17) Kuti twapepa kuli ena inshita iili yonse no kumulomba ukuti atupandeko amano. (Amapi. 3:5, 6) Apo Yehova ni kapekape, kuti twapepa kuli ena imiku iili yonse iyo twingatemwa.

2. Finshi twalasambilila muli cino cipande?

² Tulatasha sana ifi Yehova atweba ukuti tulepepa kuli ena. Nomba apo twalikwata ifya kucita ifingi, kuti ciletwafya ukusangako inshita ya kupepa. Na kabili kuti twafwaya ukuti tulepepa amapepo ayasuma. Icawamako ca kuti, twalikwata Amalembo ayengi ayengatutungulula. Muli cino cipande, twalamona ifyo twingasambililako kuli Yesu pa kuti tulesangako inshita ya kupepa. Twalasambilila na pa fintu 5 ifingatwafwa ukulapepa amapepo ayasuma.

3. Bushe Yesu alemona shani amapepo?

³ Yesu alishibe ukuti amapepo tupepa yalicindama sana kuli Yehova. Ilyo talaisa pano calo, alemona uko Wishi aleasuka amapepo ya baume na banakashi aba cishinka. Ku ca kumwenako, Yesu alimwene uko Wishi a-aswike  ipepo lya kwa Hana, Davidi, na Elisha e lyo na babomfi bakwe bambi aba cishinka. (1 Sam. 1:10, 11, 20; 1 Isha. 19:4-6; Amalu. 32:5) Ici e calengele ukuti Yesu asambilishe abasambi bakwe ukulapepa no mukosha kabili ukwabula ukuleka.—Mat. 7:7-11.

4. Finshi twingasambilila ku mapepo Yesu alepepa?

⁴ Filya Yesu alepepa kuli Yehova fyalelenga abasambi bakwe ukulamupashanya. Ilyo alebomba umulimo wakwe, lyonse alepepa imiku iingi. Apo alikwete ifya kucita ifingi kabili aleba pamo na bantu abengi, alesangako inshita ya kupepa. (Marko 6:31, 45, 46) Alebuuka lucelocelo pa kuti akwateko inshita ya kupepa. (Marko 1:35) Bushiku bumo alipepele ubushiku bonse ilyo talapingulapo ukucita fimo ifyacindama. (Luka 6:12, 13) Na kabili ubushiku ilyo Yesu ali mupepi no kufwa, alipepele imiku iingi. Alepepela pa fyo ali no kupwilikisha umulimo wa-afya uo aishile pano isonde.—Mat. 26:39, 42, 44.

5. Kuti twapashanya shani Yesu ilyo tulepepa?

⁵ Ifyo Yesu alecita filatusambilisha ukuti te mulandu ne fya kucita ubwingi tukwete, tulingile ukusangako inshita ya kupepa. Nga filya Yesu alecita na ifwe tulingile ukusangako inshita ya kupepa. Nalimo kuti twalapepa ulucelo sana nelyo ubushiku ilyo tatulaya mu kulaala. Nga twacita ifi, ninshi tulelanga ukuti tulatasha sana Yehova pa kutusuminisha ukulalanda nankwe. Ba nkashi Lynne balebukisha ifyo baumfwile bwino ilyo basambilile ukutila kuti bapepa kuli Yehova. Batile: “Ilyo nasambilile ukutila, kuti nalanda na Yehova inshita iili yonse, natendeke ukulamona Yehova ukuti ni cibusa wandi, kabili nalefwaya ukulapepa amapepo ayasuma.” Ukwabula no kutwishika fwe bengi nalimo e fyo tumfwa. Kanshi natulande pa fintu 5 ifyacindama ifyo twingalandapo ilyo tulepepa kuli Yehova.

