Bamunyinefwe pa Bethel balibombele ukucila pa mwaka umo pa kuti bapange umulabasa wa WBBR mu Staten Island, mu New York City. Pa numa ya kuwamya apo bali no kupangila umulabasa, balikuulile ing’anda iikalamba iyali no kulaikalamo abali no kulabombela pali uyu umulabasa. Lyena bakuulile icikuulwa icikalamba umwali no kuba uyu mulabasa. Ilyo uyu mulimo wapwile, bamunyinefwe batampile ukusuntinkanya ifya kubomfya pa kuti uyu mulabasa utampe ukubomba. Lelo balikwete amafya ayengi ayo balingile ukupwisha.

Bamunyinefwe basangile ukuti calikosele ukubika umulongoti uukalamba uwa mulabasa nelyo erio iikalamba iya mulabasa. Iyi erio balingile ukuimika pa kati ka fimuti fibili. Cila cimuti calepele amamita 61. Ilyo baeseshe pa muku wa kubalilapo, balifililwe. Aba bamunyinefwe balicetekele Yehova, kabili basukile babika erio iikalamba iya mulabasa. Ba Calvin Prosser bamo pa babombeele pali uyu mulabasa batile, “Atukumanisha ukubika iyi erio pa muku wa kubalilapo, nga twaleyumfwa atuti, ‘Natukumanisha ukubika erio!’” Aba bamunyinefwe batile Yehova e wabafwile pa kuti bakumanishe ukubika erio. Nomba balikwete ubwafya na bumbi.

Pali iyi nshita, e lyo umulabasa wa filimba watendeke fye mu fyalo. Kanshi calikosele ukushita ifya kubomfya pantu tafyafulile. E ico bamunyinefwe bashitile ifya kubomfya ifyabombapo ifyo umuntu umo apangile. Mu cifulo ca kushita icisoselo, bamunyinefwe babomfeshe fye icisoselo ico bafumishe kuli foni. Bushiku bumo mu February mu nshita ya bushiku, bamunyinefwe balefwaya ukwesha uyu mulabasa uo bapangile. Balingile ukukwata programu ya kubika pa mulabasa. E ico baimbile inyimbo sha Bufumu. Munyinefwe umo Ernest Lowe, alibukishe ifyo caweme  pali bulya bushiku. Alandile ati ilyo ba Judge Rutherford, b abali ku Brooklyn ukwalepele amakilomita nalimo 25 baumfwile ifyo bamunyinefwe baleimba pa mulabasa, balibatumine foni.

Babebele abati “Lekeni ukupanga icongo. Muleumfwika kwati mulepunda fye!” Kwena aba bamunyinefwe balyumfwileko insoni, kabili ilyo line balishimishe umulabasa. Lelo ici calengele beshibe ukuti uyu mulabasa walebomba kabili bali-ipekenye ukutendeka uku-ubomfya.

Pa 24 February mu 1924, munyinefwe Rutherford alandile ukuti uyu mulabasa bali no kulaubomfya pa kubomba umulimo uo Kristu Imfumu abapeele ukubomba. Alandile ukuti ico bapangile uyu mulabasa, “kwafwa abantu pa kuti bomfwe ifyaba mu Baibo, kabili beshibe ifyo inshita iyo tuleikalamo yacindama, te mulandu ne fyo basuminamo nelyo uko bapepa.”

Programu ya kubalilapo pali ulya mulabasa, yalyendele bwino sana. Pa myaka 33 pali uyu mulabasa wa WBBR e po abantu ba kwa Yehova balekwatila amaprogramu yabo.

Mu July mu 1924, abasambi ba Baibo balilongene ukulongana kwa citungu mu Columbus, Ohio. Abaishile kuli uku kulongana, bafumine mu fyalo ifyalekanalekana, kabili balikutike amalyashi ayalandilwe mu ciArabic, iciNgeleshi, iciFrench, iciGerman, iciGriki, iciHungarian, iciItalian, iciLithuanian, iciPolish, iciRussian, ne ndimi sha ku Scandinavia ne ciUkrainian. Amalyashi yamo baleyabika pa mulabasa, kabili aba bwananyina balyebele abene ba nyunshipepala ya Ohio State Journal ukuti cila bushiku balelemba amalyashi pali uku kulongana.

Pali Cine pa 24 July, aba bwananyina abacilile pali 5,000 abaile kuli uku kulongana, baile mu kubila imbila nsuma mu musumba umwabelele uku kulongana. Balipeele abantu ifitabo mupepi na 30,000 kabili balitendeke amasambililo ya Baibo ayengi icine cine. Mu Ulupungu lwa kwa Kalinda balembele ukuti “bulya bushiku, e bushiku bwawamishe.”

