ABENA Israele balitemenwe sana ukwimba inyimbo. Ilingi line Baibo ilalanda pa bantu abalelisha ifilimba na baleimba inyimbo. Na kuba, iciputulwa icikalamba ica Baibo ni nyimbo sheka sheka. Ku ca kumwenako, mwi buuku lya Amalumbo, ilya Ulwimbo lwa Nyimbo ne lya Inyimbo sha Bulanda mwaba inyimbo. E mulandu wine icitabo citila Music in Biblical Life cilandila ukuti Baibo ilalangilila bwino bwino ukuti abena Israele baleimba inyimbo pa nshita ishalekanalekana.

Baleimba inyimbo mu fyo balecita cila bushiku. Abena Israele balelisha ifilimba kabili baleimba inyimbo pa kulanga ifyo baleumfwa. (Esa. 30:29) Abanakashi balelisha utuoma twa nyenjele uku ninshi baleimba kabili balecinda nga ca kuti balebika umuntu pa bufumu, nga nabakwata umutebeto kabili nga balesekelela pa mulandu wa kuti abashilika babo nabacimfya abalwani. (Abapi. 11:34; 1 Sam. 18:​6, 7; 1 Isha. 1:​39, 40) Na kabili abena Israele baleimba inyimbo pa kulanga ifyo bali no bulanda nga ca kuti umuntu nafwa. (2 Imila. 35:25) Icitabo ca McClintock and Strong’s Cyclopedia citila ukwabula no kutwishika “AbaHebere balitemenwe sana ukwimba inyimbo.”

Baleimba inyimbo kwi sano. Imfumu sha bena Israele shalitemenwe sana ukukutika inyimbo. Imfumu Shauli yalitile Davidi kwi sano lya iko pa kuti engalailishishako nsango. (1 Sam. 16:​18, 23) Ilyo Davidi na o aishileba imfumu, alipangile ifilimba, alilembele inyimbo ishisuma sana kabili alipangile ne bumba lya bakemba abaleimba pe tempele lya kwa Yehova. (2 Imila. 7:6; Amose 6:5) Imfumu Solomone yalikwete ibumba lya bakemba abaume na banakashi abaleimba kwi sano lya iko.—Luk. Mil. 2:8.

Baleimba inyimbo pa kupepa Yehova. Na kuba, kwali abaume 4,000 abalelisha ifilimba mu Yerusalemu. (1 Imila. 23:5) Balelisha amalimba, ifilimba fya nsale, nsango na mapenga. (2 Imila. 5:12) Lelo aba abaume 4,000 te baleimba fye pa kupepa Yehova. Abena Israele abengi, nabo bene baleimba inyimbo pa kuya ku Yerusalemu mu kusefya imitebeto. Ishi inyimbo baleshita ukuti Inyimbo sha Baleninika. (Amalu. 120-134) Kabili ukulingana ne fyalembwa fya baYuda, abena Israele baleimba inyimbo sha Amalumbo a ilyo balesefya umutebeto wa Cakucilila.

Ababomfi ba kwa Lesa muno nshiku nabo bene balicindika sana ukwimba. (Yako. 5:13) Tulembila Yehova inyimbo pa kumulumbanya. (Efes. 5:19) Nga tuleimbila pamo na Bena Kristu banensu, tulaba abaikatana. (Kol. 3:16) Na kabili, inyimbo shilatukosha nga natukwata amafya. (Imil. 16:25) Ukwimba ni nshila iisuma nga nshi iyo tulangilamo ifyo twatetekela Yehova ne fyo twamutemwa.