ICIPANDE CA KUSAMBILILAMO 24
Kuti Mwafishapo Ifyo Mufwaya Ukucita mu Mulimo wa kwa Lesa
“Twinenuka ukucita icawama, pantu mu nshita yalinga tukalobolola nga tatutompweke.”—GAL. 6:9.
ULWIMBO 84 Tuleipeelesha
IFYO TWALASAMBILILA a
1. Bwafya nshi ubo fwe bengi tukwata?
BUSHE kwaliba ifyo mwapanga ukucita mu mulimo wa kwa Lesa ifyamwafya ukucita? b Ifi nga e fyo caba, te imwe mweka. Ku ca kumwenako, ba Philip balefwaya ukuwamyako amapepo yabo e lyo ne miku balepepa, lelo calebakosela ukusanga inshita ya kupepa. Ba Erika balefwaya ukulafika bwangu mu kulongana e lyo na mu kukumana kwa kuya mu kubila imbila nsuma. Na lyo line, lyonse balecelwa. Ba Tomáš balyeseshe pa miku iingi ukubelenga Baibo yonse. Batile: “Ukubelenga Baibo takwaleumfwika bwino. Nalyeseshe ukubelenga Baibo yonse pa miku itatu, lelo lyonse nalepelela fye mwi buuku lya Ubwina Lebi.
2. Mulandu nshi tushilingile ukumfwila ububi nga ca kutila twalipanga fimo ifyo tushilafikilisha?
2 Nga kwaliba fimo ifyo mwapanga ifyo mushilakumanisha ukucita, mwilafuupuka. Mulakabila ukubombesha no kukwata inshita ya kuti mucite ifyo mwapanga nangu fye finono. Apo mucili mulafwaya ukufishapo ifyo mwapanga ukucita, cilelangilila fye ukuti mumona bucibusa mwakwata na Yehova ukuti bwalicindama kabili mulefwaisha ukumubombela apapela amaka yenu. Yehova alamona ukuti ifyo mumubombela fyalicindama. Na kuba, Yehova tenekela imwe ukucita ifyo mushingakumanisha. (Amalu. 103:14; Mika 6:8) Kanshi mulepanga ukucita ifyo mwingakumanisha. Finshi mwingacita pa kuti mufikilishe ifyo mwapanga ukucita? Lekeni tulandeko pali fimo ifyo mwingacita.
MULEFWAISHA UKUFIKILISHA IFYO MWAPANGA UKUCITA
Mulepepa kuli Yehova ukuti alelenga mulefwaisha ukufikilisha ifyo mwapanga ukucita (Moneni paragrafu 3-4)
3. Mulandu nshi ukulafwaisha ukufikilisha ifyo mwapanga ukucita kwacindamina?
3 Mufwile ukulafwaisha ukufikilisha ifyo mwapanga ukucita. Nga mulefwaya ukufikilisha ifyo mwapanga ukucita, mukalabombesha pa kuti mucite ifyo mwapanga. Kuti twalinganya ukufwaisha ukufikilisha ifyo tufwaya ukucita mu mulimo wa kwa Lesa ku mwela uulesunka ubwato ubuli pali bemba. Umwela nga watwalilila ukubako, ubwato kuti bwafika uko buleya. Kabili umwela nga naukosa nalimo ubwato kuti bwafika na bwangu uko buleya. Ifi fine e fyo caba na kuli ifwe. Pa kuti tufikilishe ifyo twapanga ukucita, tulingile ukulafwaisha ukucita ifyo fine twapanga. Munyinefwe David uwa ku El Salvador atile: “Tulabombesha nga ca kuti tulefwaya ukufikilisha fimo ifyo twapanga ukucita, kabili tatuleka icintu nangu cimo calenga twafilwa ukufikilisha ifyo twapanga ukucita.” Nomba finshi mwingacita pa kuti mulefwaisha ukufikilisha ifyo mwapanga ukucita?
