1-2. Finshi nalimo twingatwishika ilyo tulepepa?

 BUSHE mulatwishika nga ca kuti Yehova alasuka amapepo yenu? Nga mulatwishika, te imwe mweka. Aba bwananyina abengi nabo bamona kwati Yehova tasuka amapepo, maka maka nga bali na mafya. Nga ca kuti tuli na mafya, kuti catukosela ukumona ifyo Yehova aswike amapepo yesu.

² Lekeni tusambilile icingalenga twacetekela ukuti Yehova alasuka amapepo ya babomfi bakwe. (1 Yoh. 5:15) Kabili twala-asuka ne fi fipusho: Mulandu nshi inshita shimo twingamwena kwati Yehova taswike amapepo yesu? Bushe Yehova asuka shani amapepo muno nshiku?

3. Mulandu nshi Yehova afwaila tulepepa kuli ena?

³ Amalembo yatweba ukuti Yehova alitutemwa sana kabili twalicindama kuli ena. (Hag. 2:7; 1 Yoh. 4:10) E mulandu wine atwebela ukuti tulepepa kuli ena. (1 Pet. 5:6, 7) Afwaya twapalama kuli ena pa kuti tuleshipikisha amafya twingakwata.

4. Twaishiba shani ukuti Yehova alasuka amapepo ya babomfi bakwe? (Moneni ne cikope.)

⁴ Mu Baibolo ilingi tulabelenga ukuti Yehova alyaswike amapepo ya babomfi bakwe. Bushe kuti mwatontonkanyako pali bamo abo Yehova a-aswike amapepo yabo? Bamo abo twingalandapo ni Mfumu Davidi. Yalikwete abalwani abengi kabili ilingi yalepepa kuli Yehova. Pa nshita imo, Imfumu Davidi yapepele ukuti: “Mwe Yehova, umfweni ipepo lyandi; kutikeni ku kupapaata kwandi. Njasukeni ukulingana ne cishinka  cenu no bulungami bwenu.” (Amalu. 143:1) Yehova alyaswike ipepo Davidi apepele ilya kuti amupusushe. (1 Sam. 19:10, 18-20; 2 Sam. 5:17-25) E mulandu wine Davidi alandile ukuti: “Yehova aba mupepi na bonse abalilila kuli ena.” Na ifwe bene kuti twacetekela Yehova nge fyo amucetekele.—Amalu. 145:18.

5. Bushe Yehova lyonse aleasuka amapepo ya babomfi bakwe aba ku kale ukulingana ne fyo bale-enekela? Landeni pa ca kumwenako. (Moneni ne cikope.)

⁵ Inshita shimo Yehova tasuka amapepo yesu ukulingana ne fyo tule-enekela. Ifi fine e fyacitike ku mutumwa Paulo. Alombele Lesa ukuti amufumye “umuunga mu mubili.” Pa miku itatu alipepeele pali ubu bwafya ubo akwete. Bushe Yehova alyaswike ifyo Paulo apepele? Ee alyaswike, nomba mu nshila iyo Paulo ashale-enekela. Mu cifulo ca kufumyapo amafya ayo akwete, Yehova apeele Paulo amaka ayo alekabila pa kuti atwalilile ukumubombela ne cishinka.—2 Kor. 12:7-10.

6. Mulandu nshi inshita shimo twingamwena kwati Yehova taleasuka amapepo yesu?

⁶ Na ifwe bene, Yehova inshita shimo kuti aasuka ipepo mu nshila tushile-enekela. Kuti twacetekela ukuti Yehova alishiba ifyo engasuka amapepo yesu. Kuti a-asuka “ukucila na pa fyo twingalomba nangu pa fyo twingatontonkanya.” (Efes. 3:20) Pa mulandu ne fi twalandapo, limo Yehova kuti a-asuka amapepo yesu pa nshita nelyo mu nshila tushile-enekela.