6. Ukulingana na mashiwi ayaba pa Ukusokolola 4:10, 11, finshi Yehova alinga ukupokelela?

⁶ Mulelumbanya Yehova. Mu cimonwa ico umutumwa Yohane amwene, amwene abakalamba 24 balepepa Yehova mu muulu. Balelumbanya Lesa kabili baleti, alilinga ukupokelela “ubukata no mucinshi  na maka.” (Belengeni Ukusokolola 4:10, 11.) Kwaliba ifintu ifingi ifyo bamalaika ba cishinka balumbanishishapo no kucindikilapo Yehova. Baba na Yehova ku muulu kabili balimwishiba bwino, balamona imibele yakwe iisuma e lyo ne fyo acita ifintu. Nga bamona ifyo Yehova acita ifintu balamulumbanya.—Yobo 38:4-7.

7. Finshi twingalumbanishishapo Yehova?

⁷ Na ifwe ilyo tulepepa tulafwaya ukulalumbanya Yehova, ukumweba ifyo twatemwa, e lyo ne fyo tumutashishapo. Ilyo mulebelenga Baibolo, mulemona imibele iyo Yehova akwata iyo mwatemwa sana. (Yobo 37:23; Rom. 11:33) Lyena mule-eba Yehova ifyo mumfwa pali iyo mibele akwata. Na kabili kuti twalumbanya Yehova pa mulandu wa kuti alatwafwa kabili alafwa na ba bwananyina. Cila nshita alatwafwa no kutucingilila.—1 Sam. 1:27; 2:1, 2.

8. Fintu nshi fimo ifyo twingatashishapo Yehova? (1 Abena Tesalonika 5:18)

⁸ Muletasha Yehova. Kwaliba ifintu ifingi ifyo twingatashishapo Yehova. (Belengeni 1 Abena Tesalonika 5:18.) Kuti twatasha Yehova pa fisuma ifyo twakwata. Na kuba, ifisuma fyonse fifuma kuli ena. (Yako. 1:17) Ku ca kumwenako, kuti twamutasha pa fyo isonde e lyo ne fyo abumba fimoneka bwino. Na kabili kuti twamutasha pa bumi atupeela, ulupwa lwesu, ifibusa, e lyo ne subilo twakwata. Kabili kuti twatasha Yehova pa kutusuminisha ukuba ifibusa fyakwe.

9. Mulandu nshi tulingile ukulatashisha Yehova?

⁹ Tufwile ukubikako sana amano pa kuti tutontonkanye pa fyo twingatashishapo Yehova. Twikala mu calo umo abantu bashitasha. Ilingi abantu babika fye amano ku fyo balefwaya, ukucila ukubika amano ku fyo bengalacita pa kuti baletasha pa fyo bakwata. Ifi na ifwe nge fyo twaba, kuti twaikalila fye ukulalomba mu mapepo yesu. Pa kuti tatwikalile fye ukulalomba mu mapepo yesu, tufwile ukutwalilila ukulatasha pali fyonse ifyo Yehova atucitila.—Luka 6:45.

10. Bushe nkashi umo ashipikishe shani amafya pa mulandu wa kuti aletasha? (Moneni ne cikope.)

¹⁰ Nga tuletasha tukalashipikisha amafya. Moneni ifyacitike kuli bankashi Kyung-sook, abo balemba mu Ulupungu lwa kwa Kalinda ulwa January 15, 2015. Balilwele kansa ya kuli bapwapwa. Batile: “Ubu bulwele bwalencusha ica kuti naleumfwa kwati nalilufishe fyonse ifyo nakwata kabili naleumfwa umwenso nga nshi.” Cinshi calengele ukuti bashipikishe? Batile lyonse ubushiku ilyo tabalaya mu kulaala, baleya pa muputule wa pa muulu mu kupepa. Baletasha Yehova pa fintu 5 ifyo abacitile bulya bushiku. Ici calelenga baleshipikisha  no kutemenwako Yehova. Baishilemona ukuti Yehova alafwa ababomfi bakwe aba cishinka nga bali na mafya. Kabili baishileishiba ukuti nangu ca kuti tulakwata amafya, Yehova alatupaala nga nshi. Nga filya fine ba Kyung-sook balecita, na ifwe twalikwata ifingi ifyo twingatashishapo Yehova Lesa. Nga tuletasha kuli Yehova tukalashipikisha, kabili tukalatwalilila ukuba abatekanya ilyo tuli na mafya.

