ICIPANDE CA KUSAMBILILAMO 38
“Iseni Kuli Ine, . . . na Ine Nalamusansamusha”
“Iseni kuli ine imwe bonse mwe balecula kabili abafininwa, na ine nalamusansamusha”—MAT. 11:28.
ULWIMBO 17 “Ndefwaya”
IFYO TWALASAMBILILA *
1. Bulayo nshi Yesu alaile abantu ubwaba pali Mateo 11:28-30?
YESU alilaile abantu abalekutika ifyo alesambilisha ukuti ali no kubacitila ifintu ifisuma nga nshi. Abalaile ati “Iseni kuli ine . . . na ine nalamusansamusha.” (Belengeni Mateo 11:28-30.) Ubu bulayo tabwali malanda kanwa fye. Cinshi twalandila ifi? Taleni tontonkanye pa fyo Yesu acitiile umwanakashi uwalwele ubulwele bwabipisha.
2. Finshi Yesu acitiile umwanakashi uwalwele?
2 Uyu mwanakashi alefwaisha ukundapwa. Apo alefwaisha ukupola alile kuli bashing’anga abengi. Aliculile pa myaka 12, lelo takwali nangu umo uwamundepe. Ukulingana na Mafunde, uyu mwanakashi ali uwakowela. (Lebi 15:25) Lyena aumfwile ukuti Yesu aleundapa abalwele, e ico alile ku kumufwaya. Ilyo amusangile, aikete ku nsenkebele sha ca kufwala cakwe ica ku nse, kabili apo pene alipolele! Yesu alyundepe uyu mwanakashi, kabili alicitile ne fyalengele omfwe ukuti alimucindike kabili alimutemenwe. Finshi fimo acitile? Ilyo Yesu alandile nankwe amwitile ukuti, “we mwana” pa kulanga ukuti alimutemenwe. Uyu mwanakashi afwile alisansamwike!—Luka 8:43-48.
3. Mepusho nshi twalaasuka?
3 Moneni ukuti ulya mwanakashi aitendekeleko fye ukuya kuli Yesu. Ifi fine e fyo caba na muno nshiku. Na ifwe tufwile ukuitendekelako ukuya kuli Yesu. Muno nshiku Yesu tondapa abalwala mu cisungusho abaya kuli ena. Lelo abeba ukuti: “Iseni
kuli ine . . . na ine nalamusansamusha.” Muli cino cipande twalaasuka aya amepusho 5: Finshi tufwile ukucita pa kuti tuye kuli Yesu? Bushe Yesu aloseshe mwi ilyo atile: “Sendeni ikoli lyandi”? Finshi twingasambilila kuli Yesu? Mulandu nshi umulimo Yesu atupeela utusansamushisha? Kabili finshi tulingile ukucita pa kuti tutwalilile ukusansamuka ilyo tulesenda ikoli lya kwa Yesu?“ISENI KULI INE”
4-5. Finshi fimo ifyo twingacita pa kuti tuye kuli Yesu?
4 Cimo ico twingacita pa kuti tuye kuli Yesu kusambilila ifingi pa fyo alelanda na pa fyo alecita. (Luka 1:1-4) Takuli nangu umo uwingatucitila ifi, lelo tufwile ukuisambilisha ifyo Baibolo ilanda pali Yesu. Na kabili tulaya kuli Yesu nga twasalapo ukubatishiwa no kuba abasambi ba kwa Kristu.