4. Finshi twingapepelapo? (Abena Filipi 2:13) (Moneni ne cikope.)
4 Mulepepa ukuti mulefwaisha ukufikilisha ifyo mwapanga ukucita. Yehova kuti abomfya umupashi wakwe uwa mushilo pa kulenga mulefwaisha ukufikilisha ifyo mwapanga ukucita. (Belengeni Abena Filipi 2:13.) Inshita shimo tulapanga ifya kucita pantu tumona kwati e fyo tulingile fye ukucita, kabili ukucita ifi takwabipa. Nomba limo te kuti tufwaishe no kucita ifyo twapanga. Ifi fine e fyacitike kuli nkashi Norina uwa ku Uganda. Alefwaya ukulatungulula isambililo lya Baibo, nomba alemona kwati taishibe ukusambilisha bwino. Cinshi calengele afikilishe ifyo alefwaya ukucita? Atile: “Nalitendeke ukulalomba Yehova cila bushiku ukuti alelenga ndefwaisha ukulatungulula isambililo lya Baibo. Lyena nalitendeke ukucita ifyo nalepepelapo. Ilyo papitile imyeshi iinono, naishilemona ukuti nalefwaisha ukulatungulula isambililo lya Baibo. Ulya wine mwaka, nalitendeke ukutungulula amasambililo ya Baibo yabili.”
5. Finshi twingatontonkanyapo pa kuti tulefwaisha ukufikilisha ifyo twapanga ukucita?
5 Muletontonkanya pa fyo Yehova amucitila. (Amalu. 143:5) Umutumwa Paulo aletontonkanya pa fyo Yehova ali ne cikuuku kuli ena, kabili ukucita ifi kwalengele alebombela sana Yehova. (1 Kor. 15:9, 10; 1 Tim. 1:12-14) Na imwe bene nga muletontonkanya pa fyo Yehova amucitila, mukalafwaisha ukufikilisha ifyo mwapanga ukucita. (Amalu. 116:12) Natulande pa fya-afwile nkashi umo uwa ku Honduras pa kuti afikilishe ifyo apangile ukuba painiya wa nshita yonse. Atile: “Naletontonkanya pa fyo Yehova antemwa sana. Alilenga naba pa bantu bakwe. Alansakamana kabili alancingilila. Ifi naletontonkanya pa fyo Yehova antemwa sana, fyalilengele namutemenwako kabili nalafwaisha no kubomba bupainiya.”
6. Finshi fimbi ifingalenga twalafwaisha ukufikilisha ifyo twapanga ukucita?
6 Muletontonkanya pa fisuma ifikacitika nga mwafikilisha ifyo mufwaya ukucita. Moneni ica-afwile ba Erika abo tulandilepo kale, ilyo bapangile ukulafika bwangu mu kulongana na mu kukumana kwa kuya mu kubila imbila nsuma. Batile: “Naishileishiba ukuti filya nalecelwa mu kukumana kwa kuya mu kubila imbila nsuma, nalepuswa ku fingi. Nomba nga nafika bwangu, nalekwata inshita ya kuposha aba bwananyina e lyo no kulandako nabo. Kabili naleumfwa ne fyo aba bwananyina balelanda ifyali no kungafwa ukuwamyako ifyo nalebila imbila nsuma.” Ba Erika baletontonkanya pa fisuma ifyali no kucitika nga ca kuti balafika bwangu. Ne ci calilengele baleka ukucelwa. Fisuma nshi mwingatontonkanyapo? Nga ca kuti mulefwaya ukulaisambilisha bwino Baibo nelyo ukulapepa amapepo ayasuma, muletontonkanya pa fyo bucibusa bwenu na Yehova bukakoselelako. (Amalu. 145:18, 19) Nga mufwaya ukuba ne mibele iyo Umwina Kristu alingile ukukwata, muletontonkanya pa fyo mukalaumfwana bwino na ba bwananyina. (Kol. 3:14) Kanshi kuti cawama nga mwalilembele ifyalenga mulefwaisha ukufikilisha ifyo mwapanga ukucita. Kabili mulebelengamo mu fyo mwalemba. Ba Tomáš abo tulandilepo kale batile: “Nga kuli ifingi ifilelenga ndefwaisha ukufikilisha ifyo napanga ukucita, ndesha ukubombesha pa kuti mfifikilishe.”
