ICIPANDE CA KUSAMBILILAMO 43
ULWIMBO 90 Mulekoseleshanya
Ifyo Twingacita pa Kuti Tuleke Ukutwishika
“Muleshininkisha ifintu fyonse.”—1 TES. 5:21.
IFYO TWALALANDAPO SANA
Twalasambilila pa fyo twingacita pa kuti tuleke ukutwishika ifintu fimo ifingalenga twalafilwa ukubombela bwino Yehova.
1-2. (a) Fintu nshi fimo ifyo ababomfi ba kwa Yehova bengatwishika? (b) Finshi twalasambilila muli cino cipande?
BONSE fye nampo nga tuli bakalamba nelyo nga tuli baice tulatwishika. a Ku ca kumwenako, kasabankanya umwaice kuti alatwishika nampo nga Yehova alimubikako amano nelyo iyo. Ici cilenga alatwishika nampo nga afwile ukubatishiwa nelyo iyo. Nelyo tontonkanyeni pali munyinefwe wa kuti ilyo ali umwaice, asalilepo ukubombela Yehova ukucila ukulapanga indalama ishingi. Nomba pali ino nshita mukalamba kabili indalama sha kusakamaninamo ulupwa nashishupa. E ico alatontonkanya nampo ifyo asalilepo ukucita fyali fye bwino nelyo iyo. Nangu tontonkanyeni pali nkashi umukalamba uushikwete amaka ayengi. Pali ino nshita alomfwa ububi pantu tacita ifyo alecita kale. Bushe mwaliyipushapo amepusho pamo nga: ‘Bushe cine cine Yehova alimbikako amano? Bushe nalicitile fye bwino ifi naipeeleshe ukulabombela Yehova? Bushe na pali ino ine nshita kuti nabombela Yehova?’
2 Nga ca kuti tatwaswike aya mepusho, kuti twaleka ukutetekela Yehova, nelyo kuti twaleka fye no kumubombela. Muli cino cipande, twalamona ifyo amashinte ya mafunde ya mu Baibo yengatwafwa (1) nga ca kuti tulemona ukuti Yehova tatubikako mano, (2) nga tuletwishika nampo nga ifyo twasalilepo ukucita fyali fye bwino nelyo iyo, nelyo (3) nga tuletwishika nampo nga Yehova acili alatasha pa fyo tumubombela nelyo iyo.
IFYO MWINGACITA PA KUTI MULEKE UKUTWISHIKA
3. Finshi twingacita pa kuti tuleke ukutwishika?
3 Nga ca kuti tuletwishika pa fintu fimo, kuti cawama twamona ifyo Baibo yalanda pali ifyo fintu. Nga ca kuti twacita ifi, bucibusa bwesu na Yehova bukakoselako kabili ‘tukeminina ndi mu citetekelo.’—1 Kor. 16:13.
4. Finshi ifyo tufwile ukucita pa kuti ‘tushininkishe ifintu fyonse’? (1 Abena Tesalonika 5:21)
4 Belengeni 1 Abena Tesalonika 5:21. Baibo itweba ukuti tulingile ‘ukushininkisha ifintu fyonse.’ Kuti twacita shani ifi? Kuti twashininkisha ukuti ifyo twasuminamo fya cine nga ca kuti tulefilinganya ku fyo Baibo ilanda. Ku ca kumwenako, natulande pali kasabankanya umwaice uutwishika nga cine cine Yehova alimubikako amano. Bushe alingile ukutontonkanya ukuti ifi fine amona ukuti Yehova tamubikako amano e fyo caba? Awe, afwile ‘ukushininkisha ifintu fyonse’ ukupitila mu kubelenga Baibo pa kuti engeshiba ifyo Yehova amona ifyo aletontonkanya.
5. Kuti twacita shani pa kuti tusange amasuko ya mepusho twakwata?
5 Ilyo tulebelenga Baibo ciba kwati Yehova alelanda na ifwe. Lelo tatulingile ukupeelela fye pa kubelenga Baibo pa kuti twishibe amasuko ya mepusho ayo twingakwata. Tulingile ukulabelenga Amalembo ayengalenga twasanga amasuko ya mepusho twingakwata. Pa kuti tucite ifi, tulingile ukufwailisha mu mpapulo isho icilonganino ca kwa Yehova catupekanishisha. (Amapi. 2:3-6) Tulingile ukupepa kuli Yehova no kumulomba ukuti atwafwe pa kuti tusange amasuko ya mepusho ayo twakwata. Lyena tulingile ukumona amashinte ya mafunde ya mu Baibo ayo twingakonka, ne fyebo ifingatwafwa pa bwafya tukwete. Kuti cawama nga twabelengako na malyashi ya mu Baibo aya babomfi ba kwa Yehova aba cishinka abaletontonkanya nge fyo tuletontonkanya, na baleumfwa nge fyo tuleumfwa.