5 Na cimbi ico tulingile ukucita pa kuti tuye kuli Yesu, kuya kuli baeluda pa kuti batwafwe ilyo tuli na mafya. Yesu abomfya aba abaume ababa “ifya bupe ku bantu” pa kucema impaanga shakwe. (Efes. 4:7, 8, 11; Yoh. 21:16; 1 Pet. 5:1-3) Kanshi tufwile ukuitendekelako ukuya kuli baeluda pa kuti batwafwe. Baeluda te kuti beshibe ifyo tuletontonkanya ne fyo tulekabila nga tatubebele. Natulande pali munyinefwe uo twalaita ukuti Julian. Uyu munyinefwe alandile ati: “Nali mu kuleka ukubombela pa Bethel pa mulandu wa kuti nalelwalilila. Nomba umunandi anjebele ati njebeko baeluda pa kuti bangafwe. Ilyo anjebele fye nalemona kwati nshalekabila ukungafwa. Lelo pa numa nalyebele baeluda ukuti bangafwe, kabili ifyo banjebele ilyo balencema fyali bupe ubwawamisha ubo napokelelapo.” Baeluda ababa ne cishinka pamo nga balya abatandalile munyinefwe Julian, kuti balenga twaishiba “ifyo Kristu atontonkanya.” Nga twaishiba ifyo atontonkanya kuti twalamupashanya. (1 Kor. 2:16; 1 Pet. 2:21) Baeluda nga batwafwa ninshi batupeela ubupe ubwawamisha.
“SENDENI IKOLI LYANDI”
6. Ni mwi Yesu aloseshe ilyo atile “Sendeni ikoli lyandi”?
6 Lintu Yesu atile: “Sendeni ikoli lyandi,” nalimo aloseshe mu kuti tufwile ukuleka aletutungulula. Na kabili nalimo aloseshe mu kuti tufwile ukuba nankwe kwi koli limo, no kulabombela Yehova pamo nankwe. Nampo nga Yesu aloseshe mu kuti tufwile ukuleka aletutungulula, nelyo mu kuti tufwile ukuba nankwe kwi koli limo, ikoli lipilibula ukubombela Yehova.
7. Nga fintu tubelenga pali Mateo 28:18-20, mulimo nshi batupeela, kabili cinshi ico tushingatwishika?
7 Nga twaipeela kuli Yehova twabatishiwa no kubatishiwa tulatendeka ukusenda ikoli lya kwa Yesu. Abo Yesu aita ukuya kuli ena, bantu fye bonse, kabili te kuti akaane abafwaya ukubombela Lesa no mweo onse. (Yoh. 6:37, 38) Abasambi ba kwa Kristu bonse balabombako umulimo Yehova apeele Yesu. Te kuti tutwishike no kutwishika ukuti Yesu akulatwafwa ilyo tulebomba umulimo uo Yehova amupeele.—Belengeni Mateo 28:18-20.
‘SAMBILILENI KULI INE’
Mulesansamusha abantu nga fintu Yesu alecita (Moneni paragrafu 8 ukufika ku 11) *
8-9. Mulandu nshi abantu abali abaicefya baleila kuli Yesu, kabili mepusho nshi tulingile ukuyipusha?
8 Abantu abali abaicefya baleya kuli Yesu. (Mat. 19:13, 14; Luka 7:37, 38) Mulandu nshi baleilako? Pantu Yesu tali nga baFarise. AbaFarise tabatemenwe abantu kabili bali ne cilumba. (Mat. 12:9-14) Yesu ena alitemenwe abantu kabili ali uwaicefya. AbaFarise balefwaya ukulumbuka kabili baleimona ukuti balicindeme ukucila abantu bambi pa mulandu ne fifulo fya pa muulu ifyo bakwete. Lelo Yesu ena alandile ati te cisuma ukulafwaya ukulumbuka. Asambilishe abasambi bakwe ukuba abaicefya no kulabombela abantu. (Mat. 23:2, ) AbaFarise balinyantilile abantu kabili balebatiinya. ( 6-11Yoh. 9:13, 22) Yesu alesansamusha abantu pantu alebacitila ifisuma kabili alebeba amashiwi ayasuma.
9 Bushe mulapashanya Yesu? Yipusheni amuti: ‘Bushe abantu banjishiba ukuti nalifuuka kabili naliicefya? Bushe ndaitemenwa ukubomba imilimo iyo abantu bamona ukuti ya pa nshi pa kuti ngafwe abantu? Bushe naliba ne cikuuku ku bantu?’
10. Bushe Yesu ali shani ku bo alebomba nabo?
10 Yesu aleumfwana sana na abo alebomba nabo, kabili alitemenwe ukubasambilisha imilimo. (Luka 10:1, 19-21) Alekoselesha abasambi bakwe ukulamwipusha amepusho, kabili na o alebepusha pa kuti eshibe ifyo baletontonkanya. (Mat. 16:13-16) Nga filya fine ifimenwa fikula bwino nga balefitapilila, e fyo na basambi balelunduluka. Balibikile amano ku fyo Yesu alebasambilisha kabili balitwele ifisabo, e kutila balebomba imilimo iisuma.
