1. Ni nsambu nshi Yehova atupeela?

BONSE Yehova alitupeela insambu sha kuisalila ifyo tulefwaya ukulaikala. Alatusambilisha ifya kusala bwino ifya kucita, kabili alalenga ifintu filetuwamina nga tulesala ifya kucita ifilenga aba ne nsansa. (Amalu. 119:173) Kanshi nga tulekonka sana ifyo Baibolo ilanda tukalasala bwino ifya kucita.—Heb. 5:14.

2. Bwafya nshi twingakwata pa numa ya kusalapo ifya kucita?

² Nangu tusale bwino ifya kucita, limo cilafya ukufifishapo. Natulande pa fya kumwenako fimo: Munyinefwe wacaice asalapo ukubelenga Baibolo yonse. Atendeka fye bwino ukubelenga, kabili aibelenga pa milungu iinono lelo fimo fyalenga aleka ukubelenga. Nkashi asalapo ukutendeka bupainiya bwa nshita yonse lelo alatantalisha fye inshiku sha kutendekelapo. Ibumba lya baeluda basuminishanya ukuti batendeke ukulacema sana aba bwananyina mu cilonganino, lelo pa numa ya myeshi iingi basanga ukuti tabatendeka ukubacema. Nangu ca kuti ifi ifya kumwenako nafipusanapusana, bonse tabafishishepo ifyo basalilepo ukucita. Abena Kristu bakubalilapo abaleikala mu Korinti nabo balikwete ubwafya bumo bwine. Natulande ifyo twingasambililako.

3. Finshi abena Korinti basalilepo ukucita, lelo cinshi cacitike?

³ Nalimo mu mwaka wa 55 ninshi Yesu alibwelelamo ku muulu, kwali icacindama ico abena Korinti basalilepo ukucita. Balyumfwile ukuti aba bwananyina mu Yerusalemu na mu Yudea balecula kabili bali ne cipowe no kuti ifilonganino fimo fyalesangula indalama sha kwafwilisha balya aba bwananyina. Apo abena Korinti bali ne cikuuku kabili bali bakapekape, balefwaya ukusangula indalama kabili baipwishe umutumwa Paulo ifyo bali no kucita  pa kusangula. Alibebele ifyo balingile ukucita kabili atumine Tito ukuyapoka indalama isho baali no kusangula. (1 Kor. 16:1; 2 Kor. 8:6) Pa numa ya myeshi iinono, Paulo aumfwile ukuti abena Korinti tabasangwile indalama balaile. Kanshi ilyo balesenda indalama ukutwala ku Yerusalemu isho ifilonganino fimbi fyasangwile, ninshi nalimo abena Korinti tabalasangula indalama.—2 Kor. 9:4, 5.

4. Ukulingana ne lembo lya 2 Abena Korinti 8:7, 10, 11, finshi Paulo akoseleshe abena Korinti ukucita?

⁴ Ifyo abena Korinti basalilepo ukucita fyaliweme sana, kabili Paulo alibatashishe pa citetekelo cabo icakosa na pa fyo balefwaisha ukusangula. Lelo alibakoseleshe ukufikilisha ifyo balaile. (Belengeni 2 Abena Korinti 8:7, 10, 11.) Ku fyacitikiile abena Korinti kuti twasambililako ukuti na Bena Kristu ba cishinka limo kuti cabakosela ukufishapo ifyo basalilepo ukucita.

5. Mepusho nshi twalaasuka?

⁵ Nga filya fine cali ku bena Korinti, na ifwe limo kuti catukosela ukufishapo ifyo twasalilepo ukucita. Mulandu nshi cingakosela? Apo tatwapwililika, limo kuti twalalalikisha ifyo tulingile ukucita. Ificitika ukwabula ukwenekela na fyo kuti fyalenga catukosela ukucita ifyo twasalilepo ukucita. (Luk. Mil. 9:11; Rom. 7:18) Nomba finshi tulingile ukucita nga ca kuti tulefwaya ukupituluka mu fyo twasalilepo no kumona nga tulingile ukwalula? Kabili finshi twingacita pa kuti tulepwishishisha ifyo twatendeka?

6. Ni lilali cingawama ukwalula ifyo tusalapo ukucita?

⁶ Fimo ifyacindama ifyo tusalapo ukucita te kuti tufyalule. Ku ca kumwenako, nga twalisalapo ukubombela Yehova te kuti twalule, kabili abaupana te kuti balule ifyo balapile ukuti bakatwalilila ukuba aba cishinka ku bena mwabo. (Mat. 16:24; 19:6) Lelo fimbi ifyo tusalapo ukucita kuti twafyalula. Mulandu nshi? Pantu ifintu filaluka. Finshi tufwile ukucita pa kuti tulesala bwino ifya kucita?

7. Finshi tufwile ukulomba Lesa, kabili mulandu nshi?

⁷ Mulelomba amano. Yehova alengele Yakobo alembe ati: “Nga ca kutila umo pali imwe abulwa amano, eleka ukulomba kuli Lesa na o akamupeela, pantu Lesa apeela fye kuli bonse.” (Yako. 1:5) Kwena bonse ‘tulabulwa amano’ muli fimo. Kanshi tufwile ukulomba Yehova ukuti atwafwe ukusala bwino ifya kucita no kuti atwafwe ilyo tulefwaya ukwalula ifyo twasalilepo ukucita. Lyena Yehova akatwafwa ukusala bwino ifya kucita.

