1-2. Finshi filenga fwe babomfi ba kwa Lesa tuleba ne nsansa? (Yakobo 1:​22-25)

 YEHOVA no Mwana wakwe bafwaya tuleba ne nsansa. Uwalembele Amalumbo 119:2 alembele ati: “Ba nsansa abakonka ifyo atwibukishako, abamufwaya no mutima wabo onse.” Yesu na o atile: “Aba nsansa bantu abomfwa icebo ca kwa Lesa no kukonka ifyo cilanda!”—Luka 11:28.

² Fwe babomfi ba kwa Yehova twaliba ne nsansa. Cinshi calenga tube ne nsansa? Kwaliba ifingi ifyalenga tuleba ne nsansa. Cimo icalenga sana nico tulabelenga Icebo ca kwa Lesa cila bushiku, kabili tulesha na maka yesu yonse pa kuti tulekonka ifyo tubelenga.—Belengeni Yakobo 1:​22-25.

3. Bushe tunonkelamo shani nga tulecita ifyo tubelenga mu Cebo ca kwa Lesa?

³ Tulanonkelamo sana nga ca kuti ‘tulecita ifyo Icebo ca kwa Lesa cilanda.’ Twalishiba ukuti nga tulecita ifyo Icebo ca kwa Lesa cilanda tulalenga Yehova alesekelela. Nga tulelenga Yehova alesekelela, tulaba ne nsansa. (Luk. Mil. 12:13) Nga tulecita ifyo Icebo ca kwa Lesa cilanda, bonse mu lupwa tulaba ne nsansa kabili bucibusa bwesu na ba bwananyina bulakosa. Ifi cifwile e fyo caba na kuli imwe. Na kabili tatukwata amafya ayengi ayo abantu abashikonka amafunde ya kwa Yehova bakwata. Cine cine, ciba fye nga filya fine Imfumu Davidi yalandile. Pa numa ya kulanda pa mafunde, pa fya kukonka no bupingushi bwa kwa Yehova mu lwimbo ulo Imfumu Davidi yaimbile, yatile: “Uufikonka alalambulwa nga nshi.”—Amalu. 19:​7-11.

4. Mulandu nshi limo cikosela ukulacita ifyo Icebo ca kwa Lesa cilanda?

⁴ Kwena ukulanda fye icishinka, limo cilakosa ukucita ifyo Icebo ca kwa Lesa cilanda. Nangu ca kuti twalikwata ifya kucita ifingi, tulingile ukulakwatako inshita ya kulabelenga Baibo ne  nshita ya kulaisambilisha Baibo pa kuti tuleishiba ifyo Yehova afwaya tulecita. E ico natulande pali fimo ifyo twingalacita pa kuti tulebelenga Icebo ca kwa Lesa lyonse. Twalasambilila na pa fyo twingalacita pa kuti tuletontonkanya sana pa fyo tulebelenga na pa fyo twingalacita pa kuti tulecita ifyo tusambilila mu Cebo ca kwa Lesa.

TULEKWATAKO INSHITA YA KUBELENGA ICEBO CA KWA LESA

5. Milimo nshi iyo tupoosapo sana inshita?

⁵ Abantu ba kwa Yehova abengi balikwata ifya kucita ifingi. Inshita iikalamba tupoosa mu kucita ifintu ifyo Baibo itila fyalicindama. Ku ca kumwenako, fwe bengi tulabomba pa kuti tuleisakamana, tulesakamana ne ndupwa shesu. (1 Tim. 5:8) Abena Kristu abengi balasakamana balupwa lwabo abalwala nelyo abakote. Na kabili bonse tulingile ukulaisakamana, e lyo pa kuisakamana, tulapoosapo inshita. Ukulunda pali ifi twalandapo, twalikwata imilimo na imbi mu cilonganino. Umulimo umo uwacindama, kuba abacincila mu kubila imbila nsuma ya Bufumu. Nomba nangu ca kuti mwalikwata imilimo yonse iyi twalandapo, kuti mwacita shani pa kuti mulebelenga Baibo lyonse, muletontonkanya pa fyo ilanda kabili mulecita ifyo ilanda?

