1, 2. (a) Mulimo nshi Yesu abikileko sana amano, kabili mulandu nshi? (b) Apo “tubombela pamo na Lesa,” finshi tulingile ukucita pa kuti tulebomba bwino?

YESU KRISTU ali ni kabasa kabili kasambilisha. (Marko 6:3; Yoh. 13:13) Alishibe sana ukubomba imilimo yonse ibili. Apo ali ni kabasa, alisambilile ifya kubomfya ifibombelo ifyo alebomfya pa kubasa pa kuti alepanga ifintu ifisuma. Yesu alishibe bwino Amalembo kabili ilyo alebila imbila nsuma aleyabomfya sana pa kwafwa abantu ukumfwikisha icine caba mu Cebo ca kwa Lesa. (Mat. 7:28; Luka 24:32, 45) Ilyo Yesu afishishe imyaka 30, alilekele ukubomba umulimo wa kubasa pantu alishibe ukuti ukusambilisha abantu icine pali Lesa e kwacindamishe. Alandile ukuti cimo ico Lesa amutumiine pano calo ni ku kubila imbila nsuma ya Bufumu bwa kwa Lesa. (Mat. 20:28; Luka 3:23; 4:43) Yesu abikile sana amano ku kubila imbila nsuma kabili alefwaya na bambi balebombako uyu mulimo.—Mat. 9:35-38.

² Nalimo te kuti tube bakabasa, lelo ni fwe bakasambilisha. Uyu mulimo twakwata uwa kubila imbila nsuma walicindama pantu “tubombela pamo na Lesa.” (1 Kor. 3:9; 2 Kor. 6:4) Twalishiba ukuti “Icebo [ca kwa Yehova] conse ca cine.” (Amalu. 119:159, 160) E co tufwaila ‘tulelungika pa kusambilisha icebo ca cine’ ilyo tulebila imbila nsuma. (Belengeni 2 Timote 2:15.) Kanshi e cilenga tuletwalilila ukwishibilako ifya kubomfya Baibolo iyo tubomfya sana pa kusambilisha abantu icine pali Yehova, pali Yesu na pa Bufumu. Pa kuti  tulesambilisha bwino abantu icine, icilonganino ca kwa Yehova calipekanya impapulo isho tulingile ukwishiba bwino ifya kushibomfya. Ishi ni Mpapulo Tubomfya pa Kusambilisha Abantu Baibolo.

3. Finshi tulingile ukubikako sana amano muli iyi inshita tushele nayo iya kubilamo imbila nsuma, kabili ilembo lya Imilimo 13:48 kuti lyatwafwa shani ukucita ifi?

³ Nalimo kuti mwatontonkanya icilenga twilaita ishi mpapulo ukuti Impapulo Tubomfya pa Kubila Imbila Nsuma, lelo tuleshita ukuti Impapulo Tubomfya pa Kusambilisha Abantu Baibolo. “Ukubila” kwalola mu kweba fye abantu imbila nsuma; lelo “ukusambilisha” kwalola mu kulanshanya na bantu imbila nsuma pa kuti yabafika pa mutima kabili balafwaya no kulakonka ifyo balesambilila. Muli iyi nshita tushele nayo iya kubila imbila nsuma, tulingile ukubika sana amano ku kutendeka amasambililo ya Baibolo no kusambilisha abantu icine. Ici cilolele mu kuti tufwile ukubika sana amano ku kufwaya bonse ‘ababa no mutima uusuma uufwaya umweo wa muyayaya’ no kubafwa ukutendeka ukubombela Yehova.—Belengeni Imilimo 13:44-48.

4. Kuti twaishiba shani ‘ababa no mutima uusuma uufwaya umweo wa muyayaya,’ kabili kuti twabasanga shani?

⁴ Kuti twaishiba shani ‘ababa no mutima uusuma uufwaya umweo wa muyayaya’? Nga filya fine cali mu nshita ya batumwa, kuti twasanga fye aba bantu nga tulebila imbila nsuma. Kanshi tulingile ukulacita filya fine Yesu alandile ukuti tulecita. Atile: “Mu musumba onse nelyo umushi umo mwaingila, fwayenimo umuntu uulefwaya ukumfwa.” (Mat. 10:11) Tatwenekela abantu aba bumbimunda, aba cilumba nelyo abashatemwa ifya kwa Lesa ukufwaya ukukutika imbila nsuma. Tufwaya abantu abafumacumi, abaicefya kabili ababa ne nsala ya kwishiba icine. Kuti twalinganya uyu mulimo wa kufwaya aba bantu ku fyo Yesu uwali kabasa alecita pa kufwaya ifimuti ifisuma ifya kupangamo ifipuna, ifiibi, amakoli, ne fintu fimbi. Nga asanga icimuti icisuma, alebuula ifibombelo fyakwe no kufibomfya bwino pa kuti apange ifyo alefwaya. Na ifwe ifi fine e fyo tulingile ukucita pa kulenga abafwaya ukusambilila icine baba abasambi.—Mat. 28:19, 20.

