ICIPANDE CA KUSAMBILILAMO 41
Ifyo Twingafwa Abasambi ba Baibolo pa kuti Balunduluke no Kubatishiwa—Ulubali 1
“Mwalimoneka ukuti ni mwe kalata wa kwa Kristu uwalembwa na ifwe fwe babomfi.”—2 KOR. 3:3.
ULWIMBO 78 ‘Ukusambilisha Icebo ca kwa Lesa’
IFYO TWALASAMBILILA *
Bushe kuli icingalenga aba mu cilonganino bonse basekelela ukucila pa kumona umusambi wa Baibolo uo batemwa abatishiwa? (Moneni paragrafu 1)
1. Finshi ilembo lya 2 Abena Korinti 3:1-3 lilanda ifilenga twaishiba ukuti ukusambilisha umuntu Baibolo no kumulenga abatishiwa lishuko nga nshi? (Moneni icikope pa nkupo.)
BUSHE mumfwa shani nga mwamona umusambi wa Baibolo umo mu cilonganino cenu abatishiwa? Ukwabula no kutwishika mulasekelela icine cine. (Mat. 28:19) Kabili nga ca kuti ni mwe mwalemusambilisha, mulatemwa nga nshi ukumona abatishiwa no kuba Inte ya kwa Yehova! (1 Tes. 2:19, 20) Abasambi ba Baibolo nga babatishiwa baba kwati ni ‘bakalata ba kutasha’ ku ba mu cilonganino bonse, te ku balebasambilisha fye.—Belengeni 2 Abena Korinti 3:1-3.
2. (a) Cipusho nshi icacindama ico tulingile ukutontonkanyapo, kabili mulandu nshi? (b) Bushe isambililo lya Baibolo ni cinshi? (Moneni futunoti.)
2 Twalitemwa sana ukumona ukuti pa myaka ine iyapita, mwi sonde lyonse twaletungulula amasambililo ya Baibolo * nalimo 10 milioni cila mweshi. Kabili muli iyi ine myaka, abantu nalimo ukucila pali 280,000 balebatishiwa cila mwaka no kuba Inte sha kwa Yehova kabili abasambi ba kwa Yesu Kristu. Finshi twingacita pa kuti twafwe aba abengi abo tusambilisha Baibolo ukubatishiwa? Apo Yehova alitekanya kabili alipeela abantu inshita ya kusambilila icine no kuba abasambi ba kwa Kristu, tulingile ukwesha apo twingapesha ukubafwa ukulunduluka no kubatishiwa bwangu bwangu. Inshita isheleko naicepa icine cine!—1 Kor. 7:29a; 1 Pet. 4:7.
3. Finshi twalasambilila muli cino cipande pa fya kutungulula amasambililo ya Baibolo?
3 Pa mulandu wa kuti umulimo wa kulenga abantu baba abasambi naucindama sana pali ino nshita, Ibumba Litungulula lyalipwishe amaofeshi ya misambo ifyo twingacita pa kwafwa abasambi ba Baibolo abengi ukulunduluka no kubatishiwa. Muli cino cipande e lyo na mu cikonkelepo, twalamona ifyo twingasambilila kuli bapainiya ababomba pa myaka iingi, bamishonari, e lyo na bakangalila ba muputule. * (Amapi. 11:14; 15:22) Aba aba bwananyina balilanda pa fyo bakasabankanya na basambi bengacita ifingalenga abasambi balelunduluka. Muli cino cipande, twalasambilila pa fintu 5 ifyo umusambi umo na umo alingile ukucita pa kuti alunduluke no kubatishiwa.
MULESAMBILILA CILA MULUNGU
Kuti mwaipusha umusambi nga kuti mwaikala pamo ilyo mulelanshanya ifyaba mu Baibolo (Moneni paragrafu 4 ukushinta ku 6)
4. Finshi tulingile ukwishiba nga ca kuti tuletungulula fye isambililo lya Baibolo pa nshita fye iinono ninshi natwiminina pa mwinshi?
4 Bamunyinefwe na bankashi abengi basambilisha abantu Baibolo ninshi beminine fye pa mwinshi. Nangu ca kuti ukucita ifi kuti kwalenga abantu batemwa ukulalanshanya nabo ifyaba mu Baibolo, ilingi line ukulanshanya kwa musango uyu kuba fye ukwipi kabili nalimo te kuti mulelanshanya nabo cila mulungu. Pa kuti balenge umuntu ukutemwa sana ifyaba mu Baibolo, bamunyinefwe na bankashi bamo balasenda inambala ya foni iya uyo muntu pa kuti bakamutumine foni nelyo meseji no kulanshanya nankwe ifya mu Baibolo ilyo ubushiku bamusambilisha tabulafika. Kuti batwalilila ukulanshanya nankwe muli iyi inshila pa myeshi iingi. Nomba bushe umusambi wa Baibolo kuti alunduluka aipeela na kuli Yehova no kubatishiwa nga ca kuti alebomfya fye inshita yakwe iinono na maka ukusambilila Icebo ca kwa Lesa? Awe te kuti alunduluke.