6. Kuti mwacita shani pa kuti mulebelenga Baibo lyonse? (Moneni ne cikope.)

⁶ Kuli fwe Bena Kristu, ukubelenga Baibo kwaba pa fintu “ifyacilapo ukucindama.” E ico tufwile fye ukulaibelenga. (Fil. 1:10) Baibo ilanda pa muntu uwa nsansa aiti: “Alitemwa sana amafunde ya kwa Yehova, kabili alabelenga amafunde yakwe mwi shiwi ilinono akasuba no bushiku.” (Amalu. 1:​1, 2) Aya amashiwi yalangilila fye apabuuta tuutu ukuti tufwile ukulakwatako inshita ya kubelenga Baibo. Bushe ni nshita nshi ingalinga sana ukubelenga Baibo? Umuntu umwine e ulingile ukumona inshita iingalinga sana ukubelenga Baibo. Lelo kwena icacindama kusala inshita iyo cingatwangukila ukulabelenga Baibo lyonse. Munyinefwe uwe shina lya kuti Victor atile: “Ine natemwa ukubelenga Baibo ulucelo. Nangu ca kuti cilankosela ukubuuka  lucelocelo, iyi nshita takuba ifingi ifya kupumfyanya. Cilanyangukila ukubika amano ku fyo ndebelenga pantu ninshi bongobongo tailanaka.” Bushe ifi e fyo caba na kuli imwe? Yipusheni amuti, ‘Ni nshita nshi iisuma sana iyo ningalabelengelapo Baibo?’

MULETONTONKANYA SANA PA FYO MULEBELENGA

7-8. Finshi fingalenga twafilwa ukunonkelamo sana mu fyo tulebelenga? Langilileni.

⁷ Nomba ilingi line ificitika fya kutila, kuti twabelenga ifyebo ifingi ukwabula ukuti tumfwe ne fyo twabelenga. Bushe mwalitala amubelengapo fimo, lelo pa numa fye ya nshita iinono mwafilwa ukufibukisha? Ifi bonse fyalitucitikilapo. Ku ca bulanda, ifya musango uyu kuti fyacitika na lintu tulebelenga Baibo. Nalimo kuti twapanga ukulabelenga ifipandwa fya Baibo fimo cila bushiku. Caliba fye bwino ukupanga ukucita ifi. Tufwile ukupanga ifya kucita kabili nga twapanga, tulingile ukwesha na maka yesu yonse ukucita ifyo fine twapanga. (1 Kor. 9:26) Lelo ukulabelenga Baibo ni ntendekelo fye kabili ni ntendekelo iisuma. Kwaliba na fimbi ifyo tufwile ukulacita pa kuti tulenonkelamo sana mu kubelenga Icebo ca kwa Lesa.

⁸ Tontonkanyeni pali ici: Pa kuti ifimenwa fikule bwino, filakabila amenshi, maka maka amenshi ya mfula. Nomba nga ca kuti imfula yalokesha mu kashita akanono, umushili ulakwata sana amenshi. Amenshi nga yafulisha, ifimenwa tafikula bwino. Imfula ifwaikwa ileloka panono panono pa kuti amenshi yengile bwino mu mushili. Lyena ifimenwa kuti fyakula bwino. Na ifwe bene tatufwile ukulabelenga Baibo lubilo lubilo ica kuti twafilwa no kumfwa ifyo twabelenga, twalafilwa ukufibukisha no kulafikonka.—Yako. 1:24.

9. Kuti twacita shani nga ca kuti ilingi line tulabelenga Baibo lubilo lubilo?

⁹ Bushe limo mulasanga fye ukuti mulebelenga Baibo lubilo lubilo? Finshi mulingile ukucita? Mufwile ukulabelenga panono panono. Mulingile ukuibikilishako pa kuti muletontonkanya sana pa fyo mulebelenga nelyo pa fyo mwabelenga. Tacifwile ukumukosela ukucita ifi. Kuti mwalundako ne nshita ya kuisambilisha  pa kuti mulekwata ne nshita ya kulatontonkanya sana pa fyo mulebelenga. Nelyo kuti mwasalapo ukubelenga ifikomo ifinono, e lyo mwashalako ne nshita iikalamba iya kutontonkanya pa fyo mwabelenga. Ba Victor abo tulandilepo batile: “Nga ndebelenga Baibo, mbelenga fye pa nshita iinono, nelyo icipandwa fye cimo. Apo mbelenga Baibo ulucelo, akasuba konse ndatontonkanya pa fyo nacibelenga.” Kuti mwasalapo, nampo nga mwalabelenga ifingi nelyo ifinono. Lelo icacindama kulabelenga panono panono pa kuti mulekwata inshita ya kulatontonkanya sana pa fyo mulebelenga.—Amalu. 119:97; Moneni na kabokoshi akaleti “ Amepusho Mwingalatontonkanyapo.”