5. Finshi tulingile ukwishiba pa mpapulo tubomfya pa kusambilisha abantu Baibolo? Langilileni. (Moneni icikope pa ntendekelo ya cino cipande.)

⁵ Cila cibombelo calikwata umulimo bacibomfeshako. Tontonkanyeni pa fibombelo ifyo Yesu alebomfya pa kubasa. * Alikwete ifibombelo fya kubomfya pa kupima no kuputula ifimuti; pa kushila, pa kutula, pa kusuntinkanya na pa kulinganya imbao; e lyo na pa kubomba imilimo imbi pa kuti apange ico alefwaya. Ifi fine e fyo caba na ku mpapulo tubomfya pa kusambilisha abantu Baibolo. Cila lupapulo lwalikwata umulimo lubomba. Kanshi natulande pa mpapulo twakwata isho tubomfya pa kusambilisha abantu Baibolo ne fyo tulingile ukulashibomfya.

6, 7. (a) Mubomfya shani amakardi apaba webusaiti yesu? (b) Milimo nshi ibili utupepala twa kwitilapo abantu mu kulongana tubomba?

⁶ Amakardi Apaba Webusaiti Yesu. Aya amakardi yanono lelo kuti twayabomfya pa kuti abantu batwishibe kabili beshibe na webusaiti yesu. Nga baya pa webusaiti, kuti baishibilapo na fimbi pali ifwe kabili kuti balomba ukuti balebasambilisha Baibolo. Abantu ukucila pali 400,000 balilomba pa webusaiti ya jw.org ukuti balebasambilisha Baibolo kabili abantu abengi cila bushiku balalomba amasambililo ya Baibolo. Kuti mulesendako aya makardi pa kuti mulepeelako abantu konse uko muli.

⁷ Utupepala twa Kwitilapo Abantu. Utupepala twa kwitilapo abantu mu kulongana tatulenga fye abantu batwishiba lelo tulalenga baishiba no kutila kuti twabasambilisha Baibolo nga balefwaya. Balembapo ati: “Mulesambilila Baibolo ne  Nte sha kwa Yehova.” Lyena umuntu umwine kuti asalapo nga alefwaya ukusambilila Baibolo “pa kulongana kwesu” ‘nelyo nga alefwaya uwa kumusambilisha.’ Kanshi utu tupepala tulalenga abantu batwishiba kabili pa nshita imo ine tulalenga “abaishiba ukuti balakabila ifya kwa Lesa” batendeka ukusambilila Baibolo. (Mat. 5:3) Na lyo line, abantu kuti baleisa mu kulongana nangu balefwaya ukulasambilila Baibolo nelyo iyo. Nga balelongana, bakamona kabili bakeshiba ifyo tusambilisha abantu Baibolo.

8. Mulandu nshi abantu balingile ukwishila mu kulongana nangu fye muku umo? Landeni pa cacitike.

⁸ Ukutwalilila ukweba abantu ukwisa mu kulongana kwalicindama. Mulandu nshi? Pantu bakamona ifyo tuipakisha ifya kulya fya ku mupashi ifingi ilyo tuli pa kulongana e lyo ne fyo aba muli Babiloni Mukalamba bashakwata ifi fya kulya. (Esa. 65:13) Ifi fine e fyo ba Ray na ba Linda abaupana aba ku United States basangile. Basalilepo ukutendeka ukuya ku calici. Balisumine muli Lesa kabili balekabila ifya kwa Lesa, e ico batendeke ukuya kwi calici limo na limo mu musumba baleikala. Muli uyu musumba mwali amacalici ayengi no tubungwe twa mapepo utwingi. Ilyo bashilatendeka ukuya kuli aya macalici, batile kwi calici uko bali no kulapepa, balingile ukusambililako fimo ilyo balelongana kabili imibele ya ba muli ico icalici ne fyo bacita filingile ukulanga ukuti babombela Lesa. Pa myaka iingi iyo baile ku macalici yonse, tabasambilileko nangu cimo kabili imifwalile ya ba muli aya macalici tayaweme. Ilyo bafumine mwi calici lya kulekeleshako pa macalici batantike ukuti bali no kuyako, ba Linda baile ku ncito e lyo ba Ray bena baile ku ng’anda. Ilyo baleya ku ng’anda, bapitile mupepi ne Ng’anda ya Bufumu kabili batontonkenye abati, ‘Kanje imone ificitika mu Ng’anda ya Bufumu.’ Ala balitemenwe sana ifyo basangile! Bonse mu Ng’anda ya Bufumu bali ne nsansa, abayangusha kabili balifwele bwino. Ba Ray baikele ku ntanshi kabili balitemenwe sana ifyo basambilile! Cali fye nga filya fine umutumwa Paulo alandile pa muntu uwaisa mu kulongana pa muku wa kubalilapo no kutila: “Lesa aba muli imwe cine cine.” (1 Kor. 14:23-25) Ba Ray batendeke ukuya mu kulongana lyonse pa Mulungu, kabili pa numa batendeke no kuya mu kulongana konse ukwa mu kati ka mulungu. Ba Linda nabo balitendeke ukulongana, kabili bonse babili balicilile pa myaka 70 ilyo batendeke ukusambilila Baibolo no kubatishiwa.

