BAMUNYINEFWE na bankashi abengi abaile mu kwikala ku fyalo fimbi pa kuti bakwate indalama, balibwelelamo ku fyalo fya ku mwabo. Ukutemwa Yehova e lyo na bantu, kwalilenga baya ku ncende uko bakabila ba Bufumu bacepa. (Mat. 22:37-39) Finshi baipeelesha ukucita, kabili Yehova abapaala shani? Pa kuti twishibe, lekeni tulande pa ba bwananyina ababwelela ku Cameroon.

Mu 1998 munyinefwe Onésime alifumine mu calo ca Cameroon. Aleikala ku calo cimbi pa myaka 14. Bushiku bumo ilyo ali pa kulongana, munyinefwe uwalelanda ilyashi alibomfeshe icilangililo icalelanda pa mulimo wa kubila imbila nsuma. Atile: “Nga ca kuti abantu babili baleloba isabi mu ncende ishapusana e lyo umo amona umunankwe aleikata isabi ilingi, bushe te kuti aye kulya ukuli isabi ilingi pa kuti na o ekateko?”

Ici icilangililo calengele ba Onésime ukutontonkanya pa kubwelela ku Cameroon uko abengi balefwaya ukukutika imbila nsuma, pa kuti bakaye mu kubombela pamo na bakasabankanya aba muli cilya calo. Lelo balisakamikwe. Bushe bali no kubelesha ukwikala mu Cameroon na kabili pa numa ya kwikala mu calo cimbi pa myaka iingi? Pa kuti bamone nga kuti babelesha ukwikala mu Cameroon, balileko mu kutandala pa myeshi 6. Lyena mu 2012 balikuukiile ku Cameroon.

Ba Onésime batile: “Nalingile ukubelesha ukwikala ukwakaba, no kubelesha imikalile ya mu Cameroon. Kabili mu Ng’anda ya Bufumu nalingile ukubelesha ukulaikala pa fipuna ifyakosa.” Na kabili, balandile ninshi balemwentula abati, “Nga nabika sana amano kuli programu ya kulongana, nalelabako ku fipuna ifisuma ifyo naleikalapo mu Mayanda ya Bufumu yambi ayo nalelonganinamo ku calo cimbi.”

Mu 2013, ba Onésime balyupile ba Géraldine, ababwelele ku Cameroon pa numa ya kwikala mu France imyaka 9. Bushe Yehova abapaalile shani pa fyo babikile amano ku mulimo wa Bufumu? Ba Onésime batile: “Twalisangilwe kwi Isukulu lya Bakabila ba Bufumu kabili tubombela pa Bethel. Mu mwaka fye umo, abasambi ba Baibolo 20 balibatishiwe mu cilonganino cesu. Pali ino nshita ng’umfwa ukuti naba mu ncende iisuma iya ‘kwikatamo isabi.’” (Marko 1:17, 18) Ba Géraldine nabo batile: “Yehova alimpaala icine cine ukucila na pa fyo nale-enekela.”

Ba Judith balikuukiile ku America, lelo balefwaisha ukulabombesha mu mulimo wa kwa Yehova. Batile: “Lyonse nga naya mu kutandalila ulupwa lwandi ku Cameroon, nalelila pa kubwelelamo pantu nalesha abantu abo nalesambilila nabo Baibolo.” Na lyo line, ba Judith baleshingashinga ukubwelela ku Cameroon. Balebomba incito iyo balefola indalama ishingi, kabili tacalebakosela ukulipilila bawishi ku cipatala abaleikala ku Cameroon. Lelo ba Judith balicetekele Yehova kabili  balibwelelemo ku Cameroon. Balandile ukuti balefuluka ifyo baleikala bwino ku America. Balipepele kuli Yehova ukuti abafwe ukubelesha imikalile ya mu Cameroon, kabili Yehova alibafwile ukubomfya kangalila wa muputule no mwina mwakwe.