5. Finshi Yesu alandile pali Luka 14:27-33, ifyo twingabomfya pa kwafwa abo tusambilisha Baibolo?
5 Inshita imo Yesu alibomfeshe icilangililo pa kulondolola ifyo umuntu alingile ukucita nga alefwaya ukuba umusambi wakwe. Alandile pa muntu uulefwaya ukukuula ulupungu, e lyo na pa mfumu iilefwaya ukuya ku bulwi. Yesu alandile ukuti uulekuula ulupungu afwile ‘abala aikala pa nshi pa kuti amone ishingapooswapo’ pa kulupwisha, no kuti imfumu nayo ilingile yabala “yaikala pa nshi no kulanshanya ne mpanda mano” pa kuti imone nga ca kuti abashilika ili nabo kuti bayacimfya ubulwi. (Belengeni Luka 14:27-33.) Ifi fine e fyo Yesu alandile na pa muntu uulefwaya ukuba umusambi wakwe. Atile afwile ukutontonkanya sana pa fyo akulacita nga aba umusambi wa kwa Kristu. Kanshi tulingile ukulakoselesha abo tusambilisha Baibolo ukuti tulesambilila nabo cila mulungu. Nomba finshi twingacita pa kubakoselesha?
6. Finshi nalimo twingacita pa kwafwa abo tusambilisha Baibolo ukulunduluka?
6 Kuti mwabalilapo ukulalefyako inshita musambilila na abo musambilisha Baibolo ninshi namwiminina pa mwinshi. Ukucila ukulalanshanya fye nabo Ilembo limo, nalimo kuti mwatendeka ukulalanshanya Amalembo yabili. Nga ca kuti umusambi abelela ukulanshanya nankwe pa nshita iitali, kuti mwamwipusha nga kuliko uko mwingekala ilyo mulelanshanya. Ifyo aasuka kuti fyalenga mwaishiba nga alefwaisha ukusambilila Baibolo nelyo iyo. Lyena pa kuti mwafwe umusambi ukulunduluka bwangu, kuti mwamwipusha nga kuti atemwa ukulasambilila imiku ibili mu mulungu. Nomba kwaliba na fimbi ifyo mulingile ukucita ukulunda pa kulasambilila fye umuku umo nelyo ibili mu mulungu.
MULEPEKANYA ILYO MUSHILAYA MU KUSAMBILISHA UMUNTU BAIBOLO
Mulepekanya bwino ilyo mushilaya mukusambilisha umusambi Baibolo, kabili mulemulanga ifya kupekanya (Moneni paragrafu 7 ukushinta ku 9)
7. Finshi kasambilisha engacita pa kuti apekanye bwino ilyo ashilaya mu kusambilisha umuntu Baibolo?
7 Apo ni mwe bakasambilisha, lyonse mufwile ukulapekanya bwino ilyo mushilaya mu kusambilisha umuntu Baibolo. Kuti mwabalilapo ukubelenga ifyebo mwalaya mu kumusambilisha e lyo na malembo ayalimo. Mufwile ukumfwikisha ifishinka ifikalamba ifili mu fyebo mwalaya mu kumusambilisha. Mufwile ukutontonkanya sana pa mutwe wa cipandwa, pa tumitwe utunono, pa mepusho ayalimo, pa malembo batile “belengeni,” pa fikope, e lyo na mavidio ayengamwafwa ukulondolola ifyo mulemusambilisha. Ilyo mulepekanya muletontonkanya pa musambi, na pa fyo mwingamulondolwela ifyebo mu nshila iya-anguka pa kuti afyumfwikishe kabili alefikonka.—Nehe. 8:8; Amapi. 15:28a.
8. Finshi amashiwi umutumwa Paulo alembele pa Abena Kolose 1:9, 10 yatusambilisha pa kupepelako abo tusambilisha Baibolo?