11. Mulandu nshi abasambi ba kwa Yesu balekabila ukubela abashipa ilyo Yesu abwelelemo ku muulu?

¹¹ Mulelomba Yehova ukuti alemulenga ukuba abashipa ilyo mulebila imbila nsuma. Ilyo Yesu talabwelelamo ku muulu, alibukisheko abasambi bakwe ukuti balingile ukulabila imbila nsuma mu “Yerusalemu na mu Yudea monse na mu Samaria, na ku mpela ya pano isonde.” (Imil. 1:8; Luka 24:46-48) Ilyo papitile inshita, intungulushi sha baYuda shaikete umutumwa Petro na Yohane no kubaleta mu cilye ca Sanhedrini, kabili shabebele ati baleke ukubila imbila nsuma. (Imil. 4:18, 21) Bushe Petro na Yohane bacitile shani?

12. Ukulingana na mashiwi ayaba pa Imilimo 4:29, 31, finshi abasambi bacitile?

¹² Pa kwasuka intungulushi sha baYuda, Petro na Yohane batile: “Pinguleni mwe bene, nga nacilungama mu menso ya kwa Lesa ukumfwa kuli imwe atemwa ukumfwa kuli Lesa. Lelo ifwe, te kuti tuleke ukulanda ifyo twamwene ne fyo twaumfwile.” (Imil. 4:19, 20) Ilyo Petro na Yohane bafumine mu cifungo, abatumwa balipepele kuli Yehova. Bapepele ati: ‘Suminisheni abasha benu ukuti balelanda icebo cenu no kushipa konse.’ Yehova alyaswike lilya ipepo.—Belengeni Imilimo 4:29, 31.

13. Finshi twingasambilila ku fyo ba Jin-hyuk bacitile?

¹³ Kuti twapashanya abatumwa nga ca kuti twatwalilila ukubila imbila nsuma nangu abalashi ba buteko batweba ukuleka ukubila. Natulandeko pali munyinefwe Jin-hyuk uo bakakile pa mulandu wa kukanaingila ubushilika. Ilyo ali mu cifungo balimupeele umulimo wa kulasakamana abafungwa abo babikile mu muputule beka, abo bashalesuminisha ukufuma. Nomba munyinefwe Jin-hyuk bamusuminishe fye ukulaipusha abafungwa ifyo balekabila, tabamusuminishe ukulalanda nabo ifya mu Baibolo. Ba Jin-hyuk balipepele kuli Yehova ukuti abalenge ukuba abashipa pa kuti balebila ku bafungwa banabo. (Imil. 5:29) Batile: “Yehova alyaswike ipepo lyandi pantu alilengele naba uwashipa, kabili nalitendeke ukulatungulula amasambililo ya Baibolo pa mamineti 5 pa minshi ya mu miputule ya bafungwa. Ubushiku nalelemba amakalata ayo nali no kupeela abafungwa banandi ulucelo.” Na ifwe kuti twacetekela ukuti Yehova kuti atwafwa ukubomba bwino umulimo wa kubila imbila nsuma. Nga filya ba Jin-hyuk bacitile, kuti twapepa kuli Yehova ukutila atulenge ukuba abashipa e lyo no kuba na mano.

14. Finshi fingalenga twashipikisha amafya? (Amalumbo 37:3, 5)

¹⁴ Mulelomba Yehova ukuti alemwafwa ukushipikisha amafya. Fwe bengi twalikwata amafya ayo tushipikisha pamo nga ukulwala, ukufwilwa, ukutucusha, e lyo na mafya yambi. Kabili icikuko e lyo ne nkondo fyalilenga amafya yakoselako. Mule-eba Yehova fyonse ifyo muleumfwa. Mulemweba amafya mulekwata nga filya fine mwingeba cibusa  wenu. Mulecetekela ukuti Yehova “akabombelapo.”—Belengeni Amalumbo 37:3, 5.

