ICIPANDE CA KUSAMBILILAMO 42
Ikatisheni Icine ico Mwaishiba
“Muleshininkisha ifintu fyonse; ikatisheni icawama.” —1 TES. 5:21.
ULWIMBO 142 Twikatishe Isubilo Twakwata
IFYO TWALASAMBILILA *
1. Cinshi calenga abantu abengi ukukanaishiba bwino Abena Kristu ba cine?
KWALIBA amacalici ayengi aya batila Bena Kristu, kabili batila bapepa Lesa mu nshila iyo afwaya. E calenga abantu abengi beishiba bwino bwino Abena Kristu ba cine! Bepusha ukuti, “Bushe kwaba fye ukupepa kwa cine kumo, atemwa bushe imipepele yonse ilapepa Lesa ukulingana ne fyo afwaya?” Bushe twalishinkisha ukuti fwe Nte sha kwa Yehova tusambilisha icine kabili tupepa Yehova mu nshila iyo afwaya? Cinshi calenga tushininkishe ukuti ukupepa kwesu e kwa cine? Natumone icalenga tushininkishe.
2. Cinshi calengele umutumwa Paulo ashininkishe ukuti ifyo aishibe e cine? (1 Abena Tesalonika 1:5)
2 Umutumwa Paulo alishininkishe ukuti ifyo aishibe e cine. (Belengeni 1 Abena Tesalonika 1:5.) Icalengele ukuti ashininkishe ukuti ifyo aishibe e cine, te pa mulandu wa kuti icine ico alesambilila calemulenga ukuba ne nsansa. Lelo icalengele ni co aleisambilisha sana Icebo ca kwa Lesa. Alicetekele ukuti “Amalembo yonse aya mushilo yafuma kuli Lesa.” (2 Tim. 3:16) Finshi asambilile ilyo aleisambilisha? Mu Malembo ayo Paulo aleisambilisha, asangilemo ubushininkisho bwa kuti Yesu e Mesia uo batile ali no kwisa. Ifi Paulo aishibe e fyo intungulushi sha baYuda shishalefwaya ukwishiba. Shilya intungulushi sha baYuda isha bumbimunda shalelanda ukuti shalesambilisha abantu icine pali Lesa, lelo shalecita ifyo Lesa apata. (Tito 1:16) Paulo tali nge shi intungulushi sha baYuda, pantu ena alecetekela fyonse ifyo alebelenga mu Malembo. Ali-ipekenye ukufunda e lyo no kucita fyonse ifyo Lesa afwaya.—Imil. 20:27.
3. Bushe tulingile ukwishiba fyonse pa kuti tushininkishe ukuti ifyo twasuminamo e cine? (Moneni na kabokoshi kaleti “ Imilimo ya kwa Yehova na Matontonkanyo Yakwe ‘Fyalifulisha ica Kutila te Kuti Tufipende.’”)
3 Bamo batontonkanya ukuti imipepele ya cine ilingile ukwasuka ifipusho fyonse, ukubikako fye ne fyo Baibolo ishalandapo. Bushe caliba fye bwino ukutontonkanya ifyo? Awe. Natulandeko pali Paulo. Akoseleshe abasumina banankwe ukuti “Muleshininkisha ifintu fyonse.” Na lyo line, alisumine ukuti kwali ifintu ifingi ifyo ashaishibe. (1 Tes. 5:21) Atile: “Tatwaishiba fyonse . . . Pantu pali nomba tumwena mu cilola ca cela icishilenga ifintu ukumonekesha.” (1 Kor. 13:9, 12) Paulo te fyonse aishibe, kabili na ifwe bene te fyonse twaishiba. Nangu cibe ifyo, Paulo alishibeko fimo ifyacindama ifyo alingile ukwishiba pali Yehova. Ifyo aishibe fyalilengele ashininkishe ukuti ifyo asumiinemo e cine.