8 Mulepepelako umusambi kuli Yehova ilyo mulepekanya ukuya mu kumusambilisha. Mule-eba Yehova ukuti alemwafwa ukufika umusambi pa mutima ilyo mulemusambilisha. (Belengeni Abena Kolose 1:9, 10.) Muletontonkanishisha libela pa fyo mulemona ukuti nalimo kuti fyakosela umusambi wenu ukumfwikisha nelyo ukusumina. Muleibukisha ukuti ico mufwaya kwafwa umusambi wenu ukulunduluka no kubatishiwa.
9. Bushe kasambilisha kuti aafwa shani umusambi wakwe ukupekanishisha isambililo? Londololeni.
9 Twenekela ukuti nga tulesambilisha umuntu Baibolo lyonse, kuti atendeka ukutasha pa fyo Yehova na Yesu batucitila kabili kuti alafwaisha ukusambilila na fimbi. (Mat. 5:3, 6) Pa kuti alenonkelamo sana, umusambi afwile ukulabika sana amano ku fyo alesambilila. Pa kumwafwa ukulabikako sana amano, mufwile ukumulondolwela ico cacindamina ukupekanishisha libela isambililo. Mulingile ukumweba ukuti pa kupekanishisha isambililo, afwile ukubelengelamo libela mu fyebo ali no kwisasambilila e lyo no kutontonkanya sana pa fyo engafibomfya. Finshi mwingacita pa kumwafwa ukupekanishisha isambililo? Kuti mwapekanishisha pamo nankwe pa kuti mumulange ifyo akalapekanya. * Mulingile ukumulondolwela ifyo engacita pa kuti alesanga amasuko ya mukulungatika. Kabili mufwile no kumwafwa ukwishiba ifya kushila pa mashiwi nelyo ifyebo ifingamwafwa ukwibukisha icasuko. Lyena mufwile ukumweba ukula-asuka mu mashiwi yakwe. Nga aleasuka mu mashiwi yakwe kuti mwaishiba nga ca kuti naumfwikisha ifyo alesambilila nelyo iyo. Kuli na fimbi ifyo mufwile ukukoselesha umusambi wenu ukulacita.
MULESAMBILISHA UMUSAMBI UKULALANSHANYA NA YEHOVA CILA BUSHIKU
Mulesambilisha umusambi wenu uwa Baibolo ifya kulanshanya na Yehova (Moneni paragrafu 10 na 11)
10. Mulandu nshi cacindamina ukulabelenga Baibolo cila bushiku, kabili cinshi umusambi wa Baibolo engacita pa kuti alenonkelamo sana mu kubelenga Baibolo?
10 Ukulunda pa kulasambilila Baibolo cila mulungu, umusambi akanonkelamo nga alecita ifintu fimo pa lwakwe cila bushiku. Alingile ukulalanshanya na Yehova. Kuti alanshanya shani nankwe? Kuti alanshanya na Yehova nga alekutika kuli ena no kulanda nankwe. Umusambi kuti akutika kuli Lesa nga alebelenga Baibolo cila bushiku. (Yosh. 1:8; Amalu. 1:1-3) Mufwile ukumulanga “Programu ya Kubelenga Baibolo” iyaba pa jw.org iyo mwingapulinta. * Pa kuti mumwafwe ukulanonkelamo sana mu fyo alebelenga mu Baibolo, mulemukoselesha ukulatontonkanya sana pa fyo ifyo alebelenga mu Baibolo filemusambilisha pali Yehova, e lyo na pa fyo engafibomfya mu bumi bwakwe.—Imil. 17:11; Yako. 1:25.
11. Bushe umusambi kuti asambilila shani ifya kupepa ukufuma pa nshi ya mutima, kabili cinshi cacindamina ukulapepa kuli Yehova lyonse?
11 Mulekoselesha umusambi ukulapepa cila bushiku pa kuti alelanda na Yehova. Ilyo muletendeka ukusambilila na lintu mwapwisha ukusambilila mulepepa ukufuma pa nshi ya mutima, kabili mulelumbula ishina lya musambi ilyo mulepepa. Nga alekutika ilyo mulepepa akasambilila ukulapepa ukufuma pa nshi ya mutima, no kuti afwile ukulapepa kuli Yehova Lesa ukupitila mwi shina lya kwa Yesu Kristu. (Mat. 6:9; Yoh. 15:16) Elenganyeni ifyo ukubelenga Baibolo cila bushiku (ukukutika kuli Yehova) no kulapepa (ukulalanda kuli Yehova) kukafwa umusambi wenu ukupalama sana Lesa! (Yako. 4:8) Umusambi wenu nga alecita ifi cila bushiku, akalunduluka kabili akaipeela kuli Lesa no kubatishiwa. Finshi fimbi mulingile ukucita pa kwafwa umusambi wenu?