Icintu icikalamba na cimbi calicitike pali uku kulongana pali Cisano pa 25 July, ilyo munyinefwe Rutherford abelengele ulupapulo ulwalesuusha intungulushi sha mapepo. Muli ulu lupapulo munyinefwe Rutherford alandile no kuti intungulushi sha fikansa fya calo, intungulushi sha mapepo na bacita amakwebo ayakalamba, balelesha abantu ukusambilila icine pa Bufumu bwa kwa Lesa ubo Lesa akabomfya pa kuti abantu bonse bakapaalwe. Na kabili munyinefwe Rutherford alandile ukuti ishi ntungulushi  shalilufyenye pantu shaletungilila akabungwe ka League of Nations kabili shalelanda ukuti aka kabungwe e ko Lesa alebomfya pa kuteka abantu pano isonde. Abasambi ba Baibo balingile ukuba abashipa pa kuti bengalabila iyi mbila ku bantu.

Pa numa, Ulupungu lwa kwa Kalinda lwalandile ukuti, uku kulongana ukwabelele mu Columbus, Ohio, kwalilengele icitetekelo ca ba bwananyina abali abacincila cakoselako, kabili kwalengele baba abashipa mu kubila imbila nsuma nangu ca kuti balebakaanya. Ba Leo Claus abali pali uku kulongana baibukishe abati: “Ilyo twapwishishe ukulongana, twali abacincila kabili twalefwaisha ukupeela abantu ulu lupapulo mu cifulo cesu ica kubilamo imbila nsuma.”

Mu October, Abasambi ba Baibo batendeke ukupeela abantu trakiti iyaleti Ecclesiastics Indicted. Muli iyi trakiti mwali amashiwi ayo munyinefwe Rutherford abelengele pa kusuusha intungulushi sha mapepo. Mwi tauni ilinono ilya Cleveland, Oklahoma, ba Frank Johnson bapwishishe ukupeela abantu iyi trakiti mu cifulo ico babapeele ninshi kwashala amamineti 20 pa kuti aba bwananyina bese babasende. Munyinefwe Johnson tali no kulolela aba bwananyina pa cifulo apo abantu bali no kumumona bwangu pantu muli ili itauni mwali abaume abakalipe pa fyo alebila, kabili balemufwaya. E ico ailebelama mu ceici ilyali mupepi. Apo tamwali abantu, munyinefwe ashile iyi trakiti muli Baibo ya kwa shimapepo na pa fipuna fyonse. Alyangufyenye ukubika amatrakiti kabili alifumine bwangu muli ili iceici. Apo inshita ya kuti bese bamusende yali tailakumana, aile mu maceici na yambi yabili, kabili namo mwine alishilemo amatrakiti.

Lyena munyinefwe Johnson ayangufyenye ukubwelela apo bali no kumusendela. Ailebelama ku numa ya cikuulwa apo baleshitishisha amafuta ya muli motoka, kabili aleceba ceba pa kuti engamona abaume abalemufwaya. Aba baume abalemufwaya baishilepita na motoka mupepi, lelo tabamumwene. Ilyo bapitile fye, bamunyinefwe na bankashi abalebila mupepi balishile na motoka, basenda munyinefwe Johnson baya no kuya.

Munyinefwe umo aibukishe ati: “Ilyo twafumine muli ili itauni, twapitile pali yalya maceici yatatu. Panse paleba abantu nalimo 50 ninshi nabeminina. Bamo balebelenga iyi trakiti, e lyo bambi balelanga shimapepo iyi trakiti. Ala twapuswike fye kwempe! Lelo twalitashishe sana Yehova Lesa wesu pa fyo atucingilile pa kuti twingabila iyi imbila ukwabula ukuti batwikate.”

Na mu fyalo fimbi Abasambi ba Baibo bali abashipa ilyo balebila imbila nsuma. Ku kapinda ka ku kuso aka calo ca France, ba Józef Krett balebila kuli bashimaini abafumine ku Poland. Balibebele ukulanda ilyashi ilyakwete umutwe uwaleti “Abafwa Bali no Kubuushiwa Nomba Line.” Ilyo aba bwananyina bapeele abantu muli ili itauni utupepala twa kubetilapo ku kulongana, shimapepo aebele abaleya kwi ceici lyakwe ukuti bekayako. Nomba icacitike ca kuti ico abaleseshe ukucita e co bacitile. Abantu ukucila pali 5,000 balile mu kukutika ilyashi, kumo na shimapepo wine. Munyinefwe Krett aebele uyu shimapepo ukuti alondolwele abantu ifyo asuminemo, lelo alikeene. Pa numa ya lyashi, munyinefwe Krett alipeele abantu impapulo shonse isho akwete, pantu alimwene ukuti balefwaya ukwishibilapo ifingi pa fyaba mu Cebo ca kwa Lesa.—Amose 8:11.

