1-2. (a) Cinshi tufwaila ukuti Armagedone ikese? (b) Mepusho nshi twalaasuka muli cino cipande?

BUSHE mwalitala amumfwapo abantu balelanda ukuti Armagedone ni nkondo ya mabomba nelyo kayofi? Nomba Baibolo isambilisha ukuti Armagedone ikalenga ifintu fikawame, kabili ikalenga tukalesekelela! (Ukus. 1:3) Inkondo ya Armagedone tayakalofye abantu bonse lelo ikalenga bamo bakapusuke! Cinshi twalandila ifi?

² Baibolo isambilisha ukuti inkondo ya Armagedone ikonaula amabuteko ya bantu pa kuti ikapusushe abantunse. Iyi inkondo ikonaula abantu abacita ifyabipa lelo ikalenga abacita ifyalungama bakapusuke. Na kabili ikonaula abonaula isonde pa kuti isonde likonaika. (Ukus. 11:18) Pa kuti tumfwikishe ifi fishinka, natwasuke aya mepusho yane: Bushe Armagedone ni cinshi? Finshi fikabalilapo ukucitika ilyo Armagedone ishilatendeka? Finshi tufwile ukucita pa kuti tukapusuke inkondo ya Armagedone? Finshi tufwile ukulacita pa kuti tutwalilile ukuba aba cishinka ilyo Armagedone ilepalama?

3. (a) Bushe ishiwi lya kuti “Armagedone” lyalola mwi? (b) Ukulingana ne fyaba pa Ukusokolola 16:14, 16, cinshi twingalandila ukuti Armagedone te cifulo ca cine cine?

³ Belengeni Ukusokolola 16:14, 16. Ishiwi lya kuti Armagedone balilumbula fye umuku umo mu Baibolo. Ili shiwi lyafuma kwi shiwi lya ciHebere ilipilibula ukuti “Ulupili lwa Megido.” (Ukus. 16:16) Megido wali musumba mu Israele. (Yosh. 17:11) Lelo pano isonde tapaba icifulo ico beta ukuti Armagedone. Armagedone fintu fikacitika ilyo “ishamfumu sha ba pano isonde  shonse” bakashilonganika pa kuti shilwe na Yehova. (Uks 16:14) Lelo muli cino cipande ishiwi lya kuti “Armagedone” tulelibomfya na pa kulanda pa nkondo iikabako ilyo ishamfumu sha pano isonde bakashilonganika. Twaishiba shani ukuti Armagedone cifulo ca mampalanya fye? Ica kubalilapo, takwaba ulupili pano calo ulo beta ukuti Megido. Ica bubili, icifulo ca Megido cinono sana ica kutila te kuti cikumane “ishamfumu sha ba pano isonde shonse” na bashilika bashiko ne fyanso. Ica butatu, nga fintu twalasambilila muli cino cipande, inkondo ya Armagedone ikatendeka ilyo “ishamfumu” sha pano isonde shikasansa abantu ba kwa Lesa, abaikala mu ncende ishalekanalekana pano isonde.

4. Mulandu nshi Yehova ayampanishisha inkondo iikalamba iya kulekeleshako na Megido?

⁴ Mulandu nshi Yehova ayampanishisha inkondo iikalamba iya kulekeleshako na Megido? Ni co Megido no Mupokapoka wa Yesreele uwali mupepi e mo abantu balelwila sana inkondo. Inshita shimo, Yehova aleafwa abantu bakwe pa kuti bacimfye ubulwi. Ku ca kumwenako, Lesa alengele Umupingushi Baraki acimfye abashilika abena Kanaani abo Sisera aletungulula. Abacimfiishe “mu lulamba lwa menshi ya mu Megido.” Baraki na Debora kasesema mwanakashi balitootele Yehova pa fyo alengele bacimfye ubulwi. Bamwimbiile abati: “Ukufuma ku muulu intanda . . . shalwishishe Sisera. Umumana wa Kishone walibasendele.”—Abapi. 5:19-21

5. Bupusano nshi bukaba pa nkondo ya Armagedone ne nkondo iyo Baraki alwile?

⁵ Baraki na Debora basondwelele ulwimbo na mashiwi ya kuti: “E fyo abalwani benu bonse balobe, mwe Yehova, kabili abamutemwa babe nga filya akasuba kabalika mu maka ya kako.” (Abapi. 5:31) Na lintu kukaba inkondo ya Armagedone, abalwani ba kwa Lesa bakaloba, lelo abatemwa Lesa bakapusuka. Nomba paliba ubupusano pali ishi inkondo shibili. Ilyo kukaba inkondo ya Armagedone, abantu ba kwa Lesa tabakalweko, kabili tabakakwate ne fyanso! “Amaka [yabo] yakaba mu mutende na mu kutetekela” Yehova na bashilika bakwe aba ku muulu.—Esa. 30:15; Ukus. 19:11-15.