Mwilaifinya
Muleba abacincila pa kubila imbila nsuma
Muleba abaicefya kabili mulebombesha *
11. Mepusho nshi tufwile ukuyipusha?
11 Bushe kwaliba abo mutungulula? Nga eko baba, yipusheni amuti: ‘Bushe ndomfwana na abo ntungulula pa ncito nelyo pa ng’anda? Bushe ndacita ifilenga tuleumfwana na abo ntungulula? Bushe ndakoselesha abo ntungulula ukulanjipusha amepusho? Kabili bushe ndakutika ilyo balelanda ifyo baletontonkanya?’ Tatufwile ukuba nga abaFarise abalekalipa nga babepusha amepusho, kabili abalecusha abalebeba ifyalepusana ne fyo baletontonkanya.—Marko 3:1-6; Yoh. 9:29-34.
‘MUKASANGA UKUTUUSHA’
12-14. Mulandu nshi umulimo uo Yesu atupeela ulengela tuleba ne nsansa?
12 Finshi filenga tuleba ne nsansa ilyo tulebomba umulimo uo Yesu atupeela? Kwena fingi filenga, lelo natulandeko fye pali fimo.
13 Twalikwata bakangalila abacila intungulushi shonse. Yehova Kangalila wesu Uwapulamo, te munkalwe ku babomfi bakwe. Alatasha pa mulimo tubomba. (Heb. 6:10) Na kabili alatupeela amaka pa kuti tulebomba bwino umulimo atupeela. (2 Kor. 4:7; Gal. 6:5) Yesu Imfumu yesu alitulanga ifyo tufwile ukulatungulula abantu. (Yoh. 13:15) Kabili baeluda abatucema balapashanya Yesu “umucemi mukalamba.” (Heb. 13:20; 1 Pet. 5:2) Balaba ne cikuuku, balatukoselesha kabili balashipa ilyo baletutungulula na lintu baletucingilila.
14 Twalikwata ifibusa ifisuma ukucila pa fibusa fyonse. Takwaba abantu abakwata ifibusa ifyaba no kutemwa nge fyo twakwata, kabili ababomba umulimo uusuma nga uo tubomba. Tontonkanyeni pali ici: Tubombela pamo na bamunyinefwe na bankashi ababa ne mibele iisuma sana kabili abashitontonkanya ukuti balicila bambi. Nangu bamunyinefwe balishiba bwino ifya kubomba imilimo imo, tabayumfwa, kabili bamona bambi ukuti balibacila. Batumona ukuti tuli babomfi banabo no kuti tuli fibusa fyabo. Kabili balitutemwa nga nshi ica kuti no kutufwila kuti batufwila!
15. Bushe tufwile ukulamona shani umulimo tubomba?
15 Twalikwata umulimo uwa wamisha ukucila imilimo yonse. Tulasambilisha abantu icine pali Yehova, kabili tulalenga baishiba ubufi ubo Satana Kaseebanya abepa. (Yoh. 8:44) Satana alabepa abantu ubufi bwa fiita fititi ica kuti tabakwata ne subilo. Ku ca kumwenako, Satana afwaya tulemona ukuti Yehova te kuti atwelele imembu kabili te kuti atutemwe. Ubu bufi ubwa fiita fititi, kabili bulenga abantu beba ne subilo. Nga twaya kuli Kristu, Yehova alelela imembu shesu. Kabili icishinka ca kuti Yehova alitutemwa nga nshi. (Rom. 8:32, 38, 39) Tulasekelela nga nshi nga twaafwa abantu batendeka no kushintilila pali Yehova, baba ne subilo kabili baba ne nsansa!