MULEAFWA UMUSAMBI UKUBA CIBUSA WA KWA YEHOVA
12. Finshi kasambilisha engacita pa kwafwa umusambi ukuba cibusa wa kwa Yehova?
12 Umusambi tafwile ukutemwa fye ifyo alesambilila mu Baibolo, lelo fifwile no kumufika pa mutima. Cinshi twalandila ifi? Ni co ifyo umusambi alesambilila nga fyamufika pa mutima, kuti alafwaisha ukulafikonka. Yesu alesambilisha abantu ifintu ifingi, kabili baletemwa ukusambilila kuli ena. Nomba icalelenga ukuti balemukonka ni co ifyo alebasambilisha fyalebafika pa mutima. (Luka 24:15, 27, 32) Umusambi wenu afwile ukwishiba ukuti Yehova muntu wa cine cine, uwingaba cibusa wakwe. Afwile no kulamumona ukuti ni Wishi, ni Lesa wakwe, kabili ni Cibusa wakwe. (Amalu. 25:4, 5) Ilyo mulesambilisha umuntu Baibolo mulelenga alebika amano ku mibele ya kwa Lesa wesu iisuma nga nshi. (Ukufu. 34:5, 6; 1 Pet. 5:6, 7) Mufwile ukulacita ifi te mulandu ne fyo mulesambililapo. Muleafwa umusambi wenu ukulamona imibele ya kwa Yehova iisuma pamo ngo kutemwa, icikuuku, no luse. Yesu atile ‘ifunde ilikalamba kabili ilya ntanshi, kutemwa Yehova Lesa obe.’ (Mat. 22:37, 38) Muleafwa umusambi wenu ukutemwa Yehova.
13. Landeni fimo ifyo twingacita pa kulenga umusambi wa Baibolo aishiba imibele ya kwa Yehova.
13 Ilyo mulelanshanya no musambi, mulelanda pa co mwatemenwa Yehova. Ukucita ifi kukalenga umusambi akeshibe ukuti alingile ukutemwa Lesa no kuba cibusa wakwe. (Amalu. 73:28) Ku ca kumwenako, bushe mu citabo mubomfya pa kumusambilisha nelyo mwi lembo, mwaliba amashiwi yamo ayo mwatemwa kabili ayamufika pa mutima ayalondolola ifyo Yehova aba no kutemwa, amano, umulinganya nelyo amaka? Mule-ebako umusambi wenu no kumulondolwela ukuti ifi fyaba pa fyalenga mutemwe sana Shifwe wa ku muulu. Kwaliba na fimbi ifyo umusambi wa Baibolo onse alingile ukucita pa kuti alunduluke no kubatishiwa.
MULEKOSELESHA UMUSAMBI UKULALONGANA
Mulekoselesha umusambi wenu uwa Baibolo ukulasangwa mu kulongana ilyo mwatendeka fye ukumusambilisha!(Moneni paragrafu 14 na 15)
14. Mashiwi nshi ayaba pa AbaHebere 10:24, 25 ayalanda pa kulongana ayengafwa umusambi wa Baibolo ukulunduluka?
14 Bonse fye tulafwaya abasambi besu aba Baibolo balunduluka no kubatishiwa. Cimo icacindama ico twingacita pa kubafwa, kulabakoselesha ukulasangwa mu kulongana. Bakasambilisha abaishiba sana ukubomba umulimo wa kulenga abantu baba abasambi balanda ukuti, abasambi abashikokola ukutendeka ukulongana balalunduluka bwangu. (Amalu. 111:1) Bakasankanya bamo balalondolwela abasambi ukuti ifyebo fimo bakafisambilila pe sambililo lya Baibolo e lyo fimbi bakafisambilila pa kulongana. Kuti mwabelenga no musambi ilembo lya AbaHebere 10:24, 25 no kumulondolwela ifyo akanonkelamo nga asangwa ku kulongana. Kuti mwamutambisha vidio itila Finshi Ficitika pa Ng’anda ya Bufumu? * Muleafwa umusambi wenu ukwishiba ukuti ukulasangwa mu kulongana cila mulungu kwalicindama sana.