10. Langilileni ifyo mwingacita pa kuti mulecita ifyo muleisambilisha. (1 Abena Tesalonika 5:​17, 18)

¹⁰ Te mulandu ne nshita mubelenga Baibo, ne nshita mupoosapo ilyo mulebelenga, icacindama kumona ifyo mwingalacita ifyo mulebelenga. Ilyo mulebelenga iciputulwa cimo ica Cebo ca kwa Lesa, muleyipusha amuti, ‘Kuti nabomfya shani ifi fyebo pali ino nshita nelyo kuti nafibomfya shani ku ntanshi?’ Tutile mulebelenga 1 Abena Tesalonika 5:​17, 18. (Belengeni.) Pa numa ya kubelenga ifi fikomo kuti mwaimininako e lyo mwalatontonkanya pa miku mupepa na pa fyo amapepo yenu yaba. Na kabili kuti mwatontonkanyako na pa fintu ifyo mutashishapo Yehova. Nalimo kuti mwafwaya ukutasha Yehova pa fintu fitatu. Nangu mwakwata fye inshita iinono iya kutontonkanya sana pa fyo mwasambilila mu Baibo, mukomfwikisha ifyaba mu Cebo ca kwa Lesa kabili mukalacita ifyo cilanda. Tontonkanyeni pa fyo mwinganonkelamo nga ca kuti mulecita ifi fine ilyo mulebelenga ifiputulwa fimbi ifya mu Baibo! Cine cine, nga mulecita ifi, ninshi mulecita ifyo Icebo ca kwa Lesa cilanda. Nomba finshi mulingile ukucita nga mwasanga ukuti mufwile ukwaluka mu fintu ifingi?

MULEPANGA UKUCITA IFYO MWINGAKUMANISHA UKUCITA

11. Mulandu nshi inshita shimo mwingomfwila ukuti ifyo mulingile ukwalukamo fingi? Langilileni.

¹¹ Ilyo mulebelenga Baibo, inshita shimo kuti mwafuupuka nga mwasanga ukuti kuli ifintu ifingi ifyo mufwile ukwalukamo. Tontonkanyeni pali ici: Tutile lelo mwabelenga ifikomo ifilanda pa kukanaba na kapaatulula. (Yako. 2:​1-8) Nomba mwasanga ukuti mwalikwata akapaatulula kabili mwasalapo ukwaluka. Ala ninshi mwacita bwino sana! Lyena ubushiku bukonkelepo mwabelenga ifikomo ifilanda pa co cacindamina ukuba ne milandile iisuma. (Yako. 3:​1-12) Mwailuka ukuti inshita shimo tamulanda bwino. E ico mulefwaya ukutampa ukulalanda ifisuma kabili ifingakoselesha abantu.  Ilyo mulebelenga Baibo ubushiku bukonkelepo, mwabelenga ifikomo ifitusoka pa bubi bwaba mu kuba ifibusa ne calo. (Yako. 4:​4-12) Mwasanga ukuti mulingile ukulasala bwino ifya kuleseshamo icitendwe. Pa bushiku bwalenga 4, nalimo kuti mwamona ukuti ifyo mufwile ukwalukamo fyafulisha.

12. Cinshi mushilingile ukufuupukila nga ca kuti ilyo mulebelenga Baibo mwasanga ukuti mufwile ukwaluka mu fintu ifingi? (Moneni na futunoti.)

¹² Nga mwamona ukuti mulingile ukwaluka mu fintu ifingi, tamulingile ukufuupuka. Na kuba, ici cilangilila fye ukuti mwalikwata umutima uusuma kabili mwali-icefya. Umuntu uwaicefya kabili uwa cishinka, ilyo alebelenga Baibo afwaya ukumona ifyo engalukamo. a Muleibukisha no kuti tatufwala “ubuntu bupya” mu bushiku fye bumo. (Kol. 3:10) Finshi mwingacita pa kuti mutwalilile ukucita ifyo Icebo ca kwa Lesa cilanda?