4. Bushe kuti twashininkisha shani ukuti twalisanga icine, kabili finshi twingeshibilako Abena Kristu ba cine ifyo twalalandapo muli cino cipande?
4 Inshila imo iyo twingashininkishishamo ukuti ifyo twasuminamo e cine, kulinganya ifyo Yesu atile e fyo bakapepa ba kwa Yehova bafwile ukucita ku fyo Inte sha kwa Yehova bacita muno nshiku. Muli cino cipande, twalamona ukuti Abena Kristu ba cine (1) tabapepa utulubi, (2) balacindika ishina lya kwa Yehova, (3) balitemwa icine, na (4) balitemwana nga nshi.
TATUPEPA UTULUBI
5. Bushe Yesu asambilishe ukuti tulingile ukulapepa shani Lesa, kabili kuti twabomfya shani ifyo asambilishe?
5 Apo Yesu alitemwa sana Yehova, e o alepepa fye eka ilyo ali ku muulu na lintu ali pano isonde. (Luka 4:8) Asambilishe abasambi bakwe ukuti nabo bafwile ukulapepa fye Yehova. Yesu na basambi bakwe tabalebomfya ifimpashanya pa kupepa. Apo Lesa mupashi, takuli nangu cimo ico umuntu engapanga icingapalana nankwe. (Esa. 46:5) Nomba bushe cali ba fye ukupanga ifimpashanya fya batakatifu no kulafipepa? Awe. Mwi funde lya bubili pa Mafunde 10, Yehova atile: “Wilabasa icimpashanya nelyo conse icapala ica mu muulu ku muulu nelyo ica pe sonde . . . Wilafikontamina.” (Ukufu. 20:4, 5) Abantu abafwaya ukulapepa Lesa ukulingana ne fyo afwaya balishiba ukuti tabalingile ukulabomfya ifimpashanya pa kumupepa.
6. Bushe ifyo Inte sha kwa Yehova bacita pa kupepa bapashanya bani?
6 Abasambilila ifya kale basanga ukuti Abena Kristu ba kubalilapo balepepa fye Lesa eka. Ku ca kumwenako, icitabo cimo icilanda pa lyashi lya kale catile, “Abena Kristu ba kubalilapo nga balipatile icimusango ca kubomfya ifimpashanya mu fifulo fya kupepelamo.” Na muno nshiku mwine, Inte sha kwa Yehova tababomfya ifilubi nga filya fine Abena Kristu abaliko mu nshiku sha batumwa balecita. Tatupepa ifimpashanya fya “batakatifu” nelyo bamalaika, kabili tatupepa na Yesu wine. Tatupika salyuti kuli flagi nelyo ukucita ifili fyonse ifingalanga ukuti tulepepa icalo cesu. Nangu bengatupatikisha shani, tukalaumfwila amashiwi ya kwa Yesu aya kuti: “Yehova Lesa obe e o ulepepa.”—Mat. 4:10.
7. Bushe Inte sha kwa Yehova bapusana shani ne mipepele imbi?
7 Muno nshiku abantu abengi balitemwa ukukutika kuli bashimapepo balumbuka. Balitemwa sana aba bashimapepo babo ica kuti limo ni cikanga babapepe no kubapepa. Abantu abengi balaya ku bene ba aya macalici, balashita ifitabo fyabo, kabili balabapeela ne ndalama ishingi nelyo ukupeela akabungwe ako babamo. Na kabili bamo balasumina fye fyonse ifyo aba bashimapepo balanda. Balomfwa bwino ukumona bashimapepo babo, kwati fye bamona Yesu! Lelo abapepa Lesa ukulingana ne fyo afwaya tabakwata bashimapepo abo bakonka. Nangu ca kuti twalicindika abatungulula, tulomfwila ifyo Yesu atufundile. Atile: “Imwe bonse muli ba bwananyina.” (Mat. 23:8-10) Tatupepa abantu, nangu babe ni ntungulushi sha mapepo nelyo bakateka. Kabili tatutungilila imipepele yabo nangu ifyo balanda ukuti e bakapwisha amafya yonse ayo abantu bakwata. Twali-ipaatulako kabili tatuitumpa mu fya calo. Ifi e fyalenga tupusaneko ne mipepele ya batila Bena Kristu.—Yoh. 18:36.