15. Finshi twingacita pa kuti tukoseleshe umusambi ukulalongana lyonse?
15 Finshi mwingacita nga ca kuti umusambi wenu talatendeka ukulongana nelyo tasangwa mu kulongana lyonse? Mulemwebako fimo ifyo mwatemenwe pa fyo mwasambilile mu kulongana ukwafumineko, kabili muleba abacincimuka ilyo mulemweba. Ukucita ifi kuti kwakoselesha umusambi, ukucila ukumwita fye ukusangwa mu kulongana. Kuti mwamupeela Ulupungu lwa kwa Kalinda nelyo Akatabo ka Mikalile no Mulimo Tubomba ako mulebomfya pa kulongana. Kuti mwamulanga ifyo mukasambilila pa kulongana kukonkelepo no kumwipusha ulubali lwa kulongana ulo engatemwapo. Ifyo umusambi wenu uwa Baibolo akomfwa no kumona nga asangwa ku kulongana pa muku wa kubalilapo, fikawama icine cine ukucila pa fyo amona no kumfwa pa kulongana ukuli konse ukwa mipepele imbi. (1 Kor. 14:24, 25) Akatemwa ukuba pamo na ba bwananyina ababa ne mibele iisuma iyo engapashanya, kabili abengamwafwa ukulunduluka no kubatishiwa.
16. Finshi tulingile ukucita pa kuti twafwe abasambi ba Baibolo ukulunduluka no kubatishiwa, kabili finshi tukasambilila mu cipande cikonkelepo?
16 Kuti twacita shani pa kuti tuleafwa abasambi ba Baibolo ukulunduluka no kubatishiwa? Kuti twa-afwa umusambi wa Baibolo umo na umo nga ca kuti tulemukoselesha ukulasambilila cila mulungu no kulapekanishisha limo isambililo ilyo tushilaya mu kumusambilisha. Tufwile no kumukoselesha ukulalanshanya na Yehova cila bushiku, kabili tulingile ukumukoselesha ukuba cibusa wa kwa Yehova. Cimbi ico tufwile ukucita, kukoselesha umusambi wa Baibolo ukulasangwa mu kulongana. (Moneni akabokoshi akali pe bula 12 akaleti “ Ifyo Abasambi ba Baibolo Balingile Ukucita pa Kuti Balunduluke no Kubatishiwa.”) Nomba mu cipande cikonkelepo tukalanda pa fintu na fimbi 5 ifyo bakasambilisha ba Baibolo bafwile ukucita pa kuti bafwe abasambi ukulunduluka no kubatishiwa.
ULWIMBO 76 Bushe Mumfwa Shani?
^ para. 5 Ukusambilisha umuntu ifintu kwalola mu kumwafwa ukwaluka mu fyo atontonkanya, ifyo omfwa nelyo ifyo acita ifintu fimo. Ilembo lya mwaka wa 2020, ilya kwa Mateo 28:19 lilatwibukishako ifyo cacindama ukusambilisha abantu Baibolo, e lyo no kubasambilisha ifyo bengacita pa kuti babatishiwe no kuba abasambi ba kwa Yesu Kristu. Muli cino cipande e lyo na mu cikonkelepo, twalasambilila ifyo twingacita pa kuti tuwamyeko ifyo tubomba uyu umulimo uwacindama nga nshi.
^ para. 2 UBULONDOLOSHI: Nga ca kuti mulalanshanya no muntu ukubomfya Baibolo e lyo no lupapulo lumo pa mpapulo tubomfya ukusambilisha abantu Baibolo nelyo ukubomfya ifyebo fyaba mu lupapulo, ninshi mulatungulula isambililo lya Baibolo. Kuti mwacita lipoti isambililo lya Baibolo nga ca kuti pa numa ya kulanga umuntu ifyo tusambilila, mwasambilila nankwe imiku ibili kabili nga namushininkisha ukuti mukatwalilila ukusambilila nankwe.
^ para. 3 Muli ifi fipande twalalanda na pali fimo ifyo twingacita ifyaba mu fipande fitila “Ukutungulula Amasambililo ya Baibolo Ayalunduluka,” ifyali mu Ubutumikishi Bwesu Ubwa Bufumu ukutendeka mu July 2004 ukufika mu May 2005.
^ para. 9 Tambeni vidio ya mamineti 4 iitila Ukusambilisha Umusambi Ifya Kupekanya. Mu JW Library®, kabiyeni apatila MEDIA > OUR MEETINGS AND MINISTRY > IMPROVING OUR SKILLS.
^ para. 10 Kabiyeni apatila AMASAMBILISHO YA MU BAIBOLO > IFYO MWINGABOMFYA PA KUSAMBILILA BAIBOLO.
^ para. 14 Mu JW Library®, kabiyeni apatila MEDIA > OUR MEETINGS AND MINISTRY > TOOLS FOR THE MINISTRY.