6. Finshi Yehova nalimo akacita pa kuti akacimfye abalwani bakwe mu nkondo ya Armagedone?

⁶ Finshi Lesa akacita pa kuti akacimfye abalwani bakwe mu nkondo ya Armagedone? Kuti acita ifyalekanalekana. Ku ca kumwenako, kuti abacimfisha ku finkukuma, ku mfula ya mabwe, na ku nkuba. (Yobo 38:22, 23; Esek. 38:19-22) Na kabili kuti alenga abalwani balaipayana abene beka. (2 Imila. 20:17, 22, 23) Kabili kuti atuma bamalaika bakwe ku kwipaya abacita ifyabipa. (Esa. 37:36) Nampo nga akacita ifi twalandapo nelyo akacita ifintu fimbi, ukucimfya kwena akacimfya. Abalwani bakwe bonse bakaloba. Lelo abalungama bakapusuka.—Amapi. 3:25, 26.

7-8. (a) Ukulingana ne fyaba pe lembo lya 1 Abena Tesalonika 5:1-6, finshi intungulushi shikacita? (b) Mulandu nshi ifi shikacita fikabela bufi ubwabipisha?

⁷ Abantu bakabalilapo ukusosa abati “umutende no mutelelwe” e lyo pakakonke “ubushiku bwa kwa Yehova.” (Belengeni 1 Abena Tesalonika 5:1-6.) “Ubushiku bwa kwa Yehova” ubo balandapo pali 1 Abena Tesalonika 5:2, “bucushi bukalamba.” (Ukus. 7:14) Bushe tukeshiba shani ukuti ubucushi bukalamba buli mu kutendeka? Baibolo itweba ukuti bakabilisha icintu ico bashibilishabilisha. Nga babilisha cikaba cishibilo ca kuti ubucushi bukalamba bwalatendeka.

⁸ Uku kukaba e kubilisha kwa “umutende no mutelelwe” uko Baibolo yasobele. Mulandu nshi intungulushi shikabilishisha ukuti kuli “umutende no mutelelwe”? Bushe ne  ntungulushi sha mapepo nasho shikabilishako? E fyo cimoneka. Lelo twalishiba ukuti intungulushi nga shabilisha ukutila kuli “umutende no mutelelwe,” bukaba bufi ubukafuma ku fibanda. Ubu ubufi bukabipisha pantu bukalenga abantu bakamone ukuti kwalaba umutende e lyo ninshi ubucushi ubushatala abubako buli mu kutendeka. “Ubonaushi bwa kupumikisha bukabemina filya ukucula kwa pa kupaapa kwisa pa mwanakashi uuli ne fumo.” Inga ababomfi ba kwa Yehova aba cishinka, bena cikaba shani? Nalimo bakapapa pantu ubushiku bwa kwa Yehova bukangufyanya ukutendeka, lelo tabwakabapumikishe.

9. Bushe Yehova akonaula icalo ca kwa Satana pa muku umo? Londololeni.

⁹ Yehova takonaule icalo ca kwa Satana pa muku umo nga filya acitile mu nshita ya kwa Noa. Lelo akabalilapo ukonaula ulubali lumo e lyo pa numa akonaule ulubali lumbi. Akabalilapo ukonaula Babiloni Mukalamba, e kutila imipepele ya bufi yonse. Lyena mu nkondo ya Armagedone akonaula ulubali lumbi ulwa calo ca kwa Satana, pamo nga utubungwe twa fikansa fya calo, abashilika ne fyanso fya nkondo, e lyo na makwebo ayakalamba. Natulande sana pali ifi twalandapo.

10. Ukulingana ne fyaba pa Ukusokolola 17:1, 6 na pa Ukusokolola 18:24, cinshi Yehova akonawila Babiloni Mukalamba?

¹⁰ “Cilende mukalamba uwaikala pa menshi ayengi akapingulwa.” (Belengeni Ukusokolola 17:1, 6; 18:24.) Babiloni Mukalamba aliseebanya sana ishina lya kwa Lesa. Ababamo basambilisha abantu ifya bufi pali Lesa. Nga filya fine cilenda ashaba ne cishinka ku mwina mwakwe, ne mipepele ya bufi nayo tayaba ne cishinka kuli Yehova pantu ilatungilila amabuteko ya bantunse. Imipepele ya bufi ilacusha ababamo kabili ilabaliila indalama. Kabili yalipaya abantu abengi, kumo fye na babomfi ba kwa Lesa. (Ukus. 19:2) Bushe Yehova akonaula shani Babiloni Mukalamba?

