Pali uyu muputule e po balepita pa kwingila mu muputule wa Mushilo uwa mwi tempele. Muli Baibo ya Amalembo ya Calo Cipya iyo twasabankenye ilyo umwaka wa 2023 ushilafika, pali 2 Imilandu 3:4 pali amashiwi ya kuti, “Umuputule wa kwingililapo uwali pa ntanshi walepele imikono 20 kabili wabelele mu bwipi bwa ng’anda, kabili ukuya mu muulu walepele imikono 120.” AmaBaibo yambi nayo yatila uyu muputule wasanseme “imikono 120” kabili ici cipilibula ukuti wasanseme amamita 53!

Lelo Baibo ya Amalembo ya Calo Cipya iyo twapulintile mu 2023 ilanda pa muputule wa pe tempele lya kwa Solomone ukuti: “Wasanseme imikono 20,” nelyo amamita nalimo 9. a Natulandeko pali fimo ifyalengele twalule.

Pali 1 Ishamfumu 6:3 Baibo tayalanda ifyo uyu muputule wasanseme. Muli ili ilembo, Yeremia uwalembele ici cikomo alembele pa fyo uyu muputule wali mu butali na mu bwipi, lelo talembelepo pa fyo wasanseme. Lyena mu cipandwa cakonkapo alilembele pa mbali shimbi isha ili itempele ishacindama, pamo nga icishiba ca mukuba, ifya kusendelapo amenshi ifili 10 ne nceshi sha mukuba shibili ishali panse ya uyu muputule. (1 Isha. 7:​15-37) Nga ca kuti cine cine uyu muputule wasanseme ukucila pa mamita 50 kabili walisanseme ukucila ifiputulwa fimbi ifye tempele, mulandu nshi Yeremia ashelembele pa fyo wasanseme? Na lintu papitile imyaka iingi, bakalemba abaYuda balilembele ukuti uyu muputule tawasanseme ukucila ifiputulwa fimbi ifye tempele lya kwa Solomone.

Abasambilila sana ifya mu Baibo balatwishika nga ca kuti ifibumba fye tempele kuti fyatungilila umuputule uwasanseme imikono 120. Kale ifikuulwa ifyasanseme sana ifyo balekuulila na mabwe ne njelwa, pamo nga impongolo sha mu Egupti, fyalekulila kwi samba e lyo ku muulu fyacepa. Lelo ifi te fyo bakuulile itempele lya kwa Solomone. Abasambilila sana ifya mu Baibo batila ifibumba fye tempele lya kwa Solomone tafyatikeme ukucila pa mikono 6, nelyo ukucilako pa mamita yabili. Eco ba Theodor Busink abasambilila ifyo balekuula ifikuulwa kale balembele ukuti: “Ifyo ifibumba fya pa [mwinshi we tempele] fyatikeme, filangilila ukuti umuputule wa kwingililapo tawasanseme imikono 120.”

Nalimo balufyenye fye ukukopolola amashiwi yaba pali 2 Imilandu 3:4. Nangu ca kuti amamanyuskripti yamo aya kale pali ili ilembo paba imikono “120,” ifyalembwa fimbi ifyacetekelwa pamo nga icalembwa ca Codex Alexandrinus ico balembele ukucila pa myaka 1,500 iyapitapo ne ca Codex Ambrosianus ico balembele ukucila pa myaka 1,400 iyapitapo filangilila ukuti, pali ili ilembo paba “imikono 20.” Cinshi nalimo calengele uwalekopolola apange icilubo ca kulembapo imikono “120”? Mu ciHebere, ifyo balemba ishiwi “umwanda” ne fyo balemba ishiwi “umukono,” fyalipalana. E ico nalimo uwalekopolola alembele ishiwi “umwanda” mu cifulo ca kulemba ishiwi “umukono.”

Kwena nangu ca kuti tulesha na maka yesu yonse pa kuti twishibe bwino ifi fyonse, na pa kuti tulelungika pa kulanga ifyo itempele lya kwa Solomone lyalemoneka, ico tubikako sana amano fintu ili itempele lyaleimininako, e kutila itempele ilikalamba ilya mampalanya. Ala tulatasha sana Yehova pali ifi aita ababomfi bakwe bonse ukwisa mu kumupepela muli ili itempele!—Heb. 9:​11-14; Ukus. 3:12; 7:​9-17.