Ba Claude Brown baile mu kubila imbila nsuma ku Africa, mu calo ico beta pali ino nshita ukuti Ghana. Amalyashi ayo balelanda ne mpapulo isho balepeela abantu fyalengele abantu baishiba bwangu icine muli cilya calo. Ba John Blankson abalesambilila pa sukulu apo balesambilisha ifya kupeela abantu umuti, balikutike ilyashi limo ilyo munyinefwe Brown alandile. Ilyo line fye balilwike ukuti balisangile icine. Ba John balandile abati, “Icine ico nasambilile calengele natemwa sana ica kuti nale-ebako abantu bonse pa sukulu apo nalesambilila.”

 Ba John balisambilile ukuti Baibo taisambilisha ukuti Muli Lesa Umo Mwaba Balesa Batatu. E ico bushiku bumo baile kwi ceici lya Anglican mu kwipusha shimapepo pali ici cisambilisho. Uyu shimapepo alibatamfishe uku ninshi alepunda ati: “Tauli Mwina Kristu; uli wa kwa Satana Kaseebanya. Fuma pano!”

Ilyo ba John bafikile ku ng’anda, balembeele uyu shimapepo kalata, kabili bamulembele ukuti bakakumane pa kuti bakalanshanye pa cintubwingi pali ici cisambilisho ca kuti Muli Lesa Umo Mwaba Balesa Batatu. Uyu shimapepo aebele ba John ukuti bakaye kwi ofesi lya kwa kafundisha mukalamba wa pa sukulu apo ba John balesambilila. Ilyo baingile mu ofesi, kafundisha mukalamba alibepwishe nga ca kuti ca cine balilembeele uyu shimapepo kalata.

Ba John ba-aswike abati, “E mukwai nalilembele.”

Uyu kafundisha mukalamba aebele ba John ukuti balingile ukulembela ulya shimapepo kalata ya kulomba ubwelelo. E ico ba John balembele abati:

“Mukwai bakafundisha bandi banjebele abati imulembele kalata ya kulomba ubwelelo, kabili ninjipekanya ukulemba iyi kalata, cikulu fye musumine ukuti ifyo musambilisha fya bufi.”

Kafundisha mukalamba alipapile. Lyena aipwishe ba John ati, “Blankson, e fyo walemba ifi?”

Ba John bamwaswike abati, “E mukwai. Ifi fine e fyo ndefwaya ukulemba.”

Lyena kafundisha mukalamba aebele ba John ati, “Te kuti utwalilile ukusambilila pali lino isukulu nga ca kuti ulelanda ifyabipa pali shimapepo we ceici ilyo ubuteko butungilila.”

Ba John bamwipwishe abati, “Nga ca kuti ilyo mulefunda kwaba fimo ifyo tushumfwikishe, bushe tatumwipusha?”

Abaswike ati, “Ee, mulepusha.”

Ba John bamwebele abati, “Mukwai ifi fine e fyacitike. Ulya shimapepo alesambilisha Baibo kabili namwipwishe icipusho. Nga ca kuti alifililwe ukunjasuka, cinshi mfwile ukumulembela kalata ya kulomba ubwelelo?”

Ba Blankson tababatamfishe isukulu kabili tabalembele na kalata ya kulomba ubwelelo.

Pa kulanda pa mulimo onse uo Abasambi ba Baibo babombele muli uyu mwaka, Ulupungu lwa kwa Kalinda lwatile: “Kuti twalanda nge fyo Davidi alandile. Alandile ati: ‘Mukampeela amaka ya kulwa inkondo.’ (Amalu. 18:39) Ificitike muli uno mwaka nafitukoselesha sana pantu natumona ifyo Yehova atwafwile pa kuti tubombe umulimo wakwe . . . Ababomfi bakwe aba cishinka balasekelela ilyo babila imbila nsuma.”

Ku kupwa kwa mwaka, bamunyinefwe balepekanya ukupanga umulabasa na umbi uwa kubililapo imbila nsuma. Batendeke ukupanga uyu mulabasa mu musumba wa Chicago ku U.S.A. Uyu mulabasa bawinike ishina lya kuti WORD, e kutila ICEBO pantu bali no kulabila Icebo ca kwa Lesa pali uyu mulabasa. Pa kupanga uyu mulabasa, bamunyinefwe babomfeshe ifya kubomfya ifya maka sana ica kuti na bantu abaleikala ukutali sana, pamo nga ku kapinda ka ku kulyo aka calo ca Canada, baleumfwa imbila ya Bufumu.

Mu 1925 Yehova alyafwilishe aba bwananyina ica kuti balyumfwikishe ifyo Baibo yalandapo mu cipandwa 12 ice buuku lya Ukusokolola. Lelo bamo balilekele ukubombela Yehova pa mulandu ne fi. Nomba abengi balitemenwe ilyo baumfwikishe ifyacitike ku muulu, ne fyo fyakumine abantu ba kwa Lesa pano isonde.