11. Bushe “iciswango icakashika ce” ni cinshi, kabili Lesa akacibomfya shani pa kupingula Babiloni Mukalamba?

¹¹ Yehova akabomfya “insengo ikumi” isha  “ciswango icakashika ce” pa konaula “cilende mukalamba.” Ici ciswango ica mampalanya cimininako akabungwe ka United Nations. Insengo ikumi shimininako amabuteko ayatungilila aka kabungwe. Pa inshita iyo Lesa umwine apekanya, aya mabuteko yakasansa Babiloni Mukalamba. Yakamupokolola fyonse no kumusha ubwamba, pa kuti bonse bakamone ifyabipa ifyo acita. (Ukus. 17:3, 16) Abatungilila Babiloni Mukalamba bakapapa sana pantu Yehova akamonaula mu kwangufyanya kwati ni mu bushiku fye bumo. Na kuba Babiloni Mukalamba alayumfwa, atila: “Ine ndi namfumu, nshili mukamfwilwa, no kuloosha nshakalooshe nakalya.”—Ukus. 18:7, 8.

12. Cinshi Yehova ashakaleke amabuteko yakacite, kabili mulandu nshi?

¹² Yehova takaleke amabuteko yakalofye abantu bakwe. Abantu bakwe betilwa kwi shina lyakwe, kabili balikonka ifunde ilyo abeba ukuti bafume muli Babiloni Mukalamba. (Imil. 15:16, 17; Ukus. 18:4) Na kabili balabombesha pa kuti bafwe abantu nabo bafume muli Babiloni Mukalamba. Kanshi “ifinkunka fyakwe” tafyakese pa babomfi ba kwa Yehova. Na lyo line bakafwaikwa ukuba ne citetekelo icakosa pa kuti bakashipikishe amesho.

13. (a) Bushe Goge nani? (b) Ukulingana na Esekiele 38:2, 8, 9, cinshi cikalenga Goge akasanse abantu ba kwa Lesa?

¹³ Goge akasansa abantu ba kwa Lesa. (Belengeni Esekiele 38:2, 8, 9.) Ilyo Yehova akonaula imipepele yonse iya bufi, pano isonde pakashala fye imipepele imo. Bantu fye ba kwa Yehova e bakashala balepepa Lesa. Ici cikalenga Satana akakalipe nge nyense. Pa kulanga ubukali bakwe, akalenga ifibanda fikalande “ifyebo fyakowela” pa kuti inko shonse shikemine abantu ba kwa Yehova. (Ukus. 16:13, 14) Ishi nko shonse e “Goge wa mu calo ca Magoge.” Ilyo inko shikasansa abantu ba kwa Lesa, e lyo inkondo ya Armagedone ikatendeka.—Ukus. 16:16.

14. Finshi Goge akeluka?

¹⁴ Goge akacetekela sana “ukuboko kwa buntunse” e kutila abashilika bakwe ne fyanso.  (2 Imila. 32:8) Ifwe tukacetekela sana Yehova Lesa wesu. Lelo inko shikamona ukuti ukucetekela Yehova buwelewele. Pantu na kuba, balesa ba kwa Babiloni Mukalamba tabamupuswishe ku “ciswango” na ku “nsengo ikumi” isha ici ciswango! (Ukus. 17:16) E ico Goge akamona kwati alatulofya ukwabula no kupoosa inshita. Pa kusansa abantu ba kwa Yehova akaba “nge kumbi ilyakupa icalo.” (Esek. 38:16) Lelo tapakakokole Goge akeshiba ukuti nanyanta pali namunsanki. Nga filya fine cali kuli Farao pali Bemba wa Kashika, Goge na o akeluka ukuti alelwisha Yehova.—Ukufu. 14:1-4; Esek. 38:3, 4, 18, 21-23.

15. Finshi Kristu akacita pa kuti akacimfye abalwani bakwe mu nkondo ya Armagedone?

¹⁵ Kristu na bashilika bakwe aba ku muulu bakacingilila abantu ba kwa Lesa kabili bakalofya inko na bashilika bashiko. (Ukus. 19:11, 14, 15) Nomba cinshi cikacitikila Satana umulwani mukalamba uwa kwa Yehova uukabepa inko pa kuti shikemine abantu ba kwa Lesa, kukabe ne nkondo ya Armagedone? Yesu akapoosa Satana ne fibanda fyakwe mu cilindi icabula impela, kabili akabesalila pa myaka 1,000.—Ukus. 20:1-3.