7. Mulandu nshi tulingile ukwalwila ifyo tulepepelapo? Landeni pa ca kumwenako.

⁷ Ilyo twile tuleishiba bwino ukufwaya kwa kwa Lesa, kuti twa-alulako ifyo tulepepelapo. Natulandeko pa fyacitike kuli ba Martin Poetzinger. Tapakokwele ukutula apo baupile, balibakakile mu nkambi ya baNazi. Pa kubalilapo, balelomba ukuti Yehova abafumye mu nkambi ya baNazi pa kuti baleya mu kusakamana abena mwabo e lyo no kuya mu kubila imbila nsuma. Nomba pa numa ya milungu ibili, tabamwenepo ifili fyonse ifyalelangilila ukuti Yehova ali no kubafumya mu nkambi ya baNazi. E ico batendeke ukupepa ati: “Mwe Yehova, lekeni njishibe ifyo mulefwaya ncite.” Lyena batendeke ukutontonkanya pa mafya ayo aba bwananyina bakwete abo bali nabo mu nkambi. Abengi abo bakakile balesakamana sana pa bana  babo na bena mwabo. Lyena munyinefwe Poetzinger apepele ukuti: “Mwe Yehova natasha pali uyu mulimo umbi mwampeela. Ngafweni ukukosha icitetekelo ca ba bwananyina no kubakoselesha.” Balitwalilile ukukoselesha aba bwananyina pa myaka 9 iyo bali mu nkambi ya baNazi.

8. Finshi tufwile ukulaibukisha ilyo tulepepa?

⁸ Tufwile ukwibukisha ukuti kwaliba ifyo Yehova afwaya ukucita kabili akaficita pa nshita yakwe umwine. Pali ifi afwaya ukucita, paba no kufumyapo amafya yonse ayalenga tulecula, amafya pamo nga amasanso ayakalamba, ukulwala, e lyo no kufwa. Yehova akabomfya Ubufumu bwakwe pa kufikilisha ifi twalandapo. (Dan. 2:44; Ukus. 21:3, 4) Na lyo line, pali ino nshita Yehova alisuminisha ukuti Satana aleteka cino calo. b (Yoh. 12:31; Ukus. 12:9) Nga ca kuti Yehova alifumishepo amafya yonse ayo tukwata pali ino nshita, kuti camoneka kwati Satana alishiba ukuteka bwino abantu. Nomba ifi tulelolela ukuti Yehova akafikilishe ifyo afwaya ukucita, tacilolele mu kuti te kuti atwafwe nga twakwata amafya. Lekeni tulande pali fimo ifyo Yehova acita pa kutwafwa.

9. Bushe Yehova kuti alenga shani twasalapo bwino ifya kucita? Langilileni.

⁹ Alatupeela amano. Yehova alitulaya ukuti akulatupeela amano ayo tukabila pa kusala bwino ifya kucita. Tulakabila amano ya kwa Lesa pa kuti tusalepo bwino ifya kucita ifingakuma ubumi bwesu bonse. Fimo ifyo twingasalapo kuupa nelyo ukukanaupa. (Yako. 1:5) Natulandeko pa fyacitikile ba Maria. c Bali ne nsansa ilyo balebomba bupainiya bwa nshita yonse. Kabili baishileishibana na munyinefwe. Batile: “Ilyo twaile tuleishibana twalitendeke ukutemwana. Nalishibe ukuti nalingile ukusalapo ifya kucita. Kanshi nalipepelepo sana pantu nalekabila ukuti Yehova antungulule. Na lyo line nalishibe ukuti tali no kunsalilapo ifya kucita.” Ba Maria balimwene ukuti Yehova alyaswike amapepo yabo. Aaswike shani? Ilyo balefwailisha ifyebo mu mpapulo, balisangile amalyashi ayalelanda pa fipusho bakwete. Na kabili balikutike ku fyo banyina babebele. Ifyo abafyashi babo babebele fyalibafwile ukutontonkanya pa fyo baleumfwa. Ne ci calengele ba Maria basalepo bwino ifya kucita.