6. Bushe ifyo tusambilila nga tulelongana filenga shani twaleka ukutwishika?
6 Na kabili nga tulesambilila Baibo ilyo tulelongana, ciba kwati Yehova alelanda na ifwe. Nga tulalongana lyonse, kuti twaumfwa fimo mu lyashi ilyo uwa bwananyina alelanda, nelyo mu fyo uwa bwananyina alelanda pa kwasukapo, ifingalenga twaleka ukutwishika. (Amapi. 27:17) Nomba natulande pa fyo twingaleka ukutwishika pa fintu fimo.
NGA CA KUTI MULATWISHIKA NAMPO NGA YEHOVA ALIMUBIKAKO AMANO NELYO IYO
7. Cipusho nshi bamo bengepusha?
7 Bushe mwalitala amuyipushapo amuti, ‘Bushe cine cine Yehova alimbikako amano?’ Nga ca kuti muimona ukuti tamwacindama kuti mwalatontonkanya ukuti te kuti mube cibusa wa kwa Kabumba wa muulu ne sonde. Nalimo Imfumu Davidi nayo yalitontonkenyepo ifi. Yalipapile ukuti Yehova alabika amano na ku bantunse. Yaipwishe aiti: “Mwe Yehova, wanshi umuntu uwa kuti mulemusakamana, wanshi umwana wa muntu umwina kufwa uwa kuti mulemubikako amano?” (Amalu. 144:3) Ni kwisa twingasanga icasuko ca ici cipusho?
8. Nga fintu tubelenga pali 1 Samwele 16:6, 7, 10-12, finshi Yehova abikako amano?
8 Baibo itusambilisha ukuti Yehova alabika amano ku bantu abo bambi bamona kuti tabacindama. Ku ca kumwenako, Yehova alitumine Samuele ku ng’anda ya kwa Yese pa kuti engayasuba umo pa bana bakwe abaume uwali no kuba imfumu ya Israele. Yese aletele abana bakwe abaume 7 pa kuti bengamonana na Samuele, lelo taletele Davidi uwali umwaice pali bonse. b Lelo Davidi e o Yehova asalile. (Belengeni 1 Samwele 16:6, 7, 10-12.) Yehova alishibe bwino Davidi, alishibe ukuti uyu mulumendo alimutemenwe sana.
9. Finshi fingalenga mwashininkisha ukuti Yehova alimubikako amano? (Moneni ne cikope.)
9 Tontonkanyeni pa fyo Yehova alanga kale ati alimubikako amano. Alamupanda amano pa fya kucita pa bwafya ubo mukwete. (Amalu. 32:8) Ici cilanga fye ukuti alimwishiba bwino. (Amalu. 139:1) Nga mulekonka amano ayo amupanda, kabili nga mwamona ifyo yamwafwa, mukashininkisha ukuti Yehova alimubikako amano. (1 Imila. 28:9; Imil. 17:26, 27) Yehova alamona fyonse ifyo mucita pa kuti mulemubombela na pa kuti mulemumfwila. Alishiba imibele mwakwata kabili alafwaya ukuba cibusa wenu. (Yer. 17:10) Afwaya na imwe mwasumina ukuba cibusa wakwe.—1 Yoh. 4:19.
“Nga [wafwaya Yehova], akaleka ukamusange.”—1 Imila. 28:9 (Moneni paragrafu 9) c
NGA CA KUTI MULATWISHIKA NAMPO NGA IFYO MWASALILEPO UKUCITA FYALI FYE BWINO
10. Nga twatontonkanya pa fyo twasalilepo ukucita kale, mepusho nshi twingayipusha?
10 Inshita shimo abantu bamo nga batontonkanya pa fyo basalilepo ukucita ku numa, kuti balatwishika nampo ifyo basalilepo ukucita fyali fye bwino nelyo iyo. Nalimo balisalilepo ukuleka incito iyo balefolelapo indalama ishingi, nelyo ukuleka ukucita ubukwebo ubo balecita pa kuti bengalabombela sana Yehova. Lelo nomba napapita imyaka iingi. Nalimo kuti balatontonkanya pa bantu bamo abo baishiba, abasalilepo ifintu fimbi ukucila ifyo bena basalilepo. Kabili pali ino nshita aba bantu balamoneka kwati balikwata indalama ishingi kabili balekala bwino. Kanshi kuti balatontonkanya abati: ‘Bushe ifyo nasalilepo ukulabombela Yehova fyali fye bwino? Nelyo fyalengele napanya indalama ishingi?’