13. Kuti mwacita shani pa kuti mulecita ifyo mulebelenga? (Moneni ne cikope.)

¹³ Mu cifulo ca kulafwaya ukucita ifintu fyonse ifyo mulebelenga mu Baibo pa muku umo, kuti cawama mwasalapo ukucita cimo nangu fibili. (Amapi. 11:2) Kuti mwaeshako ukucita ifi: Lembeni fyonse ifyo mulemona ukuti e fyo mufwile ukwalukamo. Lyena salenipo cimo nangu fibili ifyo mwingabombelapo, e lyo ifi fimbi ifyashala mukafibombelepo ku ntanshi. Nomba finshi mwingatampilapo ukubombelapo?

14. Finshi mwingatampilapo ukucita pa fyo mwapanga?

¹⁴ Nalimo kuti mwasalapo ukutendekela pa fyo mulemona ukutila kuti fyamwangukila ukufibombelapo bwangu. Nelyo nalimo kuti mwasalapo ukutendekela pa fyo mulemona ukuti e fyo mulingile ukwalukamo sana. Nga  mwasalapo ico mulefwaya ukwalukamo, kuti mwafwailapo ifyebo mu mpapulo shesu pamo nga, mu Icisontelelo ca Mpapulo sha Watch Tower nelyo Icitabo ca Kwafwa Inte sha kwa Yehova Ukusanga Ifyebo. Mulepepela pa co mulefwaya ukwalukamo. Mulelomba Yehova pa kuti alemwafwa ‘mulefwaya ukucita ifyo afwaya kabili alemupeela na maka ya kuficita.’ (Fil. 2:13) Lyena mulecita ifyo musambilile. Nga mwa-aluka muli cimo ico mwasalilepo, mukalafwaisha ukwaluka na muli fimbi. Na kuba, nga mwamona ukuti namukumanisha ukwaluka muli fimo nelyo ukukwata imibele iyo Umwina Kristu alingile ukukwata, mukalafwaisha ukutwalilila ukwaluka. Kabili nalimo cikamwangukila ukwaluka na muli fimbi.

LEKENI ICEBO CA KWA LESA “CILEBOMBELA NA MULI IMWE”

15. Bushe ababomfi ba kwa Yehova bapusana shani na bantu abatila balabelenga Baibo? (1 Abena Tesalonika 2:13)

¹⁵ Abantu bamo batila balibelenga Baibo pa miku iingi. Nomba bushe balisumina ifyo Baibo isambilisha? Bushe balakonka ifyo ilanda, kabili bushe balaleka Baibo yabaalula? Ku ca bulanda, tabakonka ifyo Baibo ilanda kabili tabaleka yabaalula. Lelo abantu ba kwa Yehova bena te fyo baba! Ifwe twalicetekela ukuti Baibo “ca cine Cebo ca kwa Lesa,” nga filya fine na Bena Kristu ba mu nshita ya batumwa bacetekele. Na kabili tulesha na maka yesu yonse pa kuti tulecita ifyo Baibo ilanda.—Belengeni 1 Abena Tesalonika 2:13.

16. Finshi tulingile ukulacita pa kuti tulecita ifyo Icebo ca kwa Lesa cilanda?

¹⁶ Kwena limo cilakosa ukubelenga Icebo ca kwa Lesa no kukonka ifyo cilanda. Kuti catukosela ukukwata inshita ya kubelenga Icebo ca kwa Lesa. Nelyo kuti twasanga ukuti tulebelenga lubilo lubilo ica kuti twafilwa no kumfwikisha ifyo tulebelenga. Nangu kuti twafuupuka nga twasanga ukuti tulingile ukwaluka mu fintu ifingi. Nampo nga mwalikwata ubwafya bumo pali aya twalandapo, Yehova nga amwafwa kuti mwakumanisha ukubucimfya. Natuleleka Yehova aletwafwa pa kuti twilaumfwa fye Icebo ca kwa Lesa no kulabako, lelo tulecita ifyo cilanda. Ukwabula no kutwishika, nga ca kuti tulebelenga Icebo ca kwa Lesa kabili tulecita ne fyo cilanda, tukalaba ne nsansa icine cine.—Yako. 1:25.