16. (a) Kuti twalanga shani ukuti twalishiba Lesa? (b) Nga twaishiba Yehova, finshi akatucitila mu nkondo ya Armagedone?

¹⁶ Nampo nga kale twasambilila icine nelyo iyo, pa kuti tukapusuke inkondo ya Armagedone tulingile ukulalanga ukuti twalishiba Lesa no kuti tulanakila “imbila nsuma iya kwa Shikulwifwe Yesu.” (2 Tes. 1:7-9) Nga twalishiba ifyo Lesa atemwa, ifyo apata, e lyo na mafunde yakwe ni nshi twalimwishiba. Na kabili tulanga ukuti twalishiba Lesa nga twalimutemwa, nga tulamumfwila kabili nga e o tupepa fye. (1 Yoh. 2:3-5; 5:3) Nga tulelanga ukuti twalishiba Lesa, na o akatwishiba. (1 Kor. 8:3) Ici cikalenga akatupusushe mu nkondo ya Armagedone.

17. Bushe calola mwi ukunakila “imbila nsuma iya kwa Shikulwifwe Yesu”?

¹⁷ “Imbila nsuma iya kwa Shikulwifwe Yesu,” cine conse icaba mu Cebo ca kwa Lesa ico Yesu asambilishe. Tulanakila imbila nsuma nga tulekonka  ifyo ilanda. Na kabili nga ca kuti intanshi tulefwaya Ubufumu no bulungami bwa kwa Lesa, kabili tulebila pa Bufumu bwakwe ninshi tulenakila imbila nsuma. (Mat. 6:33; 24:14) Tulanakila imbila nsuma na lintu tuletungilila bamunyina ba kwa Kristu abasubwa ilyo balebomba umulimo wabo uukalamba.—Mat. 25:31-40.

18. Bushe bamunyina ba kwa Kristu abasubwa bakalambula shani ababatungilila?

¹⁸ Ababomfi ba kwa Lesa abasubwa bali no kulambula aba mu “mpaanga shimbi” pa fyo babafwilisha. (Yoh. 10:16) Bali no kubalambula shani? Ilyo inkondo ya Armagedone ishilatendeka, ba 144,000 bonse ninshi baliya ku muulu kabili balibapeela no mweo uushingafwa. Lyena bakaba pa bashilika ba ku muulu abakonaula Goge kabili abakacingilila “ibumba ilikalamba” ilya bantu ba kwa Yehova. (Ukus. 2:26, 27; 7:9, 10) Ala aba mwi bumba likalamba bakatemwa nga nshi pa fyo baletungilila abasubwa aba kwa Yehova ilyo bali pano isonde!

19-20. Apo inkondo ya Armagedone ilepalama, finshi tufwile ukulacita pa kuti twingatwalilila ukuba aba cishinka nangu tube na mafya?

¹⁹ Muli shino nshiku sha kulekelesha ishayafya, abantu ba kwa Yehova abengi balekwata amafya. Nangu cileba ifi, kuti tulesekelela ilyo tuleshipikisha. (Yako. 1:2-4) Icikalamba ico tufwile ukulacita pa kuti tulesekelela, kuba no mukosha wa kupepa. (Luka 21:36) Na kabili tulingile ukulaisambilisha Icebo ca kwa Lesa cila bushiku no kulatontonkanyapo sana. Tulingile no kulaisambilisha pa masesemo ayalanda pa nshiku tuleikalamo no kulatontonkanyapo sana. (Amalu. 77:12) Nga tulecita ifi, kabili tulebila sana imbila nsuma, icitetekelo cesu cikaba icakosa kabili tukatwalilila ukuba ne subilo.

²⁰ Elenganyeni ifyo mukatemwa nga nshi Yehova nga onaula Babiloni Mukalamba na lintu inkondo ya Armagedone ikapwa! Na kabili elenganyeni ifyo mukatemwa sana ilyo ishina lya kwa Lesa likacindikwa e lyo na lintu cikeshibikwa bwino ukuti e walinga ukuteka ku muulu na pano isonde! (Esek. 38:23) Cine cine abaishiba Lesa, abomfwila Umwana wakwe, kabili abatwalilila ukushipikisha, balafwaisha ukuti Armagedone ikese.—Mat. 24:13.