8. Finshi tufwile ukucita ilyo tushilasalapo ifya kucita?

⁸ Mulefwailisha sana. Mulefwailisha mu Cebo ca kwa Lesa, mulebelenga impapulo isho icilonganino ca kwa Yehova cipekanya, kabili muleipushako abantu abengamupanda amano ayasuma. (Amapi. 20:18) Nga mulefwailisha sana mukeshiba ifya kucita ilyo mushilaalula incito ya kubomba, ilyo mushilasalapo nampo nga mufwile ukukuukila kumo nelyo iyo, na lintu mushilasalapo amasambililo ayo mulingile ukukwata, ayengalenga mwalakwata indalama sha kwikalilamo pa kuti mutwalilile ukubombela Yehova.

9. Fisuma nshi fikafumamo nga tuli aba cishinka?

⁹ Mulepituluka mu filenga mulesalapo ukucita fimo. Yehova alabika amano ku filenga tulecita ifyo tucita. (Amapi. 16:2) Afwaya tuleba aba cishinka mu fintu fyonse. Kanshi ilyo twasalapo ukucita fimo, tulingile ukwishiba ifyalenga tusalepo ukucita ifyo fintu kabili abantu bambi nabo balingile ukwishiba ifyalenga tusalepo ukucita ifyo fintu. Nga tatuli aba cishinka sana kuti catukosela ukucita ifyo twalandile ukuti tukacita. Ku ca kumwenako, munyinefwe wacaice kuti asalapo ukuba painiya wa nshita yonse. Lelo mu kupita kwa nshita, alafilwa ukukumanisha amaawala ayo painiya wa nshita yonse afwile ukubomba, kabili aleka  ukusekelela sana ilyo alebila imbila nsuma. Nalimo kuti alatontonkanya ukuti icikalamba icalengele atampe bupainiya ni co alefwaya ukusekesha Yehova. Nomba limbi icalengele ni co alefwaya ukusekesha abafyashi bakwe nangu umuntu umbi.

10. Finshi fingalenga umuntu ukwaluka?

¹⁰ Tontonkanyeni pa musambi wa Baibolo uwasalapo ukuleka ukupeepa fwaka. Pa mulungu umo nelyo ibili aikala fye ukwabula ukupeepa. Lelo camukosela ica kuti atendeka ukupeepa na kabili. Mu kuya kwa nshita asuka aleka ukupeepa! Ukutemwa Yehova no kufwaisha ukumusekesha e kwalenga aleke ukupeepa fwaka.—Kol. 1:10; 3:23.

11. Mulandu nshi mufwile ukupangila ifya kucita?

¹¹ Mulepanga ifya kucita. Nga mwalipangila limo ifya kucita, cikamwangukila ukufifishapo. Ku ca kumwenako, nalimo kuti mwasalapo ukulabelenga Baibolo lyonse. Lelo nga tamutantike ifyo mwakulabelenga, kuti camukosela ukulabelenga lyonse. * Nelyo baeluda mu cilonganino kuti bapanga ukuti balecema sana aba mu cilonganino, lelo papita inshita ukwabula ukuti batendeke ukubacema. Pa kuti bafishepo ifyo bapanga, bafwile ukuyipusha aya amepusho: “Bushe twalitantika amashina ya bamunyinefwe na bankashi abo tulingile ukucema? Bushe twalitantika inshiku ne nshita ya kuyabacema?”

12. Finshi nalimo twingacita, kabili mulandu nshi?

¹² Muleishiba ifyo mwingacita ne fyo mushingacita. Takuli uwingakwata inshita, amaka, na fyonse ififwaikwa pa kuti acite conse ico alefwaya. Kanshi mufwile ukwishiba ukuti kwaliba ifyo mwingacita ne fyo mushingacita. Kuti mwaalula ifyo mwapangile ukucita nga mwamona ukuti cayafya ukufifishapo. (Luk. Mil. 3:6) Nomba kuti mwacita shani nga ca kuti mwapituluka mu fyo mwapangile ukucita, mwaalulako na fimo, lyena mwamona ukuti mulingile ukucita filya fine mwapangile? Natulande pa fintu 5 ifyo mwingacita pa kuti mufishepo ifyo mwapangile.

13. Finshi mwingacita pa kuti mukwate amaka ya kucita ifyo mwasalilepo ukucita?

¹³ Mulelomba amaka ya kucitapo cimo. Lesa kuti amupeela amaka ya “kucitapo cimo” pa kuti mufishepo ifyo mwasalapo ukucita. (Fil. 2:13) Kanshi mulelomba Yehova alemupeela umupashi wakwe uwa mushilo pa kuti ulemupeela amaka ya kucita ifyo mwasalapo ukucita. Muletwalilila fye ukupepa nangu ca kuti limo kuti mwamona kwati Yehova alekokola ukwasuka amapepo yenu. Yesu alandile ukuti: “Mulelomba, kabili bakamupeela” umupashi wa mushilo.—Luka 11:9, 13.