10. Ukulingana na mashiwi yaba pa Abena Filipi 4:13, finshi Yehova engacita pa kwafwa bakapepa bakwe? Landeni pa ca kumwenako. (Moneni ne cikope.)

¹⁰ Alatupeela amaka ya kushipikisha. Yehova akatupeela amaka ya kushipikisha, nga filya  fine acitile ku mutumwa Paulo. (Belengeni Abena Filipi 4:13.) Natulandeko pa fyo Yehova aafwile munyinefwe Benjamin ukushipikisha amafya akwete. Ilyo ba Benjamin bali abalumendo, baleikala no lupwa lwabo mu nkambi ya mbutushi mu Africa. Batile: “Nalepepa kuli Yehova lyonse ukumulomba ukuti alempeela amaka ya kucita icalungama. Yehova alyaswike amapepo yandi, pantu alilengele naba no mutende, natwalilila ukulabila imbila nsuma, kabili alimpeele ne mpapulo ishingi ishalelenga napalama sana kuli ena.” Balandile no kuti: “Ukubelenga amalyashi ayalanda pa ba bwananyina abakwetepo amafya, e lyo no kumona ifyo Yehova alengele bashipikisha amafya bakwete, kwalilengele nalafwaisha ukutwalilila uwa cishinka kuli ena.”

11-12. Bushe Yehova kuti abomfya shani aba bwananyina pa kwasuka amapepo yesu? (Moneni ne cikope.)

¹¹ Alabomfya aba bwananyina. Ubushiku ilyo Yesu ashilafwa, alipepele sana. Alipaapete Yehova ukuti abantu belamumona ukuti alepontela ishina lya kwa Lesa. Mu nshita yakucingilila umwana wakwe ukuti efwa imfwa ya museebanya, Yehova atumine bamalaika bakwe ku kumukosha. (Luka 22:42, 43) Na ifwe Yehova kuti atukoselesha ilyo abomfya aba bwananyina ukututuminako foni, nelyo ukututandalila. Bonse kuti twalaebako aba bwananyina “amashiwi ayasuma.”—Amapi. 12:25.

¹² Natulandeko pali bankashi Miriam. Ilyo papitile imilungu iinono ukutula apo abena mwabo bafwiliile, ba Miriam bali fye beka pa ng’anda, bali no bulanda sana, kabili balifuupwike. Baleloosha ukwabula ukuleka, kabili balefwaya uwa kulanda nankwe. Ba Miriam batile: “Nshakwete amaka ya kutumina umuntu nangu umo foni, e co napepele fye kuli Yehova. Ilyo nalepepa uku ninshi ndelila, foni yandi yalililile. Kwali eluda umo uwali icibusa sana.” Ba Miriam balibasansamwishe kuli ulya eluda no mwina mwakwe. Balicetekele ukuti Yehova e walengele ukuti uyu munyinefwe abatumine foni.

13. Landeni pa ca kumwenako icilelangilila ifyo Yehova abomfya abantu abashimupepa ukwasuka amapepo yesu.

 ¹³ Kuti abomfya abantu abashimupepa. (Amapi. 21:1) Inshita shimo Yehova alaasuka amapepo ya babomfi bakwe ukubomfya abantu abashimupepa, ukwafwilisha abantu bakwe. Ku ca kumwenako, alibomfeshe Imfumu Artakishashete ukusuminisha Nehemia ukuyakuula cipya cipya ifibumba fya musumba wa Yerusalemu. (Nehe. 2:3-6) Na muno nshiku mwine, Yehova kuti abomfya abantu abashimupepa ukutwafwilisha.