Ilyo ba Judith baibukishe ifyo cali ilyo babwelele fye ku Cameroon batile, “Mu myaka fye itatu nalyafwile abasambi ba Baibolo 4 ukubatishiwa. Nalitemenwe sana.” Ba Judith baishileba bapainiya baibela. Ino nshita babombela mu muputule na bena mwabo ba Sam-Castel. Nomba cali shani kuli bawishi ba ba Judith? Ba Judith na balupwa lwabo balisangile icipatala ica ku calo cimbi icasumiine ukubalipilila pa kuti babalepule. Icaweme ca kuti bawishi ba ba Judith balibalepwile ukwabula ubwafya.

Munyinefwe Victor aile mu kwikala ku Canada. Ilyo abelengele icipande icali mu Ulupungu lwa kwa Kalinda icalelanda pa masambililo ya pa muulu, alitontonkenye sana pa masambililo yakwe. Alilekele ukuya ku masambililo ya ku universiti, no kutendeka ukusambilila imilimo imbi pa koleji iishali no kumusendela imyaka iingi. Atile: “Ifi nacitile fyalengele naingila bwangu incito, no kutendeka ukubomba umulimo natemenwe sana, uwa bupainiya.” Pa numa, ba Victor baupile ba Caroline, kabili baliile mu kutandala ku Cameroon. Ilyo bali ku Cameroon, baliile mu kutandala pe ofeshi lya musambo. Kabili bamunyinefwe bamo balibakoseleshe ukutontonkanya pa kubombelako mu Cameroon. Ba Victor batile: “Tapali icali no kutulesha ukuya mu kubombela ku Cameroon. Kabili apo twalyangwishe kale imikalile, twalisumine.” Nangu ca kuti ba Caroline balikwete ubulwele ubo balwele, balisalilepo ukuya mu kubombela ku Cameroon.

Ba Victor na ba Caroline balile mu kubomba bupainiya bwa nshita yonse ku Cameroon, pa kuti bafwe abantu abalefwaya ukusambilila Baibolo. Pa kubala balebomfya indalama isho basungile pa kuti belabomba incito. Lyena pa numa baliile mu kubomba incito ku Canada pa myeshi iinono, pa kuti bakwate indalama ishali no kwisabafwa nga babwelela ku Cameroon, no kutwalilila ukubomba bupainiya bwa nshita yonse. Bushe Yehova abapaalile shani? Balisangilwe kwi Isukulu lya Bakabila ba Bufumu, baishileba bapainiya baibela, kabili pali ino nshita babomfi ba makuule. Ba Victor batile: “Apo twalyangwishe imikalile twalishintilile pali Yehova, kabili Yehova aletusakamana.”

Mu 2002, ba Alain abalesambilila pa universiti ya mu Germany balibelengele trakiti iitila Mwe Bacaice—Finshi Mukacita mu Bumi Bwenu? Ifyo babelengele muli ilya trakiti fyalilengele bapanga ifya kucita mu mulimo wa kwa Lesa. Mu 2006, balisangilwe kwi Isukulu lya Kukansha Ilya Butumikishi, kabili balibatumine ukuya mu kubombela ku Cameroon uko bafyalilwe.

Ilyo bali mu Cameroon, ba Alain balisangile incito iyo balebombako fye inshiku shimo mu mulungu. Pa numa balingiile incito iyo balefola indalama ishingi, lelo balisakamikwe pantu yali no kulenga balefilwa ukubombesha mu mulimo wa kubila imbila nsuma. Kanshi ilyo babasontele ukuba bapainiya baibela, tabaikete na ku cani, balisumine. Ababengishe incito, baebele ba Alain ukuti balabalundilako indalama, lelo ba Alain balikeene kabili balitendeke ukubomba bupainiya bwaibela. Pa numa, ba Alain balyupile ba Stéphanie, abaikele imyaka iingi ku France. Mafya nshi ba Stéphanie bakwete ilyo bakuukiile ku Cameroon?