9, 10. (a) Mulandu nshi amatrakiti yayangukila ukubomfya pa kutendeka ukulanshanya na bantu? (b) Londololeni ifya kubomfya trakiti itila, Bushe Ubufumu bwa kwa Lesa ni Cinshi?

⁹ Amatrakiti. Twalikwata amatrakiti 8 ayayanguka ukubomfya kabili ayabomba bwino ayo tubomfya pa kutendeka ukulanshanya na bantu. Ukutula apo yatendekele ukufuma mu 2013, amatrakiti ayapulintwa yalifika nalimo amabilioni 5. Ico aya amatrakiti yawamina ni co yalembwa mu nshila imo ine, kanshi nga mwaishiba ifya kubomfya imo ninshi kuti mwabomfya yonse. Kuti mwabomfya shani trakiti ukutendeka ukulanshanya na bantu?

¹⁰ Nalimo kuti mwasalapo ukupeela umuntu trakiti itila, Bushe Ubufumu bwa kwa Lesa ni Cinshi? Kuti mwamulanga icipusho pe bula lya kubalilapo no kumwipusha ati: “Bushe mwalibwishiba Ubufumu bwa kwa Lesa? Bushe kuti mwatila . . . ?” Lyena mwebeni asalepo cimo pa fyasuko fyabapo fitatu. Ukwabula ukumweba nga ca kuti nalungika nelyo iyo, kabiyeni mu kati ka trakiti apo balemba ati, “Ifyo Baibolo Ilandapo.” Lanshanyeni amalembo babikapo, Daniele 2:44 na Esaya 9:6. Uo mulelanshanya nankwe nga nakwata inshita, kuti mwatwalilila ukulanshanya. Lyena pa kulekelesha mulangeni icipusho pe bula lya kulekeleshako apo balemba ati, “Ifyo Mufwile Ukulatontonkanyapo” icitila: “Bushe abantu bakalaikala shani ilyo Ubufumu bwa kwa Lesa bukalateka?” Ukucita ifi kuti kwalenga  mwakwata apa kwisatendekela ukulanshanya nankwe. Nga mwabwelelako, kuti mwaya mwi sambililo 7 muli broshuwa ya Imbila Nsuma Ukufuma Kuli Lesa! iyaba pa mpapulo tubomfya ukutendeka amasambililo ya Baibolo.

11. Cinshi balembela amamagazini, kabili finshi tulingile ukwishiba pali aya amamagazini?

¹¹ Amamagazini. Ulupungu lwa kwa Kalinda na Loleni! e mamagazini ayapilibulwa no kusabankanishiwa sana mwi sonde lyonse! Apo yalasabankanishiwa mwi sonde lyonse, amalyashi yaba mu fipande fikalamba malyashi ayo abantu mu ncende shalekanalekana bengatemwa. Tufwile ukuyabomfya pa kulenga umuntu afwaya ukwishibilapo na fimbi pa fintu ifyacindama muno nshiku. Pa kuti tulepeela abantu impapulo abo shingafwa sana, tufwile ukwishiba abo balembela ishi impapulo.

12. (a) Ni bani balembela Loleni!, kabili cinshi bailembela? (b) Fisuma nshi fyacitike ilyo mwapeele abantu ulu lupapulo?