11. Finshi fyalesakamika uwalembele Amalumbo 73?
11 Nga ca kuti mulayipusha amepusho ya musango uyu, tontonkanyeni pa fyo uwalembele Amalumbo 73 aleumfwa. Alemona abantu abashalebombela Yehova lelo abali no bumi ubusuma, abali abakankaala, kabili abalemoneka kwati tabalekwata amafya. (Amalu. 73:3-5, 12) Ilyo amwene ukuti aba baleikala bwino sana, atontonkenye ukuti aleipoosela fye inshita ukubombela Yehova. Ifyo aletontonkanya fyalemusakamika “akasuba konse.” (Amalu. 73:13, 14) Bushe acitile shani pa kuti aleke ukumfwa ububi?
12. Ukulingana ne fyo Baibo ilanda pa Amalumbo 73:16-18, finshi uwalembele aya Amalumbo acitile pa kuti aleke ukumfwa ububi?
12 Belengeni Amalumbo 73:16-18. Uyu uwalembele Amalumbo 73 aile ku cifulo ca mushilo ica kwa Yehova. Pa mulandu wa kuti kuli ici cifulo kwali abantu ba kwa Yehova, uwalembele aya Amalumbo ali no kulatontonkanya bwino. Alilwike ukuti nangu ca kuti bamo balemoneka ukuti baleikala bwino, tabali no kutwalilila ukwikala bwino. E ico tatwalilile ukumfwa bubi, kabili alishininkishe ukuti filya asalilepo ukubombela Yehova alicitile bwino sana. Ne cafuminemo ca kuti alitwalilile ukubombela Yehova.—Amalu. 73:23-28.
13. Kuti mwacita shani pa kuti muleke ukusakamana nga ca kuti ifyo mwasalilepo ukucita fyali fye bwino nelyo iyo? (Moneni ne cikope.)
13 Icebo ca kwa Lesa kuti calenga na imwe bene mwaleka ukusakamikwa nga filya fine cali ku walembele Amalumbo 73. Kuti mwaleka shani ukusakamikwa? Muleibukisha ifintu ifisuma ifyo mwakwata, ukubikako ne fyo Yehova amupaala. Muleibukisha no kuti Yehova tafwa abantu abashibombela. Abantu abengi abashibombela Yehova bamona ukuti ukukwata incito iisuma e cintu icacindamisha, pantu tabakwata isubilo lya kwikala umuyayaya. Nomba imwe, Yehova alimupaala pali ino nshita, kabili na ku ntanshi kwine akamupaala nga nshi. (Amalu. 145:16) Kabili tontonkanyeni pali ici: Bonse te kuti twishibe ifyo twali no kulaikala pali ino nshita, atusalapo ukucita ifintu fimbi. Lelo icintu cimo ico mwingashininkisha ca kuti: Abasalapo ukubombela Lesa pa mulandu wa kuti balimutemwa na pa mulandu wa kuti balitemwa na bantu banabo, balakwata ifyo bakabila.
Muletontonkanya sana pa malayo ayo Yehova atulaya (Moneni paragrafu 13) d
NGA MUMONA UKUTI PALI INO NSHITA TAMUBOMBELA YEHOVA NGE FYO MWALEMUBOMBELA KALE
14. Mafya nshi ababomfi ba kwa Yehova bamo bakwata, kabili mepusho nshi bengalayipusha?
14 Ababomfi ba kwa Yehova bamo balafilwa ukumubombela pa mulandu wa kuti nabakula, balalwalilila, nelyo balilemana. Kanshi nalimo kuti balaumfwa ukuti Yehova abamona ukuti tabacindama. E ico kuti balayipusha abati, ‘Bushe Yehova amona ukuti nalicindama?’