TWALILILENI UKUSANSAMUKA ILYO MULESENDA IKOLI LYA KWA YESU
16. Bushe umulimo uo Yesu atupeela wapusana shani ne milimo imbi iyo tulingile ukubomba?
16 Umulimo uo Yesu atweba ukulabomba walipusana ne milimo imbi iyo tufwile ukubomba. Ku ca kumwenako, abantu abengi nga bainuka ku ncito balanaka bafuma na kwifupa ica kuti tababa ne nsansa. Lelo ifwe nga twabombela Yehova na Kristu, tulaba ne nsansa nga nshi. Kwena limo kuti twafunshika nga twainuka ica kuti na pa kuya mu kulongana icungulo tuleisunka fye. Nomba ilingi line nga twabwela mu kulongana tulasansamuka ica kuti na maka yabwela. Ifi fine e fyo tumfwa nga twabombesha pa kuti tubile imbila nsuma na pa kuti tuisambilishe Baibolo. Insansa na maka tukwata filacila pa fyo tubomfya pa kucita ifi!
17. Finshi tufwile ukwishiba kabili mulandu nshi tulingile ukubela abacenjela?
17 Tufwile ukwishiba ukuti amaka fwe bantu twakwata yalikwata apo yapelela. Kanshi tulingile ukuba abacenjela pa fyo tubomfya amaka yesu. Ku ca kumwenako, kuti twalaonawila fye amaka yesu ku kufwaisha icuma. Moneni ifyo Yesu aebele umulumendo uwali umukankaala uwamwipwishe ati: “Cinshi mfwile ukucita pa kuti nkakwate umweo wa muyayaya?” Ulya mulumendo alekonka Amafunde. Afwile ali muntu umusuma pantu ibuuku lya kwa Marko litila Yesu “alimutemenwe.” Yesu alitile uyu kateka umulumendo umukankaala. Amwebele ati: “Kabiye, kashitishe fyonse ifyo wakwata . . . e lyo wise ube umusambi wandi.” Uyu mulumendo alipelenganishiwe, lelo cimoneka kwati alifililwe ukusha “ifyuma ifingi” ifyo akwete. (Marko 10:17-22) Ifi acitile alangile ukuti alikeene ikoli ilyo Yesu amwebele ukusenda kabili atwalilile ukubombela ‘ifyuma.’ (Mat. 6:24) Nga ni mwe nga mwasalilepo finshi?
18. Cinshi tufwile ukulacita, kabili mulandu nshi?
18 Kuti cawama nga ca kuti tuleiceeceeta pa kuti tulemona ifyo twabikako sana amano. Mulandu nshi? Pa kuti tulebomfya bwino amaka yesu. Moneni ifyo umulumendo uo twalaita ukuti Mark alandile, atile: “Pa myaka iingi nalemona kwati nalyangwishe imikalile. Nangu ca kuti nalebomba bupainiya, nalepoosa inshita iikalamba ku kupanga indalama pa kuti ndeikala bwino sana. Lelo nshaishibe icalelenga nilaba ne nsansa nge fyo nalefwaya. Lyena naishileiluka ukuti nalepoosa inshita iikalamba na maka ku kucita ifyo nalefwaya, e lyo inshita iinono na maka ayanono e fyo nalebomfya ku kubombela Yehova.” Mark alyalwile ifyo aletontonkanya kabili alyangwishe ne mikalile pa kuti alekwata inshita iikalamba iya kubombela Yehova. Alandile ati: “Inshita shimo ndafwaya ukukwata indalama lelo apo Yehova na Yesu balangafwa, ndabika amano ku kubombela Yehova.”
19. Mulandu nshi tulingile ukwishibila bwino ifya kubomba?
19 Nga tulecita ifintu fitatu, tukatwalilila ukusansamuka ilyo tulesenda ikoli lya kwa Yesu. Ica kubalilapo, tufwile ukwishiba bwino ifya kubomba. Tubomba umulimo wa kwa Yehova, kanshi tulingile ukuubomba ukulingana ne fyo afwaya. Ifwe tuli babomfi, Yehova e mwine wa mulimo. (Luka 17:10) Nga tulebomba ukulingana ne fyo tulefwaya, cikalatukosela ukubomba. Nangu fye ni ng’ombe iya maka kuti yaicena kabili kuti yafunshika nga ca kuti ilefwaya fye ukulaya uko ilefwaya, kabili nga ilepilikita mwi koli ilyo umwine aletungulula. Nomba nga tulekonka ifyo Yehova atweba, kuti twabomba ne milimo iyo twalemona ukuti te kuti tuibombe kabili kuti twapwisha na mafya ayo twalemona ukuti te kuti tuyapwishe. Tuleibukisha ukuti takuli nangu umo uwingacilikila Yehova ukucita ifyo alefwaya!—Rom. 8:31; 1 Yoh. 4:4.