¹² Loleni! Abo balembela bantu abashaishiba nangu cimo pali Baibolo nelyo abashaishibapo ifingi. Nalimo tabaishibapo nangu cimo pa fisambilisho fya Bena Kristu nangu tabacetekela imipepele yonse nelyo bamona kwati ifyaba mu Baibolo te kuti fibafwe. Ico balembela Loleni! kwafwa uulebelenga pa kuti ashininkisha ukuti Lesa eko aba. (Rom. 1:20; Heb. 11:6) Ilafwa uulebelenga ukutetekela ukuti Baibolo “ca cine cebo ca kwa Lesa.” (1 Tes. 2:13) Loleni! itatu iya mu 2018 yakwata imitwe itila: “Ifya Kucita pa Kuba ne Nsansa,” “Ifintu 12 Ifingafwa Indupwa,” na “Ifingafwa Abafwililwe.”

13. (a) Ni bani balembela Ulupungu lwa kwa Kalinda ulwa bantu bonse? (b) Fisuma nshi fyacitike ilyo mwapeele abantu ulu lupapulo?

¹³ Ulupungu lwa kwa Kalinda, ulwa bantu bonse lwena balembela abantu abacindika Lesa ne Cebo cakwe. Nangu ca kuti balishibako fimo pali Baibolo, tabaishiba bwino ifyo isambilisha. (Rom. 10:2; 1 Tim. 2:3, 4) Ulupungu lwa kwa Kalinda lutatu ulwa mu 2018 lwakwata imitwe iitila: “Bushe Ifyo Baibolo Ilanda Filatwafwa Muno Nshiku?,” “Bushe Ifintu Fikaba Shani ku Ntanshi?,” na “Bushe Lesa Alimubikako Amano?”

14. (a) Mulimo nshi amavidio yane ayaba pa mpapulo tubomfya pa kusambilisha abantu Baibolo yabomba? (b) Fisuma nshi fyacitike ilyo mwatambishe abantu aya mavidio?

¹⁴ Amavidio. Mu nshita Yesu ali pano calo, kabasa alebomfya fye ifibombelo ifya ku minwe ifyayanguka. Lelo ababasa muno nshiku balikwata ifibombelo ifibomba na malaiti pamo nga soo, ifya kutulilako, ifya kupalilako imbao, ifya kutelelesha imbao e lyo ne fyapala ifi. Na ifwe pali ino nshita tatwakwata fye impapulo shapulintwa lelo twalikwata na mavidio ayo tutambisha abantu. Pa mpapulo tubomfya pa kusambilisha abantu Baibolo paba na mavidio yane ayatila: Mulandu Nshi Mulingiile Ukusambilila Baibolo?, Bushe Isambililo lya Baibolo Liba Shani?, Finshi Ficitika pa Ng’anda ya Bufumu?, na Bushe Inte sha kwa Yehova ni Bani? Kuti cawama twatambisha abantu amavidio ayalepa amamineti yabili no kucepako ilyo twalanshanya nabo pa muku wa kubalilapo. Ayalepa ukucila pa mamineti yabili yena kuti cawama twatambisha abantu ilyo tulecita ifipempu fya kubwelelamo nelyo twatambisha abakwete inshita. Aya amavidio yalafika sana abantu pa mutima kabili yalalenga balafwaya ukusambilila Baibolo no kulaisa mu kulongana.

15. Landeni ifyacitike ifilanga ukuti abantu balatemwa sana ukutamba amavidio mu lulimi lwabo.

¹⁵ Ku ca kumwenako, nkashi umo asangile umwanakashi uwafumine ku Micronesia kabili ululimi lwakwe ciYapese. Nkashi alitambishe uyu mwanakashi vidio itila, Mulandu Nshi Mulingiile Ukusambilila Baibolo? iya mu ciYapese. Ilyo umwanakashi atendeke ukutamba iyi vidio, atile: “Iye ulu lulimi lwandi. Napapa sana! Imilandile ya uyu umwaume ilelanga fye ukuti afuma pa cishi  apo nafuma. Alanda ululimi lwandi!” Ilyo apwishishe ukutamba, alandile ati ali no kuyabelenga no kutamba fyonse ifyaba pa jw.org mu lulimi lwakwe. (Linganyeniko Imilimo 2:8, 11.) Kwali na cimbi icacitike ku United States. Nkashi atumiine umwanasenge wakwe umwaume uwaleikala ku calo cimbi linki ya vidio itila Mulandu Nshi Mulingiile Ukusambilila Baibolo? Uyu mwaume alitambile iyi vidio mu lulimi lwakwe kabili atumiine banasenge ifyebo pa Intaneti no kubeba ati: “Nalitemwa palya balanga mu vidio umubifi alelenga ifyabipa filecitika pano calo. Nalilembesha no kulembesha ukuti balensambilisha Baibolo.” Uyu mwanasenge wa kwa uyu nkashi ekala mu calo umo babinda Inte sha kwa Yehova!