15. Cinshi uwalembele Amalumbo 71 ashininkishe?
15 Uwalembele Amalumbo 71 na o aleumfwa ifi fine. Apepele ati: “Mwinsha ilyo amaka yandi yapwa.” (Amalu. 71:9, 18) Nangu ca kutila aleumfwa ifi, alishininkishe ukuti nga atwalilila ukubombela Yehova ne cishinka, Yehova ali no kulamwafwa. Uwalembele Amalumbo 71 alishibe ukuti Yehova alatemwa abatwalilila ukumubombela nangu ca kuti nabakwata amafya.—Amalu. 37:23-25.
16. Finshi abakalamba bengacita pa kubombela Yehova? (Amalumbo 92:12-15)
16 Mwe bakalamba, mulemona amafya ayo mukwata nge fyo Yehova ayamona. Kuti amwafwa pa kuti mwingatwalilila ukumubombela nangu namukwata amafya. (Belengeni Amalumbo 92:12-15.) Mu cifulo ca kulabika amano ku fyo mushingakumanisha ukucita, mulebika mano ku fyo mwingakumanisha ukucita. Ku ca kumwenako, ifyo mwatwalilila ukubombela Yehova ne cishinka kuti fyakoselesha aba bwananyina, ne fyo mubabikako amano na fyo kuti fyabakoselesha. Kuti mwalaebako aba bwananyina ifyo Yehova amwafwa pa myaka yonse iyi iyo mwamubombela, e lyo na pa malayo ayo mufwaya yakafikilishiwe. Kabili mwilalaba ukuti amapepo ayo mupepelako aba bwananyina ukufuma panshi ya mutima, kuti yabafwa. (1 Pet. 3:12) Nangu twingakwata amafya ya musango shani, bonse kuti twabombela Yehova kabili kuti twala-afwa aba bwananyina.
17. Mulandu nshi tushilingile ukulailinganishisha ku ba bwananyina?
17 Nga ca kuti mulomfwa ububi pa mulandu wa kuti pali ino nshita te kuti mubombele Yehova nge fyo mwalemubombela kale, muleibukisha ukuti Yehova alatasha pa milimo yonse iyo mumubombela. Nalimo kuti mwalaesha ukulinganya ifyo mubombela Yehova ku fyo aba bwananyina bambi bamubombela. Tekwesha ukucita ifi. Mulandu nshi? Pantu Yehova tatulinganya ku bantu bambi. (Gal. 6:4) Ku ca kumwenako, Maria aitulwilile amafuta aya mutengo nga nshi pa makasa ya kwa Yesu. (Yoh. 12:3-5) Lelo mukamfwila umupiina ena asangwile utundalama tubili utunono sana mwi tempele. (Luka 21:1-4) Lelo Yesu alemona ukuti ifyo abanakashi aba bonse babili bacitile fyalelanga ukuti balikwete icitetekelo. Yesu alepashanya sana Wishi, e ico kuti mwashininkisha ukuti Yehova alamona ifyo mumubombela pa mulandu wa kuti mwalikwata icitetekelo kabili mwalimutemwa, nangu mwingalafimona ukuti finono.
18. Kuti twacita shani pa kuti tuleke ukutwishika? (Moneni na kabokoshi kaleti “ Ifyaba mu Cebo ca kwa Yehova Kuti Fyalenga Mwaleka Ukutwishika.”)
18 Inshita shimo bonse tulatwishika ifintu fimo. Nomba nga fintu twasambilila, ifya cine ifyaba mu Cebo ca kwa Lesa, kuti fyalenga twaleka ukutwishika. E ico mule-esha na maka yenu yonse pa kuti muleke ukutwishika. Nga mulecita ifi, tamwakulasakamikwa. Ukwabula no kutwishika, Yehova alimwishiba. Alatasha pa fyo mwasalapo ukumubombela, kabili akamulambula. Yehova alitemwa ababomfi bakwe bonse aba cishinka kabili alabasakamana.
ULWIMBO 111 Ifilenga Tulesekelela
a UBULONDOLOSHI: Muli cino cipande, twalalanda pa kutwishika ukulenga twalamona ukuti Yehova amona ukuti tatwacindama, nelyo nga tuletwishika nga ca kuti tulemona ukuti ifyo twasalilepo ukucita fyali fye bwino. Uku te kutwishika uko Baibo ilandapo uko abantu bamo bakwata ukulanga ukuti tabacetekela Yehova ne fyo atulaya.
b Nangu ca kuti Baibo tayatweba imyaka Davidi akwete ilyo Yehova amusalile, cimoneka kwati ali fye mulumendo.—Moneni Ulupungu lwa kwa Kalinda ulwa September 1, 2011, ibu. 29, para. 2.