15. Bushe ipepo kuti lyalenga shani twashipikisha ilyo tulecula? Landeni pa ca kumwenako.

¹⁵ Ukuba no mute wa kupepa kuti kwalenga ‘twashipikisha ilyo tulecula.’ (Rom. 12:12) Yehova alishiba amafya ayo ababomfi bakwe bashipikisha kabili alomfwa nga bapepa kuli ena. (Amalu. 145:18, 19) Ba Kristie bapainiya abali ne myaka 29, baishileishiba ukuti ca cine Yehova alakutika nga twapepa. Balitendeke ukulwala sana ukwabula ukwenekela, ne ci calengele balesakamikwa sana. Pa numa abafyashi babo baishilelwala ubulwele ubushipola. Ba Kristie batile: “Nalepepa sana kuli Yehova ukuti alenkosha pa kuti ndeshipikisha cila bushiku. Nalitwalilile ukulalongana no kulaisambilisha.” Balandile no kuti: “Ipepo lyalilengele nashipikisha ilyo nali na mafya. Nalishibe ukuti Yehova lyonse aleba na ine kabili ukutontonkanya pali ifi kwalensansamusha. Nangu ca kuti nshapolele ilyo line fye, Yehova alyaswike ipepo lyandi pa kumpeela umutende no kungafwa ukuba uwatekanya.” Tekwesha ukulaba ukuti “Yehova alishiba ukupokololako bakapepa [bakwe] ku fya kwesha.”—2 Pet. 2:9.

16. Mulandu nshi tukabila Yehova ukutwafwa pa kuti tukaane amatunko?

¹⁶ Mulelomba Yehova ukuti alemupeela amaka ya kukaana amatunko. Apo tatwapwililika, lyonse tulalwisha amatunko ya kucita ifyabipa. Satana alesha apo engapesha ukuti ciletukosela ukucimfya amatunko. Alabomfya ifya kuleseshamo icitendwe ifishawama pa kuti tuletontonkanya pa kucita ifyabipa. Ifi ifya kuleseshamo icitendwe ifishawama kuti fyalenga twalatontonkanya pa fyabipa ifingalenga twacita no lubembu ulukalamba.—Marko 7:21-23; Yako. 1:14, 15.

17. Kuti twacita shani pa kuti tulecita ukulingana ne fyo tulepepelapo? (Moneni ne cikope.)

 ¹⁷ Pa kukaana amatunko ya kucita ifyabipa tulakabila Yehova ukutwafwa. Mwi pepo lya cilangililo Yesu alandile no kuti: “Mwitutwala mu kutunkwa, lelo tupokololeni ku mubifi.” (Mat. 6:13) Yehova alafwaisha ukutwafwa, lelo tulingile ukumulomba mwi pepo. Tufwile no kulacita ifyo tulepepelapo. Tufwile ukwesha apo twingapesha ukukanabelenga nelyo ukukutika ku fili fyonse ifyabipa ifyaseeka muli cino calo ca kwa Satana. (Amalu. 97:10) Pa kuti tuletontonkanya pa fintu ifisuma, tufwile ukulabelenga no kuisambilisha Baibolo. Na kabili pa kuti tucingilile amatontonkanyo yesu, tufwile ukulalongana no kulabila imbila nsuma. Yehova na o atulaya ukuti takaleke ukuti tukeshiwe ubwesho ubo tushingashipikisha.—1 Kor. 10:12, 13.

18. Finshi bonse tulingile ukulacita?

¹⁸ Ifwe bonse tulakabila ukulapepa sana pa kuti tutwalilile aba cishinka kuli Yehova muli shino nshiku sha kulekelesha isha-afya. Cila bushiku mulesangako inshita ya kupepa kuli Yehova. Yehova afwaya ukuti ‘tulemupongolwela ifyaba mu mitima yesu.’ (Amalu. 62:8) Mulelumbanya Yehova kabili mulemutasha pali fyonse ifyo acita. Mulemulomba Yehova ukuti alelenga muleba abashipa ilyo mulebila imbila nsuma. Mulemupapaata ukuti alemwafwa ukushipikisha amafya e lyo no kukaana amatunko yonse ayo mwingakwata. Tekwesha ukuleka icili conse nelyo uuli onse ukumulesha ukulapepa kuli Yehova cila bushiku. Nomba bushe Yehova aasuka shani amapepo yesu? Tukasuka ici cipusho mu cipande cikonkelepo.