7. Finshi ba Julio na bena mwabo bacitile pa kuti balebombesha mu mulimo wa kubila imbila nsuma?
7 Muleba pamo na bengamukoselesha ukufikilisha ifyo mwapanga ukucita. (Amapi. 13:20) Natulande pa fya-afwile ba Julio na bena mwabo abalefwaisha ukulabombesha mu mulimo wa kubila imbila nsuma. Batile: “Twalisalile ifibusa abaletutungilila kabili twalelanda na pa fyo twalefwaya ukucita. Abengi pa fibusa twasalile balebombesha mu mulimo wa kubila imbila nsuma, e ico baletwebako ne fyo twingacita pa kuti tulebombesha. Ifibusa fyesu baletwipusha na pa fyo twalefwaya ukucita kabili baletukoselesha ilyo twalebakabila.”
NGA CA KUTI TWALEKA UKULAFWAISHA UKUFIKILISHA IFYO TUFWAYA UKUCITA
Mulebombela pa fyo mwapanga ukucita (Moneni paragrafu 8)
8. Mulandu nshi tulingile ukutwalilila ukubombela pa fyo twapanga ukucita na lintu tushilefwaya ukuficita? (Moneni ne cikope.)
8 Ukulanda fye icishinka, te lyonse tufwaya ukucita ifyo twapanga. Bushe ici cilolele mu kutila te kuti tufikilishe ifyo tulefwaya ukucita? Awe. Natulangilile: Umwela kuti wasunka ubwato mpaka bwafika no ko buleya. Na lyo line, te lyonse kuba umwela. Inshiku shimo kulaba sana umwela e lyo shimbi takuba umwela. Bushe ici cilepilibula ukuti ubwato te kuti bwende nga takuli umwela? Awe nakalya. Ku ca kumwenako, amato yamo yalakwata injini, e lyo yambi yabomfya inkafi. Ule-ensha ubwato kuti abomfya injini nelyo inkafi pa kuti ubwato butwalilile ukwenda. Umwela kuti twaulinganya ku fyo tumfwa ilyo tulecita ifyo twapanga ukucita. Inshita shimo tulafwaisha sana ukufikilisha ifyo tufwaya ukucita ukucila inshita shimbi. Kabili inshita shimo cilatukosela ukufwaya ukufikilisha ifyo twapanga ukucita. Kanshi tulingile ukuibikilishako ukucita ifyo twapanga na lintu tushilefwaya ukuficita. Pantu nga tatucitile ifi, te kuti tufikilishe ifyo tufwaya ukucita. Nga filya fine uwensha ubwato engabomfya injini nelyo inkafi pa kuti ubwato butwalilile ukwenda, na ifwe tulingile ukulabombela pa fyo twapanga ukucita na lintu tushilefwaisha ukufifikilisha. Nangu ca kuti taca-anguka ukucita ifi, mukaba sana ne nsansa nga mwafikilisha ifyo mupanga ukucita. Ilyo tatulalanda pa fyo tufwile ukucita, intanshi lekeni tulandeko pa cipusho icacindama.
9. Bushe calilubana ukutwalilila ukubombela pa fyo mufwaya ukucita na lintu mushilefwaya ukuficita? Londololeni.
9 Yehova afwaya tuleitemenwa ukumubombela kabili tulemubombela ne nsansa. (Amalu. 100:2; 2 Kor. 9:7) Bushe tufwile ukutwalilila ukubombesha ukufishapo ifyo twapanga ukucita mu mulimo wa kwa Lesa na lintu tushilefwaya ukuficita? Natulandeko pa fyacitike ku mutumwa Paulo. Atile: “Ntuutaula umubili wandi no ku-uteka ubusha.” (1 Kor. 9:25-27) Paulo ale-esha ukucita icalungama na lintu umwine ashalefwaya ukucita ifyo. Bushe Yehova alesekelela pa fyo Paulo alemubombela? Ukwabula no kutwishika, alesekelela! Kabili Yehova alepaala ifyo Paulo alebombesha.—2 Tim. 4:7, 8.