TWALICINDIKA ISHINA LYA KUTI YEHOVA
Abena Kristu ba cine balebako abantu pali Yehova (Moneni paragrafu 8 ukushinta ku 10) *
8. Twaishiba shani ukuti Yehova afwaya tulecindika ishina lyakwe no kulenga lyaishibikwa ku bantu bonse?
8 Inshita imo Yesu apepele ukuti: “Tata, cindikeni ishina lyenu.” Yehova alyaswike ipepo lya kwa Yesu ilyo alandile ne shiwi ilikalamba ukufuma mu muulu ukuti ali no kucindika ishina lyakwe. (Yoh. 12:28) Lyonse ilyo Yesu alebila imbila nsuma alecindika ishina lya kwa Wishi. (Yoh. 17:26) Kanshi Abena Kristu ba cine bafwile ukulabomfya ishina lya kwa Lesa no kulaebako abantu bambi pali ili ishina.
9. Bushe Abena Kristu ba kubalilapo balangile shani ukuti balicindike ishina lya kwa Lesa?
9 Ilyo fye icilonganino capangilwe, Yehova “apilibukile ku bena fyalo ku kubuulamo abantu abe shina lyakwe.” (Imil. 15:14) Balya Bena Kristu ba kubalilapo baleumfwa bwino ukubomfya ishina lya kwa Lesa no kwebako abantu bambi pali ili ishina. Abatumwa na basambi balebomfya ishina lya kwa Lesa lintu balebila imbila nsuma, e lyo na lintu balelemba amabuuku ya mu Baibolo. * Ifi balecita fyalengele caishibikwa ukuti e bantu fye abalengele ishina lya kwa Lesa lyaishibikwa.—Imil. 2:14, 21.
10. Twaishiba shani ukuti Inte sha kwa Yehova e babila fye pe shina lya kwa Yehova?
10 Bushe Inte sha kwa Yehova balabila pe shina lya kwa Lesa? Ee. Natumone ifilangilila ifyo. Muno nshiku, intungulushi sha mapepo ishingi shalyesha ukufisa ishina lya kwa Lesa. Balifumya ishina lya kwa Lesa mu maBaibolo ayo bapilibula, kabili inshita shimo balalesha na bantu ukubomfya ili ishina mu macalici yabo. * Kanshi te kuti tutwishike no kutwishika ukuti ni Nte sha kwa Yehova fye e bacindika ishina lya kwa Lesa. Tulalenga ishina lya kwa Lesa lyaishibikwa ku bantu abengi ukucila imipepele imbi. Kanshi tulesha ukucita ifyo ishina lyesu lipilibula, e kutila ukuba Inte sha kwa Yehova! (Esa. 43:10-12) Twalipulinta amaBaibolo ya Amalembo ya Calo Cipya ukucila pali 240 milioni. Muli iyi Baibolo twalibwesesha ishina lya kwa Yehova ponse apo lifwile ukuba, apo bakapilibula ba maBaibolo yambi bafumya. Kabili tulapanga impapulo ishilanda pa fya mu Baibolo ishibomfya ishina lya kwa Lesa mu ndimi ukucila 1,000!