14. Finshi mwatemwa sana pa fyacitikile ba Soo Hing? (Moneni ne cikope.)

¹⁴ Bankashi Soo Hing balimwene ukuti Yehova e wabomfeshe badokota pa kubafwa. Balikwata umwana uwalwala amalwele ya kuli bongobongo. Ali mu busanso ubukalamba, e ico bankashi Soo Hing na bena mwabo balilekele incito pa kuti balemusakamana. Ne ci calengele belakwata indalama. Bankashi Soo Hing baumfwile kwati tabakwete amaka ya kushipikisha amafya na yambi. Balyebele Yehova ifyalebasakamika pa kuti abafwe. Dokota uwalesakamana umwana wabo alisangile inshila iya kwafwilamo ba Soo Hing no lupwa lwabo. Pa mulandu ne fyo uyu dokota acitile, fyalengele ba Soo Hing babafwilishe ku buteko kabili basange ing’anda iyo balekumanisha ukusonkela. Pa numa, ba Soo Hing batile: “Twalimona ifyo Yehova atwafwile. Ca cine, Lesa ‘alomfwa amapepo.’”—Amalu. 65:2.

15. Cinshi calengele nkashi umo atendeke ukumona ifyo Yehova asuka amapepo?

¹⁵ Amapepo yesu tayasukwa mu cisungusho. Nomba ifyo Yehova asuka amapepo, e fyo tukabila pa kuba aba cishinka kuli Shifwe wa ku muulu. Kanshi mulebika amano ku fyo Yehova asuka amapepo yenu. Bankashi Yoko balemona kwati Yehova taleasuka amapepo yabo, nomba balitendeke ukulemba ifyo balepepelapo. Ilyo papitile inshita, balipitulwike mu fyo balembele. Lyena balimwene ukuti Yehova alyaswike amapepo yabo, ukubikako na yo balabile. Cila nshita tulakabila ukulamona ifyo Yehova aleasuka amapepo yesu.—Amalu. 66:19, 20.

16. Kuti twalanga shani ukuti tuli ba citetekelo ilyo tulepepa? (AbaHebere 11:6)

 ¹⁶ Kuti twalanga ukuti twalikwata icitetekelo ilyo tulepepa kuli Yehova, na lintu twasumina ifyo Yehova aasuka amapepo yesu te mulandu ne nshila aasukilamo. (Belengeni AbaHebere 11:6.) Natulandeko pa fyacitike kuli ba Mike na bena mwabo ba Chrissy. Balefwaisha ukubombela pa Bethel. Ba Mike batile: “Pa myaka iingi twalipwishe ukubombelako pa Bethel no mwina mwandi, kabili twalipepelepo sana. Na lyo line, tabatwitile.” Ba Mike na ba Chrissy balicetekele Yehova ukuti alishiba umulimo uusuma uo bengamubombela. Balitwalilile ukubombesha, balibombele bupainiya bwa nshita yonse uko aba kubila imbila nsuma bacepele, kabili balebombako no mulimo wa makuule. Pali ino nshita ni bakangalila ba muputule. Ba Mike batile: “Te lyonse Yehova aleasuka amapepo yesu ukulingana ne fyo twale-enekela, lelo alyasuka mu nshila iyo tushale-enekela no kwenekela.”

17-18. Ukulingana na mashiwi yaba pa Amalumbo 86:6, 7, finshi twingacetekela?

¹⁷ Belengeni Amalumbo 86:6, 7. Uwaimbile amalumbo Davidi alicetekele ukuti Yehova aleumfwa no kwasuka amapepo yakwe. Na ifwe bene kuti twacetekela ukuti Yehova alomfwa no kwasuka amapepo yesu. Ifyo twasambilila muli cino cipande, fyalenga twacetekela ukuti Yehova kuti atupeela amano na maka ayo tukabila pa kushipikisha amafya. Kuti abomfya aba bwananyina, nangu fye abantu abashimupepa pa kuti batwafwe.

¹⁸ Twalishininkisha ukuti Yehova kuti aasuka amapepo yesu, nangu ca kuti te kuti asuke mu nshila iyo tule-enekela. Akatupeela ifyo tukabila, pa nshita ilya ine tulefikabila. E ico twalilileni ukupepa no kucetekela ukuti Yehova akulamupeela fyonse ifyo mulekabila, kabili mu calo cipya akapeela “ica mweo conse ifyo cikabila.”—Amalu. 145:16.