10. Fisuma nshi fyaba mu kubombela pa fyo mufwaya ukucita nangu ca kuti tamulefwaya ukuficita?
10 Na muno nshiku mwine, Yehova alatemwa nga amona tulebombela pa fyo tufwaisha ukucita nangu tatulefwaya ukufifishapo. Alasekelela pa fyo tulebomba pantu aleshiba ukuti ico tulebombela uyo mulimo te pa mulandu wa kuti twaliutemwa, lelo ni pa mulandu wa kuti twalimutemwa. Filya fine Yehova apaalile Paulo, na ifwe akatupaala pa fyo tubombesha. (Amalu. 126:5) Kabili nga twamona ifyo Yehova atupaala, tukalafwaisha ukufishapo ifyo tulefwaya ukucita. Ba nkashi Lucyna aba ku Poland balandile ukuti: “Inshita shimo nshifwaya ukuya mu kubila imbila nsuma, maka maka nga ninaka sana. Nomba ndaba sana ne nsansa nga ca kuti naya mu kubila imbila nsuma.” Nomba lekeni tusambilile ifyo twingacita nga tatulefwaya ukucita ifyo twapanga.
11. Bushe Yehova kuti alenga shani twalailama?
11 Mulepepa pa kuti muleilama. Ukuilama kuti kwalenga twakaana ukucita ifyabipa. Na lyo line tulakabila ukuilama na pa kucita ifintu ifisuma maka maka nga ca kuti ifyo tulefwaya ukucita nafikosa nelyo tatulefwaya ukuficita. Ibukisheni ukuti ukuilama kwaba pa fisabo fya mupashi, kanshi mulelomba Yehova ukumupeela umupashi wa mushilo pa kuti muleba ne yi mibele yacindama. (Luka 11:13; Gal. 5:22, 23) Ba Davidi abo tulandilepo kale balilondolwele ifyo ipepo lyalengele balaisambilisha Baibo lyonse. Batile: “Nalepepa kuli Yehova ukuti ndeilama. Ne ci calengele ntendeke ukulaisambilisha Baibo bwino kabili naleisambilisha lyonse.”
12. Bushe ishinte lye funde ilyaba pali Lukala Milandu 11:4 kuti lyalenga shani twafikilisha ifyo tufwaisha ukucita?
12 Mwilalolela ukuti ifintu fikabe bwino. Ifintu muli cino calo tafyakatale afibapo bwino, kanshi tatufwile ukulalolela ifintu ukuba bwino pa kuti tucite ifyo twapanga ukubomba mu mulimo wa kwa Lesa. Nga tulelolela ukuti ifintu fikabe bwino, te kuti tufikilishe ifyo tufwaya ukucita. (Belengeni Lukala Milandu 11:4.) Munyinefwe Dayniel atile: “Ifintu fiba fye bwino ilyo twatendeka ukufikilisha ifyo twapanga ukucita. Kanshi tatufwile ukulolela ukuti ifintu fikabe bwino.” Munyinefwe Paul uwa ku Uganda alilandile pa mulandu na umbi uo tushilingile ukulalikisha ukufikilisha ifyo twapanga ukucita. Atile: “Nga twatendeka ukufikilisha ifyo twapanga ukucita mu mulimo wa kwa Lesa nangu ca kuti ifintu tafili bwino, Yehova akatupaala.”—Mal. 3:10.