TWALITEMWA ICINE
11. Bushe Abena Kristu ba kubalilapo balangile shani ukuti balitemenwe icine?
11 Yesu alitemenwe sana icine, e kutila icine pali Lesa na fyonse ifyo alaya ukucita. Ifyo Yesu alecita fyalelangilila ukutila ifyo asumiinemo e cine, kabili alesambilisha na bantu icine. (Yoh. 18:37) Abasambi ba kwa Yesu nabo balitemenwe sana icine. (Yoh. 4:23, 24) Na kuba umutumwa Petro aitile ukupepa kwa Bena Kristu ukuti kwali ni nshila ya cine. (2 Pet. 2:2) Pa mulandu wa kuti Abena Kristu ba kubalilapo balitemenwe icine, balekaana intambi, imipepele, e lyo ne fyo abantu balelanda ifishali fya cine. (Kol. 2:8) Na muno nshiku mwine Abena Kristu ba cine balesha na maka ‘ukulaenda mu cine,’ e kutila balashininkisha ukuti fyonse ifyo basuminamo ne fyo bekala fileba ukulingana ne fyo Icebo ca kwa Lesa cilanda.—3 Yoh. 3, 4.
12. Finshi Ibumba Litungulula licita nga lyaishiba ukuti tulingile ukwalukako muli fimo, kabili mulandu nshi kubela ukwaluka?
12 Inte sha kwa Yehova muno nshiku tabalanda ukuti balishiba fyonse fye ifyaba mu Baibolo. Na bo bene inshita shimo balalufyanya ilyo bale-esha ukulondolola ifyo Baibolo isambilisha nelyo ifyo icilonganino cifwile ukutungululwa. Ici tacifwile ukutupapusha. Baibolo yalilondolola ukuti abantu ba kwa Lesa balaya baleishibilako icine. (Kol. 1:9, 10) Yehova alaya alesokola icine panono panono, kanshi tufwile ukulolela ukufikila icine caishibikwa bwino bwino. (Amapi. 4:18) Ibumba Litungulula nga lyaishiba ukuti tufwile ukwalukako muli fimo ifyo twaishibe kale e lyo ne fyo tucita, ilyo line fye lilaalulako fimo. Aba mipepele abengi balaalulako fimo ifyo baishiba ne fyo basambilisha pa kuti fye abantu babatemwe e lyo na pa kuti beshibikwe ku calo. Lelo fwe Nte sha kwa Yehova tulaalulako fimo pa kuti tupalame kuli Lesa na pa kuti tulemupepa ukulingana ne fyo afwaya nga filya fine Yesu alemupepa. (Yako. 4:4) Ico twalwilako fimo te pa mulandu wa kuti abantu abengi e fyo balefwaya, lelo ni pa mulandu wa kuti natumfwikisha bwino ifyo Baibolo ilanda. Ala twalitemwa sana icine!—1 Tes. 2:3, 4.
TWALITEMWANA NGA NSHI
13. Mibele nshi iyo twingeshibilako Abena Kristu ba cine, kabili bushe Inte sha kwa Yehova balanga shani iyi imibele?
13 Abena Kristu ba kubalilapo bali ne mibele iisuma iingi, lelo ukutemwa e mibele baishibikilweko sana. Yesu atile: “Nga muletemwana, e lyo bonse bakeshiba ukuti muli basambi bandi.” (Yoh. 13:34, 35) Inte sha kwa Yehova mwi sonde lyonse balitemwana kabili balikatana. Twalipusanako ne mipepele imbi pantu twalikatana, te mulandu no kuti twafuma mu fyalo ifyalekanalekana, tukonka intambi ishapusanapusana kabili twalipusana ne nkulilo. Tulamona ifyo twatemwana icine cine ilyo tulelongana pa cilonganino, e lyo na pa kulongana kukalamba. Ici cilenga twashininkisha ukuti tupepa Yehova mu nshila iyo afwaya ukuti tulemupepa.
14. Ukulingana na mashiwi yaba pa Abena Kolose 3:12-14, ni nshila nshi imo iyacindama iyo tulangilamo ukuti twalitemwana nga nshi?
14 Amalembo yatukoselesha ‘ukulatemwana nga nshi.’ (1 Pet. 4:8) Inshila imo iyo tulangilamo ukuti twalitemwana, kulabelelana uluse e lyo no kulashipikishanya. Na kabili tufwile ukuba ne cileela e lyo na bukapekape kuli bonse mu cilonganino, ukubikako fye na batulufyenye. (Belengeni Abena Kolose 3:12-14.) Ukutemwana kwa musango uyu e kulangilila ukuti tuli Bena Kristu ba cine.