20. Mulandu nshi tulingile ukulasendela ikoli lya kwa Yesu?
Yoh. 6:25-27, 51, 60, 66; Fil. 3:18, 19) Lelo abalebombela Lesa pa mulandu wa kuti balimutemenwe kabili balitemenwe na bantu banabo, balitwalilile ukuba ne nsansa. Tabalekele ukusenda ikoli mpaka bafwa ne subilo lya kuyabombela pamo na Kristu ku muulu. Tufwile ukutwalilila ukusenda ikoli lya kwa Yesu ukwabula ubumbimunda nga filya fine nabo bacitile.
20 Ica bubili, tatulingile ukuba no bumbimunda ilyo tulebomba. Ico tubombela kufwaya abantu balalumbanya Shifwe Yehova uwaba no kutemwa. Abalebombela Yehova mu nshita ya kwa Yesu abali bakaitemwe nelyo abalefwaya ukumwenamo mu mulimo wa kwa Yehova, tapakokwele balilekele ukuba ne nsansa kabili balilekele ukusenda ikoli lya kwa Yesu. (21. Nga fintu Baibolo ilanda pali Mateo 6:31-33, finshi twingenekela Yehova ukutucitila?
21 Ica butatu, tulingile ukutwalilila ukuba ne subilo. Twaliitemenwa ukwangusha imikalile kabili tubomba umulimo uwakosa. Yesu alitwebele libela ukuti bakalatucusha. Lelo kuti twasubila ukuti Yehova akalatupeela amaka pa kuti tuleshipikisha amesho yonse ayo twingakwata. Nga twatwalilila ukushipikisha tukalakoselako. (Yako. 1:2-4) Na kabili kuti twasubila ukuti Yehova akulatupeela ifyo twakulakabila, Yesu akulatucema, kabili bamunyinefwe na bankashi bakulatukoselesha. (Belengeni Mateo 6:31-33; Yoh. 10:14; 1 Tes. 5:11) Ukwabula no kutwishika, twalikwata fyonse ifyo tukabila pa kuti tuleshipikisha amesho.
22. Finshi fikalenga tukabe ne nsansa?
22 Umwanakashi uo Yesu aundepe alisansamwike bulya bwine bushiku amundepe. Lelo ali no kutwalilila fye ukusekelela nga ca kuti alishileba umusambi wa kwa Kristu uwa cishinka. Bushe mulemona ukuti acitile shani? Elenganyeni icilambu ubusuma ico ali no kukwata nga ca kuti alisumine ukusenda ikoli lya kwa Yesu, ali no kukwata icilambu ca kubombela pamo na Yesu ku muulu! Nga kwali ifyo ashile pa kukonka Kristu, ninshi tafyalingene na mapaalo ayo ali no kukwata. Nampo nga twakwata isubilo lya kwikala ku muulu nelyo ilya kwikala pano isonde umuyayaya, tukaba ne nsansa pantu twalisumine ukuya kuli Yesu.
ULWIMBO 13 Tupashanya Kristu
^ para. 5 Yesu alitweba ukuya kuli ena. Finshi tulingile ukucita pa kuti twingaya kuli ena? Muli cino cipande twalaasuka ici cipusho. Na kabili twalasambilila ne fyo Kristu engatusansamusha nga tulebombela pamo nankwe.
^ para. 60 UBULONDOLOSHI BWA CIKOPE: Yesu alecitila abantu ifintu ifyalekanalekana pa kubasansamusha.
^ para. 66 UBULONDOLOSHI BWA CIKOPE: Na munyinefwe na o alesansamusha abantu mu nshila ishalekanalekana.