13. Busuma nshi bwaba mu kubalilapo ukucita utuntu utunono nga mulefwaya ukufikilisha ifyo mwapanga?
13 Mulebalilapo ukucita ifinono ifyo mwingakumanisha. Limo kuti twafilwa ukufikilisha ifyo twapanga pantu tulemona kwati nafikosa. Ifi nga e fimucitikila, nalimo kuti mwatendekelapo ukucita ifinono pa fyo mwapanga. Nga ca kuti mulafwaya ukuba ne mibele iisuma, nalimo kuti mwatendeka ukulalanga iyo mibele mu tuntu utunono. Nga ca kuti mufwaya ukulabelenga Baibo yonse, nalimo kuti mwatendeka ukulabelenga Baibo pa nshita iinono. Ba Tomáš abo tulandilepo balifililwe ukubelenga Baibo yonse mu mwaka umo. Batile: “Naishileiluka ukuti nalefwaisha ukubelenga ifingi pa muku umo. Kanshi nalitendeke ukubelenga Baibo na kabili lelo uno muku nalebelenga fye ifikomo ifinono cila bushiku no kutontonkanya pa fyo nalebelenga. Ne ci calengele ntendeke ukutemwa ifyo nalebelenga.” Ilyo ba Tomáš batemenwe ifyo balebelenga, balitendeke ukubelenga pa nshita iikulu kabili mu kuya kwa nshita balibelengele Baibo yonse. c
MWILANENUKA NGA KWACITIKA FIMO IFYALENGA MWAFILWA UKUFIKILISHA IFYO MWAPANGA
14. Finshi ifingacitika ifingalenga twafilwa ukufikilisha ifyo twapanga ukucita?
14 Kwena te mulandu ne fyo twingafwaisha ukufikilisha fimo nelyo ifyo twingalailama, inshita shimo kuti kwacitika fimo ifingalenga twanenuka. Ku ca kumwenako, nalimo “inshita ya fintu fyabula ukwenekela” kuti yalenga twafilwa ukubombela pa fyo twapanga ukucita. (Luk. Mil. 9:11) Nalimo kuti twakwata amafya ayengalenga twanenuka. (Amapi. 24:10) Pa mulandu wa kukanapwililika, nalimo kuti twacita ifingalenga twafilwa ukufikilisha ifyo tufwaya ukucita. (Rom. 7:23) Nelyo kuti twaumfwa ukunaka. (Mat. 26:43) Finshi fingalenga twashipikisha nga kwacitika ifyalenga twafilwa ukufikilisha ifyo twapanga ukucita?
15. Mulandu nshi mushilingile ukunenukila nga ca kuti kwacitika fimo ifyalenga mwafilwa ukufikilisha ifyo mwapanga ukucita? (Amalumbo 145:14)
15 Muleibukisha ukuti nga kwacitika fimo ifyalenga mwafilwa ukufikilisha ifyo mwapanga, te kutila ninshi tamwakatale amufikilisha ifyo mufwaya ukucita. Baibo ilalanda ukutila kuti twakwata amafya. Na lyo line ilatweba no kuti Yehova nga atwafwa kuti twafikilisha ifyo twapanga ukucita na lintu tuli na mafya. (Belengeni Amalumbo 145:14.) Munyinefwe Philip uo tulandilepo kale atile: “Nshikalila fye ukutontonkanya pa miku nafilwa ukufikilisha ifyo napanga ukucita, lelo ntontonkanya sana pa fyo ningacita pa kuti mfikilishe ifyo mfwaya ukucita.” Ba David abo tulandilepo batile: “Nshimona ifilenga ndefilwa ukufikilisha ifyo napanga ukucita ukuti mafya ayakalamba. Lelo mona ukuti aya mafya, kuti yalenga nalanga ifyo natemwa Yehova.” Ca cine, nga mwatwalilila ukufikilisha ifyo mwapanga na lintu muli na mafya, mulalanga ukuti mulafwaya Yehova ukulasekelela. Yehova alatemwa nga amona mule-esha apo mwingapesha ukufikilisha ifyo mwapanga.