16. Londololeni ico balembela broshuwa ya: (a) Mulekutika Kuli Lesa pa Kuti Mukekale Umuyayaya. (b) Imbila Nsuma Ukufuma Kuli Lesa! (c) Ni Bani Bacita Ifyo Yehova Afwaya Muno Nshiku?

¹⁶ Amabroshuwa. Kuti twasambilisha shani umuntu icine uushaishibisha ukubelenga nelyo uo kushaba impapulo mu lulimi lwakwe? Kuti twabomfya broshuwa itila, Mulekutika Kuli Lesa pa Kuti Mukekale Umuyayaya. * Kabili kuti twabomfya broshuwa itila, Imbila Nsuma Ukufuma Kuli Lesa! pa kutendeka isambililo lya Baibolo. Kuti mwalanga uo mulelanshanya nankwe amasambililo 14 ayaba ku numa ya broshuwa no kumwipusha isambililo atemwapo sana. Lyena kuti mwatendeka ukumusambilisha muli ilyo isambililo. Bushe mwalitala amweshapo ukucita ifi ilyo mulecita ifipempu fya kubwelelamo? Broshuwa ya butatu iyaba pa mpapulo tubomfya pa kusambilisha abantu Baibolo ni broshuwa itila, Ni Bani Bacita Ifyo Yehova Afwaya Muno Nshiku? Ico bailembela ni pa kuti ileyafwa abasambi ba Baibolo ukwishiba icilonganino ca kwa Yehova. Nga mulefwaya ukwishiba ifya kubomfya iyi broshuwa ilyo mulesambilisha abantu Baibolo, moneni Akatabo ka Mikalile ya Bwina Kristu no Mulimo Tubomba aka mu March 2017.

17. (a) Cinshi balembela ifitabo tubomfya pa kusambilisha abantu Baibolo? (b) Cinshi bonse abafikapo ukubatishiwa balingile ukucita, kabili mulandu nshi?

¹⁷ Ifitabo. Pa numa ya kutendeka isambililo lya Baibolo muli broshuwa, kuti mwalekela mwi sambililo ili lyonse no kutendeka ukusambilila mu citabo citila, Bushe Cinshi Baibolo Isambilisha? Ici citabo kuti cayafwa umuntu ukwishiba amasambililo ya mu Baibolo aya kutendekelako. Nga mwapwisha ici citabo kabili umusambi alelunduluka, kuti mwatwalilila ukumusambilisha mu citabo citila, Ifyo Mwingatwalilila Ukutemwa Lesa. Ici citabo kuti cayafwa umusambi ukwishiba ifya kubomfya lyonse amashinte ya mafunde aya mu Baibolo. Nangu ca kuti umusambi abatishiwa, alingile ukupwisha ukusambilila mu fitabo fyonse fibili. Ukucita ifi kukamwafwa ukuba ne citetekelo icakosa.—Belengeni Abena Kolose 2:6, 7.

18. (a) Cinshi ilembo lya 1 Timote 4:16 litukoselesha ukucita, kabili finshi fingafumamo nga twacita ifi? (b) Ilyo tulebomfya Impapulo Tubomfya pa Kusambilisha Abantu Baibolo, cinshi tulingile ukulafwaisha ukucita?

¹⁸ Fwe Nte sha kwa Yehova twalipeelwa umulimo wa kubila “amashiwi ya cine aya mbila nsuma” ayengalenga abantu baba no mweo wa muyayaya. (Kol. 1:5; belengeni 1 Timote 4:16.) E ico twalikwata Impapulo Tubomfya pa Kusambilisha Abantu Baibolo ishitwafwa ukubila iyi mbila nsuma. (Moneni akabokoshi kaleti “ Impapulo Tubomfya pa Kusambilisha Abantu Baibolo.”) Kanshi natulebomfya bwino ishi mpapulo. Cila kasabankanya kuti asalapo ulupapulo lwa kupeela umuntu e lyo na lintu engamupeela. Ico tufwaisha te kupeela fye abantu impapulo ishingi; nelyo ukupeela abantu abashifwaya ukukutika imbila tubila. Ico tufwaisha kulenga abantu abaicefya kabili abatemwa ifya kwa Lesa, e kutila ‘ababa no mutima uusuma abafwaya umweo wa muyayaya’ baba abasambi.—Imil. 13:48; Mat. 28:19, 20.