14. Bushe ishinte lye funde ilyaba pa Amapinda 21:5 kuti lyamwafwa shani ukufishapo ifyo mwasalapo ukucita?

¹⁴ Muletantika ifya kucita. (Belengeni Amapinda 21:5.) Pa kuti mupwishishishe ifyo mwatendeka, mufwile ukutantika ifya kucita. Lyena mulingile ukucita filya fine mwatantika. Na lintu mwapanga ukucita fimo, mulingile ukutantika ifyo mukalacita pa kuti mukafishepo ifyo mwapanga. Nga namukwata ifya kucita ifingi kuti mwafyakanya mu finono finono, kabili nga mulecita ifi cikamwangukila ukubomba iyo milimo. Paulo akoseleshe abena Korinti ukuti balingile ukupekanya imisangulo “pa bushiku bonse ubwa ntanshi ubwa mulungu” ukucila ukulolela akese e lyo bakatendeke ukusangula. (1 Kor. 16:2) Nga namukwata ifya kucita ifingi e lyo mwayakanya finono finono, tafyakamufulile ica kuti mukafilwe no kubomba.

15. Cinshi mufwile ukucita nga mwatantika ifya kucita?

¹⁵ Nga mulelemba ifyo mwatantika ukucita  cikamwangukila ukucita ifyo mwasalapo ukucita. (1 Kor. 14:40) Ku ca kumwenako, amabumba ya baeluda baliyeba ukuti lyonse nga bakumana balesala eluda uwa kulemba fyonse ifyo ibumba lya baeluda lyapingula, ukubikako fye na mashina ya bamunyinefwe abo basala ukubombela pa fyo bapingula, e lyo no bushiku balingile ukubombelapo. Baeluda nga balecita ifi balabombela bwino pa fyo balanshenye ukubombelapo. (1 Kor. 9:26) Na imwe kuti mwalacitako ifi baeluda babeba. Ku ca kumwenako, kuti mwalemba fyonse ifyo mulefwaya ukucita cila bushiku kabili kuti mwabika ico mulefwaya ukubalilapo ukucita pa muulu. Nga mulecita ifi cikalamwangukila ukupwisha ifyo mwatendeka kabili mukalafibomba mu nshita iinono.

16. Finshi tulingile ukucita pa kuti tufishepo ifyo twasalapo ukucita, kabili ifi fyaampana shani ne fyaba pa Abena Roma 12:11?

¹⁶ Mulebombesha. Mufwile ukubombesha pa kuti mucite fyonse ifyo mwatantika na pa kuti mupwishishishe ifyo mwatendeka ukucita. (Belengeni Abena Roma 12:11.) Paulo aebele Timote ukuti atwalilile ukuibikilishako pa kuti aleishibilako ukusambilisha. Kuti twalakonka ifyo Paulo alandile na muli fimbi ifyo tupanga ukucita mu mulimo wa kwa Yehova.—1 Tim. 4:13, 16.

17. Kuti twabomfya shani ifyaba pa Abena Efese 5:15, 16 ilyo tulecita ifyo twasalapo ukucita?

¹⁷ Mulebomfya bwino inshita. (Belengeni Abena Efese 5:15, 16.) Muletantika inshita mulefwaya ukucita ifyo mwasalapo ukucita kabili mwilaalula iyo nshita. Mwilalolela ukuti ifintu fikabe bwino e lyo mukatendeke ukucita ifyo mwapanga ukucita; nalimo ifintu tafyakatale afiba bwino. (Luk. Mil. 11:4) Mwilapoosa inshita na maka pa fintu ifishacindama sana ica kuti mwalafilwa no kucita ifyacilapo ukucindama. (Fil. 1:10) Mulecita ifyo mwapanga ukucita ilyo abantu bashingamupumfyanya. Mulebeba ukuti tabalingile ukumupumfyanya. Muleshimya foni kabili mwilabelenga amameseji ilyo mulecita ifyacilapo ukucindama. *

18-19. Finshi fingalenga mwatwalilila ukucita ifyo mwasalapo ukucita nangu ca kuti limo mufwile ukwalulako fimo?

¹⁸ Muletontonkanya pa fikafumamo nga mwapwishishisha ifyo mwasalapo ukucita. Ifingafuma mu fyo mwasalapo ukucita fyaba kwati cifulo uko umuntu aleya. Nga cine cine mulefwaya ukufika uko muleya nangu mwasanga inshila nabesala kabilii mufwile ukupita kumbi, mukatwalilila fye ukuya. Ifi fine e fyo caba na ku fifuma mu fyo tusalapo ukucita, tatunenuka nga twaishiba ukuti tufwile ukwalulako fimo pa kuti tufishepo ifyo twasalapo ukucita.—Gal. 6:9.

¹⁹ Calikosa ukusala ifya kucita ifisuma kabili calikosa ukufishapo ifyo twasala ukucita. Lelo Yehova kuti amupeela amano na maka pa kuti mupwishishishe ifyo mwatendeka.