16. Finshi twingasambililako nga kwacitika fimo ifingalenga twafilwa ukufikilisha ifyo twapanga?
16 Mulesambililako nga ca kuti kwacitika fimo ifyalenga mwafilwa ukufikilisha ifyo mwapanga. Muletontonkanya pa calengele ukuti mufilwe ukufikilisha ifyo mwapangile ukucita. Kabili muletontonkanya na pali ici cipusho, ‘Finshi ifyo mfwile ukucita pa kuti ifi taficitike na kabili?’ (Amapi. 27:12) Inshita shimo nga ca kuti twafilwa ukufikilisha ifyo twapanga ukucita, nalimo kuti twa-alula ifyo twapanga. Nga ca kuti na imwe mwalifilwa ukucita ifyo mwapanga, nalimo kuti mwatontonkanya pa fyo mulefwaya ukucita, pa kuti mumone nga kuti mwakumanisha. d Yehova takamone ukuti tapali ifyo mwingacita nga mwafilwa ukufikilisha ifyo mwapanga ukucita lelo ifyo mushingakumanisha.—2 Kor. 8:12.
17. Mulandu nshi tulingile ukulatontonkanishisha pa fyo twakumanishapo ukucita?
17 Muletontonkanya pa fyo mwakumanishapo ukucita. Baibo itila: “Lesa taba uushalungama, takalabe umulimo wenu.” (Heb. 6:10) Kanshi na imwe tamufwile ukulaba ifisuma ifyo mwabomba. Muletontonkanya sana pa fyo mwapangile ifyo mwakumanishapo ukucita. Nalimo mwalipangile ukuba icibusa sana na Yehova, ukulaebako abantu pali ena, nelyo ukubatishiwa. Nga filya fine mwafikilishe ifyo mwapangile ukucita, kuti mwakumanisha ukufikilisha ifyo mwapanga ukucita na pali ino nshita.—Fil. 3:16.
Mulemona ifyo Yehova alemwafwa ilyo mule-esha ukufikilisha ifyo mwapanga (Moneni paragrafu 18)
18. Cinshi tulingile ukwibukisha ukucita ilyo tulebombela pa fyo twapanga? (Moneni ne cikope.)
18 Nga Yehova amwafwa, kuti mwafikilisha ifyo mwapanga ukucita, nga filya fine uwensha ubwato engafika uko aleya. Nomba ibukisheni ukuti abensha ubwato balamonako ne fyo Yehova abumba ilyo bali pali bemba. Ifi fine e fyo na ifwe tufwile ukulacita. Ilyo tulebombela pa fyo twapanga ukucita, twilalaba ukulasekelela nga twamona ifyo Yehova aletwafwa ne fyo aletupaala. (2 Kor. 4:7) Nga tamunenwike, Yehova akamupaala icine cine.—Gal. 6:9.
ULWIMBO 126 Beni Abalola, Koseni, Iminineni Ndi
a Icilonganino ca kwa Yehova cilatukoselesha ukulatontonkanya pa fyo twingacita pa kuti tulebombesha mu mulimo wa kwa Yehova. Nomba kuti twacita shani nga ca kuti kwaliba ifyo twapanga ukucita nomba tulefilwa ukuficita? Muli cino cipande, twalasambilila ifyo twingacita pa kuti tufishepo ifyo twapanga ukucita.
b UBULONDOLOSHI: Ifyo mwingapanga ukucita mu mulimo wa kwa Lesa, kuti fyaba ifili fyonse ifyo mwingafwaya ukucita nelyo ifyo mwingafwaya ukulabomba bwino mu mulimo wa kwa Lesa. Ku ca kumwenako, kuti mwafwaya ukukwata imibele imo iyo Umwina Kristu alingile ukukwata. Nelyo kuti mwafwaya ukuwamyako fimo ifyo mucita ilyo mulebombela Yehova, pamo nga ukubelenga Baibo, ukuisambilisha, nelyo ukubila imbila nsuma.
c Moneni icitabo citila Nonkelenimo mu Masambililo ya Isukulu lya Butumikishi Ilya Bulesa, amabu. 10-11, para. 4.
d Nga mulefwaya ukwishibilapo ifyebo na fimbi, moneni icipande citila “Mulecita fye Ifyo Mwingakwanisha pa Kuti Muleba ne Nsansa,” mu Ulupungu lwa kwa Kalinda ulwa July 15, 2008.