“ICITETEKELO CIMO”
15. Finshi fimbi ifyo tupashanyamo Abena Kristu ba kubalilapo?
15 Kwaliba na fimbi ifyo tupashanyamo Abena Kristu ba kubalilapo. Ku ca kumwenako, ifyo icilonganino cesu citungululwa tafyapusana ne fyo caletungululwa mu nshiku sha Bena Kristu ba kubalilapo. Twalikwata bakangalila benda, baeluda, na babomfi batumikila nge fyo nabo bene bakwete. (Fil. 1:1; Tito 1:5) Nga filya fine Abena Kristu ba kubalilapo basumiinemo, na ifwe tulakonka mafunde ya kwa Yehova ayalanda pa bulalelale, icupo, e lyo na pa mulopa. Na kabili tulacingilila icilonganino ku bacita imembu abashilapila.—Imil. 15:28, 29; 1 Kor. 5:11-13; 6:9, 10; Heb. 13:4.
16. Finshi tusambilila ku mashiwi yaba pa Abena Efese 4:4-6?
16 Yesu alandile ukuti abantu abengi bakulaitunga ukuba abasambi bakwe, lelo banono fye abali no kuba abasambi ba cine. (Mat. 7:21-23) Baibolo yasobele no kuti mu nshiku sha kulekelesha, abantu abengi ‘bakalamoneka kwati ni bakapepa.’ (2 Tim. 3:1, 5) Na kabili yalitweba ukwabula ukupita na mu mbali ukuti kwaba “icitetekelo cimo” ico Lesa asuminisha.—Belengeni Abena Efese 4:4-6.
17. Ni bani bakapepa ba cine muno nshiku abakonka ifyo Yesu asambilishe?
17 Bushe bakapepa ba cine muno nshiku ni bani? Natusambilila ifyo twingabeshibilako. Natulanda pa fyo Yesu atulangilile ukuti e fyo tufwile ukulapepa Lesa ifyo na Bena Kristu ba kubalilapo balecita. Kanshi ukwabula no kutwishika kuti twa-asuka ukuti ni Nte sha kwa Yehova fye e bakapepa ba cine. Ala lishuko nga nshi ukuba pa bantu ba kwa Yehova, e lyo no kwishiba icine pali Yehova na pa fyo akacitila abantu! Kanshi natutwalilile ukwikatisha icine ico twaishiba.
ULWIMBO 3 Mulatupeela Amaka, Twashintilila Pali Imwe
^ para. 5 Muli cino cipande twalasambilila ifyo Yesu acitile ifilangilila ifyo ukupepa kwa cine kufwile ukuba, e lyo ne fyo Abena Kristu ba kubalilapo balefikonka. Twalasambilila ne filanga ukuti Inte sha kwa Yehova muno nshiku nabo balakonka ifyo Yesu alecita.
^ para. 9 Moneni akabokoshi akaleti “Bushe Abena Kristu ba Kubalilapo Balebomfya Ishina lya kwa Lesa?” mu Ulupungu lwa kwa Kalinda ulwa July 1, 2010, ibu. 6.
^ para. 10 Ku ca kumwenako, mu 2008 Papa Benedict XVI alandile ukuti ishina lya kwa Lesa “talifwile ukubomfiwa” mwi calici lya Katolika, mu mapepo yabo nelyo mu nyimbo shabo.
^ para. 63 UBULONDOLOSHI BWA CIKOPE: Icilonganino ca kwa Yehova calipulinta Baibolo ya Amalembo ya Calo Cipya mu ndimi ukucila 200 pa kuti abantu balebelenga mu lulimi lwabo. Kabili muli yi Baibolo mwaliba ne shina lya kwa Lesa ilya kuti Yehova.