Ba Stéphanie batile: “Ilyo twafikile fye mu Cameroon nalelwala amalwele ayanono ayengi, lelo caliweme pantu baleng’undapa libili libili kabili  naleumfwako bwino nga bang’undapa.” Yehova alipaalile ba Stéphanie na bena mwabo pa fyo baleshipikisha. Ba Alain batile: “Ilyo twaile mu kubila imbila nsuma mu mushi wa Katé uwabela ukutali sana, twalisangile abantu abengi abalefwaya ukusambilila Baibolo. Pa numa twalitendeke ukulasambilisha aba bantu Baibolo ukubomfya foni. Babili pali aba twalesambilisha Baibolo balibatishiwe, kabili ne bumba lya bakasabankanya nalyo lyalipangilwe.” Ba Stéphanie balandile no kuti: “Takwaba icingalenga umuntu aba ne nsansa ukucila pa kwafwa abantu ica kuti baipeela na kuli Yehova. Apo twatendekela ukubombela kuno, twaliba ne nsansa pantu tulafwa abantu abengi ukuipeela kuli Yehova.” Pali ino nshita ba Alain na ba Stéphanie babombela mu muputule.

Ba Gisèle babatishiwe ninshi bali pa sukulu apo balesambilila ifya budokota mu Italy. Balitemenwe ukumona ifyo bapainiya abaupana abalebasambilisha Baibolo ba-angwishe imikalile, kabili ici calengele balefwaisha ukulabombesha mu mulimo wa kwa Lesa. E co ba Gisèle balitendeke bupainiya bwa nshita yonse ninshi tabalapwisha ne sukulu.

Ba Gisèle balefwaisha sana ukuya mu kubombesha mu mulimo wa kwa Lesa ku Cameroon, lelo kwali ifyabasakamike. Batile: “Ukuya ku Cameroon kwali no kulenga bampoka insambu sha kwikala mu Italy, kabili nali no kusha ifibusa na balupwa abo naleikala nabo ku Italy.” Na lyo line, mu May mu 2016, ba Gisèle balikuukiile ku Cameroon. Ilyo papitile inshita, ba Gisèle balyupilwe kuli ba Léonce, kabili iofeshi lya musambo ilya ku Cameroon lyabebele ukuti baye mu kubombela kwi tauni lya Ayos, uko bakabila ba Bufumu bacepa sana.

Bushe imikalile ku Ayos yali shani? Ba Gisèle batile: “Ilingi line takwaleba amalaiti pa milungu iingi, kabili tatwalecaja na mafoni. Kanshi ilingi line tatwalebomfya amafoni. Nalisambilile ukwipikila pa nkuni, kabili twaleya mu kutapa amenshi ubushiku ne cibaala ninshi natusanika na amatoci. Pantu uko twaletapa amenshi takwaleba abantu abengi ubushiku.” Finshi fya-afwile ba Gisèle na bena mwabo ukushipikisha? Ba Gisèle balandile ukuti: “Umupashi wa kwa Yehova walitwafwile ukushipikisha, kabili ine na bena mwandi twalekoseleshanya. E lyo balupwa ne fibusa nabo inshita shimo baletukoselesha kabili baletupeelako ne ndalama.”

Bushe ba Gisèle balitemwa filya babwelele ku calo ca ku mwabo? Batile: “Ee! Nalitemwa icine cine. Pa kubala twaleba sana na mafya kabili twalefuupuka, lelo ilyo twacimfishe aya amafya, ine na bena mwandi twaumfwile ukuti twacitile fye filya fine twalingile ukucita. Twalicetekela Yehova kabili twalipalama sana kuli ena.” Ba Léonce na ba Gisèle balisangilwe kwi Isukulu lya Bakabila ba Bufumu, kabili pali ino nshita ni bapainiya baibela aba pa nshita inono.

Nga filya abalondo be sabi baba abashipa no kushipikisha amafya ayengi pa kuti bekate isabi ilingi, bonse ababwelela ku fyalo fya ku mwabo balaipeelesha no kwafwa abantu ababa no mutima uusuma abafwaya ukukutika imbila nsuma ya Bufumu. Ukwabula no kutwishika, Yehova takalabe ifyo aba bakasabankanya ababombesha baipeelesha, no kutemwa uko balanga kwi shina lyakwe. (Nehe. 5:19; Heb. 6:10) Nga ca kuti mwikala ku calo cimbi kabili bakasabankanya mu calo cenu balicepa, bushe te kuti mutemwe ukubwelelamo ku calo cenu? Nga mwabwelelamo, Yehova akamupaala nga nshi.—Amapi. 10:22.